Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Hulyo 2014

Ang Katawhan ni Jehova Nagabiya sa Pagkadimatarong

Ang Katawhan ni Jehova Nagabiya sa Pagkadimatarong

“Ang tagsatagsa nga nagatawag sa ngalan ni Jehova dapat magbiya sa pagkadimatarong.”2 TIM. 2:19.

1. Ano ang may pinasahi nga bahin sa aton pagsimba?

NAKITA mo na bala ang ngalan ni Jehova nga nasulat sa isa ka publiko nga bilding ukon sa isa ka dumaan nga butang sa museo? Pat-od gid nga nalipay ka sang nakita mo ini. Kay man, ang personal nga ngalan sang Dios may pinasahi nga bahin sa aton pagsimba—mga Saksi ni Jehova kita! Sa bilog nga kalibutan, wala na sing iban nga grupo sang mga tawo ang mas nakilala sa ngalan sang Dios sangsa aton. Pero, nahibaluan naton nga ang pribilehiyo nga magdala sa ngalan sang Dios nagalakip sing responsibilidad.

2. Ano ang aton responsibilidad sa pagdala sang ngalan sang Dios?

2 Ang paggamit lamang sa ngalan sang Dios wala nagagarantiya nga kahamut-an kita ni Jehova. Dapat kita magkabuhi nahisuno sa iya moral nga mga talaksan. Bangod sini, ang Biblia nagapahanumdom sa aton nga ang katawhan ni Jehova dapat ‘magpalayo sa malaut.’ (Sal. 34:14) Maathag nga ginsiling ni apostol Pablo ini nga prinsipio sang nagsulat sia: “Ang tagsatagsa nga nagatawag sa ngalan ni Jehova dapat magbiya sa pagkadimatarong.” (Basaha ang 2 Timoteo 2:19.) Subong iya mga Saksi, kilala gid kita nga nagatawag sa ngalan ni Jehova. Pero paano naton biyaan ang pagkadimatarong?

 “MAGPALAYO KAMO” SA KALAINAN

3, 4. Ano nga teksto ang madugay na nga nakapukaw sa interes sang mga iskolar sa Biblia, kag ngaa?

3 Binagbinaga kon ngaa nasiling ni Pablo ang narekord sa 2 Timoteo 2:19. Ginapatuhuyan sini nga teksto ang “malig-on nga sadsaran sang Dios” kag dayon ginsambit ang duha ka proklamasyon nga nasulat sa sini. Ang una amo, “Kilala ni Jehova ang mga natungod sa iya,” nga maathag nga nabase sa Numeros 16:5. (Tan-awa ang nagligad nga artikulo.) Ang ikaduha nga proklamasyon nga, “Ang tagsatagsa nga nagatawag sa ngalan ni Jehova dapat magbiya sa pagkadimatarong,” madugay na nga nakapukaw sa interes sang mga iskolar sang Biblia. Ngaa?

4 Daw ginapakita nga ginkuha ni Pablo ang iya ginsiling sa iban nga bahin sang Hebreong Kasulatan. Pero, daw wala sing bersikulo nga nagaanggid sa iya ginsiling. Gani, ano ang ginapatuhuyan sang apostol sang nagsiling sia: “Ang tagsatagsa nga nagatawag sa ngalan ni Jehova dapat magbiya sa pagkadimatarong”? Ang una nga ginsiling ni Pablo ginkuha niya sa Numeros kapitulo 16, nga nagasaysay sang hitabo parte sa pagrebelde ni Kora. Indi ayhan nga ining ikaduha nga proklamasyon naangot man sa mga hitabo parte sa sina nga pagrebelde?

5-7. Ano nga mga hitabo sang panahon ni Moises ang magapaathag sang ginsiling ni Pablo sa 2 Timoteo 2:19? (Tan-awa ang piktyur sa umpisa sini nga artikulo.)

