Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) OKTUBRE 2014

“Ituon ang Inyo Hunahuna sa mga Butang sa Ibabaw”

“Ituon ang Inyo Hunahuna sa mga Butang sa Ibabaw”

“Ituon ang inyo hunahuna sa mga butang sa ibabaw, indi sa mga butang sa duta.”COL. 3:2.

1, 2. (a) Ano ang nagapakita nga may problema ang kongregasyon sa Colosas sang unang siglo? (b) Ano ang ginlaygay sa mga kauturan sa Colosas para makapabilin sila nga malig-on?

ANG Cristianong kongregasyon sang unang siglo sa Colosas may problema! Ang pila sa sulod sang kongregasyon nagtuga sing pagbinahinbahin paagi sa pagpatuman sang Mosaikong Kasuguan. Ang iban nagasakdag sa pagano nga pilosopiya sang pagdingot sa kaugalingon. Para mabatuan ini nga mga panudlo, si apostol Pablo naghimo sing makapalig-on nga sulat sa mga taga-Colosas: “Mag-andam kamo: basi may isa nga magataban sa inyo subong iya natukob paagi sa pilosopiya kag wala pulos nga daya suno sa tradisyon sang mga tawo, suno sa nahauna nga mga butang sang kalibutan kag indi suno kay Cristo.”Col. 2:8.

2 Kon gintuon sadtong hinaplas nga mga Cristiano ang ila hunahuna sa “nahauna nga mga butang sang kalibutan,” mahimo nga talikdan nila ang aman ni Jehova para sa kaluwasan. (Col. 2:20-23) Para mabuligan sila nga maamligan ang ila hamili nga kaangtanan sa Dios, si Pablo naglaygay: “Ituon ang inyo hunahuna sa mga butang sa ibabaw, indi sa mga butang sa duta.” (Col. 3:2) Huo, kinahanglan hunahunaon sang mga utod sang Cristo ang ila paglaum nga makatigayon sing di-madinulunton nga palanublion nga ‘natigana para sa ila sa langit.’Col. 1:4, 5.

3. (a) Ano nga paglaum ang ginahunahuna sang hinaplas nga mga Cristiano? (b) Ano nga mga pamangkot ang binagbinagon naton sa sini nga artikulo?

 3 Sa karon, ginatuon man sang hinaplas nga mga Cristiano ang ila hunahuna sa langitnon nga Ginharian sang Dios kag sa ila paglaum nga mangin “kaupod nga mga manunubli ni Cristo.” (Roma 8:14-17) Pero kamusta naman ang may dutan-on nga paglaum? Paano maaplikar sa ila ang ginsiling ni Pablo? Paano ginatuon sang “iban nga mga karnero” ang ila hunahuna sa “mga butang sa ibabaw”? (Juan 10:16) Kag paano kita tanan makabenepisyo sa pagbinagbinag sang mga halimbawa sang matutom nga mga tawo sang una, pareho nanday Abraham kag Moises, nga bisan pa sang mga kabudlayan gintuon nila ang ila hunahuna sa mga butang sa ibabaw?

PAGTUON SANG ATON HUNAHUNA SA MGA BUTANG SA IBABAW

4. Paano matuon sang iban nga mga karnero ang ila hunahuna sa mga butang sa ibabaw?

4 Bisan pa wala sing langitnon nga paglaum ang iban nga mga karnero, mahimo man nila matuon ang ila hunahuna sa mga butang sa ibabaw. Paano? Paagi sa pag-una kay Jehova nga Dios kag sa mga intereses sang Ginharian. (Luc. 10:25-27) Sa paghimo sini, ginasunod naton ang Cristo subong aton huwaran. (1 Ped. 2:21) Pareho sa aton mga kauturan sang unang siglo, makasumalang kita sing butig nga mga pangatarungan, kalibutanon nga mga pilosopiya, kag materyalistiko nga mga panimuot sa sistema sang mga butang ni Satanas. (Basaha ang 2 Corinto 10:5.) Bilang pag-ilog kay Jesus, kinahanglan nga mangin mabinantayon kita batok sa mga pagsalakay sa aton espirituwalidad.

5. Paano naton mausisa ang aton panghunahuna parte sa materyal nga mga butang?

5 Naimpluwensiahan bala ang aton kabuhi sang pagtamod sang kalibutan sa materyal nga mga butang? Ang mga butang nga aton nanamian masami nga matalupangdan sa aton mga ginahunahuna kag ginahimo. “Kon diin ang imo bahandi, didto man ang imo tagipusuon.” (Mat. 6:21) Para mahibaluan ang huyog sang aton tagipusuon, mas maayo nga usisaon naton kon kaisa ang aton kaugalingon. Pamangkuta ang imo kaugalingon: ‘Daw ano kadaku nga tion ang akon ginahinguyang sa paghunahuna sang kuarta? Pirme ko bala ginapamensar ang negosyo, ukon ang pagtinguha sang mas komportable nga pangabuhi? Ukon nagapanikasog gid bala ako nga mahuptan ang akon mata nga nagakonsentrar sa espirituwal nga mga butang?’ (Mat. 6:22) Ginpakita ni Jesus nga ang mga nagauna sa ‘pagtipon sing mga bahandi sa duta’ nagabutang sang ila kaugalingon sa espirituwal nga katalagman.Mat. 6:19, 20, 24.

