Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) AGOSTO 2014

Pamatii ang Tingog ni Jehova sa Tanan nga Tion

Pamatii ang Tingog ni Jehova sa Tanan nga Tion

“Ang imo mga idulungug magapamati sang polong sa likod nimo, nga nagasiling, ‘Ini amo ang dalan.’”ISA. 30:21.

1, 2. Paano nagapakigkomunikar si Jehova sa iya mga alagad?

SA BILOG nga kasaysayan sang Biblia, nabaton sang mga indibiduwal ang giya ni Jehova sa lainlain nga paagi. Nagpakig-istorya ang Dios sa iban paagi sa mga anghel, mga palanan-awon, ukon mga damgo, para ipakita sa ila ang matabo sa palaabuton. Ginhatagan man sila ni Jehova sing espesipiko nga mga asaynment. (Num. 7:89; Ezeq. 1:1; Dan. 2:19) Ang iban nakabaton sing direksion paagi sa mga tawo nga representante ni Jehova nga nagaalagad sa dutan-on nga bahin sang iya organisasyon. Sa ano man nga paagi nga nabaton sang katawhan ni Jehova ang iya pulong, ang mga nagtuman sang iya mga instruksion ginpakamaayo.

2 Sa karon, ginagiyahan ni Jehova ang iya katawhan paagi sa Biblia, iya balaan nga espiritu, kag kongregasyon. (Binu. 9:31; 15:28; 2 Tim. 3:16, 17) Maathag katama ang giya nga ginahatag niya sa aton nga daw ‘ang aton mga idulungug nagapamati sang polong sa likod naton, nga nagasiling, “Ini amo ang dalan, lakat kamo sa sini.”’ (Isa. 30:21) Ginapalab-ot man ni Jesus ang tingog ni Jehova sa aton samtang ginatuytuyan niya ang kongregasyon paagi sa “matutom kag mainandamon nga ulipon.” (Mat. 24:45) Kinahanglan gid naton sundon ini nga giya kag panuytoy, kay ang aton pagtigayon sing kabuhi nga walay katapusan nagadepende sa aton pagkamatinumanon.Heb. 5:9.

3. Ano ang mahimo mag-upang sa pagtuman naton sa giya ni Jehova? (Tan-awa ang piktyur sa umpisa sini nga artikulo.)

3 Katuyuan ni Satanas nga Yawa nga balabagan ang nagaluwas-kabuhi  nga giya halin kay Jehova. Dugang pa, ang aton mismo “tagiposoon malimbongon” amo nga maupangan sini ang aton pagtuman sa mga instruksion ni Jehova. (Jer. 17:9) Gani, binagbinagon naton kon paano maatubang ang mga balagbag nga nagapabudlay sa aton pagpamati sa tingog sang Dios. Binagbinagon man naton kon paano ang suod nga komunikasyon kay Jehova nagaamlig sa aton kaangtanan sa iya ano man ang aton kahimtangan.

PAG-ATUBANG SING MADINALAG-ON SA MGA PAHITO NI SATANAS

4. Paano ginatinguhaan ni Satanas nga impluwensiahan ang panghunahuna sang mga tawo?

4 Ginatinguhaan ni Satanas nga impluwensiahan ang panghunahuna sang mga tawo paagi sa butig nga impormasyon kag malimbungon nga propaganda. (Basaha ang 1 Juan 5:19.) Luwas sa naimprinta nga materyal, ang mga impormasyon sa bilog nga kalibutan mapalab-ot—lakip na sa malayo nga mga lugar—paagi sa mga radyo, TV, kag Internet. Makabenepisyo kita sa pila sini nga mga impormasyon, pero sa masami nagapasanyog ini sang mga paggawi kag mga talaksan nga supak sa iya ni Jehova. (Jer. 2:13) Halimbawa, ginapagua sang mga balita kag industriya sa kalingawan nga ang pagpakasal sang pareho nga lalaki ukon babayi ginabaton na, kag madamo ang nagabatyag nga tama ka estrikto ang ginasiling sang Biblia parte sa homoseksuwalidad.1 Cor. 6:9, 10.

