Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Septiembre 2014

Mga Ginikanan—Bantayi ang Inyo Kabataan

Mga Ginikanan—Bantayi ang Inyo Kabataan

“Magmaukud ka sa paghibalo sang kahimtangan sang imo mga panong.”—HULU. 27:23.

1, 2. (a) Ano ang pila ka responsibilidad sang Israelinhon nga manugbantay? (b) Paano ang mga ginikanan kaangay sang mga manugbantay?

MABUDLAY gid ang kabuhi sang mga manugbantay sa Israel sang una. Indi lamang nga antuson nila ang init kag tugnaw kundi kinahanglan man nila amligan ang ila panong sa mga magahalit nga sapat ukon tawo. Regular nga ginatan-aw sang mga manugbantay ang karnero kag ginabulong ang nagamasakit ukon nasamaran. Ginahatagan nila sing pinasahi nga atension ang mga kordero bangod maluya pa sila sangsa daku na nga karnero.Gen. 33:13.

2 Sa pila ka paagi, ang Cristiano nga mga ginikanan mga manugbantay man, nga nagapakita sing mga kinaiya nga importante sa literal nga mga manugbantay. Responsibilidad nila nga padakuon ang ila kabataan sa “disiplina kag nagatuytoy nga panghunahuna ni Jehova.” (Efe. 6:4) Mahapos lang bala ini nga asaynment? Indi! Ang mga kabataan nagapakigbato sa mga propaganda ni Satanas, subong man sa ila indi himpit nga mga huyog. (2 Tim. 2:22; 1 Juan 2:16) Kon may kabataan ka, paano mo sila mabuligan? Binagbinagon naton ang tatlo ka butang nga mahimo mo para mabantayan ang imo kabataan—hibalua ang ila kahimtangan, pakan-a sila, kag giyahi sila.

 HIBALUA ANG KAHIMTANGAN SANG IMO KABATAAN

3. Ano ang buot silingon sang ‘paghibalo’ sang mga ginikanan sa “kahimtangan” sang ila kabataan?

3 Ang maayo nga manugbantay nagausisa sing maayo sa tagsa ka karnero para mapat-od nga mapagros ini. Mahimo mo man ang kaangay sini sa imo kabataan. Ang Biblia nagasiling nga ‘hibalua ang kahimtangan sang imo mga panong.’ (Hulu. 27:23) Para mahimo ini, dapat mo binagbinagon ang ginahimo, ginahunahuna, kag ginabatyag sang imo kabataan. Paano? Ang isa sa pinakamaayo nga mga paagi amo ang pagpakighambal pirme sa imo kabataan.

4, 5. (a) Anong praktikal nga mga suhestyon ang mahimo makabulig sa mga kabataan nga makig-istorya sa ila ginikanan? (Tan-awa ang piktyur sa umpisa sini nga artikulo.) (b) Ano ang ginhimo mo para indi matahap ang imo kabataan sa pagpakig-istorya sa imo?

4 Natalupangdan sang pila ka ginikanan nga ang komunikasyon mas mabudlay kon tin-edyer na ang ila kabataan, kay mahimo nga maglikaw sila kag masaw-ahan sa pagsugid sang ila ginahunahuna ukon nabatyagan. Kon matuod ini sa imo kabataan, ano ang puede mo himuon? Sa baylo nga piliton ang imo bata nga makighambal sa imo sing malawig kag serioso, tilawi nga makig-istorya sa ila sa relaks nga mga kahimtangan. (Deut. 6:6, 7) Ayhan kinahanglan mo sing dugang nga panikasog para mahimo ini. Mahimo mo sila updon sa paglakatlakat, pagbiyahe, paghampang, ukon sa mga hilikuton sa balay. Paagi sini, ang mga pamatan-on mangin relaks kag mas gusto nila nga makig-istorya sa imo.

5 Pero kamusta kon daw natahap gihapon ang imo bata sa pag-istorya? Mahimo mo tilawan ang lain nga paagi. Halimbawa, sa baylo nga pamangkuton sia kon kamusta ang iya adlaw, mahimo mo isugid sa iya ang imo adlaw. Posible nga isugid man niya ang natabo sa iya sa sina nga adlaw. Ukon para mahibaluan mo ang opinyon sang imo bata parte sa isa ka butang, pamangkuta sia sing mga pamangkot nga wala nagasentro sa iya. Mahimo mo sia pamangkuton kon ano ang pagtamod sang iya abyan parte sa amo nga butang. Dayon mahimo mo sia pamangkuton kon ano ang mahimo niya ilaygay sa iya abyan.

