Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2014

“Kamo Akon mga Saksi”

“Kamo Akon mga Saksi”

“‘Kamo akon mga saksi,’ nagasiling ang GINOO.”ISA. 43:10.

1, 2. (a) Ano ang buot silingon sang mangin saksi, kag ano ang wala mahimo sang media sang kalibutan? (b) Ngaa wala nagadepende si Jehova sa media sini nga kalibutan?

ANO ang buot silingon sang mangin saksi? Suno sa isa ka diksionaryo, ang saksi amo ang “isa nga nakakita sa hitabo kag nagreport sang natabo.” Halimbawa, sa siudad sang Pietermaritzburg, sa Bagatnan nga Aprika, ang pamantalaan nga ginatawag karon nga The Witness ginabalhag sa sobra na 160 ka tuig. Nagakaigo gid ang ngalan sini nga pamantalaan, kay katuyuan sini nga ireport sing sibu ang mga nagakatabo sa bilog nga kalibutan. Ang editor nga nagtukod sang The Witness nanumpa nga ang pamantalaan magasugid sing “kamatuoran, bug-os nga kamatuoran, kag puro kamatuoran lamang.”

2 Pero makapasubo nga ang media sang kalibutan halos nagabalewala ukon nagapatiko pa gani sang pinakaimportante nga mga kamatuoran sa kasaysayan sang tawo. Wala nila ginasugid ang ginasiling sang labing gamhanan nga Dios paagi sa iya manalagna sang una nga si Ezequiel: “Makilala sang mga pungsud nga Ako amo ang GINOO.” (Ezeq. 39:7) Pero ang Soberano nga Manuggahom sang uniberso wala nagadepende sa media sang kalibutan. May ara sia mga walo ka milyon ka Saksi nga nagasugid sa mga tawo sa tanan nga pungsod parte sa iya kag sa iya mga pagpakig-angot sa katawhan, sadto kag subong. Ining hangaway sang mga Saksi nagabantala man sang dalayawon nga mga butang nga ginsaad sang Dios nga himuon sa palaabuton. Kon ginahimo naton nga prioridad ang pagpanaksi, ginapamatud-an naton ang ngalan nga ginhatag sang Dios sa  aton, subong sang ginasiling sang Isaias 43:10: “‘Kamo akon mga saksi,’ nagasiling ang GINOO, ‘kag ang akon alagad nga ginpili ko.’”

3, 4. (a) San-o ginbaton sang mga Estudyante sang Biblia ang bag-o nga ngalan, kag ano ang ila nabatyagan sa sini? (Tan-awa ang piktyur sa umpisa sini nga artikulo.) (b) Ano nga mga pamangkot ang aton binagbinagon?

3 Pribilehiyo gid nga dalhon ang ngalan ni Jehova, kay sia ang “Hari nga dayon,” nga nagasiling: “Ini amo ang akon ngalan sa gihapon, kag ini amo ang akon handumanan sa tanan nga kaliwatan”! (1 Tim. 1:17; Ex. 3:15; ipaanggid ang Manugwali 2:16.) Sang 1931, ang ngalan nga mga Saksi ni Jehova ginbaton sang mga Estudyante sang Biblia. Pagkatapos sini, madamo nga sulat sang apresasyon ang ginbalhag sa sini nga magasin. Ang isa ka kongregasyon sa Canada nagsulat: “Nakunyag gid kami sa maayo nga balita nga kita ‘mga saksi ni Jehova,’ kag ginpabaskog sini ang amon determinasyon nga mangin takus sa sining bag-o nga ngalan.”

4 Paano mo mapakita ang imo apresasyon sa pribilehiyo nga dalhon ang ngalan sang Dios? Mapaathag mo man bala kon ngaa gintawag kita ni Jehova nga iya mga Saksi, subong sang aton mabasa sa tulun-an sang Isaias?

ANG MGA SAKSI SANG DIOS SANG UNA

5, 6. (a) Sa ano nga paagi ang Israelinhon nga mga ginikanan mangin mga saksi ni Jehova? (b) Ano pa ang ginsugo sa mga Israelinhon, kag ngaa dapat man ini himuon sang mga ginikanan subong?

