Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Nobiembre 2014

Ngaa Kinahanglan Naton Mangin Balaan?

Ngaa Kinahanglan Naton Mangin Balaan?

“Magpakabalaan kamo.”LEV. 11:45.

1. Paano makabulig sa aton ang libro sang Levitico?

SA LIBRO sang Levitico, mas madamo nga beses nga ginsambit ang pagkabalaan sangsa iban nga libro sa Biblia. Bangod ginapatuman ini nga kinaiya sa tanan nga matuod nga sumilimba ni Jehova, ang pag-apresyar kag paghangop sa Levitico makabulig sa aton nga mapamatud-an nga balaan kita.

2. Ano ang talalupangdon sa libro sang Levitico?

2 Ang libro sang Levitico, nga ginsulat ni Moises, bahin sang “bug-os nga Kasulatan” nga mapuslanon sa pagtudlo. (2 Tim. 3:16) Sa orihinal nga lenguahe sang Biblia, ang ngalan ni Jehova makita sing aberids nga napulo ka beses sa tagsa ka kapitulo sini nga libro. Ang paghangop sa Levitico magapalig-on sa aton nga likawan ang bisan ano nga makapasipala sa balaan nga ngalan sang Dios. (Lev. 22:32) Ang pirme nga paggamit sini nga libro sang mga tinaga nga “Ako si Jehova” sa orihinal nga Hebreo, dapat magpahanumdom sa aton nga tumanon ang Dios. Sa sini nga artikulo kag sa masunod, hibaluon naton ang bilidhon nga mga punto sa libro sang Levitico, isa ka regalo sang Dios nga nagabulig sa aton nga maghimo sing balaan nga pagsimba.

GINPATUMAN ANG PAGKABALAAN

3, 4. Ano ang ginarepresentar sang pagpaligo ni Aaron kag sang iya mga anak? (Tan-awa ang piktyur sa umpisa sini nga artikulo.)

3 Basaha ang Levitico 8:5, 6. Ginpili ni Jehova si Aaron para mag-alagad  subong mataas nga saserdote sang Israel, kag ang iya mga anak nga lalaki subong mga saserdote sang pungsod. Si Aaron nagarepresentar kay Jesucristo kag ang iya mga anak sa hinaplas nga mga sumulunod ni Jesus. Buot bala silingon nga ang pagpaligo ni Aaron nagarepresentar sa pagpaninlo ni Jesus? Indi, kay si Jesus wala sing sala kag “wala sing depekto,” gani indi niya kinahanglan ang pagtinlo. (Heb. 7:26; 9:14) Pero ang natinluan nga kahimtangan ni Aaron nagarepresentar sa matinlo kag matarong nga kahimtangan ni Jesus. Ano naman ang ginarepresentar sang pagpaligo sang mga anak nga lalaki ni Aaron?

4 Ang pagpaligo sang mga anak ni Aaron nagarepresentar sa pagtinlo sa mga ginpili nga mangin miembro sang langitnon nga mga saserdote. Ang bawtismo bala sang mga hinaplas naangot sa pagpaninlo sang mga anak ni Aaron? Wala, ang bawtismo wala nagahugas sang sala kundi nagasimbulo sang bug-os nga pagdedikar sang isa kay Jehova nga Dios. Ang pagtinlo sa mga hinaplas ginahimo “paagi sa pulong,” kag nagakinahanglan ini sang ila bug-os tagipusuon nga pag-aplikar sang mga panudlo sang Cristo. (Efe. 5:25-27) Gani paagi sini, ginpakabalaan sila kag gintinluan. Pero, kamusta naman ang “iban nga mga karnero”?Juan 10:16.