6. Paano mabatyagan sang imo kabataan nga may tion ka sa ila kag madali ka palapitan?

6 Siempre, para makig-istorya sa imo ang imo kabataan, dapat makita nila nga may tion ka sa ila kag madali ka palapitan. Kon daw masako pirme ang mga ginikanan, mahimo nga indi pag-isugid sang mga pamatan-on ang ila problema. Paano mo mapat-od nga madali ka palapitan? Indi lamang ini pagsiling sing, “Palapit ka lang sa akon sa bisan ano nga oras.” Dapat mabatyagan sang imo kabataan nga indi mo pagbalewalaon ang ila problema ukon maglalain dayon sa sini. Madamo nga ginikanan ang nangin huwaran sa sini. Ang 19 anyos nga si Kayla nagsiling: “Maistorya ko kay tatay ang tanan. Wala sia nagasaligbat, kag wala niya ako ginahukman; nagapamati lang sia. Dayon ginahatagan niya ako sing maayo gid nga laygay.”

7. (a) Paano mangin balanse ang mga ginikanan parte sa mga topiko kaangay sang pagnobyo ukon pagnobya? (b) Paano indi hungod nga mapaakig sang mga ginikanan ang ila kabataan?

7 Kon kaisa, kinahanglan ninyo istoryahan sang imo kabataan ang sensitibo nga mga butang, pareho sang pagnobyo ukon pagnobya. Kon ginahimo ini, pat-ura nga ginatudluan mo sila sa husto nga paagi. Sa pag-ilustrar: Ibutang ta nga nagkadto ka sa isa ka kalan-an kag nakita mo nga ang menu puro lang mga paandam parte sa makahililo nga pagkaon. Mahimo nga mahalin ka na lang kag mangita sing lain nga kalan-an. Amo man sini ang himuon sang imo kabataan kon magpalapit sila sa imo para pangayuon ang imo laygay, pero ang ginatanyag mo sa ila nga “menu” puro lang estrikto nga mga paandam. (Basaha ang Colosas 3:21.) Mangin balanse sa imo pagpakig-angot sa ila. Ang pamatan-on nga utod nga si Emily nagsiling: “Kon nagaistorya sa akon ang akon  mga ginikanan parte sa pagnobyo, wala nila ini ginahimo nga daw negatibo. Ginapadaku nila ang kalipay sa pagkilala sing maayo sa isa kag sa pagpangita sing makaupod sa kabuhi. Nakabulig ini sa akon nga mangin komportable sa pagpakighambal sa ila parte sa sini. Ang matuod, gusto ko isugid sa ila kon may nobyo ako sa baylo nga taguon ini.”

8, 9. (a) Ano ang mga benepisyo sang pagpamati nga wala nagasapar dayon? (b) Paano ka nangin madinalag-on sa pagpamati sa imo kabataan?

8 Parte sa ginsiling ni Kayla, mapakita mo nga madali ka palapitan paagi sa pagpamati sing mapailubon sa imo kabataan. (Basaha ang Santiago 1:19.) “Sadto,” siling sang nagasolo nga iloy nga si Katia, “indi gid ako mapailubon sa akon bata nga babayi. Ginasapar ko sia pirme. Natak-an ako mamati sa iya ukon indi ko lang gusto nga magproblema. Karon nga ginbag-o ko na ang akon panimuot, ginbag-o man sang akon bata ang iya panimuot. Mas nagakooperar na sia sa akon.”

Hibalua ang ila kahimtangan paagi sa pagpamati sa ila (Tan-awa ang parapo 3 asta 9)

9 Ang amay nga si Ronald may amo man sini nga eksperiensia sa iya tin-edyer nga bata nga babayi. “Sang ginsugid niya sa akon nga may naluyagan sia nga lalaki sa eskwelahan, naakig ako sang primero,” siling niya. “Pero sang ginpamalandungan ko kon paano nangin mapailubon kag makatarunganon si Jehova sa iya mga alagad, nahunahuna ko nga mas maayo kon hatagan ko sia sing kahigayunan nga mapabutyag ang iya nabatyagan antes ko sia tadlungon. Maayo gid kay ginhimo ko ini! Nahangpan ko na ang ginabatyag sang akon bata. Pagkatapos niya istorya, mas mahapos para sa akon nga makig-istorya sa iya sa mahigugmaon nga paagi. Nalipay ako kay ginabaton gid niya ang akon laygay. Nagsiling sia nga gusto gid niya bag-uhon ang iya panimuot.” Kon nagapakig-istorya ka pirme sa imo kabataan, mas mahangpan mo ang ila ginahunahuna kag balatyagon. Gani, labi mo sila nga mabuligan sa ila mga desisyon sa kabuhi. *

PAKAUNA ANG IMO KABATAAN

10, 11. Paano mo mabuligan ang imo kabataan para indi sila mapahilayo?