5 Ang tagsa ka Israelinhon sang panahon ni Isaias amo ang “mga saksi” ni Jehova, kag ang pungsod sa kabilugan amo ang “alagad” sang Dios. (Isa. 43:10) Ang isa ka paagi nga makapanaksi ang Israelinhon nga mga ginikanan amo ang pagtudlo sa ila kabataan parte sa mga pagpakig-angot sang Dios sa ila mga katigulangan. Halimbawa, sang ginsugo ang katawhan nga saulugon ang Paskua kada tuig, ginsilingan sila: “Kon ang inyo mga anak magsiling sa inyo, ‘Ano bala ang kahologan sining pag-alagdan?’ magasiling kamo, ‘Ini halad sang pascua sang GINOO, kay nagligad sia sa kabalayan sang katawohan sang Israel sa Egipto, sang pagpatay niya sang mga Egiptohanon  apang ginluwas ang amon kabalayan.’” (Ex. 12:26, 27) Mahimo man ginpaathag sini nga mga ginikanan sa ila kabataan nga sang nagkadto si Moises sa manuggahom sang Egipto para mangabay nga tugutan ang mga Israelinhon sa pagsimba kay Jehova sa kamingawan, nagsabat ang Paraon: “Sin-o bala ang GINOO, nga magpamati ako sa iya tingug kag magpalakat sang Israel?” (Ex. 5:2) Mahimo ginsugid man nila nga sa tapos sang napulo ka kalalat-an nga naglaglag sa duta kag sa tapos naluwas ang mga Israelinhon sa hangaway sang Egipto sa Pula nga Dagat, nangin maathag sa tanan ang sabat sa pamangkot sang Paraon, nga si Jehova gid ang Labing Gamhanan. Nasaksihan man sang pungsod sang Israel nga si Jehova ang matuod nga Dios kag Manugtuman sang iya mga saad.

6 Ang mga Israelinhon nga nagaapresyar sa pribilehiyo nga dalhon ang ngalan sang Dios pat-od nga nagsugid sining dalayawon nga mga hitabo indi lamang sa ila kabataan kundi sa mga dumuluong man nga nangin mga ulipon sa ila mga panimalay. Ginsugo man ang mga Israelinhon nga hanason ang ila kabataan sa pagtuman sa mga talaksan sang Dios parte sa pagkabalaan. Si Jehova nagsiling: “Magpakabalaan kamo; kay Ako ang GINOO nga inyo Dios balaan.” (Lev. 19:2; Deut. 6:6, 7) Maayo gid ini nga halimbawa para sa Cristiano nga mga ginikanan subong, nga dapat man maghanas sa ila kabataan sa mga dalanon sang pagkabalaan, amo nga mabuligan sila sa pagpadungog sa mahimayaon nga ngalan sang Dios!Basaha ang Hulubaton 1:8; Efeso 6:4.

Ang pagtudlo sa aton mga kabataan parte kay Jehova nagapadungog sa iya ngalan (Tan-awa ang parapo 5 kag 6)

7. (a) Kon mangin matutom ang mga Israelinhon kay Jehova, ano ang epekto sini sa mga pungsod sa palibot nila? (b) Ano ang responsibilidad sang tanan nga nagadala sa ngalan sang Dios?

7 Gani, kon mangin matutom ang mga Israelinhon, makahatag sila sing maayo nga panaksi sa ngalan sang Dios. Ginsilingan sila: “Ang tanan nga mga katawohan sang duta makakita nga ikaw gintawag sa ngalan sang GINOO; kag kahadlukan ka nila.” (Deut. 28:10) Pero makapasubo nga sa kasaysayan sang mga Israelinhon, masami nga indi sila matutom. Nagabalik sila sa pagsimba sa ginhimo sang tawo nga mga idolo. Luwas sini, pareho sang diosdios sang mga Canaanhon nga ila ginasimba, nangin mapintas sila, nga nagahalad sang ila kabataan kag nagapigos sa mga imol. Mabaskog gid ini nga leksion para sa aton nga tinguhaan pirme nga mangin balaan bilang pag-ilog sa Isa nga Labing Balaan, nga ang iya ngalan aton ginadala!

“YARI KARON, MAGAHIMO AKO SING BAG-ONG BUTANG”

8. Ano ang ginsugo ni Jehova kay Isaias, kag ano ang reaksion ni Isaias?

8 Gintagna na nga daan ni Jehova nga masaksihan sang mga Israelinhon ang dalayawon nga pagluwas sa ila gikan sa pagkabihag. (Isa. 43:19) Ang una nga anom ka kapitulo sang tulun-an sang Isaias halos nagaunod sing mga paandam parte sa pat-od nga kalamidad nga magaabot sa Jerusalem kag sa mga siudad sa palibot sini. Si Jehova, nga makabasa sing bug-os sa tagipusuon, nagsiling kay Isaias nga padayunon ang pagpahayag sini nga paandam bisan pa maeksperiensiahan niya ang negatibo nga reaksion. Nakibot gid si Isaias kag namangkot kon asta san-o mangin indi mahinulsulon ang pungsod sang Dios. Ang Dios nagsabat: “Tubtub nga ang kabanwaanan malaglag nga wala sing pumuluyo, kag ang mga balay wala sing tawo, kag ang duta malaglag sing bug-os.”Basaha ang Isaias 6:8-11.

