Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) OKTUBRE 2014

 SUGILANON SANG KABUHI

Mga Hitabo sa Akon Pag-alagad sa Ginharian

Mga Hitabo sa Akon Pag-alagad sa Ginharian

Sang 1947, ang mga pari sang Katoliko sa Santa Ana, El Salvador, nagtinguha nga gamuhon ang mga Saksi. Samtang nagahiwat ang mga kauturan sang ila semanal nga Pagtinuon sa Ang Lalantawan, ginhabuyan sing dalagku nga mga bato sang mga kabataan nga lalaki ang bukas nga puertahan sang puluy-an sang mga misyonero. Dayon may prosesyon nga ginpangunahan sang mga pari. Ang pila sa ila nagdala sing mga sulo, ang iban mga imahen. Sa sulod sang duha ka oras, ginabato nila ang bilding kag nagasiling: “Mabuhi sing dayon ang Birhen!” kag, “Kabay nga mapatay si Jehova!” Gusto nila tabugon ang mga misyonero sa banwa. Nahibal-an ko ini, kay isa ako sa nagtambong sadto nga miting sang nagligad nga 67 ka tuig. *

DUHA ka tuig antes sini, ako kag si Evelyn Trabert, nga akon kaupod nga misyonero, naggradwar sa ikap-at nga klase sang Watchtower Bible School of Gilead, nga yara anay malapit sa Ithaca, New York. Gin-asayn kami sa Santa Ana. Pero antes ko ipadayon ang akon malip-ot nga kasaysayan sa akon halos 29 ka tuig nga pagmisyonero, sugiran ko kamo anay kon ngaa nagdesisyon ako nga magmisyonero.

ANG AKON ESPIRITUWAL NGA PALANUBLION

Ang akon mga ginikanan, nga sanday John kag Eva Olson, nag-istar sa Spokane, Washington, U.S.A., sang 1923. Sini nga tuig ako nabun-ag. Mga Luterano sila pero indi nila mabaton ang panudlo sang simbahan parte sa kalayuhon nga impierno, bangod wala ini nagasanto sa ila pagpati sa Dios sang gugma. (1 Juan 4:8) Si Tatay nagtrabaho sa panaderya, kag isa ka gab-i ginsilingan sia sang iya kaupod sa trabaho nga ang Biblia wala nagatudlo nga ang impierno duog sang pag-antos. Wala madugay, gintun-an sang mga Saksi ni Jehova ang akon mga ginikanan kag nahibaluan nila kon ano gid ang ginatudlo sang Biblia parte sa kabuhi sa tapos sang kamatayon.

Nuebe anyos ako sadto, pero madumduman ko nga nagapamati ako sa malipayon nga pagsugid sang akon mga ginikanan parte sa ila bag-o nasapwan nga kamatuoran sa Biblia. Nalipay pa gid sila  sang nahibaluan nila nga ang ngalan sang matuod nga Dios amo si Jehova, kag nahilway sa makalilibog nga doktrina sang Trinidad. Ginbaton ko ining dalayawon nga mga panudlo sang Kasulatan, nga matun-an ang ‘kamatuoran nga nagahilway sa isa.’ (Juan 8:32) Gani wala gid nagsulod sa pensar ko nga makatalaka ang pagtuon sing Biblia, kundi nanamian ako pirme sa pag-usisa sa Pulong sang Dios. Bisan pa mahuluy-on ako, nagaupod ako sa akon mga ginikanan sa pagbantala. Nabawtismuhan sila sang 1934. Sang 1939, sa edad nga 16, nabawtismuhan man ako subong alagad ni Jehova.

Upod nanday Nanay kag Tatay sang 1941 nga asembleya sa St. Louis, Missouri

Sang tig-ilinit sang 1940, ginbaligya sang akon mga ginikanan ang amon balay, kag nag-alagad kami nga tatlo subong mga payunir sa Coeur d’Alene, Idaho. Nag-arkila kami sang isa ka apartment sa ibabaw sang talyer. Ang amon puluy-an gingamit man nga duog tilipunan. Sadto nga tion, pila lang ka kongregasyon ang may Kingdom Hall, gani nagatipon sila sa pribado nga mga balay ukon sa gin-arkilahan nga mga hulot.