5 Ang Biblia nagasiling nga sanday Datan kag Abiram, nga mga anak ni Eliab, nagbuylog kay Kora sa pagpanguna sa pagrebelde batok kanday Moises kag Aaron. (Num. 16:1-5) Ginpakita gid nila nga wala nila ginatahod si Moises kag ginsikway nila ang awtoridad nga ginhatag sang Dios sa iya. Yadto nga mga rebelde padayon nga nakig-upod sa katawhan ni Jehova, kag ginahalitan nila ang espirituwalidad sang mga matutom. Sang nag-abot ang adlaw nga painon na ni Jehova ang iya mainunungon nga mga sumilimba kag ang mga rebelde, naghatag sia sing maathag nga sugo.

6 Ang rekord mabasa: “Nagsiling si Jehova kay Moises: ‘Silinga ang katilingban, “Magpalayo kamo sa tolda ni Kora, ni Datan, kag ni Abiram!”’ Pagkatapos sini nagkadto si Moises kay Datan kag kay Abiram, kag nag-upod sa iya ang mga gulang sang Israel. Dayon nagsiling sia sa katilingban: ‘Palihug, magpalayo kamo sa tolda sining malaut nga mga tawo kag indi kamo magtandog sang bisan ano nga ila, agod indi kamo malaglag bangod sang ila sala.’ Nagpalayo sila dayon sa palibot sang tolda ni Kora, ni Datan, kag ni Abiram.” (Num. 16:23-27, New World Translation of the Holy Scriptures, NW) Dayon ginpatay ni Jehova ang tanan nga nagrebelde. Apang, ang mainunungon nga mga sumilimba—nga nagbiya sa pagkadimatarong paagi sa pagpalayo sa malaut nga mga tawo—naluwas.

7 Mabasa ni Jehova ang tagipusuon! Mahibaluan niya ang pagkamainunungon sang mga natungod sa iya. Pero sa gihapon, ang mga mainunungon sa iya dapat maghulag gilayon, nga magpalayo gikan sa mga indi matarong. Gani posible nga ang ginapatuhuyan ni Pablo amo ang hitabo sa Numeros 16:5, 23-27 sang nagsulat sia: “Ang tagsatagsa nga nagatawag sa ngalan ni Jehova dapat magbiya sa pagkadimatarong.” Ini nga konklusion nagahisanto sa ginsiling ni Pablo: “Kilala ni Jehova ang mga natungod sa iya.”2 Tim. 2:19.

“SIKWAYA ANG BINUANG KAG WALA PULOS NGA MGA PAGPAMANGKOT”

8. Ngaa indi bastante ang paggamit sang ngalan ni Jehova ukon ang mangin bahin sang Cristianong kongregasyon?

8 Paagi sa pagpatuhoy sa mga hitabo sang panahon ni Moises, ginpahanumdom ni Pablo si Timoteo nga dapat sia maghulag gilayon agod amligan ang iya hamili nga kaangtanan kay Jehova. Indi bastante nga mangin bahin lamang sang Cristianong kongregasyon, subong nga indi man bastante ang pagtawag sa ngalan ni Jehova sang panahon ni Moises. Ang matutom nga mga sumilimba dapat desidido nga magbiya sa pagkadimatarong. Ngaa importante gid ini nga himuon ni Timoteo?  Kag ano ang matun-an sang katawhan ni Jehova karon sa laygay ni Pablo?

9. Paano ang “binuang kag wala pulos nga mga pagpamangkot” nakaapektar sa Cristianong kongregasyon sang una?

9 Ang Pulong sang Dios nagahatag sing espesipiko nga laygay kon ano nga sahi sang pagkadimatarong ang dapat biyaan ukon sikwayon sang mga Cristiano. Halimbawa, sa konteksto sang 2 Timoteo 2:19, mabasa naton nga si Pablo nagsiling kay Timoteo nga “indi magbais tuhoy sa mga tinaga” kag ‘likawan ang wala pulos nga mga hambalanon.’ (Basaha ang 2 Timoteo 2:14, 16, 23.) Ang pila ka miembro sang kongregasyon nagapasanyog sang apostata nga mga panudlo. Maathag nga ang iban nagapalapta man sang mga panudlo nga nagaresulta sang pagbinais. Ang pila sini nga mga ideya wala man nagasupak sa mga panudlo sang Biblia, pero ginatunaan sang pagbinahinbahin. Nagresulta ini sa pagbinaisay sa mga tinaga, amo nga nabutang sa katalagman ang ila espirituwalidad. Gani, ginpadaku ni Pablo nga kinahanglan gid ‘sikwayon ang binuang kag wala pulos nga mga pagpamangkot.’