5. Paano naton malikawan nga maanod sang mga propaganda ni Satanas?

5 Paano malikawan sang mga nagahigugma sa pagkamatarong sang Dios nga maanod sa nagabaha nga mga propaganda ni Satanas? Paano nila mahibaluan ang maayo sa malain? Paagi ‘sa pagtalupangud sono sa polong sang Dios.’ (Sal. 119:9) Ang nasulat nga Pulong sang Dios nagaunod sing importante nga giya nga nagabulig sa aton nga mahibaluan ang kinatuhayan sang matuod nga impormasyon sa malimbungon nga propaganda. (Hulu. 23:23) Ginkutlo ni Jesus ang Kasulatan nga nagasiling nga “ang tawo mabuhi, . . . sa tagsa ka pulong nga nagagua sa baba ni Jehova.” (Mat. 4:4) Dapat naton mahibaluan kon paano maaplikar ang mga prinsipio sang Biblia sa aton kabuhi. Halimbawa, madugay pa antes ginrekord ni Moises ang kasuguan ni Jehova parte sa pagpanghilahi, nahangpan sang pamatan-on nga si Jose nga ini nga paggawi sala batok sa Dios. Wala gid niya ginpensar nga supakon si Jehova sang ginhaylo sia sang asawa ni Potifar nga maghimo sing malain. (Basaha ang Genesis 39:7-9.) Bisan pa padayon sia nga ginapilit, wala gid gintugutan ni Jose ang tingog sang asawa ni Potifar nga maglabaw sa tingog sang Dios. Agod makilala ang husto kag sala, importante gid ang pagpamati sa tingog ni Jehova kag balewalaon ang wala untat nga gahod sang propaganda ni Satanas.

6, 7. Ano ang dapat naton himuon para malikawan ang malaut nga laygay ni Satanas?

6 Tuman na gid kadamo ang nagasumpakilay nga mga panudlo kag doktrina sang mga relihion amo nga madamo ang nagabatyag nga wala sing pulos ang pagpangita sing matuod nga relihion. Pero, ginaaman ni Jehova sing maathag ang kamatuoran sa mga luyag magpamati sa iya. Dapat kita magdesisyon kon sin-o ang aton pamatian. Bangod imposible mamati sa duha ka tingog sing dungan, dapat naton ‘makilala ang tingog’ ni Jesus kag mamati sa  iya. Sia ang gintangdo ni Jehova nga mag-atipan sa Iya mga karnero.Basaha ang Juan 10:3-5.

7 “Talupangda ang inyo ginapamatian,” siling ni Jesus. (Mar. 4:24) Ang laygay ni Jehova maathag kag husto, pero dapat naton ini talupangdon kag pamatian paagi sa paghanda sang aton tagipusuon sa pagbaton sini. Kon indi kita maghalong, mahimo mamati kita sa malaut nga laygay ni Satanas imbes sa mahigugmaon nga laygay sang Dios. Indi pagtuguti ang kalibutanon nga mga musika, video, palaguaon sa TV, libro, kaupdanan, manunudlo, kag mga eksperto nga magkontrol sa imo kabuhi.Col. 2:8.

8. (a) Paano kita madala sang aton tagipusuon sa mga pahito ni Satanas? (b) Ano ang matabo sa aton kon balewalaon naton ang mga paandam?

