Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2014

“Kilala ni Jehova ang mga Natungod sa Iya”

“Kilala ni Jehova ang mga Natungod sa Iya”

“Kon ang bisan sin-o nagahigugma sa Dios, ining isa kilala niya.”—1 COR. 8:3.

1. Isugid ang isa ka kasaysayan sa Biblia nga nagapadaku sang sala nga pagpati nga nag-impluwensia sa pila ka katawhan sang Dios. (Tan-awa ang piktyur sa umpisa sini nga artikulo.)

ISA ka aga, ang mataas nga saserdote nga si Aaron nagtindog sa puertahan sang tabernakulo ni Jehova, nga nagauyat sing nagakalayo nga incensario. Ara sa malapit sanday Kora kag ang 250 ka lalaki nga nagahalad man sing incienso kay Jehova, nga ang kada isa nagauyat sing incensario. (Num. 16:16-18) Sa una nga pagtan-aw, ang tanan nga lalaki daw matutom nga mga sumilimba ni Jehova. Pero indi kaangay ni Aaron, ang grupo ni Kora mga arogante nga apostata nga nagatinguha nga agawon ang pagkasaserdote. (Num. 16:1-11) Ginpapati nila ang ila kaugalingon nga batunon sang Dios ang ila pagsimba. Pero ang ila panghunahuna nag-insulto kay Jehova, nga makabasa sang tagipusuon kag makakita sang ila pagkasalimpapaw.Jer. 17:10.

2. Ano ang ginsiling sing abanse ni Moises, kag natabo bala ini?

2 Nagakaigo gid nga sang adlaw antes sini, nagsiling sing abanse si Moises: “Sa pagkaaga magapahayag ang GINOO kon sin-o ang iya.” (Num. 16:5) Amo gid sini ang natabo. Ginpatuhay ni Jehova ang matuod nga mga sumilimba kag ang mga nagapakunokuno sang “naggowa gikan sa GINOO ang kalayo, kag naghalunhon [kay Kora kag] sang duha ka gatus kag kalim-an ka tawo nga naghalad  sang incienso.” (Num. 16:35; 26:10) Pero, wala ginlaglag ni Jehova si Aaron, nga nagapakita nga nahamuot sia sa matuod nga saserdote kag sumilimba sang Dios.Basaha ang 1 Corinto 8:3.

3. (a) Ano nga sitwasyon ang natabo sang panahon ni apostol Pablo? (b) Ano nga halimbawa ang ginpahamtang ni Jehova sa pagpakig-angot sa mga rebelde ginatos ka tuig na ang nagligad?

3 Natabo man ini nga sitwasyon mga 1,500 ka tuig sang ulihi sang panahon ni apostol Pablo. Ang pila ka nagapangangkon nga Cristiano nagbaton sing butig nga mga panudlo, pero nagapakig-upod gihapon sa kongregasyon. Kon tulukon, daw matuod gihapon nga mga sumilimba ni Jehova ini nga mga apostata. Pero ang ila apostasya makatalagam gid sa matutom nga mga Cristiano. Ini nga mga lobo nga nagapakunokuno nga karnero ‘nagaguba sang pagtuo sang iban.’ (2 Tim. 2:16-18) Pero nakita ini ni Jehova, kag mahimo nga nahibaluan ini ni Pablo bangod sa ginhimo sadto sang Dios sa mga rebelde nga sanday Kora kag sa mga sumalakdag sini, ginatos ka tuig na ang nagligad. Parte sa sini, binagbinagon naton ang isa ka makapainteres nga teksto sa Kasulatan kag tan-awon naton kon ano ang aton matun-an.

SI JEHOVA WALA NAGABAG-O

4. Sa ano kumbinsido si Pablo, kag paano niya ini ginsiling kay Timoteo?

4 Sigurado si Pablo nga mahibaluan ni Jehova ang salimpapaw nga pagsimba, kag kumbinsido man sia nga makilala ni Jehova ang mga matinumanon sa Iya. Ginpakita ni Pablo nga kumbinsido gid sia paagi sa mga tinaga nga iya gingamit sang gingiyahan sia sa pagsulat kay Timoteo. Sa tapos niya mapatuhuyan ang espirituwal nga halit nga ginahimo na sang mga apostata sa pila ka indibiduwal sa sulod sang kongregasyon, si Pablo nagsulat: “Apang, ang malig-on nga sadsaran sang Dios nagapabilin nga nagatindog, nga may subong sini nga pat-in: ‘Kilala ni Jehova ang mga natungod sa iya,’ kag: ‘Ang tagsatagsa nga nagatawag sa ngalan ni Jehova dapat magbiya sa pagkadimatarong.’”2 Tim. 2:18, 19.

