Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) SEPTIEMBRE 2014

“Nagatinguha” Ka Bala?

“Nagatinguha” Ka Bala?

SI Fernando * ginakulbaan. Ginpangabay sia sang duha ka gulang nga istoryahon sing pribado. Pagkatapos sang pila ka pagduaw sang manugtatap sang sirkito, ang mga gulang nagpaathag sa iya kon ano ang iya himuon agod makalipikar sia sa dugang nga pribilehiyo sa kongregasyon. Samtang nagaligad ang tion, nagduhaduha si Fernando kon bala matangdo pa sia nga gulang. Dayon ang manugtatap sang sirkito nagduaw liwat sa kongregasyon. Ano na karon ang isiling sang mga gulang?

Namati si Fernando samtang ginaistorya sia sang isa sa mga gulang. Ginpatuhuyan sang gulang ang 1 Timoteo 3:1 kag nagsiling nga ang mga gulang sa kongregasyon nakabaton sing sulat nga gintangdo sia subong gulang. Nakibot si Fernando kag namangkot, “Ano ang ginsiling mo?” Ginsulit sang gulang ang iya ginsiling, kag nakayuhum si Fernando. Dayon, sang ginpahibalo ini sa kongregasyon, nalipay gid ang tanan.

Sala bala nga maghandum sing mga pribilehiyo sa kongregasyon? Indi. Suno sa 1 Timoteo 3:1, “kon ang bisan sin-o nga lalaki nagatinguha sa palangakuan sang manugtatap, nagahandum sia sang maayo nga buhat.” Madamo nga Cristiano nga lalaki ang nag-aplikar sini kag nagpauswag sang ila espirituwalidad agod makalipikar sa mga pribilehiyo sa kongregasyon. Bilang resulta, may linibo ka sangkol nga mga gulang kag ministeryal nga mga alagad sa katawhan sang Dios. Pero bangod sa pag-uswag sa mga kongregasyon, kinahanglan pa magtinguha ang mas madamo nga utod nga lalaki. Ano ang nagakaigo nga paagi para mahimo ini? Kag dapat bala ini kabalak-an sang mga nagatinguha nga mangin manugtatap, kaangay ni Fernando?

ANO ANG KAHULUGAN SANG “NAGATINGUHA”?

Ang termino sa Biblia nga “nagatinguha” naghalin sa Griego nga berbo nga nagapahangop sing tudok nga paghandum ukon paglab-ot. Ayhan mahunahuna mo sa sini ang isa ka tawo nga nagalab-ot sang isa ka manami nga prutas sa ibabaw sang kahoy. Pero ang pagtinguha wala nagapahangop sing mahamkunon nga  paglab-ot sa pribilehiyo nga mangin “manugtatap.” Ngaa? Bangod ang tulumuron sang mga sinsero kag interesado sa pag-alagad subong mga gulang amo dapat ang paghimo sing “maayo nga buhat” sa baylo nga magtigayon sing posisyon.

Ang mga ginapatuman nga may kaangtanan sa sining maayo nga buhat mabasa sa 1 Timoteo 3:2-7 kag Tito 1:5-9. Parte sa sining mataas nga mga talaksan, ang madugay na nga gulang nga si Raymond nagpaathag: “Para sa akon, ang mas importante amo nga kon ano kita. Importante nga maayo ka mamulongpulong kag magtudlo, pero kinahanglan man nga mangin indi salawayon, haganhagan sa batasan, maligdong sa hunahuna, mahim-ong, maabiabihon, kag makatarunganon.”

‘Magtinguha’ paagi sa pagbulig sa kongregasyon sa lainlain nga paagi

Ang utod nga nagatinguha gid nagapakita nga indi sia salawayon paagi sa paglikaw sa tanan nga sahi sang pagkadibunayag kag kahigkuan. Haganhagan sia sa iya mga batasan, maligdong sing hunahuna, mahim-ong, kag makatarunganon; gani ang iya mga masigkatumuluo nagasalig sa iya nga manguna kag magbulig sa ila kon may problema. Kon maabiabihon sia, mangin pagpalig-on sia sa mga pamatan-on kag sa mga bag-uhan. Ginalugpayan niya kag ginabuligan ang mga nagabalatian kag ang mga tigulang bangod ginahigugma niya ang maayo. Ginapauswag niya ini nga mga kinaiya para makabenepisyo ang iban, indi bangod gusto niya nga itangdo sia. *