5. Ngaa masiling nga ginatinluan ang iban nga mga karnero paagi sa Pulong sang Dios?

5 Ang mga anak ni Aaron wala nagarepresentar sa “dakung kadam-an” sang iban nga mga karnero ni Jesus. (Bug. 7:9) Gani, ini bala nga bawtismado nga mga indibiduwal ginapakabalaan man kag ginatinluan paagi sa Pulong sang Dios? Huo! Kon mabasa sang mga may dutan-on nga paglaum ang ginasiling sang Biblia parte sa balor kag epekto sang ginpatulo nga dugo ni Jesus, nagatuo sila sa sini kag nagahatag “sang sagrado nga pag-alagad sa iya sa adlaw kag gab-i.” (Bug. 7:13-15) Ang epekto sang padayon nga pagtinlo sa mga hinaplas kag iban nga mga karnero makita sa ila ‘paghupot sing maayo nga paggawi.’ (1 Ped. 2:12) Nahamuot gid si Jehova nga makita nga matinlo kag nahiusa ang mga hinaplas kag ang iban nga mga karnero, nga nagapamati kag mainunungon nga nagasunod sa ila Manugbantay nga si Jesus!

6. Ano nga pag-usisa sa kaugalingon ang makabulig sa aton?

6 Ang ginapatuman nga pisikal nga katinlo sa mga saserdote sang Israel may kahulugan para sa katawhan ni Jehova karon. Ang aton mga ginatun-an sa Biblia masami nga nakatalupangod sa katinlo sang aton mga duog sang pagsimba, subong man sang aton mahipid kag disente nga pamayo. Pero ang katinlo sang mga saserdote nagabulig sa aton nga marealisar nga ang bisan sin-o nga nagataklad sa mataas nga bukid sang pagsimba kay Jehova dapat may “tagiposoon nga putli.” (Basaha ang Salmo 24:3, 4; Isa. 2:2, 3) Dapat naton ihatag ang aton sagrado nga pag-alagad sa Dios upod ang matinlo nga hunahuna kag tagipusuon subong man ang matinlo nga lawas. Gani kinahanglan ang pirme nga pag-usisa sa kaugalingon, kay mahimo ang iban nagakinahanglan sing daku nga mga pagbag-o agod mangin balaan. (2 Cor. 13:5) Halimbawa, mahimo pamangkuton sang isa ka bawtismado nga hungod nga nagatan-aw sing pornograpiya ang iya kaugalingon, ‘Ginapamatud-an ko bala ang akon kaugalingon nga balaan?’ Dayon, kinahanglan niya mangayo sing bulig agod mauntat inang malain nga buhat.Sant. 5:14.

PAMATUD-I ANG INYO PAGKABALAAN PAAGI SA PAGKAMATINUMANON

7. May kaangtanan sa Levitico 8:22-24, ano nga halimbawa ang ginpahamtang ni Jesus?

7 Sang ginsugdan ang pagkasaserdote sa Israel, ang dugo sang lalaki nga karnero ginpalhit sa tuo nga dulunggan, kumalagko sang kamot, kag kumalagko sang tiil sang mataas nga saserdote nga si Aaron kag sang iya mga anak. (Basaha ang Levitico 8:22-24.) Ini nga paggamit sing dugo nagapakita nga dapat matinumanon nga himuon sang mga saserdote ang ila mga obligasyon. Sing kaanggid,  nagpahamtang sing himpit nga halimbawa ang Mataas nga Saserdote nga si Jesus sa mga hinaplas kag sa iban nga mga karnero. Ang iya dulunggan nagapamati sa giya sang Dios. Ang iya mga kamot gingamit niya sa pagtuman sang kabubut-on ni Jehova, kag ang iya mga tiil wala gid naglisa sa balaan nga dalanon.Juan 4:31-34.

8. Ano ang dapat himuon sang tanan nga sumilimba ni Jehova?

8 Ang hinaplas nga mga Cristiano kag ang iban nga mga karnero ni Jesus dapat mag-ilog sa paghupot sang integridad sang ila Mataas nga Saserdote. Ang tanan nga sumilimba ni Jehova dapat magtuman sa mga panuytoy sang Pulong sang Dios kag likawan nga mapasubo ang iya espiritu. (Efe. 4:30) Dapat nila ‘tadlungon ang mga banas sang ila mga tiil.’Heb. 12:13.

