Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) OKTUBRE 2014

Palig-una ang Imo Pagtuo sa Ginharian

Palig-una ang Imo Pagtuo sa Ginharian

“Ang pagtuo amo ang masaligan nga pagpaabot sa mga butang nga ginalauman.”HEB. 11:1.

1, 2. Ano ang magapalig-on sang aton pagpati nga tumanon sang Ginharian ang katuyuan sang Dios para sa katawhan, kag ngaa? (Tan-awa ang piktyur sa umpisa sini nga artikulo.)

SUBONG mga Saksi ni Jehova, masami kita nagasiling nga ang Ginharian sang Dios amo lamang ang solusyon sa tanan naton nga problema, kag nalipay kita sa pagsugid sa mga tawo sa sining importante nga kamatuoran sa Kasulatan. Nalugpayan man kita sa paglaum nga ginaaman sang Ginharian sa aton. Pero, daw ano kabakod ang aton pagpati nga matuod ang Ginharian kag ang katuyuan sini matuman? Ano ang aton basihan sa pagpalig-on sang aton pagtuo sa Ginharian?Heb. 11:1.

2 Ang Mesianiko nga Ginharian kahimusan nga ginhimo mismo sang Labing Gamhanan agod matuman ang iya katuyuan sa iya mga tinuga. Ang Ginharian gintukod sa isa ka malig-on nga sadsaran—ang bug-os nga kinamatarong ni Jehova sa paggahom. Ang importante nga mga bahin sang Ginharian—ang hari sini, ang iya kaupod nga mga manuggahom, kag ang ila pagagamhan—legal nga ginpahamtang paagi sa mga katipan, ukon legal nga mga kasugtanan ukon mga kahimusan diin ang nagsaad amo ang Dios ukon ang iya Anak, si Jesucristo. Ang pagbinagbinag sa sini nga mga katipan magapahangop pa gid sa aton kon  paano pat-od nga matuman ang katuyuan sang Dios kag magabulig sa aton nga makita kon daw ano kabakod ini nga kahimusan.Basaha ang Efeso 2:12.

3. Ano ang usisaon naton sa sini kag sa masunod nga artikulo?

3 Ginapatuhuyan sang Biblia ang anom ka panguna nga katipan may kaangtanan sa Mesianiko nga Ginharian nga ginadumalahan ni Cristo Jesus. Ini amo ang (1) katipan kay Abraham, (2) Kasuguan nga katipan, (3) katipan kay David, (4) katipan para sa saserdote kaangay ni Melquisedec, (5) bag-o nga katipan, kag (6) katipan para sa Ginharian. Usisaon naton ang tagsa ka katipan may kaangtanan sa Ginharian kag ang pagpanghikot sini para matuman ang katuyuan sang Dios sa duta kag sa katawhan.—Tan-awa ang tsart nga “ Kon Paano Tumanon sang Dios ang Iya Katuyuan.”

SAAD NGA NAGAPAKITA KON PAANO MATUMAN ANG KATUYUAN SANG DIOS

4. Suno sa Genesis, ano ang proklamasyon ukon sugo ni Jehova parte sa mga tawo?

4 Sa tapos mahanda ang aton matahom nga planeta para istaran sang mga tawo, si Jehova may tatlo ka proklamasyon ukon sugo parte sa mga tawo: Ang aton Dios nagtuga sa tawo sa iya dagway, pasangkaron sang mga tawo ang Paraiso sa bilog nga duta kag pun-on ini sang ila matarong nga kaliwat, kag pagdumili sa mga tawo nga magkaon gikan sa kahoy sa pagkilala sang maayo kag malain. (Gen. 1:26, 28; 2:16, 17) Luwas sini, wala na sang iban pa nga sugo. Sa tapos matuga ang lalaki, ang pagsunod sa duha sini amo lang ang kinahanglan para matuman ang katuyuan sang Dios. Gani, ngaa kinahanglan pa ang mga katipan?

5, 6. (a) Paano gintinguhaan ni Satanas nga balabagan ang katuyuan sang Dios? (b) Ano ang ginhimo ni Jehova sa panghangkat ni Satanas sa Eden?