5, 6. Ngaa pinasahi ang paggamit ni Pablo sang pinamulong nga “malig-on nga sadsaran sang Dios,” kag paano ini mahimo nakaapektar kay Timoteo?

5 Ngaa pinasahi gid ang tinaga nga gingamit ni Pablo sa sini nga teksto? Kay sa sini lamang nga teksto sa Biblia ginsambit “ang malig-on nga sadsaran sang Dios.” Ginagamit sang Biblia ang tinaga nga “sadsaran” bilang pagpaanggid ukon simbulo sang lainlain nga butang, lakip ang literal nga Jerusalem, ang kapital nga siudad sang dumaan nga Israel. (Sal. 87:1, 2) Ang papel ni Jesus sa katuyuan ni Jehova ginpaanggid man sa isa ka sadsaran. (1 Cor. 3:11; 1 Ped. 2:6) Ano ang ginpatuhuyan ni Pablo sang nagsulat sia parte sa “malig-on nga sadsaran sang Dios”?

6 Ginsambit ni Pablo “ang malig-on nga sadsaran sang Dios” sa amo man nga konteksto diin ginsambit niya ang ginsiling ni Moises parte kay Kora kag sa iya mga sumalakdag, nga narekord sa Numeros 16:5. Maathag nga ginapatuhuyan ni Pablo ang mga hitabo sang panahon ni Moises para palig-unon si Timoteo kag pahanumdumon sia sa ikasarang ni Jehova nga mahibaluan kag mabalabagan ang rebelyuso nga mga buhat. Ang katuyuan ni Jehova wala maupangan sang mga apostata sa kongregasyon, subong nga wala man ini maupangan ni Kora ginatos ka tuig antes sini. Wala gindetalye ni Pablo kon ano ang ginarepresentar sang “malig-on nga sadsaran sang Dios.” Pero ang mga tinaga nga iya gingamit pat-od nga nagpalig-on kay Timoteo nga magsalig sa mga pamaagi ni Jehova.

7. Ngaa mapat-od naton nga magapanghikot si Jehova nga may pagkamatarong kag katutom?

7 Ang mataas nga mga prinsipio ni Jehova indi mabungkag. “Ang laygay sang GINOO nagapadayon sing malig-on sa gihapon, ang mga painoino sang iya tagiposoon sa tanan nga kaliwatan,” siling sang Salmo 33:11. Ginasambit sang iban nga teksto nga ang paggahom ni Jehova, ang iya malig-on nga paghigugma, pagkamatarong, kag katutom wala sing katapusan. (Ex. 15:18; Sal. 106:1; 112:9; 117:2) Ang Malaquias 3:6 nagasiling: “Ako nga GINOO wala nagabaylo.” Sing kaanggid, ang Santiago  1:17 nagasiling nga si Jehova “wala sing pagbag-o subong sang pagbag-obag-o sang landong.”

ANG “PAT-IN” NGA NAGAPABAKOD SANG PAGTUO KAY JEHOVA

8, 9. Ano ang matun-an naton sa “pat-in” sa ilustrasyon ni Pablo?

8 Ang pagpaanggid ni Pablo nga narekord sa 2 Timoteo 2:19 nagalaragway sang isa ka sadsaran ukon pundasyon nga may nasulat nga mensahe, nga daw ginpat-inan ini. Sang una, kinaandan na ang pagsulat sa pundasyon sang isa ka bilding, ayhan para ipakilala ang nagtukod ukon ang tag-iya sini. Si Pablo ang una nga manunulat sang Biblia nga naggamit sini nga ilustrasyon. * Ang pat-in sa “malig-on nga sadsaran sang Dios” may duha ka mensahe. Una, “Kilala ni Jehova ang mga natungod sa iya” kag ang ikaduha, “Ang tagsatagsa nga nagatawag sa ngalan ni Jehova dapat magbiya sa pagkadimatarong.” Ginapahanumdom kita sini sang aton mabasa sa Numeros 16:5.—Basaha.