10 Ang maayo nga manugbantay nakahibalo nga ang kada isa sa iya mga karnero posible nga mapahilayo sa panong. Ayhan naganyat ini sa mga hilamon sa unhan kag dayon sa uluunhan pa gid, amo nga napahilayo na ini sa panong. Sing kaanggid, ang isa ka bata mahimo mapahilayo sing amat-amat pakadto sa espirituwal nga katalagman, bangod ginasulay  sang malain nga kaupdanan ukon kalingawan. (Hulu. 13:20) Paano mo sia mabuligan nga malikawan ini nga sitwasyon?

11 Kon nagatudlo sa imo kabataan, maghulag gilayon kon may nakita ka nga kinahanglan nila pauswagon. Buligi sila nga pabakuron ang ila Cristiano nga mga kinaiya. (2 Ped. 1:5-8) Ang regular nga pangpamilya nga pagsimba maayo gid nga tion sa paghimo sini. Parte sa sini nga kahimusan, ang Oktubre 2008 nga Ministeryo sa Ginharian nagsiling: “Ginapalig-on ang mga ulo sang pamilya nga tungdan ang ila responsibilidad kay Jehova sa pagpat-od nga may yara sila mapuslanon kag regular nga pangpamilya nga pagtuon sa Biblia.” Ginagamit mo bala sing maalamon ini nga tion para atipanon sa espirituwal ang imo kabataan? Saligi nga apresyahon gid sang imo kabataan ang pag-una mo sang ila espirituwal nga kinahanglanon.Mat. 5:3; Fil. 1:10.

Pakauna sila sing maayo (Tan-awa ang parapo 10 asta 12)

12. (a) Paano ang mga pamatan-on nakabenepisyo sa regular nga pangpamilya nga pagsimba? (Ilakip ang kahon nga “ Ginaapresyar Nila Ini.”) (b) Paano ka nakabenepisyo sa pangpamilya nga pagsimba?

12 Binagbinaga ang ginsiling sang tin-edyer nga si Carissa parte sa kon paano nakabenepisyo ang ila pamilya sa Pangpamilya nga Pagsimba. “Nanamian gid ako kay makatipon kami tanan kag makaistoryahanay. Samtang ginahimo namon ini, nagasuod kami kag nagahimo sing makalilipay nga handumanan. Regular gid si Tatay sa amon Pangpamilya nga Pagsimba. Makapalig-on gid kay importante ini para sa iya—amo nga nangin importante man ini sa akon. Nangin rason pa gid ini nga tahuron ko sia subong akon amay kag espirituwal nga ulo.” Ang pamatan-on nga utod nga si Brittney nagsiling: “Paagi sa pangpamilya nga pagsimba, nangin suod pa gid ako sa akon mga ginikanan. Nakita ko nga luyag nila pamatian ang akon mga problema kag nagaulikid gid sila. Nakabulig ini nga mangin malig-on kag nahiusa ang amon pamilya.” Maathag nga ang pagpakaon sa imo kabataan sa espirituwal—ilabi na sa pangpamilya nga pagsimba—isa ka panguna nga paagi para mangin maayo ka nga manugbantay. *

GIYAHI ANG IMO KABATAAN

13. Paano ang isa ka bata mapahulag nga mag-alagad kay Jehova?

13 Ang maayo nga manugbantay nagagamit sing sungkod sa paggiya kag sa pagpangapin sa iya panong. Ang isa sa panguna niya nga tulumuron amo nga giyahan ang iya mga karnero pakadto “sa maayo nga halalban.” (Ezeq. 34:13, 14) Subong ginikanan, indi bala nga kaangay man sini ang imo tulumuron sa espirituwal? Gusto mo nga giyahan ang imo kabataan nga mag-alagad kay Jehova. Gusto mo nga mabatyagan nila ang nabatyagan sang salmista nga nagsulat: “Nagakalipay ako sa paghimo sang imo kabubut-on, O Dios ko; ang imo kasogoan yari sa sulud sang akon tagiposoon.” (Sal. 40:8) Ang mga pamatan-on nga may amo sini nga apresasyon magadedikar sang ila kabuhi kay Jehova kag magapabawtismo. Siempre, dapat nga hamtong na sila sa paghimo sini kag may matuod nga handum nga alagdon si Jehova.

14, 15. (a) Ano dapat ang tulumuron sang Cristiano nga mga ginikanan? (b) Ngaa posible nga duhaduhaan sang isa ka pamatan-on ang matuod nga pagsimba?

14 Pero paano kon daw wala nagauswag sa espirituwal ang imo kabataan—ayhan nagaduhaduha pa gani sa ila pagtuo? Panikasugi nga ipatudok sa ila ang gugma kay Jehova nga Dios kag ang apresasyon sa tanan niya nga ginhimo. (Bug. 4:11) Dayon kon handa na sila, makahimo na sila sing personal nga desisyon parte sa pagsimba sa Dios.