Sang 1941, nagtambong kami sang akon mga ginikanan sa asembleya sa St. Louis, Missouri. Ang Domingo amo ang “Adlaw sang mga Kabataan,” kag ang mga 5 asta 18 anyos nagpungko sa atubangan sang entablado. Sa katapusan sang pamulongpulong ni Utod Joseph F. Rutherford, nagsiling sia sa amon nga mga pamatan-on: “Tanan kamo . . . nga kabataan . . . nga nagpasugot sa pagtuman sa Dios kag sa iya Hari, palihug magtindog!” Nagtindog kami tanan. Dayon nagsiling si Utod Rutherford: “Tan-awa, ang sobra sa 15,000 nga bag-o nga saksi sang Ginharian!” Ina nga hitabo nagpalig-on sang akon desisyon nga himuon nga karera ang pagpayunir.

MGA ASAYNMENT SANG AMON PAMILYA

Pila ka bulan sa tapos sang asembleya sa St. Louis, nagsaylo kami sa nabagatnan sang California. Diri, sa siudad sang Oxnard, ang amon asaynment amo ang pagtukod sing kongregasyon. Nag-istar kami sa gamay nga treyler nga may isa lang ka katre. Kon gab-i, ginaplastar ko ang akon “hiligdaan” sa ibabaw sang amon lamesa nga kalan-an—lain gid ini sangsa una nga may kaugalingon ako nga kuarto!

Wala madugay sang nag-abot kami sa California, ginsalakay sang Japan ang Pearl Harbor sa Hawaii, sang Disiembre 7, 1941. Pagkadason nga adlaw, nag-entra ang Estados Unidos sa Bug-os Kalibutan nga Inaway II. Ginpatuman sang awtoridad ang blackout, kag kinahanglan namon patyon ang tanan nga suga kon gab-i. Ang mga submarino sang Japan nagalibot sa dagat sang California, kag ang kadulom nagabulig para indi nila maigo ang ila mga target.

Mga pila ka bulan sang ulihi, sang Septiembre 1942, nagtambong kami sa New World Theocratic Assembly sa Cleveland, Ohio. Nagpamati kami sa pamulongpulong ni Utod Nathan H. Knorr nga “PaghidaitMagapadayon Bala Ini?” Ginbinagbinag niya ang Bugna kapitulo 17, nga nagalaragway sa “mabangis nga sapat” nga “amo anay, apang indi na karon, kag buot na magtakas gikan sa kadadalman.” (Bug. 17:8, 11) Ginpaathag ni Utod Knorr nga ang “mabangis nga sapat” amo ang Liga de Nasyones nga nauntat ang mga hilikuton sini sang 1939. Ang Biblia nagtagna nga ang Liga pagabuslan, nga magaresulta sa relatibo nga paghidait. Sang 1945, natapos ang Bug-os Kalibutan nga Inaway II. Dayon, nagtuhaw liwat ang “sapat” subong Nasyones Unidas. Ginpasangkad man sang mga Saksi ni Jehova ang ila pagbantala sa bilog nga duta, kag may daku nga pag-uswag sugod sadto!

Akon diploma sa Gilead

Ina nga tagna nagbulig sa akon nga mahangpan ang matabo sa palaabuton. Sang ginpahibalo nga  masugod ang Eskwelahan nga Gilead sa masunod nga tuig, nagtubo ang akon handum nga mangin misyonero. Sang 1943, gin-asayn ako nga magpayunir sa Portland, Oregon. Sadto nga tion, nagagamit kami sing ponograpo para patukaron ang mga sermon sa mga tagbalay sa ila ganhaan, kag dayon matanyag kami sa ila sing mga literatura sa Biblia parte sa Ginharian sang Dios. Sa sina nga tuig, pirme ko ginapanumdom ang pagmisyonero.

Sang 1944, nalipay ako nga mabaton ang imbitasyon sa Gilead upod sa akon suod nga amiga nga si Evelyn Trabert. Sa sulod sang lima ka bulan, ginpakita sa amon sang amon mga instruktor kon paano kami manamian sa pagtuon sa Biblia. Nagdayaw gid kami sa ila pagkamapainubuson. Kon kaisa, samtang nagakaon kami, sila ang mga weyter. Naggradwar kami sang Enero 22, 1945.

