Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) AGOSTO 2014

Nagabaton Ka Bala sing “Pagkaon sa Nagakaigo nga Tion”?

Nagabaton Ka Bala sing “Pagkaon sa Nagakaigo nga Tion”?

NAGAKABUHI kita sa pinakamabudlay nga tion sa kasaysayan sang tawo. (2 Tim. 3:1-5) Kada adlaw, ginatilawan ang aton gugma kay Jehova kag ang aton pagkabuhi sa iya matarong nga mga talaksan. Gintagna na ni Jesus ining mabudlay nga tion, kag ginpasalig niya ang iya mga sumulunod nga mabaton nila ang kinahanglanon nga pagpalig-on agod makabatas tubtob sa katapusan. (Mat. 24:3, 13; 28:20) Nagtangdo sia sing matutom nga ulipon agod mag-aman sing espirituwal nga “pagkaon sa nagakaigo nga tion.”Mat. 24:45, 46.

Sugod sang gintangdo ang matutom nga ulipon sang 1919, minilyon sang “panimalay” halin sa tanan nga lenguahe ang gintipon sa organisasyon sang Dios kag ginapakaon sa espirituwal. (Mat. 24:14; Bug. 22:17) Pero, indi pareho ang kadamuon sang materyal nga matigayon sa tanan nga lenguahe, kag indi tanan may Internet para matigayon ang elektroniko nga mga publikasyon. Halimbawa, madamo nga lenguahe ang wala sing mga video kag artikulo nga ginabalhag lamang sa jw.org. Buot bala silingon kulang ang ila kinahanglanon nga pagkaon para makapabilin nga mapagros sa espirituwal? Agod mangin husto ang aton konklusion, binagbinagon naton ang sabat sa apat ka panguna nga pamangkot.

 1. Ano ang panguna nga ingrediente sa pagkaon nga ginaaman ni Jehova?

Sang ginsulay ni Satanas si Jesus nga himuon nga tinapay ang mga bato, si Jesus nagsabat: “Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.” (Mat. 4:3, 4) Ang pulong ni Jehova nasulat sa Biblia. (2 Ped. 1:20, 21) Gani, ang Biblia amo ang panguna nga ingrediente sang espirituwal nga pagkaon.2 Tim. 3:16, 17.

Ang organisasyon ni Jehova nagbalhag sang bug-os ukon bahin sang New World Translation of the Holy Scriptures sa sobra 120 ka lenguahe, kag madamo pa ang ginadugang kada tuig. Magluwas sa sina nga badbad, binilyon ka kopya sang iban nga bersion sang Biblia ang matigayon sing bug-os ukon ang bahin sini sa linibo ka lenguahe. Ining talalupangdon nga nahimuan nahisuno sa kabubut-on ni Jehova nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:3, 4) Kag bangod ‘wala sing tinuga nga indi dayag sa itululok ni Jehova,’ makasiguro kita nga buyukon niya sa iya organisasyon kag amanan sing espirituwal nga pagkaon “ang mga mahunahunaon sang ila espirituwal nga kinahanglanon.”Heb. 4:13; Mat. 5:3, 6; Juan 6:44; 10:14.

2. Ano ang papel sang aton mga publikasyon sa pag-aman sing espirituwal nga pagkaon?

Agod mangin malig-on ang pagtuo sang isa, indi lang pagbasa sang Biblia ang kinahanglan niya himuon. Dapat nahangpan niya ang iya ginabasa kag ginaaplikar ang iya natun-an. (Sant. 1:22-25) Narealisar ini sang Etiopianhon nga eunuco sang unang siglo. Ginabasa niya ang Pulong sang Dios sang ginpamangkot sia sang ebanghelisador nga si Felipe: “Nahibaluan mo gid bala ang imo ginabasa?” Ang eunuco nagsabat: “Sa pagkamatuod, paano ko ini mahibaluan, luwas kon may isa nga magtuytoy sa akon?” (Binu. 8:26-31) Gani, ginbuligan ni Felipe ang eunuco nga makatigayon sing sibu nga ihibalo sa Pulong sang Dios. Napahulag gid ang eunuco sa iya natun-an amo nga nagpabawtismo sia. (Binu. 8:32-38) Sing kaanggid, ang aton nabase sa Biblia nga mga publikasyon nagabulig sa aton nga matigayon ang sibu nga ihibalo sang kamatuoran. Nagatandog ini sang aton balatyagon kag nagapahulag sa aton nga iaplikar ang aton natun-an.Col. 1:9, 10.

Paagi sa mga publikasyon, ginaamanan ang mga alagad ni Jehova sing bugana nga espirituwal nga pagkaon kag ilimnon. (Isa. 65:13) Halimbawa, ang Lalantawan, nga matigayon sa sobra 210 ka lenguahe, nagapaathag sang mga tagna sa Biblia, nagapasangkad sang aton paghangop sa madalom nga espirituwal nga mga kamatuoran, kag nagapahulag sa aton nga magkabuhi suno sa mga prinsipio sa Biblia. Ang Magmata!, nga ginbalhag sa mga 100 ka lenguahe, nagapasangkad sang aton ihibalo parte sa mga tinuga ni Jehova kag nagapakita kon paano naton maaplikar ang praktikal nga mga laygay sang Biblia. (Hulu. 3:21-23; Roma 1:20) Ang matutom nga ulipon nagaaman sing nabase sa Biblia nga mga materyal sing sobra sa 680 ka lenguahe! Ginahatagan mo bala sing tion ang pagbasa sing Biblia kada adlaw? Ginabasa mo bala ang tagsa ka bag-o nga magasin kag ang tanan nga bag-o nga publikasyon nga matigayon sa imo lenguahe kada tuig?

