Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) SEPTIEMBRE 2014

Mga Pamangkot Gikan sa mga Bumalasa

Mga Pamangkot Gikan sa mga Bumalasa

Ang ginsiling bala ni David sa Salmo 37:25 kag ni Jesus sa Mateo 6:33 nagapahangop nga indi pagtugutan ni Jehova ang isa ka Cristiano nga makulangan sing bastante nga pagkaon?

Si David nagsulat nga “wala [sia] makakita nga ang matarung ginpabayaan ukon ang iya kaliwat nga nagapakilimos sing kalan-on.” Ang iya ginsiling nabase sa iya mismo naeksperiensiahan. Nahibaluan gid niya ang padayon nga pag-atipan sang Dios. (Sal. 37:25) Pero ang iya ginsiling wala nagapahangop nga wala sing sumilimba nga nag-antos ukon magaantos sang kinawad-on.

May mga tion nga naeksperiensiahan mismo ni David ang mabudlay katama nga mga sitwasyon. Ang isa sini natabo sang nagapalagyo sia kay Saul. Diutay lamang ang iya pagkaon, kag nangabay sia sing kalan-on para sa iya kag sa mga kaupod niya. (1 Sam. 21:1-6) Gani sa sini nga tion, si David nagapangita sing kalan-on. Pero, sa sining mabudlay nga sitwasyon, nahibaluan niya nga wala sia ginpabay-an ni Jehova. Ang matuod, wala kita sing mabasa nga nagpakitluoy si David sing pagkaon para mabuhi.

Sa Mateo 6:33, mabasa naton ang pasalig ni Jesus nga iaman sang Dios ang mga kinahanglanon sang iya matutom nga mga alagad nga nagauna sang mga intereses sang Ginharian. “Padayon nga pangitaa anay ang ginharian kag ang iya pagkamatarong,” siling ni Jesus, “kag ini tanan iban pa nga butang [lakip ang pagkaon, ilimnon, kag panapton] idugang sa inyo.” Pero ginpakita man ni Jesus nga bangod sang paghingabot, ang iya “mga utod” mahimo magutman. (Mat. 25:35, 37, 40) Natabo ini kay apostol Pablo. May mga tion nga nagutman sia kag gin-uhaw.2 Cor. 11:27.

Si Jehova nagsiling nga pagahingabuton kita sa lainlain nga paagi. Ayhan tugutan niya nga makaeksperiensia kita sing kinawad-on samtang nagabulig kita sa pagsabat sa mga panumbungon sang Yawa. (Job 2:3-5) Halimbawa, ang pila naton ka kauturan, kaangay sang mga ginpriso sa mga kampo konsentrasyon sang Nazi, nabudlayan gid bangod sang paghingabot. Ang pagdingot sing bastante nga pagkaon sa mga Saksi amo ang isa sa mapintas nga pamaagi sa pagbungkag sang ila integridad. Ang matutom nga mga Saksi nagpabilin nga matinumanon kay Jehova; wala niya sila ginpabay-an. Gintugutan niya nga maeksperiensiahan nila ini nga pagtilaw, subong nga gintugutan niya ang tanan nga Cristiano nga makaatubang sing lainlain nga pagtilaw. Pero wala sing duhaduha nga ginasakdag ni Jehova ang tanan nga nagaantos bangod sa iya ngalan. (1 Cor. 10:13) Maayo gid nga dumdumon naton ang ginsiling sang Filipos 1:29: “Ginhatag sa inyo ang pribilehiyo tungod kay Cristo, indi lamang agod magtuo kamo sa iya, kundi agod mag-antos man kamo tungod sa iya.”

Nagsaad si Jehova nga magaupod sia sa iya mga alagad. Halimbawa, ang Isaias 54:17 nagsiling: “Wala sing hinganiban nga ginhimo batok sa imo nga magauswag.” Ini kag ang kaangay sini nga mga saad nagagarantiya sing pangamlig sa katawhan sang Dios sa kabilugan. Pero subong indibiduwal, ang isa ka Cristiano mahimo makaeksperiensia sing mga pagtilaw, nga tubtob pa gani sa kamatayon.