5 Bangod sa malain nga pagtinguha nga balabagan ang katuyuan sang Dios, si Satanas nga Yawa nag-umpisa sang pagrebelde. Ginhimo niya ini paagi sa pagkonsentrar sa sugo diin mahapos sia makaimpluwensia—ang sugo nga nagakinahanglan sang pagkamatinumanon sang tawo. Ginsulay niya ang una nga babayi, si Eva, nga lapason ang pagdumili parte sa kahoy sa pagkilala sang maayo kag malain. (Gen. 3:1-5; Bug. 12:9) Bangod sini, ginhangkat ni Satanas ang kinamatarong sang Dios sa paggahom sa Iya mga tinuga. Sang ulihi, nagpasibangod man sia nga indi maayo ang motibo sang mainunungon nga mga alagad sang Dios.Job 1:9-11; 2:4, 5.

6 Ano ang ginhimo ni Jehova sa panghangkat ni Satanas sa Eden? Ang paglaglag sa mga rebelde pat-od nga makapauntat sang ila pagrebelde. Pero, magapahangop man ini nga indi matuman ang katuyuan sang Dios nga pun-on ang duta sang matinumanon nga mga kaliwat nanday Adan kag Eva. Imbes nga laglagon ang mga rebelde sina mismo nga tion, ang maalam nga Manunuga nagpahayag sing isa ka masaligan nga tagna—ang saad sa Edenpara mapat-od nga matuman ang tanan nga detalye nga iya ginsiling.Basaha ang Genesis 3:15.

7. Ano ang ginapasalig sa aton sang saad sa Eden parte sa man-ug kag sa iya kaliwat?

7 Paagi sa saad sa Eden, ginhukman ni Jehova ang man-ug kag ang iya kaliwat nga nagarepresentar kay Satanas nga Yawa kag sa tanan nga dampig sa iya sa hulusayon parte sa kinamatarong sang Dios sa paggahom. Ginhatagan sang matuod nga Dios sing awtoridad ang kaliwat sang iya langitnon nga babayi sa paglaglag kay Satanas. Gani, ang saad sa Eden wala lang nagpadaku nga madula ang nag-umpisa sang pagrebelde sa hardin sang Eden kag ang tanan nga masakit nga epekto sang iya ginhimo kundi nagasugid man kon paano ini matuman.

8. Ano ang masiling sa identidad sang babayi kag sang iya kaliwat?

 8 Sin-o ang kaliwat sang babayi? Bangod ang kaliwat magadugmok sa ulo sang man-ug, ukon ‘magalaglag’ sa espiritu nga tinuga nga si Satanas nga Yawa, ang kaliwat dapat espiritu man nga persona. (Heb. 2:14) Gani ang magabun-ag sa kaliwat kinahanglan nga isa man ka espirituwal nga babayi. Samtang ang kaliwat sang man-ug nagadamo, ang identidad sang kaliwat kag sang babayi wala pa mahibaluan sa sulod sang mga 4,000 ka tuig sa tapos sang saad ni Jehova sa Eden. Sa sina man nga tion, naghimo si Jehova sang pila ka katipan para makilal-an ang kaliwat kag nagpasalig sa Iya mga alagad nga ang kaliwat amo ang gamiton sang Dios agod dulaon ang halit ni Satanas sa tawhanon nga pamilya.

ANG KATIPAN NAGAPAKILALA SA KALIWAT

9. Ano ang katipan kay Abraham, kag san-o ini nagsugod?

9 Mga duha ka libo ka tuig sa tapos sang pamatbat kay Satanas, ginsugo ni Jehova ang patriarka nga si Abraham nga magbiya sa Ur sa Mesopotamia kag magkadto sa duta sang Canaan. (Binu. 7:2, 3) Si Jehova nagsiling sa iya: “Halin ka sa imo duta kag sa imo kahimataan kag sa balay sang imo amay pakadto sa duta nga akon igapakita sa imo. Kag himoon ko gikan sa imo ang isa ka pungsud nga daku, kag pakamaayohon ko ikaw, kag padakuon ang imo ngalan, kag manginpagpakamaayo ikaw. Pakamaayohon ko ang mga nagapakamaayo sa imo, kag ang nagapakamalaut sa imo pakamalauton ko; kag sa imo pakamaayohon ang tanan nga mga panimalay sang duta.” (Gen. 12:1-3) Amo ini ang una nga rekord parte sa katipan kay Abraham—ang katipan ni Jehova nga Dios kay Abraham. Wala mahibaluan kon san-o ang eksakto nga petsa sang pagpakigkatipan ni Jehova kay Abraham. Pero nagsugod ini sang 1943 B.C.E., sang nagbiya sa Haran ang 75 anyos nga si Abraham kag nagtabok sa Suba Eufrates.