6. Paano naton madaug ang undanon nga mga huyog?

6 Ang aton indi himpit nga unod nagaganyat sa aton nga pasundan ang aton nanamian. (Basaha ang Roma 7:21-25.) Kon wala ang balaan nga espiritu sang Dios sa aton kabuhi, mahimo kita madala sa “mga buhat nga iya sang kadudulman.” Nagalakip ini sang mga butang subong sang “magansal nga kinalipay kag pagpahubog . . . ginadumili nga paghuliray kag lugak nga paggawi.” (Roma 13:12, 13) Para madaug ang “mga butang sa duta”—mga butang nga makagalanyat sa unod—dapat naton ituon ang aton hunahuna sa mga butang sa ibabaw. Nagakinahanglan ini sing panikasog. Amo kon ngaa si apostol Pablo nagsiling: “Ginasakit ko ang akon lawas kag ginahimo ini nga ulipon.” (1 Cor. 9:27) Pat-od nga indi mahapos ang pagpabilin sa palumba para sa kabuhi! Binagbinagon naton kon ano ang ginhimo sang duha ka matutom nga tawo sang una para “mapahamut-an gid” ang Dios.Heb. 11:6.

NAGTUO SI ABRAHAM KAY JEHOVA

7, 8. (a) Ano ang mga kabudlayan nanday Abraham kag Sara? (b) Diin gintuon ni Abraham ang iya hunahuna?

7 Sang ginsugo ni Jehova si Abraham nga magsaylo sila sang iya panimalay sa duta  sang Canaan, kinabubut-on sia nga nagtuman. Bangod sang pagtuo kag pagtuman ni Abraham, nakigkatipan si Jehova sa iya, nga nagasiling: “Himoon ko gikan sa imo ang isa ka pungsud nga daku, kag pakamaayohon ko ikaw.” (Gen. 12:2) Apang pagligad sang tinuig, si Abraham kag si Sara wala gihapon sing bata. Nalimtan bala ni Jehova ang iya saad kay Abraham? Isa pa, indi mahapos ang kabuhi sa Canaan. Ginbiyaan ni Abraham kag sang iya panimalay ang ila puluy-an kag mga paryente sa Ur, nga isa ka manggaranon nga siudad sa Mesopotamia. Naglakbay sila sing 1,600 ka kilometro para makaabot sa Canaan, nag-istar sa mga tolda, nag-antos sing gutom, kag nag-atubang sa mga tulisan. (Gen. 12:5, 10; 13:18; 14:10-16) Pero wala sila naghandum nga magbalik sa ila masulhay nga pangabuhi sa Ur!Basaha ang Hebreo 11:8-12, 15.

8 Imbes nga magkonsentrar sa “mga butang sa duta,” si Abraham ‘nagtoo sa GINOO.’ (Gen. 15:6) Huo, gintuon niya ang iya hunahuna sa mga butang sa ibabaw paagi sa pagkonsentrar sa mga saad sang Dios. Gani, ginpadyaan ang pagtuo ni Abraham sang nagsiling sa iya ang Labing Mataas nga Dios: “‘Tanglaa ang langit, kag isipa ang kabitoonan, kon sarang mo sila maisip.’ Niyan nagsiling sia sa iya, ‘Mangin-subong sini ang imo mga kaliwatan.’” (Gen. 15:5) Makapalig-on gid ini! Kada magtangla si Abraham sa mga bituon sa kalangitan, madumduman niya ang saad ni Jehova nga magadamo ang iya kaliwat. Kag sa nagakaigo nga tion sang Dios, nakatigayon sing kaliwat si Abraham, suno sa ginsaad sa iya.Gen. 21:1,  2.

9. Paano ang pagsunod sa halimbawa ni Abraham nagapalig-on sa aton nga mangin masako sa pag-alagad sa Dios?

9 Pareho ni Abraham, nagahulat man kita sa katumanan sang mga saad sang Dios. (2 Ped. 3:13) Kon indi naton pag-ituon ang aton hunahuna sa mga butang sa ibabaw, ang katumanan sini nga mga saad daw nagpalantang kag mahimo maghinay kita sa aton espirituwal nga mga hilikuton. Halimbawa, nagsakripisyo ka bala sang una para makapayunir ukon makapasangkad sa pila ka sahi sang pag-alagad? Kon amo, takus ka hatagan sing komendasyon. Kamusta karon? Dumduma, padayon nga ginhunahuna ni Abraham “ang siudad nga may matuod nga mga sadsaran.” (Heb. 11:10) “Nagtuo [sia] kay Jehova, kag bangod sini ginkabig sia nga matarong.”Roma 4:3.