AKON ASAYNMENT SUBONG MISYONERO

Ako kag si Evelyn, upod nanday Leo kag Esther Mahan, nag-abot sa amon asaynment sa El Salvador sang Hunyo 1946. Nasapwan namon nga ang uma “maputi na . . . agod anihon.” (Juan 4:35) Ang insidente nga ginsambit kaina nagapakita nga akig gid ang mga klerigo. Mga isa ka semana antes sini, naghiwat kami sang amon una nga sirkito nga asembleya sa Santa Ana. Ginpahibalo namon sing lapnag ang pamulongpulong publiko kag nalipay gid kami kay halos 500 ang nagtambong. Imbes nga malagyo sa banwa, nangin mas determinado kami nga magpabilin kag buligan ang mga interesado. Bisan pa ginpaandaman sang mga klerigo ang mga tawo nga indi pagbasahon ang Biblia kag pila lang ang makasarang sa pagbakal sini, madamo ang ginagutom sa kamatuoran. Gin-apresyar gid nila ang amon mga panikasog nga makatuon sing Espanyol agod matudluan sila parte sa matuod nga Dios, si Jehova, kag sa iya bilidhon nga saad nga ipasag-uli ang Paraiso nga duta.

Lima kami sa amon klase sa Gilead nga ginpadala sa El Salvador. Wala pa tuo: si Evelyn Trabert, si Millie Brashier, si Esther Mahan, ako, kag si Leo Mahan

Si Rosa Ascencio amo ang isa sa akon una nga mga estudyante. Sa tapos sia makatuon sa Biblia, ginbulagan niya ang lalaki nga iya ginapuyopuyo. Dayon nagtuon ang lalaki sing Biblia. Nagpakasal sila, dayon nabawtismuhan, kag nangin makugi nga mga Saksi para kay Jehova. Si Rosa ang una nga payunir nga taga-Santa Ana. *

May gamay nga groserya si Rosa. Kon magbantala sia, ginasira niya ini kag nagasalig kay Jehova nga amanan sia sang iya mga kinahanglanon. Kon buksan na niya ini pagligad sang pila ka oras, nagadugok ang mga kostumer. Naeksperiensiahan gid niya ang ginsiling sang Mateo 6:33 kag nangin matutom sia asta sa iya kamatayon.

Isa ka bes, ginkadtuan sang pari ang tag-iya sang balay nga gin-arkilahan namon nga anom ka misyonero kag ginpaandaman sia nga kon indi niya kami pagpahalinon, isikway sia kag ang iya asawa sa ila simbahan. Ang tag-iya sang balay, nga isa ka prominente nga negosyante, akig na nga daan sa batasan sang klerigo kag wala nagpadala sa pag-ipit. Ginsilingan pa gani niya ang pari nga wala sia sing labot kon sikwayon sia sa simbahan. Ginpasalig niya kami nga puede kami mag-istar tubtob gusto namon.

 ANG RESPETADO NGA TAWO NANGIN SAKSI

Sanga talatapan nga ginpatindog sang 1955

Sa kapital nga siudad, sa San Salvador, ginatun-an sa Biblia sang isa pa ka misyonero ang asawa sang enhinyero nga si Baltasar Perla. Ining mabuot nga tawo nadulaan sing pagtuo sa Dios sang nakita niya ang pagkasalimpapaw sang mga lider sang relihion. Sang patindugon ang sanga talatapan, bisan indi pa Saksi si Baltasar, nagtanyag sia nga magdesinyo kag magpatindog sang pasilidad nga wala sing bayad.

Sa tapos sia makapakig-upod sa katawhan ni Jehova sa tion sang pagpatindog, nakumbinsi si Baltasar nga nasapwan niya ang matuod nga relihion. Nabawtismuhan sia sang Hulyo 22, 1955, kag wala madugay amo man ang iya asawa nga si Paulina. Ang tanan nila nga kabataan nagaalagad sing matutom kay Jehova. Ang iya bata nga si Baltasar, Jr, nag-alagad sing 49 ka tuig sa Brooklyn Bethel, diin nagabulig sia sa nagauswag nga pagbantala sa bilog nga kalibutan kag miembro sang Komite sang Sanga sa Estados Unidos. *

Sang naghiwat kami sing mga kombension sa San Salvador, ginbuligan kami ni Utod Perla para magamit ang daku nga gymnasium. Sang primero, pila lang ka seksion sang mga pulungkuan ang amon gingamit, pero bangod sang pagpakamaayo ni Jehova, padayon kami nga nagdamo kada tuig asta nga napuno ang gymnasium kag nagsobra pa gani. Sa sining makalilipay nga mga okasyon, nakita ko ang mga gintun-an ko sadto sa Biblia. Handurawa kon ano ang akon ginbatyag sang ginpakilala sang akon mga estudyante sadto ang akon “kaapuhan”—ang ila mga gintun-an nga bag-o nabawtismuhan!

