Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Septiembre 2014

Dumduma ang mga Yara sa Bug-os Tion nga Pag-alagad

Dumduma ang mga Yara sa Bug-os Tion nga Pag-alagad

“Wala untat nga ginadumdom namon ang inyo binuhatan tungod sa pagtuo kag ang inyo mahigugmaon nga pagpangabudlay.”—1 TES. 1:3.

1. Ano ang ginbatyag ni Pablo sa mga makugi nga nagaalagad kay Jehova?

SI APOSTOL Pablo nagadumdom sa mga nagapangabudlay para sa maayong balita. Nagsulat sia: “Wala untat nga ginadumdom namon ang inyo binuhatan tungod sa pagtuo kag ang inyo mahigugmaon nga pagpangabudlay kag ang inyo pagbatas tungod sa inyo paglaum sa aton Ginuong Jesucristo sa atubangan sang aton Dios kag Amay.” (1 Tes. 1:3) Ginadumdom man ni Jehova ang mahigugmaon nga pagpangabudlay sang tanan nga matutom nga nagaalagad sa iya, diutay man ukon madamo ang ila nahimo depende sa ila mga sirkunstansia.Heb. 6:10.

2. Ano ang binagbinagon naton sa sini nga artikulo?

2 Madamo sa aton mga kauturan, sadto kag subong, ang nagsakripisyo sing daku para maalagad sing bug-os tion si Jehova. Tan-awon naton kon paano ang pila nag-alagad sang unang siglo. Usisaon man naton ang pila ka sahi sang bug-os tion nga pag-alagad subong kag binagbinagon kon paano naton madumdom ining pinalangga nga mga utod nga naghalad sang ila kaugalingon para mag-alagad sa pinasahi nga paagi.

 MGA CRISTIANO SANG UNANG SIGLO

3, 4. (a) Sa ano nga mga paagi nag-alagad ang iban sang unang siglo? (b) Paano naaman ang ila mga kinahanglanon?

3 Wala madugay pagkatapos sang iya bawtismo, ginsugdan ni Jesus ang isa ka hilikuton nga magalapnag sa bilog nga kalibutan. (Luc. 3:21-23; 4:14, 15, 43) Sang napatay sia, ginpangunahan sang iya mga apostoles ang pagpasangkad sini nga pagbantala. (Binu. 5:42; 6:7) Ang pila ka Cristiano, kaangay ni Felipe, nag-alagad subong ebanghelisador kag misyonero sa Palestina. (Binu. 8:5, 40; 21:8) Si Pablo kag ang iban pa naglakbay sa malayo. (Binu. 13:2-4; 14:26; 2 Cor. 1:19) Ang iban, kaangay nanday Silvano (Silas), Marcos, kag Lucas, nag-alagad man subong mga manugkopya ukon manunulat. (1 Ped. 5:12) Ang mga utod nga babayi nag-alagad kaupod sining matutom nga mga utod nga lalaki. (Binu. 18:26; Roma 16:1, 2) Ang ila makalilipay nga mga eksperiensia nakabulig para mangin makawiwili basahon ang Cristianong Griegong Kasulatan, kag ginapakita sini nga si Jehova nalipay gid sa pagdumdom sa iya mga alagad.

4 Paano nasuportahan sang bug-os tion nga mga alagad sang una ang ila materyal nga mga kinahanglanon? Kon kaisa, ginaabiabi sila kag ginabuligan sang pareho nila nga mga Cristiano, pero wala nila sila ginaobligar nga himuon ini. (1 Cor. 9:11-15) Ang pila ka indibiduwal kag mga kongregasyon kinabubut-on nga nagsuporta sa ila. (Basaha ang Binuhatan 16:14, 15; Filipos 4:15-18.) Si Pablo kag ang mga kaupod niya sa paglakbay nagtrabaho man sing part-time para masuportahan ang ila kinahanglanon.