10. Ano ang aton himuon kon may nagapanudlo sing apostasya?

10 Sa karon, talagsa lang kita makakita sing apostata sa kongregasyon. Sa gihapon, kon makabati kita sing mga panudlo nga wala nabase sa Kasulatan, bisan diin man ini naghalin, dapat naton ini sikwayon gilayon. Indi gid maalamon nga debatihon ang mga apostata, sing personal man, paagi sa pagsabat sa ila mga blog, ukon sa iban pa nga pamaagi sang komunikasyon. Bisan pa katuyuan mo nga buligan ang indibiduwal, ang inyo pag-istoryahanay indi maghisanto sa laygay sang Kasulatan nga bag-o lang naton ginbinagbinag. Subong katawhan ni Jehova, ginalikawan naton sing bug-os, ukon ginasikway, ang apostasya.

Likawi nga makigdebate sa mga apostata (Tan-awa ang parapo 10)

11. Ano ang mahimo mangin tunaan sang ‘binuang nga mga pagpamangkot,’ kag paano mangin maayo nga halimbawa ang mga gulang?

11 Magluwas sa apostasya, may iban pa nga butang nga ginatunaan sang kagamo sa kongregasyon. Halimbawa, ang lainlain nga opinyon parte sa kalingawan mahimo magresulta sa “binuang kag wala pulos nga mga pagpamangkot.” Siempre, kon may mga indibiduwal nga nagapalig-on sang kalingawan nga supak sa moral nga mga talaksan ni Jehova, indi ini dapat pagpabay-an sang mga gulang para lamang malikawan ang gamo. (Sal. 11:5; Efe. 5:3-5) Pero nagahalong ang mga gulang nga indi sila maghatag sang ila personal nga mga opinyon. Matutom nila nga ginasunod ang laygay sang Kasulatan para sa Cristiano nga mga manugtatap: “Bantayi ninyo ang panong sang Dios nga yara sa inyo pag-atipan, . . . indi subong nagapakaginuo sa mga palanublion gikan sa Dios, kundi mangin mga halimbawa sa panong.”1 Ped. 5:2, 3; basaha ang 2 Corinto 1:24.

12, 13. (a) Paano nagadesisyon ang mga Saksi ni Jehova sa pagpili sang kalingawan, kag ano nga mga prinsipio sa Biblia ang makabulig? (b) Paano ang mga prinsipio nga ginbinagbinag sa parapo 12 makabulig sa lainlain nga personal nga mga butang?

12 Parte sa kalingawan, wala ginausisa sang aton organisasyon ang espesipiko nga mga pelikula, video game, libro, ukon kanta agod hibaluon kon ano ang dapat naton likawan. Ngaa? Ang Biblia nagapalig-on sa tagsa ka indibiduwal nga hanason ang iya “mga ikasarang sa paghantop . . . nga makilala ang maayo kag malain.” (Heb. 5:14) Ang Kasulatan nagpahamtang sing panguna nga mga prinsipio nga binagbinagon sang isa ka Cristiano kon nagapili sang kalingawan. Sa tanan nga bahin sang kabuhi, dapat naton ‘padayon nga pat-uron ang kalahamut-an sa Ginuo.’ (Efe. 5:10) Ginatudlo sang Biblia nga ang mga ulo sang pamilya may awtoridad, gani mahimo sila magdesisyon nga indi pagtugutan ang isa ka kalingawan sa ila panimalay. *1 Cor. 11:3; Efe. 6:1-4.