9. (a) San-o natuman ang tagna ni Isaias parte sa Jerusalem? (b) Ano ang kahimtangan karon nga nagapakita nga dapat kita magbugtaw?

9 Nabaton ni Isaias ini nga sugo sa katapusan nga tuig sang paggahom ni Hari Uzias, ukon sang mga 778 B.C.E. Ginpadayon niya ang iya pag-alagad subong manalagna sing mga 46 ka tuig asta sa katapusan sang 732 B.C.E., sa tion sang paggahom ni Hari Ezequias. Ginapakita sini nga may 125 ka tuig pa antes nalaglag ang Jerusalem sang 607 B.C.E. Gani, madamo nga paandam ang ginhatag sa katawhan sang Dios parte sa matabo sa ila pungsod sa palaabuton. Sa  karon, ginsugo man ni Jehova ang iya katawhan nga maghatag sing madamo nga paandam parte sa matabo sa palaabuton. Sa sulod sang 135 ka tuig, halin sa una nga gua sang Ang Lalantawan, ginapatalupangod sini sa mga bumalasa nga magbugtaw sa kamatuoran nga ang malaut nga sistema ni Satanas madula sa indi madugay kag buslan sang Isa ka Libo ka Tuig nga Paggahom ni Jesucristo.Bug. 20:1-3, 6.

10, 11. Ano nga katumanan sang tagna ni Isaias ang nasaksihan sang mga Israelinhon sa Babilonia?

10 Madamo nga matinumanon nga mga Judiyo nga nagsurender sa mga Babilonianhon ang naluwas sa kalaglagan sang Jerusalem kag gindala nga bihag sa Babilonia. (Jer. 27:11, 12) Didto, pagligad sang 70 ka tuig, nasaksihan sang katawhan sang Dios ang katumanan sang isa ka dalayawon nga tagna: “Amo ini ang ginsiling ni Jehova, ang inyo Manunubos, ang Balaan sang Israel: ‘Tungod sa inyo ipadala ko sila sa Babilonia kag gub-on ko ang mga pintal sang gawang.’”Isa. 43:14, NW.

11 Parte sini nga tagna, may makapakibot nga hitabo sang isa ka gab-i sang Oktubre 539 B.C.E. Sang ang hari sang Babilonia kag ang mga dungganon sini nagainom sing alak nga ginagamit ang balaan nga mga suludlan nga ginkuha sa templo sa Jerusalem kag nagadayaw sa ila ginhimo nga mga dios, ang mga hangaway sang Media kag Persia naglutos sa Babilonia. Sang 538 ukon 537 B.C.E., ang naglutos sa Babilonia nga si Ciro, nagsugo sa mga Judiyo nga magbalik kag patindugon liwat ang templo sang Dios sa Jerusalem. Ini tanan gintagna ni Isaias, lakip ang saad ni Jehova nga amanan niya kag amligan ang iya mahinulsulon nga katawhan samtang nagabalik sila sa Jerusalem. Gintawag sila sang Dios nga “ang katawohan nga ginhuman ko nga sa akon agud nga sila magpahayag sang akon kadayawan.” (Isa. 43:21; 44:26-28) Kon makabalik na ining mga tinapok sang una kag mapatindog nila liwat ang templo ni Jehova sa Jerusalem, mangin mga saksi sila sa kamatuoran nga si Jehova, ang lamang matuod nga Dios, nagatuman gid sa iya ginsiling.

12, 13. (a) Sin-o ang nalakip sa mga Israelinhon sa pagpasag-uli sang pagsimba kay Jehova? (b) Ano ang ginapaabot sa “iban nga mga karnero” samtang ginasuportahan nila ang “Israel sang Dios,” kag ano ang ila paglaum?

12 Ang linibo nga indi Israelinhon nangin bahin sang ginbun-ag liwat nga pungsod, kag sang ulihi madamo nga Gentil ang nangin mga Judiyo nga proselita. (Esd. 2:58, 64, 65; Est. 8:17) Sa karon, ang “dakung kadam-an” sang “iban nga mga karnero” ni Jesus mainunungon nga nagasuporta sa hinaplas nga mga Cristiano, nga nagahuman sa “Israel sang Dios.” (Bug. 7:9, 10; Juan 10:16; Gal. 6:16) Ang dakung kadam-an ginatawag man sa ngalan nga ginhatag sang Dios—mga Saksi Jehova.

13 Sa tion sang Isa ka Libo ka Tuig nga Paggahom ni Cristo, mangin malipayon gid ang dakung kadam-an sa pagpaathag sa mga ginbanhaw  kon ano ang mangin Saksi ni Jehova sa katapusan nga mga adlaw sining sistema sang mga butang. Pero mahimo lamang naton ini kon tindugan naton ang aton ngalan karon kag tinguhaan nga magpabilin nga balaan. Isa pa, bisan pa nagapanikasog kita, dapat kita mangayo sing kapatawaran kada adlaw sa mga nahimo naton nga indi balaan, nga ginabaton nga makasasala kita, kag daku katama nga kadungganan ang pagtugot sa aton nga dalhon ang balaan nga ngalan sang Dios.Basaha ang 1 Juan 1:8, 9.

