Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) AGOSTO 2014

‘Panumbalik Ka kag Pabakura ang Imo mga Kauturan’

‘Panumbalik Ka kag Pabakura ang Imo mga Kauturan’

NAGHILIBION gid si Pedro pagkatapos niya mapanghiwala si Jesus. Bisan pa nabudlayan ang apostol nga makapanumbalik sa espirituwal nga pagkabalanse, gusto ni Jesus nga gamiton sia para buligan ang iban. Gani, si Jesus nagsiling sa iya: “Kon makapanumbalik ka na, pabakura ang imo mga kauturan.” (Luc. 22:32, 54-62) Si Pedro nangin isa sa mga haligi sang Cristianong kongregasyon sang unang siglo. (Gal. 2:9) Sing kaanggid, ang isa nga gulang sang una mahimo mag-abaga liwat sina nga responsibilidad kag mangin malipayon sa pagpabakod sa iya mga masigkatumuluo.

Ang iban nga manugtatap sang una mahimo nga nataktak, kag nagbatyag sing kapaslawan. Si Julio, * nga gulang sa Bagatnan nga Amerika sing sobra 20 ka tuig nagsiling: “Nangin daku nga bahin sang akon kabuhi ang paghanda sing mga pamulongpulong, pagbisita sa mga utod, kag pagtatap sa mga miembro sang kongregasyon! Gulpi lang nga nadula ini tanan, gani daw may kulang ang akon kabuhi. Masakit gid ini.” Sa karon, nakabalik na si Julio sa pagkagulang.

“KABIGA NINYO NGA BUG-OS NGA KALIPAY”

Ang disipulo nga si Santiago nagsulat: “Kabiga ninyo nga bug-os nga kalipay, mga kauturan ko, kon nagaatubang kamo sang nanuhaytuhay nga pagtilaw.” (Sant. 1:2) Ginpatuhuyan ni Santiago ang mga pagtilaw nga resulta sang paghingabot kag sang aton pagkadihimpit. Ginsambit niya ang mga kailigbon, paboritismo, kag iban pa. (Sant. 1:14; 2:1; 4:1, 2, 11) Mahimo nga masakit ang pagdisiplina ni Jehova sa aton. (Heb. 12:11) Pero ina nga mga pagtilaw indi dapat magdula sang aton kalipay.

Bisan pa nadulaan kita sing katungdanan sa kongregasyon, may kahigayunan gihapon kita nga mausisa ang kalidad sang aton pagtuo kag mapakita ang aton gugma kay Jehova. Mapamalandungan man naton kon ngaa nagaalagad kita. Para bala ini sa aton kaayuhan,  ukon gintinguhaan naton ina nga pribilehiyo bangod sang aton gugma sa Dios kag kumbinsido kita nga sia ang tag-iya sang kongregasyon kag takus ini nga atipanon? (Binu. 20:28-30) Ang mga gulang sadto nga malipayon nga nagapadayon sa sagrado nga pag-alagad nagapamatuod sa tanan, lakip na kay Satanas, nga matuod ang ila gugma kay Jehova.

Sang gindisiplina si Hari David bangod sa serioso nga sala, ginbaton niya ini kag ginpatawad sia. Si David nag-amba: “Bulahan sia nga ang iya paglalis ginpatawad, nga ang iya sala gintabonan. Bulahan ang tawo nga wala ginapasangti sang GINOO sang kalautan, nga sa iya espiritu walay limbong.” (Sal. 32:1, 2) Gintadlong si David sang disiplina, kag pat-od nga nakabulig ini agod mangin mas maayo sia nga manugbantay sang katawhan sang Dios.

Sa masami, ang mga nakabalik sa pagkagulang nangin mas maayo nga mga manugbantay. “Mas nahibaluan ko na karon kon paano atipanon ang mga nakasala,” siling sang isa nga nakabalik sa pagkagulang. Ang isa pa ka gulang nagsiling: “Mas ginapabaloran ko karon ang akon pribilehiyo sa pag-alagad sa mga kauturan.”

MAKABALIK KA BALA?