Magluwas sa ginabalhag nga mga publikasyon, ang organisasyon ni Jehova nagahanda man sing nabase sa Biblia nga mga balayan para sa mga pamulongpulong sa aton mga miting, asembleya, kag mga kombension. Naapresyar mo man bala ang mga pamulongpulong, drama, demonstrasyon, kag mga interbyu nga ginapresentar sa amo nga mga pagtililipon? Ginaamanan gid kita ni Jehova sing bugana nga espirituwal nga pagkaon!Isa. 25:6.

 3. Kon indi mo matigayon sa inyo lenguahe ang tanan nga ginaaman nga publikasyon, kulang ka bala sa espirituwal nga nutrisyon?

Ang sabat indi. Kag indi na kita dapat makibot nga ang pila sa mga alagad ni Jehova mahimo makatigayon kon kaisa sing mas madamo nga espirituwal nga pagkaon sangsa iban. Ngaa? Binagbinaga ang mga apostoles. Nakabaton sila sing mas madamo nga instruksion sangsa iban nga mga disipulo sang unang siglo. (Mar. 4:10; 9:35-37) Pero, wala makulangan sa espirituwal nga nutrisyon ang iban nga disipulo. Nabaton nila ang ila kinahanglanon.Efe. 4:20-24; 1 Ped. 1:8.

Talalupangdon man nga indi tanan nga ginsiling kag ginhimo ni Jesus sang ari sia sa duta narekord sa Ebanghelyo. Si apostol Juan nagsulat: “Sa katunayan, madamo pa nga butang ang ginhimo ni Jesus, nga kon isulat ini sing detalyado, sa banta ko indi makaigo sa kalibutan ang mga linukot nga ginsulat.” (Juan 21:25) Bisan pa mas madamo ang nahibaluan sang mga sumulunod ni Jesus sang unang siglo parte sa iya kon ikumparar sa aton, wala kita nakulangan. Ginapat-od ni Jehova nga bastante ang aton ihibalo kay Jesus agod masunod naton ang iya mga tikang.1 Ped. 2:21.

Dumduma man ang mga sulat nga ginpadala sang mga apostoles sa mga kongregasyon sang unang siglo. Posible nga may sulat si Pablo nga wala nalakip sa Biblia. (Col. 4:16) Kulang bala ang aton espirituwal nga pagkaon bangod indi naton matigayon ina nga sulat? Indi. Nahibaluan ni Jehova kon ano ang aton kinahanglanon kag bastante ang iya ginaaman agod mangin malig-on kita sa espirituwal.—Mat. 6:8.

Nahibaluan ni Jehova kon ano ang aton kinahanglanon kag bastante ang iya ginaaman agod mangin malig-on kita sa espirituwal

Sa karon, may pila ka grupo sang mga alagad ni Jehova ang makatigayon sing mas madamo nga espirituwal nga pagkaon sangsa iban. Diutay lang bala nga publikasyon ang matigayon sa inyo lenguahe? Kon amo, saligi nga nagaulikid si Jehova sa imo. Tun-i ang mga materyal nga matigayon mo, kag kon posible, tambungi ang mga miting sa lenguahe nga imo nahangpan. Kag makasalig ka nga padayon ka nga palig-unon ni Jehova sa espirituwal.Sal. 1:2; Heb. 10:24, 25.

4. Kon wala sing Internet nga puede mo kuhaan sing mga materyal nga ginbalhag sa jw.org, magaluya ka bala sa espirituwal?

Sa aton Web site, makita ang mga magasin kag iban pa nga publikasyon sa pagtuon sa Biblia. Nagaaman man ini sing mga materyal nga makabulig sa mga mag-asawa, tin-edyer, kag sa mga may magagmay nga kabataan. Makabenepisyo ang pamilya kon binagbinagon nila ini nga materyal sa ila Pangpamilya nga Pagsimba. Dugang pa, makita man sa aton Web site ang mga report parte sa pinasahi nga mga programa, kaangay sang gradwasyon sa Gilead kag annual meeting, kag ginapahibalo man sini ang mga kauturan sa bilog nga kalibutan parte sa mga kalamidad kag mga kaso nga nagadalahig sa katawhan ni Jehova. (1 Ped. 5:8, 9) Epektibo man sa pagpanaksi ang aton Web site, nga nagapalab-ot sang maayong balita asta sa mga lugar nga ginadumilian ang aton hilikuton.

Pero makapabilin ka nga malig-on sa espirituwal, may access ka man sa aton Web site ukon wala. Nagapanikasog gid ang ulipon agod makaaman sing bastante nga naimprinta nga materyal agod mapakaon sing maayo sa espirituwal ang tagsa ka panimalay. Gani, indi ka magbatyag nga obligado ka magbakal sing gadyet para maka-access sa jw.org. Ang iban mahimo magmatumato sa pag-imprinta sing pila ka materyal sa aton Web site agod ihatag sa mga wala sing Internet, pero indi obligado ang kongregasyon sa paghimo sini.

Nagapasalamat gid kita kay Jesus kay gintuman niya ang iya saad nga iaman ang aton espirituwal nga mga kinahanglanon. Samtang nagahingapos na ining mabudlay nga katapusan nga mga adlaw, makasalig kita nga padayon nga iaman ni Jehova ang espirituwal nga “pagkaon sa nagakaigo nga tion.”