BUG-OS TION NGA MGA ALAGAD SUBONG

5. Ano ang nabatyagan sang isa ka mag-asawa parte sa ila kabuhi sa bug-os tion nga pag-alagad?

5 Sa karon, madamo man ang nagapangabudlay sa lainlain nga sahi sang bug-os tion nga pag-alagad. (Tan-awa ang kahon nga “ Mga Sahi sang Bug-os Tion nga Pag-alagad.”) Paano nila ginatamod ang ila ginpili nga kabuhi? Puede mo ini ipamangkot sa ila, kag mahimo gid nga mapalig-on ka. Binagbinaga ang isa ka halimbawa: Ang isa ka utod nga nag-alagad subong regular payunir, espesyal payunir, misyonero, kag miembro sang pamilya Bethel sa iban nga pungsod nagsiling: “Para sa akon, ang pagsulod sa bug-os tion nga pag-alagad amo ang isa sa pinakamaayo nga desisyon nga nahimo ko. Sang 18 anyos ako, nabudlayan ako sa pagdesisyon kon bala maeskwela ako sa unibersidad, matrabaho sing bug-os tion, ukon mapayunir. Base sa akon eksperiensia, wala gid ginakalimtan ni Jehova ang imo mga sakripisyo para maalagad sia sing bug-os tion. Nagamit ko ang mga talento ukon mga ikasarang nga ginhatag ni Jehova sa akon sa mga paagi nga indi ko mahimo kon ginpili ko ang karera sa kalibutan.” Ang iya asawa nagsiling: “Ang tagsa ka asaynment nagbulig sa akon nga mag-uswag. Pirme namon mabatyagan ang pag-amlig kag paggiya ni Jehova sa mga paagi nga indi gid matabo kon nagpabilin kami sa amon medyo masulhay nga kabuhi. Ginapasalamatan ko si Jehova kada adlaw bangod sa amon kabuhi sa bug-os tion nga pag-alagad.” Gusto mo man bala ini nga kabuhi?

6. Ano ang ginabatyag ni Jehova parte sa aton pag-alagad sa iya?

6 Matuod, bangod sa mga sirkunstansia, ang iban indi pa makapakigbahin sa ministeryo sing bug-os tion. Makasalig kita nga ginapabaloran man ni Jehova ang ila bug-os kalag nga mga panikasog. Binagbinaga ang mga ginhingadlan ni Pablo sa Filemon 1-3, lakip na ang tanan nga miembro sang kongregasyon sa Colosas. (Basaha.) Gin-apresyar sila ni Pablo, kag amo man ni Jehova. Sing kaanggid, ginaapresyar man sang aton Amay sa langit ang imo pag-alagad. Pero paano mo masuportahan ang mga nagaalagad sa karon sing bug-os tion?

BULIGI ANG MGA PAYUNIR

7, 8. Ano ang nadalahig sa pagpayunir, kag paano ang iban sa kongregasyon makabulig sa mga payunir?

7 Kaangay sang mga ebanghelisador sang unang siglo, ang makugi nga mga payunir pagpalig-on gid sa mga kongregasyon. Madamo  ang nagahinguyang sing 70 ka oras kada bulan sa ministeryo. Paano mo sila mabuligan?

8 Ang payunir nga babayi nga si Shari nagsiling: “Ang mga payunir daw mabakod tulukon, kay ara sila sa latagon kada adlaw. Pero nagakinahanglan sila gihapon sing pagpalig-on.” (Roma 1:11, 12) Ang isa pa ka utod nga babayi nga nakapayunir sing pila ka tuig nagsiling parte sa mga payunir sa ila kongregasyon: “Wala untat sila nga nagapangabudlay. Kon ang iban magpasakay sa ila, mag-agda sa ila sa pagkaon, magbulig sa ila plete ukon iban pa nga pinansial nga suporta, ginapasalamatan gid nila ini. Ginapakita sini nga nagaulikid ka gid sa ila.”

9, 10. Ano ang ginhimo sang iban para mabuligan ang mga payunir sa ila kongregasyon?

9 Gusto mo bala buligan ang mga payunir sa ministeryo? Ang payunir nga si Bobbi nagsiling: “Kinahanglan namon ang dugang nga suporta sa sulod sang isa ka semana.” Ang pareho niya nga payunir sa amo man nga kongregasyon nagsiling: “Problema gid ang pagpangita sing kaupod kon hapon.” Ang isa ka utod nga babayi nga nagaalagad na karon sa Bethel sa Brooklyn malipayon nga naghinumdom sang iya pagpayunir: “Ang isa ka utod nga babayi nga may salakyan nagsiling, ‘Kon wala ka sing makaupod, tawgi lang ako, kay updan ta ka.’ Ginsalbar gid niya ang akon pagpayunir.” Ang utod nga si Shari nagsiling: “Pagkatapos sang ministeryo, ang di-minyo nga mga payunir masami nagaisahanon. Kon kaisa, mahimo mo sila agdahon sa inyo pangpamilya nga pagsimba. Ang pag-upod sa ila sa iban pa nga hilikuton nagabulig man sa ila nga magpabilin nga mabakod.”

10 Sa paghinumdom sang iya pagpayunir sang una upod sa iban pa nga di-minyo nga utod, ang isa ka utod nga babayi nga halos 50 ka tuig na sa bug-os tion nga pag-alagad nagsiling: “Ang amon mga gulang nagabisita sa mga payunir kada duha ka bulan. Ginakamusta nila ang amon panglawas kag trabaho kag kon bala may mga problema kami. Sinsero gid sila sa sini. Nagakadto sila sa amon apartment para mahibaluan kon bala kinahanglan namon ang bulig.” Mahimo ginapahanumdom sini sa imo ang apresasyon ni apostol Pablo sa pag-amuma sa iya sang isa ka pamilyado nga tawo sa Efeso.2 Tim. 1:18.