NAKITA NI MOISES ANG “ISA NGA DI-MAKITA”

10. Ano ang kabuhi ni Moises sang pamatan-on sia?

10 Ang isa pa ka tawo nga nagtuon sang iya hunahuna sa mga butang sa ibabaw amo si Moises. Subong pamatan-on, “gintudluan [sia] sing tanan nga kaalam sang mga Egiptohanon.” Indi ini ordinaryo nga edukasyon. Ang Egipto amo ang nagapangibabaw nga kagamhanan sang tion ni Moises, kag luwas sini miembro pa sia sang panimalay sang Paraon. Indi katingalahan nga bangod sang mataas nga edukasyon ni Moises, nangin “gamhanan sia sa iya mga pulong kag mga buhat.” (Binu. 7:22) Hunahunaa ang mga oportunidad nga bukas para sa iya! Pero gintuon ni Moises ang iya hunahuna sa mas dungganon nga mga butang—ang paghimo sang kabubut-on sang Dios.

11, 12. Ano nga edukasyon ang ginpabaloran gid ni Moises, kag paano naton ina nahibaluan?

11 Sang bata pa si Moises, ang iya iloy nga si Jocabed pat-od nga nagtudlo sa iya parte sa Dios sang mga Hebreo. Ginpabaloran gid ni Moises ang ihibalo kay Jehova kag ginkabig ini nga may daku nga balor sangsa bisan ano nga manggad. Gani gintalikdan niya ang mga pribilehiyo kag kahigayunan nga mahimo niya matigayon subong miembro sang panimalay sang Paraon. (Basaha ang Hebreo 11:24-27.) Ang matuod, ang espirituwal nga edukasyon ni Moises kag ang iya pagtuo kay Jehova nagpalig-on sa iya nga ituon ang iya hunahuna sa mga butang sa ibabaw.

12 Si Moises nakatigayon sing pinakamaayo nga sekular nga edukasyon sa iya tion,  pero gingamit bala niya ini para pauswagon ang iya kabuhi sa Egipto, mangin bantog, ukon magtigayon sing materyal nga mga pagkabutang? Wala. Kon ginhimo niya ini, wala kuntani sia “nangindi nga tawgon nga anak sang anak nga babayi ni Paraon, nga ginpasulabi pa nga pintasan upod sa katawhan sang Dios sa baylo nga maagom ang umalagi nga pagpangalipay sa sala.” Maathag nga gingamit ni Moises ang iya espirituwal nga edukasyon para matuman ang katuyuan ni Jehova.

13, 14. (a) Ano ang nagbulig kay Moises para makalipikar sa asaynment nga ginhatag ni Jehova sa iya? (b) Pareho kay Moises, ano ang mahimo kinahanglan naton himuon?

13 Interesado gid si Moises kay Jehova kag sa Iya katawhan. Sang 40 anyos sia, naghunahuna si Moises nga handa na sia para buligan nga mahilway ang katawhan sang Dios sa pagkaulipon sa Egipto. (Binu. 7:23-25) Pero antes pa ini mahatag ni Jehova nga asaynment sa iya, may kinahanglan pa sia palambuon. Kinahanglan niya mapalambo ang mga kinaiya subong sang pagpaubos, pagpailob, kalulo, kag pagpugong sa kaugalingon. (Hulu. 15:33) Kinahanglan pa ni Moises ang paghanas nga magahanda sa iya nga mabatas ang palaabuton nga mga pagtilaw kag mga kabudlayan. Ang pila ka dekada nga pagbantay sang mga karnero magahanas sa iya nga mapalambo ining diosnon nga mga kinaiya.

14 Nakatuon bala si Moises sa praktikal nga paghanas sa iya subong manugbantay? Huo. Ang Pulong sang Dios nagasiling nga si Moises nangin “tama gid kamapainubuson, labi pa sa tanan nga tawo nga yara sa kadaygan sang duta.” (Num. 12:3) Napalambo niya ang pagkamapainubuson, nga nagbulig sa iya nga pakig-angutan sing mapailubon ang lainlain nga tawo kag ang ila mabug-at nga mga problema. (Ex. 18:26) Mahimo nga kinahanglan man naton palambuon ang espirituwal nga mga kinaiya nga magabulig sa aton nga makalampuwas sa “dakung kapipit-an” pasulod sa matarong nga bag-ong kalibutan sang Dios. (Bug. 7:14) Maayo bala ang aton pagpakig-angot sa mga tawo, lakip na sa ginakabig naton nga mainiton ukon sobra ka sensitibo? Kinahanglan naton pamatian ang ginsiling ni apostol Pedro, nga nagpalig-on sa mga masigkatumuluo: “Padunggi ang tanan nga sahi sang mga tawo, higugmaa ang bug-os nga paghiliutod, kahadluki ang Dios, padunggi ang hari.”1 Ped. 2:17.