8 Nahibaluan ni Satanas nga may huyog kita nga magpakasala, kag ginatinguhaan niya nga madala kita sini. Kon ginahimo ini ni Satanas sa aton, mangin mabudlay ang paghupot sang aton integridad. (Juan 8:44-47) Paano naton ini maatubang sing madinalag-on? Binagbinaga ang natabo sa isa ka tawo nga nawili sa temporaryo nga kalipay amo nga nakahimo sia sing sala nga sa pamatyag niya indi gid niya mahimo. (Roma 7:15) Ano ang kabangdanan sini? Mahimo nga amat-amat nga wala na sia nagapamati sa tingog ni Jehova. Mahimo nga wala niya matalupangdan ang mga paandam kon ano ang nagakatabo sa iya tagipusuon ukon hungod niya nga ginabalewala ini. Halimbawa, mahimo wala na sia nagapangamuyo, talagsa na lang nagapakigbahin sa ministeryo, ukon nagapalya na sa mga miting. Sang ulihi, nagpadala sia sa iya huyog kag nakahimo sing nahibaluan niya nga sala. Malikawan naton ining malain nga resulta kon nagapabilin kita nga alisto sa mga paandam kag nagahulag dayon para tadlungon ang mga butang. Kag kon nagapamati kita sa tingog ni Jehova, indi naton pagsapakon ang mga ideya sang mga apostata.Hulu. 11:9.

9. Ngaa importante gid nga temprano pa mahibaluan ang makasasala nga mga huyog?

9 Kon temprano pa mahibaluan ang balatian, mahimo maluwas ang kabuhi sang isa. Sing kaanggid, malikawan man naton ang malain nga resulta kon mahibaluan dayon naton ang mga huyog nga mahimo magresulta sa tentasyon. Kon makita naton ini nga mga huyog, maalamon gid nga maghulag gilayon, antes pa kita ‘madakpan ni Satanas nga buhi para sa iya kabubut-on.’ (2 Tim. 2:26) Ano ang aton himuon kon matalupangdan naton nga ginatugutan naton ang aton mga panghunahuna kag huyog nga ipalayo kita sa mga ginapatuman ni Jehova? Dapat kita magbalik gilayon sa iya sing mapainubuson kag pamatian ang iya laygay sing tinagipusuon. (Isa. 44:22) Dapat marealisar naton nga ang sala nga mga desisyon makahalit sing daku sa aton, amo nga mahimo kita mag-antos sa sining sistema sang mga butang. Mas maayo  gid nga likawan naton nga magpahilayo paagi sa paghulag gilayon agod malikawan ang serioso nga sala!

Paano ang maayo nga espirituwal nga rutina nagaamlig sa imo sa mga pahito ni Satanas? (Tan-awa ang parapo 4-9)

PAGDAUG SA BUGAL KAG KAKAGOD

10, 11. (a) Ano ang pila ka palatandaan sang bugal? (b) Ano ang aton matun-an sa malain nga ginhimo nanday Kora, Datan, kag Abiram?

10 Dapat naton dumdumon nga mahimo kita mapatalang sang aton tagipusuon. May daku gid nga impluwensia sa aton ang makasasala nga mga huyog! Halimbawa sa sini amo ang bugal kag kakagod. Binagbinaga kon paano ini nga mga batasan makaupang sa aton pagpamati sa tingog ni Jehova kag magresulta sa makahalalit nga dalanon. Ang bugalon nga tawo nagapadaku gid sang iya kaugalingon. Nagabatyag sia nga mahimo niya ang tanan niya nga gusto kag wala sing may magadikta sa iya. Gani para sa iya, mas labaw sia sa direksion kag laygay sang pareho niya nga mga Cristiano, mga gulang, ukon bisan sang organisasyon sang Dios. Para sa sini nga tawo, amat-amat nga nagahinay ang tingog ni Jehova.

11 Sang nagapanglakaton ang mga Israelinhon sa kamingawan, sanday Kora, Datan, kag Abiram nagrebelde sa awtoridad nanday Moises kag Aaron. Bangod sang bugal, ang mga rebelde naghimo sang ila kaugalingon nga kahimusan sa pagsimba kay Jehova. Ano ang ginhimo ni Jehova? Ginpatay niya sila. (Num. 26:8-10) Ini nga kasaysayan may importante gid nga leksion sa aton! Ang pagrebelde kay Jehova nagaresulta sa kahalitan. Dumdumon man naton nga “ang bugal nagauna sa kalaglagan.”Hulu. 16:18; Isa. 13:11.