15 Pero kamusta kon nagaduhaduha subong ang imo kabataan? Paano mo sila mabantayan kag mabuligan para marealisar nila nga ang pag-alagad kay Jehova amo gid ang pinakamaayo kag may nagadugay nga mga benepisyo? Tinguhai nga hibaluon kon ngaa nagaduhaduha  sila. Halimbawa, matuod bala nga ang imo bata wala nagaugyon sa mga panudlo sang Biblia, ukon wala lang sia sing kompiansa sa pagpangapin sini sa iya mga katubotubo? Matuod bala nga ginaduhaduhaan niya kon maalamon gid man ang mga talaksan sang Dios, ukon basi nasubuan lang sia ukon wala ginabaton sang iban?

Giyahi sila sa ila dalanon (Tan-awa ang parapo 13 asta 18)

16, 17. Paano mahimo mabuligan sang mga ginikanan ang ila kabataan nga makatigayon sing personal nga kaangtanan kay Jehova?

16 Ano man ang kabangdanan, mabuligan mo ang imo bata nga mabatuan ang mga pangduhaduha sa espirituwal. Paano? Ang isa ka panugda nga praktikal kag epektibo para sa madamo nga ginikanan amo ang paghibalo sa ginabatyag sang ila kabataan paagi sa pagpamangkot: “Para sa imo, ano ang isa ka Cristiano? Ano sa banta mo ang mga benepisyo sini para sa imo? Ano naman ang mga sakripisyo? Mas madamo bala ang mga sakripisyo kon ipaanggid sa mga benepisyo nga aton matigayon karon kag sa palaabuton? Ngaa?” Siempre, dapat mo ini ipamangkot nga ginagamit ang imo kaugalingon nga mga tinaga kag sa mainayuhon nga paagi nga nagapakita sing interes sa ila, indi nga daw imbestigador ka. Sa inyo paghambalanay, mahimo ninyo binagbinagon ang Marcos 10:29, 30. Mahimo gusto sang pila ka pamatan-on nga isulat ang ila ginahunahuna sa duha ka listahan—ang isa para sa mga sakripisyo kag ang isa para sa mga benepisyo. Paagi sa sini, mahimo mo mahibaluan ang ila mga problema kag mabuligan sila sa pagpangita sing mga solusyon. Kon kinahanglan naton gamiton ang Ginatudlo sang Biblia kag Gugma sang Dios nga mga libro sa pagtudlo sa mga interesado, indi bala nga labi naton ini nga gamiton sa aton mga kabataan! Ginahimo mo bala ini?

17 Sa ulihi, ang imo kabataan magadesisyon kon sin-o ang ila alagaron. Indi paghunahunaa nga ilugon nila gilayon ang imo pagtuo. Kinahanglan sila makatigayon sang ila personal nga kaangtanan kay Jehova. (Hulu. 3:1, 2) Kon daw nabudlayan ang bata sa paghimo sini, ngaa indi ka magsugod liwat? Buligi sia nga mangatarungan sa sini nga mga pamangkot: “Paano ko nahibaluan nga may Dios? Ano ang nagkumbinsi sa akon nga ginapabaloran gid ako ni Jehova nga Dios? Ngaa nagapati ako nga ang mga talaksan ni Jehova para gid sa akon kaayuhan?” Mga ginikanan, mangin maayo nga manugbantay paagi sa mapailubon nga paggiya sa inyo kabataan para mapamatud-an nila nga ang pag-alagad kay Jehova amo ang pinakamaayo. *Roma 12:2.

18. Paano mailog sang mga ginikanan ang Supremo nga Manugbantay nga si Jehova?

18 Gusto ilugon sang tanan nga matuod nga Cristiano ang Supremo nga Manugbantay. (Efe. 5:1; 1 Ped. 2:25) Kinahanglan gid mahibaluan sang mga ginikanan ang kahimtangan sang ila panong—ang ila hamili nga kabataan—kag himuon ang ila masarangan nga magiyahan sila sa mga pagpakamaayo nga ginatigana ni Jehova para sa ila. Gani, himua ang tanan agod mabantayan ang imo kabataan paagi sa padayon nga pagpadaku sa ila sa dalanon sang kamatuoran!

^ par. 9 Para sa dugang nga mga panugda, tan-awa ang Agosto 1, 2008 nga Ang Lalantawan, pahina 10-12.

^ par. 12 Para sa dugang nga impormasyon, tan-awa ang artikulo nga “Pangpamilya nga Pagsimba—Importante Gid Para sa Kaluwasan!” sa Oktubre 15, 2009 nga Ang Lalantawan, pahina 29-31.

^ par. 17 Para sa dugang nga impormasyon, tan-awa ang Pebrero 1, 2012 nga Ang Lalantawan, pahina 18-21.