9. Ano ang ginsiling sang tatlo ka utod nga nakatrabaho ang mga miembro sang Nagadumala nga Hubon, kag paano ini makabulig sa imo nga padayon nga mapamatud-an ang imo kaugalingon nga balaan?

9 Binagbinaga ang sinsero nga ginsiling sang tatlo ka utod nga lalaki nga may dutan-on nga paglaum kag dinekada na nga nagtrabaho upod sa mga miembro sang Nagadumala nga Hubon. Ang isa nagkomento: “Pinasahi gid ini nga pribilehiyo sa pag-alagad, kag ang suod nga pagpakig-upod sa ila nagapakita kon kaisa, nga bisan hinaplas sila, ini nga mga utod indi himpit. Pero, ang isa sa akon mga tulumuron sa sulod sang mga tinuig amo ang pagtuman sa mga nagapanguna.” Ang ikaduha nga utod nagsiling: “Ang mga teksto subong sang 2 Corinto 10:5, parte sa ‘pagkamatinumanon kay Cristo,’ nakabulig sa akon nga magmatinumanon kag magkooperar sa mga nagapanguna. Amo ini ang pagtuman nga nagahalin sa tagipusuon.” Ang ikatlo nga utod nagsiling: “Ang paghigugma sa mga ginahigugma ni Jehova kag pagkaugot sa mga ginakaugtan niya, subong man ang padayon nga pagpangayo sang iya giya kag paghimo sang kon ano ang makapahamuot sa iya, nagakahulugan sang pagtuman sa iya organisasyon kag sa mga ginagamit niya sa pagtuman sang iya katuyuan sa duta.” Nahibaluan sini nga utod sang ulihi nga si Nathan Knorr, nga nangin miembro sang Nagadumala nga Hubon, kinabubut-on nga nagbaton sa mga punto sa artikulo nga “Birth of the Nation” sa 1925 nga Watch Tower, bisan pa ginakuwestion ini sang iban. Nagdayaw gid ang utod sa sina nga pagkamatinumanon. Ang pagpamalandong sa mga ginsiling sining tatlo ka utod makabulig sa imo nga mapamatud-an ang imo kaugalingon nga balaan paagi sa pagkamatinumanon.

PAGKAMATINUMANON SA KASUGUAN SANG DIOS PARTE SA DUGO

10. Daw ano ka importante nga tumanon naton ang kasuguan sang Dios parte sa dugo?

10 Basaha ang Levitico 17:10. Ginsugo ni Jehova ang mga Israelinhon nga indi magkaon “sang bisan ano nga bagay sang dugo.” Ang paglikaw sa dugo—iya man sang sapat ukon tawo—ginapatuman man sa mga Cristiano. (Binu. 15:28, 29) Nasakitan gid kita sa paghunahuna nga ang Dios ‘nagapahamtang sang iya nawong batok sa aton’ kag isikway kita sa iya kongregasyon. Ginahigugma naton sia kag luyag naton sia tumanon. Bisan pa mabutang sa katalagman ang aton kabuhi, determinado kita nga indi magpadala sa mga ginapangabay kag ginapatuman sang mga wala makakilala kay Jehova kag sang mga nagabalewala sa pagtuman sa iya. Huo, mapaabot naton nga pakamalauton kita bangod sa paglikaw sa dugo, pero luyag naton mangin matinumanon sa Dios. (Jud. 17, 18) Ano nga pagtamod sa sini nga topiko ang makabulig sa aton nga ‘mag-andam’ nga indi magkaon ukon magpatughong sing dugo?Deut. 12:23.