ITUON PIRME ANG ATON HUNAHUNA SA MGA BUTANG SA IBABAW

15, 16. (a) Ngaa importante nga pirme naton ituon ang aton hunahuna sa husto nga mga butang? (b) Ngaa importante nga huptan sang mga Cristiano ang maayo nga paggawi?

15 Nagakabuhi kita sa “makahalanguyos nga mga tion nga mabudlay atubangon.” (2 Tim. 3:1) Gani agod makapabilin nga alisto sa espirituwal, dapat naton padayon nga ituon ang aton hunahuna sa husto nga mga butang. (1 Tes. 5:6-9) Binagbinaga kon paano naton mahimo ini sa tatlo ka bahin sang aton pagkabuhi.

16 Aton paggawi: Ginbaton ni Pedro nga importante ang maayo nga paggawi. Nagsiling sia: “Hupti nga maayo ang inyo paggawi sa tunga sang mga pungsod, agod . . . himayaon nila ang Dios . . . bangod sang inyo maayong mga buhat nga nasaksihan mismo nila.” (1 Ped. 2:12) Sa balay man kita, sa ulubrahan, sa eskwelahan, nagahampang, ukon sa ministeryo, nagapanikasog gid kita nga mahimaya si Jehova paagi sa aton maayo nga paggawi. Bangod indi himpit, tanan kita makahimo sing mga sala. (Roma 3:23) Pero paagi sa padayon nga ‘pagpakig-away sa maayong pagpakig-away sang pagtuo,’ magadaug kita batok sa aton indi himpit nga unod.1 Tim. 6:12.

17. Paano naton mailog ang panimuot sang hunahuna ni Cristo Jesus? (Tan-awa ang piktyur sa umpisa sini nga artikulo.)

17 Aton panimuot: Ang paghupot sing maayo nga paggawi naangot gid sa pagtigayon sang husto nga panimuot. Si apostol Pablo nagsiling: “Hupti ninyo ining panimuot sang hunahuna nga yara man kay Cristo  Jesus.” (Fil. 2:5) Ano ang panimuot ni Jesus? Mapainubuson sia. Ang pagpaubos nagpahulag sa iya nga mangin masinakripisyuhon sa iya ministeryo. Ginahunahuna niya pirme ang pagbantala sing maayong balita sang Ginharian sang Dios. (Mar. 1:38; 13:10) Gintamod ni Jesus ang Pulong sang Dios subong awtoridad. (Juan 7:16; 8:28) Gintun-an niya sing maayo ang Balaan nga Kasulatan agod nga makutlo niya ini, mapangapinan, kag mapaathag. Paagi sa pagkamapainubuson kag kakugi sa aton ministeryo kag sa pagtuon sing Biblia, mailog pa gid naton ang panghunahuna sang Cristo.

Ginahunahuna pirme ni Jesus ang pagbantala sing maayong balita sang Ginharian sang Dios (Tan-awa ang parapo 17)

18. Paano naton masuportahan ang hilikuton ni Jehova?

18 Aton suporta: Katuyuan ni Jehova nga “sa ngalan ni Jesus magluhod ang tagsa ka tuhod sang mga yara sa langit kag sa duta.” (Fil. 2:9-11) Bisan pa sa iya ginpakataas nga posisyon, mapainubuson si Jesus nga nagpasakop sa kabubut-on sang iya Amay, kag dapat amo man kita. (1 Cor. 15:28) Paano? Paagi sa aton bug-os nga pagsuporta sa hilikuton nga ginsugo sa aton, nga “maghimo sang mga disipulo sa mga tawo sang tanan nga pungsod.” (Mat. 28:19) Gusto man naton himuon “kon ano ang maayo sa tanan,” paagi sa paghimo sing maayo sa aton isigkatawo kag sa aton mga kauturan.Gal. 6:10.

19. Ano dapat ang determinado naton nga himuon?

19 Nagapasalamat gid kita kay ginapahanumdom kita ni Jehova nga ituon ang aton hunahuna sa mga butang sa ibabaw! Para mahimo ini, kinahanglan “magdalagan kita nga may pagbatas sang dalaganon nga ginabutang sa aton atubangan.” (Heb. 12:1) Kabay pa nga magpangabudlay kita sing “bug-os kalag subong nga kay Jehova,” kag ang aton langitnon nga Amay magapadya sang aton hanuot nga mga panikasog.Col. 3:23, 24.