“Indi [ni Jehova] pagdumdumon sing dayon ang aton mga kasaypanan,” sulat sang salmista. (Sal. 103:9NW) Gani indi gid kita maghunahuna nga indi na pagsaligan liwat sang Dios ang tawo nga nakahimo sadto sing serioso nga sala. “Nasakitan gid ako sa akon kapaslawan,” siling ni Ricardo, nga nataktak pagkatapos sang madamo nga tuig nga pag-alagad subong gulang. “Madugay ako nga nagbatyag nga indi takus, kag nagpugong ini sa akon nga magbalik sa pag-alagad sa mga kauturan bilang manugtatap. Nadulaan ako sing kompiansa nga mapamatud-an ko liwat nga masaligan ako. Pero bangod nalipay ako sa pagbulig sa iban, nakadumala ako sing mga pagtuon sa Biblia, napalig-on ko ang mga kauturan sa Kingdom Hall, kag nakaupod sila sa ministeryo. Nakabulig ini sa akon nga matigayon liwat ang kompiansa, kag karon gulang na ako liwat.”

Ginabuligan ni Jehova ang mga lalaki nga mapanumbalik ang ila kalipay kag handum nga mag-alagad liwat

Ang pagtanom sing kaakig nagapugong sa utod nga mag-alagad subong gulang. Maayo gid nga ilugon naton ang alagad ni Jehova nga si David, nga nalagyo sa mahisaon nga si Hari Saul! Wala nagbalos si David  kay Saul, bisan pa may mga kahigayunan sia. (1 Sam. 24:4-7; 26:8-12) Sang napatay si Saul sa inaway, nasubuan gid si David, kag gintawag niya si Saul kag ang anak sini nga si Jonatan nga mga “hiligugmaon kag manayanaya.” (2 Sam. 1:21-23) Wala gid nagdumot si David.

Kon pamatyag mo biktima ka sang indi pag-intiendihanay ukon inhustisya, indi pagtuguti nga mangibabaw ang kaakig sa imo hunahuna. Halimbawa, sang nataktak si William sa pagkagulang pagkatapos sang mga 30 ka tuig nga pag-alagad sa sini nga pribilehiyo sa Britanya, naakig sia sa pila ka gulang. Ano ang nakabulig kay William nga mangin balanse liwat? “Nakabulig sa akon ang pagbasa sang libro sang Job,” siling niya. “Kon ginbuligan ni Jehova si Job nga mag-uliay sila sang iya tatlo ka abyan, buligan man Niya ako nga makighidait sa Cristianong mga gulang!”Job 42:7-9.

GINAPAKAMAAYO ANG NAGAALAGAD LIWAT SUBONG MANUGBANTAY

Kon nagdesisyon ka nga mag-untat sa pagbantay sa panong sang Dios, maayo nga binagbinagon mo kon ngaa ginhimo mo ini. Bangod bala sa tuman kadamo nga problema? Nangin mas importante bala sa imo ang iban nga butang? Naluyahan ka bala bangod sa mga di-kahimpitan sang iban? Ano man ang rason, dumduma nga mas daku ang imo nabulig sa iban sang gulang ka pa. Ang imo mga pamulongpulong nagpalig-on sa ila, ang imo halimbawa nagpabakod sa ila, kag ang imo mga pagduaw nakabulig sa ila nga mabatas ang mga pagtilaw. Ang imo hilikuton subong matutom nga gulang nakapahalipay kay Jehova, kag amo man sa imo.Hulu. 27:11.

Pamatud-i ang imo gugma kay Jehova paagi sa malipayon nga pagpakigbahin sa sagrado nga pag-alagad

Ginabuligan ni Jehova ang mga lalaki nga mapanumbalik ang ila kalipay kag handum nga manguna sa kongregasyon. Kon naghalin ka ukon nataktak sa pagkagulang, mahimo ka liwat ‘magtinguha sa palangakuan sang manugtatap.’ (1 Tim. 3:1) “Wala [si Pablo] mag-untat sa pagpangamuyo” nga ang mga Cristiano sa Colosas mapuno sing sibu nga ihibalo sang kabubut-on sang Dios “agod maglakat sing takus kay Jehova sa tuyo nga pahamut-an sia sing bug-os.” (Col. 1:9, 10) Kon nakabalik ka sa pagkagulang, pangabaya ang bulig ni Jehova para mangin mabakod ka, mapailubon, kag malipayon. Sa sining katapusan nga mga adlaw, kinahanglan sang katawhan sang Dios ang espirituwal nga pagpalig-on sang mahigugmaon nga mga manugbantay. May ikasarang ka bala kag kahanda sa pagpabakod sa imo mga kauturan?

^ par. 3 Gin-islan ang pila ka ngalan.