13 Ang mga prinsipio sa Biblia nga ginbinagbinag  bag-o lang indi lamang para sa pagpili naton sing kalingawan. Ang mga opinyon parte sa pamayo kag pamustura, kapagros kag nutrisyon, kag iban pa nga personal nga mga butang mahimo man tunaan sang gamo. Apang kon wala ini nagasupak sa mga prinsipio sang Kasulatan, maalamon nga ginalikawan sang katawhan ni Jehova nga makigbais parte sa sini nga mga butang, kay “ang ulipon sang Ginuo indi kinahanglan makig-away, kundi kinahanglan mangin malulo sa tanan.”2 Tim. 2:24.

LIKAWI ANG MALAIN NGA KAUPDANAN!

14. Ano nga ilustrasyon ang gingamit ni Pablo para ipadaku ang paglikaw sa malain nga kaupdanan?

14 Sa ano pa nga paagi nga ang mga ‘nagatawag sa ngalan ni Jehova makabiya sa pagkadimatarong’? Paagi sa paglikaw nga makigsuod sa mga tawo nga nagahimo sang indi matarong. Talalupangdon gid nga ginsundan ni Pablo ang iya ilustrasyon parte sa “malig-on nga sadsaran sang Dios” sang isa pa ka ilustrasyon. Nagsulat sia parte sa “daku nga balay” nga may “mga suludlan nga indi lamang bulawan kag pilak kundi kahoy kag daga man, kag ang iban para sa dungganon nga katuyuan apang ang iban para sa di-dungganon nga katuyuan.” (2 Tim. 2:20, 21) Dayon, ginlaygayan niya ang mga Cristiano nga ‘ipalayo’ ang ila kaugalingon sa mga suludlan nga ginagamit sa “di-dungganon” nga katuyuan.

15, 16. Ano ang matun-an naton sa ilustrasyon parte sa “daku nga balay”?

15 Ano ang kahulugan sini nga ilustrasyon? Ginpaanggid diri ni Pablo ang Cristianong kongregasyon sa isa ka “daku nga balay” kag ang kada miembro sini sa “mga suludlan,” ukon mga gamit sa balay. Sa isa ka balay, ang mga suludlan mahimo mangin kontaminado bangod sang makahalalit nga mga substansia ukon mahigko nga palibot. Ginapain ini sang tagbalay gikan sa matinlo nga mga suludlan, kaangay sang mga ginagamit sa pagluto.

16 Sing kaanggid, ang katawhan ni Jehova subong, nga nagatinguha nga magkabuhi sing matinlo, dapat maglikaw sa pagpakigsuod sa mga indibiduwal sa kongregasyon nga  padayon nga nagabalewala sa mga prinsipio ni Jehova. (Basaha ang 1 Corinto 15:33.) Kon matuod ini sa pila sa sulod sang kongregasyon, mas labi na gid nga dapat kita “magpalayo” ukon indi makigsuod sa mga tawo sa gua sang kongregasyon, nga madamo sa ila ang ‘mahigugmaon sa kuarta, di-matinumanon sa mga ginikanan, di-mainunungon, mabinutangbutangon, mabangis, wala sing gugma sa kon ano ang maayo, maluib, kag mahigugmaon sa kinasadya sa baylo nga mahigugmaon sa Dios’!2 Tim. 3:1-5.

GINAPAKAMAAYO NI JEHOVA ANG ATON PAGHULAG GILAYON

17. Daw ano ka desidido ang mainunungon nga mga Israelinhon nga pamatukan ang pagkadimatarong?

17 Ginsambit sing espesipiko sang Biblia kon paano naghulag gilayon ang mga Israelinhon sang ginsilingan sila nga “magpalayo . . . sa tolda ni Kora, ni Datan, kag ni Abiram.” Ang rekord nagsiling nga “nagpalayo sila dayon.” (Num. 16:24, 27, NW) Wala sila nagduhaduha ukon nagpabuyanbuyan. Ginpakita man sang teksto kon daw ano sila ka desidido sa pagtuman. “Nagpalayo sila . . . sa palibot.” Ang mga mainunungon naghulag gilayon. Ang ila pagtuman indi hapaw ukon pakitakita lamang. Ginpakita gid nila nga ginasuportahan nila si Jehova kag ginapamatukan ang pagkadimatarong. Ano ang aton matun-an sa sini?