Nalipay ang mga gulang sa paglaygay kag pagpalig-on, pero ang pag-aplikar sang mga kinahanglanon nga ginasiling sang Kasulatan responsibilidad sang indibiduwal nga nagatinguha. Si Henry nga eksperiensiado nga manugtatap, nagsiling: “Kon nagatinguha ka, pamatud-i gid nga kalipikado ka.” Nagapatuhoy sa Manugwali 9:10, sia nagpaathag: “‘Ang bisan ano nga makita nga himoon sang imo kamut, himoa ini sa imo gahum.’ Ano man nga asaynment ang ihatag sang mga gulang sa imo, himua ang imo masarangan. Pabalori ang tanan nga hilikuton nga ginhatag sa imo sa kongregasyon, lakip ang pagpanilhig. Sa ulihi, matalupangdan gid ang imo mga ginahimo kag mga panikasog.” Kon gusto mo mangin gulang sa ulihi, magpanikasog kag mangin masaligan sa tanan nga aspekto sang sagrado nga pag-alagad. Dapat nga makita sa imo ang pagkamapainubuson,  indi ang bugal bangod sang ambisyon.Mat. 23:8-12.

ISIKWAY ANG SALA NGA PANGHUNAHUNA KAG MGA BUHAT

Ang pila nga nagahandum sang mga pribilehiyo sa kongregasyon mahimo masulay nga magpabatibati ukon magtinguha nga impluwensiahan ang hubon sang mga gulang. Ang iban wala nalipay kon laygayan sila sang mga gulang. Dapat pamangkuton sini nga mga indibiduwal ang ila kaugalingon, ‘Gusto ko bala ini para lang sa akon interes, ukon gusto ko nga atipanon sing mapainubuson ang mga karnero ni Jehova?’

Ang mga nagatinguha dapat indi malipat sa isa pa ka kinahanglanon nga ipakita sang mga gulang—“mangin mga halimbawa sa panong.” (1 Ped. 5:1-3) Ang isa nga halimbawa sa kongregasyon nagalikaw sa malimbungon nga hunahuna kag mga buhat. Ginatinguhaan niya nga mangin mapailubon, natangdo man sia ukon wala. Indi milagruso nga makuha sang pagkagulang ang mga kasawayan sang isa ka tawo. (Num. 12:3; Sal. 106:32, 33) Luwas sini, ang isa ka utod mahimo ‘wala makahibalo sang bisan ano nga butang batok sa iya kaugalingon,’ pero ang iban mahimo may mga rason kon ngaa negatibo ang ila opinyon parte sa iya. (1 Cor. 4:4) Gani, kon ang mga gulang sinsero nga nagalaygay sa imo base sa Biblia, tinguhai nga mamati kag indi maugot. Dayon panikasugi nga iaplikar ang laygay.

PAANO KON KADUGAY NA SANG IMO PAGHULAT?

Madamo nga utod ang nagbatyag nga naghulat sila sing madugay antes sila natangdo. Kon pila ka tuig ka na nga “nagatinguha sa palangakuan sang manugtatap,” natak-an ka na bala kon kaisa? Kon amo, talupangda ang ginsiling sang Biblia: “Ang paglaum nga napalantang nagapasakit sang tagiposoon, apang kon mag-abut ang handum, ini kahoy sang kabuhi.”Hulu. 13:12.

Ang isa ka tawo mahimo masakitan kon ang ginahandum gid niya nga tulumuron daw indi malab-ot. Amo sini ang ginbatyag ni Abraham. Ginsaaran sia ni Jehova sing anak nga lalaki, pero nagligad pa ang mga tinuig nga wala sila sing anak ni Sara. (Gen. 12:1-3, 7) Sang tigulang na si Abraham, nagsiling sia: “O GINOONG Dios, ano bala ang ihatag mo sa akon, kay nagapadayon nga wala ako sing anak . . . wala mo ako paghatagi sing kaliwat.” Ginpasalig sia liwat ni Jehova nga ang Iya saad parte sa isa ka anak matuman. Pero mga 14 pa ka tuig ang nagligad antes gintuman sang Dios ang iya ginsiling.Gen. 15:2-4; 16:16; 21:5.

Samtang nagahulat sia, nadula bala ni Abraham ang iya kalipay sa pag-alagad kay Jehova? Wala. Wala gid niya ginduhaduhaan ang saad sang Dios. Padayon niya nga ginhulat ang maayo nga palaabuton. Si apostol Pablo nagsulat: “Sa tapos nagpakita sang pagpailob si Abraham, natigayon niya ini nga saad.” (Heb. 6:15) Sang ulihi, ginpakamaayo sang Labing Gamhanan ining matutom nga tawo nga labaw pa sa iya ginapaabot. Ano ang imo matun-an kay Abraham?