11. Ngaa makasiling kita nga ang Adlaw sang Katumbasan indi wala sing pulos nga ritwal?

11 Ang paggamit sang mataas nga saserdote sang Israel sang una sing dugo sang sapat sa tuigan nga Adlaw sang Katumbasan makabulig sa aton nga mahangpan ang pagtamod sang Dios sa dugo. Ginapain ang dugo para sa pinasahi  nga katuyuan. Ginagamit ini para tumbasan ang sala sang mga nagapangayo sing kapatawaran kay Jehova. Ang dugo sang toro nga baka kag sang kanding dapat iwisik sa atubangan sang takop sang kaban sang katipan. (Lev. 16:14, 15, 19) Ginpaposible sini ang pagpatawad ni Jehova sa mga sala sang mga Israelinhon. Dugang pa, nagmando si Jehova nga kon patyon sang tawo ang sapat para kaunon, dapat niya iula ang dugo sini kag tabunan sing yab-ok, “kay nahanungud sa kabuhi sang tanan nga unud ang iya dugo iya kabuhi.” (Lev. 17:11-14) Wala bala sing pulos ini nga mga ritwal? Indi. Ang paggamit sing dugo sa Adlaw sang Katumbasan, subong man ang sugo nga iula ang dugo sa duta, nahisanto sa sugo ni Jehova sang una kay Noe kag sa iya mga kaliwat parte sa dugo. (Gen. 9:3-6) Gindumilian ni Jehova nga Dios ang pagkaon sing dugo agod mabuhi. Ano ang kahulugan sini sa mga Cristiano?

12. Paano gin-angot sang sulat ni Pablo sa Hebreo nga mga Cristiano ang dugo kag kapatawaran?

12 Sang ginsulatan ni apostol Pablo ang Hebreo nga mga Cristiano parte sa gahom sa pagtinlo sang dugo, sia nagpaathag: “Halos ang tanan nga butang ginatinluan paagi sa dugo suno sa Kasuguan, kag luwas kon may ginbubo nga dugo wala sing kapatawaran nga mahanabo.” (Heb. 9:22) Ginpadaku man ni Pablo nga ang paghalad sing mga sapat, bisan pa temporaryo lang, nagapahanumdom sa mga Israelinhon nga makasasala sila kag kinahanglan nila ang mas daku nga halad para bug-os nga madula ang ila mga sala. Huo, ang Kasuguan amo ang “landong sang maayong mga butang nga magaabot, apang indi ang katunayan sang mga butang.” (Heb. 10:1-4) Paano nangin posible ang pagpatawad sang mga sala?

13. Ano ang imo ginabatyag bangod ginpresentar ni Jesus ang balor sang iya dugo kay Jehova?

13 Basaha ang Efeso 1:7. Ang mahalaron nga kamatayon ni Jesucristo, nga kinabubut-on nga ‘nagtugyan sang iya kaugalingon para sa aton,’ may daku nga kahulugan para sa tanan nga nagahigugma sa iya kag sa iya Amay. (Gal. 2:20) Pero, ang ginhimo ni Jesus sa tapos sang iya kamatayon kag pagkabanhaw amo ang naghilway sa aton, gani mahimo na kita mapatawad sa aton mga sala. Gintuman ni Jesus ang ginlandong sang Mosaikong  Kasuguan sa Adlaw sang Katumbasan. Sa sina nga adlaw, nagadala ang mataas nga saserdote sing dugo sang ginahalad nga mga sapat sa Labing Balaan sang tabernakulo, kag sang ulihi sa templo ni Solomon, kag ginapresentar ini sa Dios, nga daw ginahimo ini sa iya presensia. (Lev. 16:11-15) Sing kaanggid, nagsulod si Jesus sa langit mismo dala ang balor sang iya tawhanon nga dugo kag ginpresentar ini kay Jehova. (Heb. 9:6, 7, 11-14, 24-28) Nagapasalamat gid kita nga mapatawad ang aton mga sala kag matinluan ang aton mga konsiensia bangod nagatuo kita sa dugo ni Jesus!

14, 15. Ngaa importante nga mahangpan naton kag tumanon ang kasuguan ni Jehova parte sa dugo?