11. Ano ang nadalahig sa pag-alagad subong espesyal payunir?

11 Pagpakamaayo gid sa iban nga kongregasyon ang mga espesyal payunir nga nagaalagad upod sa ila. Madamo sini nga mga utod ang nagahinguyang  sing 130 ka oras kada bulan sa ministeryo. Bangod sini kag sa ila pagbulig sa iban pa nga paagi, halos wala na sila sing tion para sa sekular nga trabaho. Ang sanga talatapan nagaaman sa ila sing nagakaigo nga allowance kada bulan agod makakonsentrar sila sa ministeryo.

12. Paano ang mga gulang kag ang iban makabulig sa mga espesyal payunir?

12 Paano naton mabuligan ang mga espesyal payunir? Ang isa ka gulang sa sanga talatapan nga nakaistorya sa madamo nga espesyal payunir nagsiling: “Kinahanglan sila istoryahon sang mga gulang, hibaluon ang ila kahimtangan, kag dayon binagbinagon kon paano nila sila mabuligan. Ang iban nga kauturan nagahunahuna nga ang mga espesyal payunir naatipan gid sing maayo bangod may allowance sila, pero ang mga kauturan makabulig sa ila sa madamo nga paagi.” Kaangay sang mga regular payunir, ginaapresyar man sang mga espesyal payunir kon may kaupod sila sa ministeryo. Makabulig ka bala sa sini nga paagi?

BULIGI ANG MGA NAGALAKBAY NGA MANUGTATAP

13, 14. (a) Ano ang dapat naton dumdumon parte sa mga manugtatap sang sirkito? (b) Ano sa banta mo ang puede mo himuon para mabuligan ang mga nagaalagad sa paglakbay nga hilikuton?

13 Ang mga manugtatap sang sirkito kag ang ila mga asawa masami nga mabakod gid sa espirituwal. Matuod gid ini, pero kinahanglan man nila ang pagpalig-on, kaupod sa ministeryo, kag nagakaigo nga kalingawan. Kamusta kon nagmasakit sila kag naospital, ayhan nagakinahanglan sing operasyon ukon terapiya? Makapaumpaw gid para sa ila kon ang mga kauturan magbulig sa ila mga kinahanglanon kag magpakita sing interes. Ayhan madumduman naton sa sini si Lucas, ang “hinigugma nga manugbulong” kag manunulat sang Binuhatan, nga nagpakita sing pag-ulikid kay Pablo kag sa mga kaupod niya sa paglakbay.Col. 4:14; Binu. 20:5–21:18.

14 Ang mga nagalakbay nga manugtatap kag ang ila mga asawa nagakinahanglan sing suod nga mga abyan. Ang isa ka manugtatap sang sirkito nagsulat: “Daw nahibaluan sang akon mga abyan kon san-o ako nagakinahanglan sing pagpalig-on. Ginapamangkot nila ako, kag nakabulig ini para masugid ko ang akon problema. Daku gid sila nga bulig bisan pa magpamati lang sila sa akon.” Ang mga manugtatap sang sirkito kag ang ila mga asawa nagaapresyar gid sa interes nga ginapakita sang ila mga kauturan.

BULIGI ANG MGA MIEMBRO SANG PAMILYA BETHEL

15, 16. Ano ang hilikuton sang mga nagaalagad sa Bethel kag mga Assembly Hall, kag paano naton sila mabuligan?

15 Sa bilog nga kalibutan, daku gid ang nabulig sang mga nagaalagad sa Bethel kag mga Assembly Hall sa hilikuton sang Ginharian para sa mga lugar nga ginatatap sang ila sanga talatapan. Kon may mga Bethelite sa inyo kongregasyon ukon sirkito, paano mo mapakita nga ginadumdom mo sila?

16 Sang bag-o pa lang sila sa Bethel, mahimo nga nasubuan sila, kay nagbiya sila sa ila mga pamilya ukon suod nga mga abyan. Nagapasalamat gid sila kon ang kaupod nila nga mga Bethelite kag ang bag-o nila nga kongregasyon makig-abyan sa ila! (Mar. 10:29, 30) Ang ila mga iskedyul sa trabaho wala nagaupang sa ila sa pagtambong sa mga miting kag sa paggua sa latagon kada semana. Pero kon kaisa, ang mga Bethelite may dugang nga mga hilikuton. Kon nahangpan ini sang mga kongregasyon kag ipakita nga ginaapresyar nila ang mga Bethelite kag ang ila mga hilikuton, ang tanan makabenepisyo gid.Basaha ang 1 Tesalonica 2:9.

