Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2014

Mga Pamangkot Gikan sa mga Bumalasa

Mga Pamangkot Gikan sa mga Bumalasa

Nagakaigo bala sa mga Cristiano ang cremation?

Wala ginapamatukan sang Kasulatan ang cremation.

May mga rekord sa Biblia parte sa mga lawas ukon tul-an sang patay nga mga tawo nga ginsunog. (Jos. 7:25; 2 Cron. 34:4, 5) Mahimo ginapakita sini nga yadto nga mga tawo indi nagakabagay sa disente nga lubong. Pero indi amo sini pirme ang rason kon ngaa ginasunog ang bangkay.

Makita naton ini sa rekord parte sa kamatayon ni Hari Saul kag sang iya tatlo ka anak nga lalaki. Sila nga apat napatay sa pagpakig-away sa mga Filistinhon. Ang isa sa ila amo si Jonatan, nga maayo nga abyan kag matutom nga sumalakdag ni David. Sang nahibaluan sang maisog nga mga Israelinhon sa Jabes-­gilead ang natabo, ginkuha nila ang bangkay sang apat, ginsunog ini, kag dayon ginlubong ang mga tul-an. Sang ulihi, gindayaw ni David yadto nga mga Israelinhon bangod sa ila ginhimo.—1 Sam. 31:2, 8-13; 2 Sam. 2:4-6.

Ang Makasulatanhon nga paglaum para sa mga patay amo ang pagkabanhaw—ang pagbuhi liwat sang Dios sa isa ka persona. Gin-cremate man ukon wala ang patay nga tawo, wala sing limitasyon ang ikasarang ni Jehova sa pagpasag-uli sang kabuhi sini upod sa bag-o nga lawas. Ang tatlo ka matutom nga Hebreo nga nag-atubang sing kamatayon sa kalayuhon nga hurno, bilang mando ni Hari Nabocodonosor, wala mahadlok nga kon masunog gid man sila, indi na sila mabanhaw sang Dios. (Dan. 3:16-18) Matuod man ini sa matutom nga mga alagad ni Jehova nga ginpamatay kag dayon gin-cremate sa mga kampo konsentrasyon sang Nazi. Ang iban nga matutom nga alagad sang Dios napatay sa mga paglupok ukon sa iban nga kabangdanan diin ang ila mga bangkay indi na makita. Sa gihapon, pat-od ang ila pagkabanhaw.—Bug. 20:13.

Indi kinahanglan nga asembulon liwat ni Jehova ang daan nga lawas sang isa ka tawo para mabanhaw ini. Makita ini sa pagbanhaw sang Dios sa hinaplas nga mga Cristiano pakadto sa kabuhi sa langit. Pareho kay Jesus, nga “ginbuhi sa espiritu,” ang hinaplas nga mga Cristiano ginbanhaw nga amo man gihapon nga persona, pero sa espiritu nga lawas. Ang bisan ano nga bahin sang ila pisikal nga lawas indi na nila madala sa langit.—1 Ped. 3:18; 1 Cor. 15:42-53; 1 Juan 3:2.

Ang aton paglaum sa pagkabanhaw nagadepende, indi sa kon ano ang ginahimo sa bangkay, kundi sa pagtuo sa ikasarang kag handum sang Dios sa pagtuman sang iya mga saad. (Binu. 24:15) Matuod, mahimo nga indi naton mahangpan sing bug-os kon paano ginhimo sang Dios ang pagkabanhaw sang una ukon kon paano niya ini himuon sa palaabuton. Sa gihapon, nagasalig kita kay Jehova. Naghatag sia sing “garantiya” paagi sa pagbanhaw kay Jesus.—Binu. 17:31; Luc. 24:2, 3.

Maayo gid nga binagbinagon anay sang mga Cristiano ang mga ginabaton sang kalabanan, mga balatyagon sang mga tawo sa ila lugar, kag mga ginapatuman sang kasuguan parte sa pagpalubong sa mga bangkay. (2 Cor. 6:3, 4) Dayon, desisyon na sang isa ukon sang pamilya kon bala ang lawas sang napatay i-cremate ukon indi.