18. Ano ang punto ni Pablo sang ginlaygayan niya si Timoteo nga ‘magpalagyo gikan sa mga kailigbon nga kinaandan sa pagkapamatan-on’?

18 Agod maamligan ang aton kaangtanan kay Jehova, dapat kita maghulag gilayon. Amo ini ang punto ni Pablo sang ginlaygayan niya si Timoteo nga ‘magpalagyo gikan sa mga kailigbon nga kinaandan sa pagkapamatan-on.’ (2 Tim. 2:22) Sina nga tion, mahimo nga treintahon na si Timoteo. Pero ang “mga kailigbon nga kinaandan sa pagkapamatan-on” wala sing ginapili nga edad. Kon ginasulay sia sina nga mga kailigbon, kinahanglan nga ‘magpalagyo’ sa sini si Timoteo. Sa iban nga hambal, kinahanglan ni Timoteo ‘biyaan ang pagkadimatarong.’ Amo man sini ang punto ni Jesus sang nagsiling sia: “Kon ang imo mata nagapasandad sa imo, lukata ini kag ihaboy.” (Mat. 18:9) Sa karon, ang mga Cristiano nga sinsero nga nagtuman sini nga laygay naghulag gilayon batok sa espirituwal nga mga katalagman, nga wala nagaduhaduha ukon nagapabuyanbuyan.

19. Paano gin-amligan sang iban ang ila kaugalingon sa espirituwal nga mga katalagman?

19 Ang pila nga may kaluyahon sa alkoholiko nga ilimnon antes sila nangin Saksi nagdesisyon nga indi na gid mag-inom. Ginlikawan sang iban ang pila ka sahi sang kalingawan nga indi malain pero makapukaw sang ila kaluyahon sa moral. (Sal. 101:3) Halimbawa, sang indi pa Saksi ang isa ka utod nga lalaki, nanamian sia magkadto sa mga party nga may sinaot diin ang mga tawo nagagawi sing imoral. Pero sang natun-an niya ang kamatuoran, nagdesisyon sia nga indi na gid magsaot bisan sa pagtipontipon sang mga Saksi kay basi mapukaw ang iya indi nagakaigo nga mga handum ukon panghunahuna sadto. Siempre, wala ginapatuman sa mga Cristiano nga likawan sing bug-os ang alkohol, pagsaot, ukon iban pa nga butang nga indi man malain. Pero, ginapaabot gid nga maghulag kita gilayon kag mangin desidido para maamligan ang aton kaugalingon sa espirituwal nga mga katalagman.

20. Bisan pa indi mahapos “magbiya sa pagkadimatarong,” ano ang masaligan naton kag makapaumpaw sa aton?

20 Ang pribilehiyo nga magdala sang ngalan sang Dios nagalakip sing responsibilidad. Dapat kita “magbiya sa pagkadimatarong” kag ‘magpalayo sa malaut.’ (Sal. 34:14) Matuod, ang paghimo sini indi pirme mahapos. Pero makapaumpaw gid mahibaluan nga padayon nga ginahigugma ni Jehova ang “mga natungod sa iya” kag ang mga nagasunod sa iya matarong nga mga dalanon.2 Tim. 2:19; basaha ang 2 Cronica 16:9a.

^ par. 12 Tan-awa ang artikulo sa jw.org/hil nga “Ginadilian Bala Ninyo ang Pila ka Pelikula, Libro, Ukon Kanta?” sa idalom sang PARTE SA AMON > MGA PIRME GINAPAMANGKOT.