14 Mas nahangpan mo na bala karon kon ngaa ginsugo kita ni Jehova nga indi magkaon sang “bisan ano nga bagay sang dugo”? (Lev. 17:10) Nakita mo na bala karon ang rason kon ngaa sagrado ang dugo para sa Dios? Para sa iya, pareho lang ang balor sang dugo kag sang kabuhi. (Gen. 9:4) Nagaugyon ka bala nga dapat naton batunon ang pagtamod sang Dios sa dugo kag tumanon ang iya sugo nga likawan ini? Ang lamang nga paagi nga makapakighidait kita sa Dios amo ang pagtuo sa halad gawad ni Jesus kag pag-apresyar nga ang dugo may pinasahi nga kahulugan para sa aton Manunuga.Col. 1:19, 20.

15 Ang bisan sin-o sa aton mahimo gulpi lang makaatubang sing isyu parte sa dugo. Ang miembro sang aton pamilya ukon suod nga abyan ayhan hinali man makaatubang sing desisyon kon bala mapatughong sila sing dugo ukon indi. Sa sini nga mga tion, kinahanglan man magdesisyon parte sa paggamit sing magagmay nga bahin sang dugo ukon mga paagi sang pagbulong. Gani, importante gid nga magpanalawsaw kag maghanda sa posible nga emerhensia. Upod ang pangamuyo, makabulig ini agod mangin malig-on ang imo panindugan kag malikawan mo nga magkompromiso. Pat-od nga indi naton gusto nga masubuan si Jehova paagi sa pagbaton sang isa ka butang nga ginapakamalaut sang iya Pulong! Madamo nga doktor kag iban pa nga nagasakdag sa pagtughong sing dugo ang nagapangabay sa mga tawo nga magdonar sing dugo agod maluwas ang kabuhi sang iban. Pero, nahibaluan sang balaan nga katawhan ni Jehova nga ang Manunuga ang may kinamatarong sa pagsiling kon paano dapat tamdon ang dugo. Para sa iya, ang “bisan ano nga bagay sang dugo” sagrado. Dapat determinado kita nga tumanon ang iya kasuguan parte sa dugo. Paagi sa aton balaan nga paggawi, mapamatud-an naton sa iya nga ginaapresyar gid naton ang nagaluwas sing kabuhi nga gahom sang dugo ni Jesus—ang lamang nga dugo nga nagpaposible sa kapatawaran sang sala kag sa kabuhi nga wala sing katapusan.—Juan 3:16.

Determinado ka bala nga tumanon ang kasuguan ni Jehova parte sa dugo? (Tan-awa ang parapo 14 kag 15)

NGAA GINAPAABOT NI JEHOVA NGA MANGIN BALAAN KITA?

16. Ngaa kinahanglan mangin balaan ang katawhan ni Jehova?

16 Sang ginhilway sang Dios ang mga Israelinhon sa pagkaulipon sa Egipto, ginsilingan niya sila: “Ako amo ang GINOO nga nagpataklad sa inyo gikan sa duta sang Egipto, nga mangin-inyo Dios; busa magpakabalaan kamo, kay balaan ako.” (Lev. 11:45) Dapat mangin balaan ang katawhan sang Israel bangod si Jehova balaan. Subong mga Saksi ni Jehova, dapat man kita mangin balaan. Maathag ini nga ginpakita sang libro sang Levitico.

17. Ano ang ginabatyag mo karon parte sa libro sang Levitico sa Biblia?

17 Ang pagbinagbinag naton sang pila ka bahin sang Levitico pat-od nga nakabulig sa aton. Mahimo nga ini nga pagtuon nagdugang man sa imo apresasyon sa sini nga libro sa Biblia. Ang pagpamalandong sa pila ka bilidhon nga mga impormasyon sa Levitico wala sing duhaduha nga nagdugang sa imo paghangop sa mga rason kon ngaa dapat kita mangin balaan. Pero, ano pa ang iban nga bilidhon nga mga impormasyon ang makuha naton sa sini nga bahin sang Pulong sang Dios? Ano pa ang matun-an naton sa sini parte sa aton balaan nga pag-alagad kay Jehova? Binagbinagon naton ini sa masunod nga artikulo.