9 Ano ang matun-an naton sa “pat-in” sa ilustrasyon ni Pablo? Para sa mga natungod ukon ginapanag-iyahan sang Dios, ang mga talaksan kag mga prinsipio ni Jehova mahimo tingbon sa duha ka sadsaran nga kamatuoran: (1) Ginahigugma ni Jehova ang mga mainunungon sa iya, kag (2) ginakaugtan ni Jehova ang pagkadimatarong. Paano ini nga leksion naangot sa isyu sang apostasya sa sulod sang kongregasyon?

10. Paano ang ginahimo sang mga apostata nakaapektar sa mga matutom sang panahon ni Pablo?

10 Si Timoteo kag ang iban pa nga matutom mahimo nga natublag sang mga ginahimo sang mga apostata. Ayhan ang pila ka Cristiano nagapamangkot kon ngaa ini nga mga indibiduwal ginatugutan pa nga magpabilin sa kongregasyon. Ang mga matutom mahimo maghunahuna kon bala nahibaluan gid ni Jehova ang ila tudok nga pagkamainunungon sa iya kag ang salimpapaw nga pagsimba sang mga apostata.Binu. 20:29, 30.

Wala gid nagpadala si Timoteo sa mga ginahimo sang mga may huyog nga mangin apostata (Tan-awa ang parapo 10-12)

11, 12. Paano ang sulat ni Pablo pat-od nga nagpabakod sang pagtuo ni Timoteo?

11 Pat-od gid nga ang sulat ni Pablo nagpabakod sa pagtuo ni Timoteo kay ginpahanumdom sia sini sang hitabo nga si Aaron ginkahamut-an kag ang salimpapaw nga si Kora kag ang iya kaupdanan ginbuyagyag, ginsikway, kag ginlaglag. Pareho lang nga ginpakita ni Pablo nga bisan pa may butig nga mga Cristiano sa tunga nila, makilala ni Jehova kon sin-o gid ang mga natungod sa iya, pareho sang ginhimo niya sang panahon ni Moises.

12 Si Jehova wala nagabag-o; masaligan gid sia. Ginakaugtan niya ang pagkadimatarong,  kag sa nagakaigo nga tion, hukman niya ang indi mahinulsulon nga mga makasasala. Subong isa nga “nagatawag sa ngalan ni Jehova,” napahanumdom man si Timoteo sa iya responsibilidad nga pamatukan ang malain nga impluwensia sang butig nga mga Cristiano. *

ANG MATUOD NGA PAGSIMBA PIRME GID GINAPADYAAN

13. Sa ano kita makasalig?

13 Mapabakod man kita sang ginsiling ni Pablo. Una sa tanan, mapalig-on kita bangod nahibaluan gid ni Jehova ang aton katutom sa iya. Ang iya nahibaluan indi hapaw. Sa baylo, interesado gid si Jehova sa mga natungod sa iya. Ang Biblia nagsiling: “Ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.” (2 Cron. 16:9) Gani, makasalig gid kita nga ang aton ginahimo para kay Jehova “gikan sa matinlo nga tagipusuon” indi wala sing pulos.1 Tim. 1:5; 1 Cor. 15:58.

14. Ano nga sahi sang pagsimba ang wala ginakunsinti ni Jehova?

14 Makapalig-on man mahibaluan nga wala ginakunsinti ni Jehova ang salimpapaw nga pagsimba. Bangod ang iya mga mata “nagapanoloktolok sa bug-os nga duta,” mahibaluan niya kon sin-o ang may tagipusuon nga indi “himpit ayon sa iya.” “Ang balingag kangil-aran sa GINOO,” siling sang Hulubaton 3:32, pareho sang isa nga nagapakitakita nga matinumanon apang nagahimo sang sekreto nga sala. Bisan pa nagmadinalag-on ang isa sa pagdaya sa iban, ang daku nga gahom kag pagkamatarong ni Jehova nagagarantiya nga “ang nagatabon sang iya mga paglalis indi mag-uswag.”Hulu. 28:13; basaha ang 1 Timoteo 5:24; Hebreo 4:13.

