Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2014

Madumduman Mo Bala?

Madumduman Mo Bala?

Nabasa mo bala sing maayo ang ulihi nga mga gua sang Ang Lalantawan? Kon amo, tilawi kon masabat mo ang masunod nga mga pamangkot:

Ano nga oras dapat ihawon ang kordero sang Paskua sa Nisan 14?

Ang pila ka translation sang Biblia nagasiling nga dapat ini ihawon “sa kahaponon,” nga sa literal, “sa ulot sang duha ka gab-i,” buot silingon sa sirom ukon kahapunanon—sa tapos magtunod ang adlaw pero antes magdulom. (Ex. 12:6)—12/15, pahina 18-19.

Ano nga mga prinsipio sa Biblia ang magamit sang mga pamatan-on para makahimo sing maalamon nga mga desisyon?

Ini amo ang (1) Pangitaa anay ang Ginharian sang Dios kag ang iya pagkamatarong. (Mat. 6:19-34) (2) Magkalipay sa pag-alagad sa iban. (Binu. 20:35) (3) Magkalipay sa pag-alagad sa Dios samtang pamatan-on. (Man. 12:1)—1/15, pahina 19-20.

Ano ang apat ka manugkabayo ang nagpanghikot sugod sang 1914?

Si Jesus, ang nagasakay sa puti nga kabayo, nagpanghikot agod tabugon sa langit si Satanas kag ang iya mga demonyo. Ang ­nagasakay sa pula nga kabayo nagalaragway sa mga inaway nga nagpaantos sa katawhan. Ang nagasakay sa itom nga kabayo nagarepresentar sa tiggulutom. Ang nagasakay sa maluspad nga kabayo nagadala sing kamatayon bangod sang makamamatay nga balatian, nga nagpatay sa minilyon. (Bug. 6:2-8)—2/1, pahina 6-7.

San-o matabo “ang kasal sang Kordero”? (Bug. 19:7)

“Ang kasal sang Kordero” matabo kon matapos na sang Hari, nga si Jesucristo, ang iya pagpangdaug, buot silingon, sa tapos sang kalaglagan sang Babilonia nga Daku kag sa tapos sang inaway sa Armagedon.—2/15, pahina 10.

Ngaa “nagapaabot” ang mga Judiyo sang adlaw ni Jesus sa Mesias? (Luc. 3:15)

Indi naton mapat-od nga ang paghangop sang mga Judiyo sang unang siglo sa tagna ni Daniel parte sa Mesias pareho sa aton paghangop. (Dan. 9:24-27) Pero, ­mahimo nga nabatian nila ang ginpahayag sang anghel sa pila ka manugbantay sang karnero ukon ang ginsiling ni Ana sang nakita niya ang lapsag nga si Jesus sa templo. Subong man, nag-abot ang mga astrologo sa pagpangita sa “isa nga natawo nga hari sang mga Judiyo.” (Mat. 2:1, 2) Sang ulihi, si Juan nga Manugbawtismo nagsiling nga sa indi madugay maabot ang Cristo.—2/15, pahina 26-27.

Paano naton malikawan nga ang aton Huo mangin Indi? (2 Cor. 1:18)

Matuod, kon kaisa, may mga sitwasyon nga indi naton kontrolado amo nga indi naton matuman ang aton ginhambal. Pero kon may ginpromisa kita ukon ginkasugtan, kinahanglan naton himuon ang aton masarangan para tumanon ini.—3/15, pahina 32.

Paano naton mabatuan ang pagsulay nga magtan-aw sing pornograpiya?

Ang tatlo ka paagi nga makabulig amo ang (1) Pagpalayo gilayon sang aton panulok kon makakita kita sing binastos nga laragway. (2) Pagbantay sang aton mga panghunahuna paagi sa pagkonsentrar sa positibo nga mga butang kag pagpangamuyo sa Dios. (3) Pagbantay sang aton tikang paagi sa paglikaw sa mga pelikula ukon Web site nga nagaunod sing pornograpiya.—4/1, pahina 10-12.

Ano ang wala sa plano nga mga resulta kon biyaan sang isa ka Cristiano ang iya pamilya para mangita sing kuarta sa iban nga lugar?

Kon ang mga ginikanan malayo sa ila pamilya, ang mga kabataan mahimo mahalitan sa emosyon kag sa moral. Mahimo sila maakig sa ila (mga) ginikanan. Kag ang mga tiayon nga malayo sa isa kag isa mahimo mag-atubang sing seksuwal nga mga pagsulay.—4/15, pahina 19-20.

Ngaa ginabalbag ang mga batiis sang mga kriminal nga ginabitay sa usok?

Ginapatay sang mga Romano ang pila ka kriminal paagi sa pagbitay sa usok. Ginpangabay sang mga Judiyo nga balbagon ang mga batiis sang mga kriminal sa tupad ni Jesus. Nagapabudlay ini sa pagginhawa, amo nga madali sila mapatay. Gani indi sila kinahanglan nga magpabilin sa usok sa bilog nga gab-i. (Deut. 21:22, 23)—5/1, pahina 11.

Ano ang apat ka pamangkot nga dapat naton dumdumon kon nagapakig-istorya sa mga tawo sa ministeryo?

Sin-o ang akon ginaistorya? Sa diin ko sila ginaistorya? San-o ko sila ginaistorya? Paano ko sila dapat istoryahon?—5/15, pahina 12-15.

Daw ano ka makamamatay ang pagpanigarilyo?

Sang nagligad nga siglo, nagpatay ini sing 100,000,000 ka tawo. Sining karon lang, nagakutol ini sang 6,000,000 ka kabuhi kada tuig.—6/1, pahina 3.