BULIGI ANG MGA NAGAALAGAD SING BUG-OS TION SA IBAN NGA PUNGSOD

17, 18. Ano ang hilikuton sang mga nagaalagad sa iban nga pungsod?

17 Ang mga nagabaton sing asaynment nga mag-alagad sa iban nga pungsod mahimo mamag-uhan gid sa mga pagkaon, lenguahe, kustombre, kag mga kahimtangan. Ngaa ginbaton nila ini nga asaynment?

 18 Ang iban sa ila mga misyonero, nga panguna nga nagaalagad sa ministeryo sa latagon diin madamo ang makabenepisyo sang ila pinasahi nga paghanas. Ang sanga talatapan nagaaman sa mga misyonero sing nagakaigo nga ilistaran kag allowance para masuportahan ang ila panguna nga mga kinahanglanon. Ang iban nga nagaalagad sa iban nga pungsod naasayn sa pag-alagad sa sanga talatapan ukon sa pagbulig sa konstruksion sang mga pasilidad sang sanga, opisina sang remote translation, Assembly Hall, ukon Kingdom Hall. Ginaamanan sila sing pagkaon, nagakaigo nga ilistaran, kag iban pa nga kinahanglanon. Kaangay sang mga miembro sang pamilya Bethel, regular sila nga nagatambong sa mga miting kag nagapakigbahin sa ministeryo, gani pagpakamaayo gid sila sa madamo nga paagi.

19. Ano ang dapat naton dumdumon parte sa mga nagaalagad sa iban nga pungsod?

19 Paano mo madumdom ining bug-os tion nga mga alagad? Dumduma, ilabi na sa umpisa, nga mahimo indi sila kauyon sang aton mga pagkaon. Dumduma ini kon ginaagda mo sila nga magkaon; pamangkuta sila anay kon ano ang mauyunan nila ukon gusto tilawan. Mangin mapailubon samtang ginatun-an nila ang inyo lenguahe ukon mga kustombre. Mahimo nagakinahanglan pa sing tion antes nila mahangpan ang tanan mo nga ginahambal, pero mahimo mo sila mabuligan sing mainayuhon sa eksakto nga pagmitlang. Gusto nila makatuon!

20. Paano naton madumdom ang bug-os tion nga mga alagad kag ang ila mga ginikanan?

20 Ang bug-os tion nga mga alagad nagatigulang, amo man ang ila mga ginikanan. Kon Saksi ang ila mga ginikanan, mahimo nga gusto gid nila nga magpabilin ang ila kabataan sa ila asaynment. (3 Juan 4) Siempre, himuon gid sang bug-os tion nga mga alagad ang ila masarangan kon kinahanglan sang ila mga ginikanan ang pag-atipan kag pirme sila magaduaw sa ila kon posible. Pero ang mga malapit sa ginikanan sang mga nagaalagad sing bug-os tion mahimo makabulig paagi sa pag-atipan sa ila mga ginikanan kon kinahanglanon. Dumduma nga ang bug-os tion nga mga alagad may hamili nga mga responsibilidad sa pinakaimportante nga hilikuton sa kalibutan karon. (Mat. 28:19, 20) Ikaw bala ukon ang inyo kongregasyon makahatag sing bulig kon ang mga ginikanan sang bug-os tion nga mga alagad nagakinahanglan sini?

21. Ano ang ginabatyag sang mga nagaalagad sing bug-os tion sa bulig kag pagpalig-on sa ila sang iban?

21 Ang mga nagasulod sa bug-os tion nga ministeryo nagahimo sini, indi bangod sa kuarta, kundi agod maghatag kay Jehova kag sa iban. Ginaapresyar gid nila ang inyo bulig. Ang isa ka utod nga babayi nga nagaalagad sa iban nga pungsod nagpabutyag sang nabatyagan sang madamo: “Bisan ang isa lang ka sulat nga nagapabutyag sang apresasyon nagapakita nga ang iban nagadumdom sa imo kag nalipay sila sa imo ginahimo.”

22. Ano ang imo pagtamod sa bug-os tion nga pag-alagad?

22 Ang pag-alagad kay Jehova sing bug-os tion amo gid ang pinakamaayo nga kabuhi. May kabudlayan ini, pero may matun-an ka kag mangin malipayon. Kag maayo gid ini nga paghanda para sa wala sing katapusan kag makalilipay nga pag-alagad sang tanan nga mga matutom kay Jehova sa idalom sang Ginharian sang Dios. Kabay pa nga kita tanan ‘wala untat nga magadumdom sang binuhatan tungod sa pagtuo kag sang mahigugmaon nga pagpangabudlay’ sang bug-os tion nga mga alagad.1 Tes. 1:3.