15. Ano ang dapat naton likawan, kag ngaa?

15 Sa kabilugan, ang katawhan ni Jehova sinsero gid sa ila pagsimba sa iya. Talagsa lang sa malaka nga ang isa sa kongregasyon hungod nga maghimo sing salimpapaw nga pagsimba. Apang, kon natabo ini sang panahon ni Moises kag sa Cristianong kongregasyon sang una, mahimo man ini matabo karon. (2 Tim. 3:1, 5) Pero, dapat bala naton duhaduhaan ang aton mga masigka-Cristiano, nga nagakuestyon sang ila katutom kay Jehova? Siempre indi! Sala gid nga duhaduhaan naton ang aton mga kauturan nga wala sing basihan. (Basaha ang Roma 14:10-12; 1 Corinto 13:7.) Isa pa, ang huyog nga duhaduhaan ang integridad sang iban sa kongregasyon makahalit sa aton espirituwalidad.

16. (a) Ano ang puede himuon sang kada isa sa aton para indi makapanggamot ang pagkasalimpapaw sa aton tagipusuon? (b) Ano ang matun-an naton sa kahon nga “Padayon nga Tilawi . . . Padayon nga Pamatud-i . . . ”?

16 Ang tagsa ka Cristiano dapat mag-usisa sang “iya kaugalingon nga binuhatan.” (Gal. 6:4) Bangod sang aton makasasala nga mga huyog, mahimo nga indi naton pirme matalupangdan nga naimpluwensiahan na kita sing salimpapaw nga mga batasan. (Heb. 3:12, 13) Gani, maayo nga usisaon naton pirme ang aton mga motibo sa pag-alagad kay Jehova. Mahimo naton pamangkuton ang aton kaugalingon: ‘Ginasimba ko bala si Jehova bangod ginahigugma ko sia kag ginakilala ang iya pagkasoberano? Ukon bangod mas ginapamensar ko ang maayo nga kabuhi sa Paraiso?’ (Bug. 4:11) Pat-od gid nga makabenepisyo kita tanan sa pag-usisa sa aton mga ginahimo kag dulaon ang bisan ano nga pagkasalimpapaw sa aton tagipusuon.

ANG PAGKAMAINUNUNGON NGA NAGAHATAG SING KALIPAY

17, 18. Ngaa dapat mangin matuod kag sinsero ang aton pagsimba kay Jehova?

17 Samtang ginatinguhaan naton nga mangin matuod kag sinsero ang aton pagsimba, makabaton kita sing madamo nga pagpakamaayo. “Bulahan ang tawo nga wala ginapasangti sang GINOO sang kalautan, nga sa iya espiritu walay limbong,” siling sang salmista. (Sal. 32:2) Huo, ang mga tawo nga nagakuha sing pagkasalimpapaw sa ila tagipusuon mas  bulahan ukon malipayon, kag matigayon nila ang bug-os nga kalipay sa palaabuton.

18 Sa ginpat-od nga tion, ibuyagyag ni Jehova ang tanan nga nagahimo sing malain ukon sekreto nga sala, para mag-athag ang kinatuhayan “sang matarung kag sang malauton, sang nagaalagad sa Dios kag sang wala nagaalagad sa iya.” (Mal. 3:18) Samtang wala pa ini, makapalig-on gid mahibaluan nga “ang mga mata ni Jehova nagatulok sa mga matarong, kag ang iya mga dulunggan nagapamati sa ila pag-ampo.”1 Ped. 3:12.

^ par. 8 Ang Bugna 21:14, nga ginsulat dinekada sang ulihi pagkatapos sang sulat ni Pablo kay Timoteo, nagasambit sang 12 ka “sadsaran nga bato” nga sa sini nasulat ang ngalan sang 12 ka apostoles.

^ par. 12 Binagbinagon sa masunod nga artikulo kon paano naton mailog si Jehova paagi sa pagsikway sa pagkadimatarong.