10. (a) Paano ginpakita ni Abraham ang malig-on nga pagtuo sa mga saad sang Dios? (b) Ano nga mga detalye ang amat-amat nga ginpahayag ni Jehova parte sa kaliwat sang babayi?

 10 Ginsulit ni Jehova ang iya saad kay Abraham sing madamo nga beses, nga nagadugang sang pila ka detalye. (Gen. 13:15-17; 17:1-8, 16) Kag sang nagpakita si Abraham sing malig-on nga pagtuo sa mga saad sang Dios paagi sa kinabubut-on nga paghalad sang iya bugtong nga anak, ginpabakod ni Jehova ang katipan paagi sa himpit nga saad. (Basaha ang Genesis 22:15-18; Hebreo 11:17, 18.) Sang nagsugod na ang katipan kay Abraham, amat-amat nga ginpahayag ni Jehova ang importante nga mga detalye parte sa kaliwat sang babayi. Ang kaliwat magagikan kay Abraham, magadamo ini, mangin hari, magalaglag sa tanan nga kaaway, kag magapakamaayo sa madamo.

Si Abraham nagpakita sing malig-on nga pagtuo sa mga saad sang Dios (Tan-awa ang parapo 10)

11, 12. Paano ginapakita sang Kasulatan nga may daku pa nga katumanan ang katipan kay Abraham, kag ano ang kahulugan sini para sa aton?

11 Ang katipan kay Abraham may literal nga katumanan para sa iya mga kaliwatan sang nagsulod sila sa Ginsaad nga Duta, pero ginapakita sang Kasulatan nga ina nga katipan may espirituwal man nga katumanan. (Gal. 4:22-25) Sa sining daku nga katumanan, subong sang ginpaathag ni apostol Pablo sa panuytoy sang Dios, ang panguna nga bahin sang kaliwat ni Abraham amo ang Cristo kag ang ikaduha nga bahin amo ang 144,000 ka hinaplas sa espiritu nga mga Cristiano. (Gal. 3:16, 29; Bug. 5:9, 10; 14:1, 4) Ang babayi nga magabun-ag sang kaliwat amo “ang Jerusalem sa ibabaw”—ang langitnon nga bahin sang organisasyon sang Dios, nga ginahuman sang mainunungon nga espiritu nga mga tinuga. (Gal. 4:26, 31) Subong sang ginsaad sa katipan kay Abraham, ang kaliwat sang babayi magapakamaayo sa katawhan.

12 Ang katipan kay Abraham nagapatalupangod sa Hari kag sa iya kaupod nga mga manuggahom sa Ginharian sang Dios, kag nagatukod ini sing legal nga sadsaran sang Ginharian sa langit. (Heb. 6:13-18) Daw ano kadugay ang pagpanghikot sini nga katipan? Isa ini ka “katipan nga dayon,” suno sa Genesis 17:7. Magapanghikot ini asta nga malaglag na sang Mesianiko nga Ginharian ang mga kaaway sang Dios kag mapakamaayo ang tanan nga pamilya sa duta. (1 Cor. 15:23-26) Ang matuod, ang mga magapuyo sa sina nga tion sa duta pakamaayuhon sing walay katapusan. Ginapakita sang katipan sang Dios kay Abraham nga determinado si Jehova nga tumanon ang iya katuyuan nga ‘matugob ang duta’ sang matarong nga mga tawo.Gen. 1:28.

KATIPAN NGA NAGAPASALIG NGA MAGAPADAYON ANG GINHARIAN

13, 14. Ano ang ginagarantiya sang katipan kay David parte sa paggahom sang Mesias?

13 Ang saad sa Eden kag ang katipan kay Abraham nagapamatuod nga ang pagkasoberano ni Jehova nga ginpakita paagi sa Mesianiko nga Ginharian nabase sing mabakod sa matarong nga mga talaksan sang Dios. (Sal. 89:14) Ang panguluhan bala sang Mesias mahimo mangin malain kag kinahanglan laglagon? Ang isa pa ka legal nga katipan magagarantiya nga indi gid ini matabo.