Kon gusto mo mangin gulang pero tinuig na nga wala ka matangdo, padayon nga magsalig kay Jehova. Indi pagdulaa ang imo kalipay sa pag-alagad sa iya. Si Warren, nga nagbulig sa madamo nga kauturan nga mag-uswag sa espirituwal nagpaathag kon ngaa: “Kinahanglan ang tion para makita nga ang isa kalipikado na nga itangdo. Sa ulihi, ang mga ikasarang sang isa ka utod  kag ang iya panimuot makita sing amat-amat paagi sa iya paggawi kag pag-atipan sa iya mga asaynment. Ang iban nagapati nga mangin madinalag-on lamang sila kon matangdo sila ukon matigayon ang isa ka pribilehiyo. Sala ini nga panghunahuna kag posible nga amo na lang ini ang pamensaron sang isa. Bisan diin ka man kag ano man ang imo ginahimo, matigayon mo ang kadalag-an kon ginaalagad mo si Jehova sing matutom.”

Ang isa ka utod naghulat sing sobra isa ka dekada antes sia natangdo nga gulang. Nagapatuhoy sa bantog nga paglaragway sa Ezequiel, kapitulo 1, ginsaysay niya ang leksion nga iya natun-an: “Si Jehova ang nagapahulag sang iya kangga, ang iya organisasyon, sa kadasigon nga gusto niya. Ang importante indi ang aton tion kundi ang tion ni Jehova. Parte sa handum nga mag-alagad subong gulang, indi importante kon ano ang akon gusto ukon handum. Para kay Jehova, ang akon gusto mahimo nga indi ko man kinahanglan.”

Kon nagalaum ka nga makahimo sing maayo subong Cristiano nga manugtatap sa ulihi, magtinguha para makabulig nga mangin malipayon ang kongregasyon. Kon daw kadugay gid, batui ang kataka kag kakulang sing pagpailob. Si Raymond, nga ginsambit kaina, nagsiling: “Ang ambisyon kaaway sang pagkakontento. Mabalewala sang mga pirme nagakabalaka ang daku nga kalipay sa pag-alagad kay Jehova.” Palambua pa gid ang bunga sang balaan nga espiritu sang Dios, labi na ang pagpailob. Panikasugi nga pauswagon ang imo espirituwalidad paagi sa pagtuon sa Kasulatan. Pasangkara ang imo pagpakigbahin sa pagbantala kag pagtudlo sing Biblia sa mga interesado. Pangunahi ang imo pamilya sa espirituwal nga mga hilikuton kag pangpamilya nga pagsimba. Magkalipay sa tagsa ka kahigayunan nga makaupod mo ang imo mga kauturan. Samtang nagapadayon ka sa imo tulumuron, mangin malipayon ka bisan subong.

Ang pagpanikasog para makalipikar sa mga pribilehiyo sa kongregasyon isa ka kahigayunan nga ginahatag ni Jehova; indi gid niya gusto ukon sang iya organisasyon nga malugaw-an kag madulaan sing kalipay sa pag-alagad ang mga nagatinguha. Ginasakdag kag ginapakamaayo sang Dios ang tanan nga nagaalagad sa iya nga may husto nga mga motibo. Kaangay sang tanan niya nga pagpakamaayo, “wala sia nagadugang sing kasubo sa sini.”Hulu. 10:22.

Bisan pa madugay ka na nga nagatinguha, makahimo ka gihapon sing daku nga pag-uswag sa espirituwal. Samtang nagatinguha ka sa pagpalambo sang kinahanglanon nga mga kinaiya kag sa pagpangabudlay sa kongregasyon, nga wala ginapabay-an ang imo pamilya, makahimo ka sing rekord sang pag-alagad nga indi malipatan. Kabay pa nga mangin malipayon ka pirme sa pag-alagad kay Jehova, ano man nga asaynment ang mabaton mo.

^ par. 2 Gin-islan ang mga ngalan sa sini nga artikulo.

^ par. 8 Ang mga prinsipio nga ginasambit sa sini nga artikulo maaplikar man sa mga nagahandum nga mangin ministeryal nga alagad. Ang mga kinahanglanon nga dapat nila malab-ot makita sa 1 Timoteo 3:8-10, 12, 13.