12, 13. (a) Maghatag sing halimbawa kon paano ang kakagod may makahalalit nga resulta. (b) Ipaathag kon paano madasig nga nagatubo ang kakagod kon indi ini matapna.

12 Binagbinaga man ang kakagod. Ang makagod masami nga nagapagusto kag nagahimo sing indi nagakaigo nga paggawi. Pagkatapos mag-ayo sa aro ang pangulo nga soldado sang mga Sirianhon nga si Naaman, naghatag sia sing mga regalo kay manalagna Eliseo pero wala niya ini ginbaton. Apang nagalangot ang buot sang alagad ni Eliseo nga si Gehazi sa mga regalo. Si Gehazi nagsiling sa iya kaugalingon: “Sa nagakabuhi ang GINOO, magalagas ako [kay Naaman], kag magkuha sing bisan ano gikan sa iya.” Sang nagtalikod si Eliseo, ginlagas niya si Naaman kag nagbinutig agod makuha ang “isa ka talanton nga pilak kag duha ka ilislan nga panapton.” Ano ang natabo kay Gehazi bangod ginhimo niya ini kag nagbinutig sa manalagna ni Jehova? Ang aro ni Naaman nagsaylo sa makagod nga si Gehazi!2 Hari 5:20-27.

13 Kon tugutan naton ang kakagod, mahimo ini madasig nga magtubo halin sa gamay nga handum asta nga magdaku kag maghalit sa aton. Ang rekord sang Biblia parte kay Acan nagapakita kon daw ano ka gamhanan ang kakagod. Talupangda kon daw ano kadasig nagtubo ang kakagod kay Acan. Sia nagsiling: “Sang nakita ko sa inagaw ang isa ka matahum nga takurong nga Babilonianhon, kag duha ka gatus ka siclo nga pilak, kag isa ka bilog nga bulawan nga kalim-an ka siclo ang kabug-aton, niyan ginkaibugan ko sila, kag ginkuha sila.” Imbes nga isikway ang sayop nga handum, makagod nga ginkawat ni Acan ang mga pagkabutang kag gintago ini sa iya tolda. Sang nabalahuba ang ginhimo ni Acan, ginsilingan sia ni Josue nga pakamalauton sia ni Jehova. Si Acan kag ang iya pamilya ginbato tubtob mapatay sadto mismo nga adlaw. (Jos. 7:11, 21, 24, 25) Posible man kita mangin makagod kaangay ni Acan. Gani dapat kita “mag-andam batok sa tanan nga sahi sang pagkamahamkunon.” (Luc. 12:15) Kon kaisa nagapensar kita sang indi maayo ukon nagahanduraw sang imoral nga mga butang, pero importante nga kontrolon naton ang aton hunahuna kag indi pagtugutan nga magtubo ang aton handum tubtob makahimo kita sing sala.Basaha ang Santiago 1:14, 15.

14. Ano ang dapat naton himuon kon natalupangdan naton nga may mga huyog kita nga mangin bugalon kag makagod?

14 Ang bugal kag kakagod may makahalalit nga resulta. Ang pagpamalandong sa mga resulta  sang sala nga paggawi makabulig sa aton nga indi pagtugutan ini nga mga handum nga maglabaw sa tingog ni Jehova. (Deut. 32:29) Sa Biblia, wala lamang ginatudlo sang matuod nga Dios kon ano ang husto nga dalanon kundi ginapaathag man niya ang mga benepisyo kon sundon naton ini kag ang mga resulta kon maglisa kita sa sini. Kon ginabuyok kita sang aton tagipusuon nga hunahunaon ang paghimo sang isa ka butang bangod sa bugal kag kakagod, maalamon gid nga pensaron naton ang mga resulta sini! Dapat naton binagbinagon ang epekto sini sa aton, sa aton mga hinigugma, kag ilabi na sa aton kaangtanan kay Jehova.