14 Binagbinaga ang ginsaad ni Jehova kay Hari David sang dumaan nga Israel paagi sa katipan kay David. (Basaha ang 2 Samuel 7:12, 16.) Ginhimo ni Jehova ini nga katipan kay David sang naggahom sia sa Jerusalem, nga nagasaad nga mangin kaliwat niya ang Mesias. (Luc. 1:30-33) Gani gin-athag pa gid ni Jehova ang pagahalinan sang kaliwat kag ginpat-od nga ang manunubli ni David amo ang “may kinamatarung” sa trono sang Mesianiko nga Ginharian. (Ezeq. 21:25-27)  Paagi kay Jesus, ang paghari ni David mangin ‘malig-on sa gihapon.’ Ang kaliwat ni David “magapadayon sa gihapon, ang iya trono subong sang adlaw.” (Sal. 89:34-37) Huo, ang paggahom sang Mesias indi gid mangin malain, kag ang himuon sini magapadayon tubtob sa walay katapusan!

ANG KATIPAN NGA MAGAAMAN SANG MAGAPANGHIKOT NGA SASERDOTE

15-17. Suno sa katipan para sa saserdote kaangay ni Melquisedec, ano pa ang dugang nga katungdanan sang kaliwat, kag ngaa?

15 Samtang ang katipan kay Abraham kag ang katipan kay David magapat-od nga ang kaliwat sang babayi mangin hari, ina nga katungdanan indi bastante para mapakamaayo ang katawhan sang tanan nga pungsod. Para pakamaayuhon sila, kinahanglan mahilway sila sa ila makasasala nga kahimtangan kag mangin miembro sang bug-os uniberso nga pamilya ni Jehova. Para mahimo ini, kinahanglan nga ang kaliwat magaalagad man subong saserdote. Ang maalam nga Manunuga nag-aman sini paagi sa isa pa ka legal nga kahimusan, ang katipan para sa saserdote kaangay ni Melquisedec.

16 Ginpahayag ni Jehova kay Hari David nga magahimo Sia sing personal nga katipan kay Jesus sa duha ka katuyuan: ‘palingkuron sia sa too nga kamut sang Dios’ tubtob malutos niya ang iya mga kaaway kag mangin “sacerdote sa gihapon sono sa paagi ni Melquisedec.” (Basaha ang Salmo 110:1, 2, 4.) Ngaa “sono sa paagi ni Melquisedec”? Bangod madugay pa antes napanubli sang kaliwatan ni Abraham ang Ginsaad nga Duta, si Melquisedec, nga hari sang Salem, nag-alagad subong “saserdote sang Labing Mataas nga Dios.” (Heb. 7:1-3) Direkta sia nga gintangdo ni Jehova sa sina nga katungdanan. Sia lang ang ginsambit sang Hebreong Kasulatan nga nag-alagad subong hari kag saserdote. Isa pa, bangod wala sing rekord nga may ginbuslan sia ukon nagbulos sa iya, makabig sia nga “saserdote sing dayon,” ukon wala sing katapusan.

17 Si Jesus direkta nga gintangdo nga mangin saserdote paagi sa sining personal nga katipan ni Jehova sa iya, kag mangin “saserdote sing dayon sa paagi nga kaangay kay Melquisedec.” (Heb. 5:4-6) Maathag nga ginapakita sini nga si Jehova legal nga naggamit sang Mesianiko nga Ginharian para matuman ang iya orihinal nga katuyuan sa mga tawo sa duta.

MGA KATIPAN NGA NAGHIMO SING LEGAL NGA BASIHAN PARA SA GINHARIAN

18, 19. (a) Ano ang ginapakita sang mga katipan nga aton ginbinagbinag parte sa Ginharian? (b) Ano nga pamangkot ang pagasabton pa?

18 Sa aton pag-usisa sa mga katipan, makita naton kon paano ini naangot sa Mesianiko nga Ginharian kag kon paano ang kahimusan sa Ginharian mabakod nga nabase sa legal nga mga kasugtanan. Ang saad sa Eden amo ang garantiya nga tumanon ni Jehova ang iya katuyuan sa duta kag sa katawhan paagi sa kaliwat sang babayi. Sin-o ang kaliwat, kag ano ang iya katungdanan? Ang katipan kay Abraham nagasugid sini tanan.

19 Gin-athag pa gid sang katipan kay David ang pagahalinan sang panguna nga bahin sang kaliwat kag ginhatagan sia sing kinamatarong sa paggahom sa duta agod ang himuon sang Ginharian magapabilin sing walay katapusan. Ang katipan para sa saserdote kaangay ni Melquisedec nangin basihan para ang kaliwat magaalagad subong saserdote. Apang indi lang si Jesus ang magagiya sa katawhan padulong sa kahimpitan. Ang iban ginhaplasan man para mangin mga hari kag mga saserdote. Diin sila maghalin? Binagbinagon ini sa masuod nga artikulo.