Si Utod F. W. Franz nagapakig-istorya sa mga misyonero sa kombension

Sa isa ka asembleya, nagpalapit ang isa ka utod sa akon kag nagsiling nga may gusto sia itu-ad. Indi ko sia kilala amo nga natingala ako. Nagsiling sia, “Isa ako sa kabataan nga nagbato sa imo sa Santa Ana.” Kaupod ko na sia karon nga nagaalagad kay Jehova! Nalipay gid ako. Ini nga pag-istoryahanay nagpasalig sa akon nga ang bug-os tion nga ministeryo amo ang labing makapaladya nga karera.

Ang una nga sirkito nga asembleya nga amon natambungan sa El Salvador

MAKALILIPAY NGA MGA DESISYON

Sa halos 29 ka tuig, nagpadayon ako subong misyonero sa El Salvador, una sa siudad sang  Santa Ana, dayon sa Sonsonate, masunod sa Santa Tecla, kag sang ulihi sa San Salvador. Sang 1975, sa tapos mapangamuyuan kag mapamensaran sing maayo, nagdesisyon ako nga mag-untat sa pagmisyonero kag magpauli sa Spokane. Ang akon matutom kag tigulang nga mga ginikanan nagakinahanglan sang akon bulig.

Sang napatay si Tatay sang 1979, gin-atipan ko si Nanay nga maluya na. Walo pa ka tuig antes sia napatay sa edad nga 94. Sa sinang mabudlay nga tion, kinapoy gid ako sa pisikal kag emosyonal. Bangod sini, nagbalatian ako sing tikos. Pero paagi sa pangamuyo kag sa mahigugmaon nga pag-alay-ay ni Jehova, nabatas ko ina nga pagtilaw. Daw nagsiling lang si Jehova, “tubtub sa pagkaubanon dalhon ko kamo. . . . Ako magadala kag magaluwas.”Isa. 46:4.

Sang 1990, nagsaylo ako sa Omak, Washington. Nabatyagan ko diri liwat nga makabulig ako sa Espanyol nga latagon, kag ang pila sa akon estudyante sa Biblia nabawtismuhan. Sang Nobiembre 2007, indi ko na maatipan ang akon ginaistaran sa Omak, gani nagsaylo ako sa isa ka apartment malapit sa banwa sang Chelan, Washington. Sugod sadto, gin-atipan ako diri sang Espanyol nga kongregasyon, kag ginpasalamatan ko gid ini. Bangod ako lang ang tigulang nga Saksi diri, mainayuhon nga ginkabig ako sang mga kauturan subong ila “lola.”

Bisan wala ako namana kag wala sing pamilya para makaalagad sing bug-os nga “wala sing tublag,” madamo ako sing espirituwal nga kabataan. (1 Cor. 7:34, 35) Nagarason ako nga sa sining presente nga kabuhi, indi ko matigayon ang tanan. Gani kinahanglan ko unahon ang importante nga mga butang—ang akon dedikasyon nga alagaron sing bug-os tagipusuon si Jehova. Sa bag-o nga kalibutan, madamo sing tion para sa tanan nga makalilipay nga hilikuton. Ang akon paborito nga teksto amo ang Salmo 145:16, nga nagapasalig sa aton nga si Jehova ‘magabusog sang handum sang tagsa ka butang nga buhi.’

Ang pagpayunir nagapabatyag sa akon nga daw bataon gihapon

Sa edad nga 91, maayo pa ang akon panglawas, gani nagapayunir gihapon ako. Nagabulig ini sa akon nga magbatyag nga daw bataon gihapon kag may katuyuan ang akon kabuhi. Sang nag-abot ako sa El Salvador, bag-o pa lang nagsugod ang pagbantala. Bisan pa sa wala untat nga pagpamatok ni Satanas, may sobra na 39,000 ka manugbantala sa sina nga pungsod. Nagpabakod gid ini sang akon pagtuo. Maathag gid nga nagabulig ang balaan nga espiritu ni Jehova sa mga panikasog sang iya katawhan!

^ par. 4 Tan-awa ang 1981 Yearbook of Jehovah’s Witnesses, pahina 45-46.

^ par. 19 1981 Yearbook, pahina 41-42.

^ par. 24 1981 Yearbook, pahina 66-67, 74-75.