HUPTI ANG SUOD NGA KOMUNIKASYON KAY JEHOVA

15. Ano ang matun-an naton parte sa komunikasyon sa halimbawa ni Jesus?

15 Gusto gid ni Jehova ang pinakamaayo para sa aton. (Sal. 1:1-3) Ginahatagan niya kita sing nagakaigo nga giya sa tion nga kinahanglan naton ini. (Basaha ang Hebreo 4:16.) Bisan pa himpit si Jesus, regular ang iya komunikasyon kay Jehova, kag padayon sia nga nagapangamuyo. Ginbuligan kag gingiyahan ni Jehova si Jesus sa dalayawon nga mga paagi. Nagpadala sia sing mga anghel sa pag-alagad kay Jesus, nag-aman sang Iya balaan nga espiritu para buligan sia, kag naggiya sa iya sa pagpili sang 12 ka apostoles. Nabatian ang tingog ni Jehova gikan sa langit nga nagapabutyag sang iya suporta kag kahamuot kay Jesus. (Mat. 3:17; 17:5; Mar. 1:12, 13; Luc. 6:12, 13; Juan 12:28) Kaangay ni Jesus, kinahanglan man naton ipabutyag ang aton tagipusuon sa Dios paagi sa pangamuyo. (Sal. 62:7, 8; Heb. 5:7) Paagi sa pangamuyo, mahuptan naton ang suod nga komunikasyon kay Jehova kag magkabuhi nga nagapadungog sa iya.

16. Paano kita ginabuligan ni Jehova para mabatian ang iya tingog?

16 Bisan pa ang laygay ni Jehova para sa tanan, wala niya ginapilit ang bisan sin-o nga tumanon ini. Kinahanglan naton pangayuon ang iya balaan nga espiritu, kag ihatag gid niya ini sa aton. (Basaha ang Lucas 11:10-13.) Pero importante nga ‘talupangdon naton kon paano kita nagapamati.’ (Luc. 8:18) Halimbawa, salimpapaw gid ang pagpangayo sing bulig kay Jehova nga matapna ang huyog nga maghimo sing imoralidad pero padayon nga nagatan-aw sing pornograpiya ukon imoral nga mga pelikula. Agod mabaton ang iya bulig, dapat yara kita sa mga lugar ukon sitwasyon nga yara ang espiritu ni Jehova. Nahibaluan naton nga ang iya espiritu yara sa mga miting sang kongregasyon. Madamo nga alagad ni Jehova ang nakalikaw sa kahalitan bangod namati sila kay Jehova sa tion sang mga miting. Bilang resulta, nakita nila ang sayop nga mga handum nga nagatubo sa ila tagipusuon kag natadlong ang ila mga paggawi.Sal. 73:12-17; 143:10.

PADAYON NGA PAMATII SING MAAYO ANG TINGOG NI JEHOVA

17. Ngaa delikado ang pagsalig sa aton kaugalingon?

17 Binagbinaga si Hari David sang dumaan nga Israel. Sang pamatan-on sia, nagdaug sia batok sa higante nga Filistinhon nga si Goliat. Si David nangin soldado, hari, kag manug-amlig. Sia man ang nagadesisyon para sa pungsod sang Israel. Pero sang nagsalig si David sa iya kaugalingon, nadaya sia sang iya tagipusuon kag nakahimo sing serioso nga sala upod kay Batseba, kag nagplano pa gani agod mapatay ang bana sini nga si Urias. Sang gindisiplina si David, mapainubuson niya nga ginbaton ang iya sala kag nangin abyan sia liwat ni Jehova. Sal. 51:4, 6, 10, 11.

18. Ano ang makabulig sa aton agod padayon kita nga mamati sa tingog ni Jehova?

18 Kinahanglan naton pamatian ang laygay sa 1 Corinto 10:12 kag likawan ang sobra nga pagsalig sa kaugalingon. Bangod indi naton masarangan nga ‘manduan ang aton tikang,’ posible nga mamati kita sa tingog ni Jehova ukon sa tingog sang iya Kaaway. (Jer. 10:23) Kabay nga padayon kita nga mangamuyo, magpagiya sa balaan nga espiritu, kag pirme gid mamati sa tingog ni Jehova.