ANG KAHULUGAN SANG NGALAN SANG DIOS

14. Ano ang kahulugan sang ngalan nga Jehova?

14 Para magdalom ang aton apresasyon sa kadungganan nga dalhon ang ngalan sang Dios, maayo gid nga pamalandungan naton ang kahulugan sini. Ang ngalan sang Dios, nga kinaandan nga gina-translate subong “Jehova,” naghalin sa Hebreo nga berbo nga mahimo maglaragway sang aksion kag mahimo i-translate nga “mangin amo.” Gani, ang ngalan nga Jehova mahimo nga nagakahulugan sing “Sia nga Nagapahanabo nga Mangin Amo.” Ini nga kahulugan sibu gid sa papel ni Jehova subong Manunuga sang pisikal nga uniberso kag sang maalam nga mga tinuga kag subong Manugtuman sang iya katuyuan. Sa pagligad sang tion, padayon niya nga ginapahanabo nga matuman ang iya kabubut-on kag katuyuan bisan ano pa ang himuon sang mga manugpamatok, kaangay ni Satanas, para balabagan ang katumanan sang kabubut-on sang Dios.

15. Ano ang aton matun-an sa ngalan ni Jehova base sa iya ginsiling kay Moises? (Tan-aw ang kahon nga “ Ngalan nga Puno sing Kahulugan.”)

15 Ginpaathag pa gid ni Jehova ang kahulugan sang iya ngalan kay Moises sang ginpadala Niya sia para hilwayon ang Iya katawhan gikan sa Egipto. Ang rekord sang Biblia nagsiling: “Ang Dios nagsiling kay Moises, ‘AKO AMO AKO’ [ukon, “Mangin Amo Ako Kon Ano ang Luyag Ko nga Mangin Amo Ako”]. Kag nagsiling sia, ‘Amo ini ang isiling mo sa katawohan sang Israel, “Si AMO AKO nagpadala sa akon sa inyo.”’” (Ex. 3:14) Gani, ano man ang kahimtangan, si Jehova mangin bisan ano para matuman ang iya katuyuan. Para sa mga Israelinhon nga naulipon sang una, sia nangin Manluluwas, Manug-amlig, Manugtuytoy, kag Manug-aman nga nagahatag sang tanan nila nga materyal kag espirituwal nga mga kinahanglanon.

PAGPAKITA SANG ATON PAGPASALAMAT

16, 17. (a) Paano naton mapakita ang aton pagpasalamat sa pribilehiyo nga dalhon ang ngalan sang Dios? (b) Ano ang binagbinagon sa masunod nga artikulo?

16 Sa karon, padayon nga ginapamatud-an ni Jehova ang kahulugan sang iya ngalan paagi sa pag-aman sang tanan naton nga espirituwal kag materyal nga mga kinahanglanon. Pero ang ngalan sang Dios nagatudlo sa aton sing iban pa nga butang parte sa iya. Nagalakip ini sa iya pagpahanabo sa mga butang may kaangtanan sa hilikuton sang iya mga Saksi para matuman ang iya katuyuan. Ang pagpamalandong sa sini makabulig sa aton nga magpadayon sa pagkabuhi nahisuno sa iya ngalan. Si Kåre, nga 84 anyos kag 70 ka tuig na nga makugi nga Saksi sa Norway, nagsiling: “Daku gid nga kadungganan para sa akon nga mag-alagad kay Jehova, ang Hari nga dayon, kag mangin bahin sang katawhan nga ginatawag sa iya balaan nga ngalan. Pribilehiyo gid pirme nga mapaathag ang kamatuoran sa Biblia kag makita nga nalipay kag nasanagan ang mga tawo. Halimbawa, nalipay gid ako kon ginatudluan ko sila kon paano gin-aman ang halad-gawad ni Cristo kag kon paano nila matigayon ang kabuhi nga wala sing katapusan sa isa ka malinong kag matarong nga bag-ong kalibutan paagi sa sini.”

17 Matuod nga sa pila ka teritoryo, mabudlay na gid makakita sing mga tawo nga luyag magtuon parte sa Dios. Pero, kaangay ni Kåre, indi bala nga nalipay ka gid kon makakita ka sing interesado kag matudluan sia parte sa ngalan ni Jehova? Apang paano kita mangin Saksi ni Jehova kag dayon mangin mga saksi man ni Jesus? Ini nga pamangkot binagbinagon sa masunod nga artikulo.