Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MAYO 2014

Nagapadayon Ka Bala Upod sa Organisasyon ni Jehova?

Nagapadayon Ka Bala Upod sa Organisasyon ni Jehova?

“Ang mga mata ni Jehova nagatulok sa mga matarong.” —1 PED. 3:12.

1. Ano nga organisasyon ang nagbulos sa apostata nga Israel subong katawhan para sa ngalan ni Jehova? (Tan-awa ang piktyur sa umpisa sini nga artikulo.)

SI Jehova gid ang dapat dayawon sang natukod ang Cristianong kongregasyon sang unang siglo kag sang napasag-uli ang matuod nga pagsimba sa moderno nga tion. Subong sang ginpakita sa nagligad nga artikulo, ang organisasyon sang mga sumulunod ni Cristo sang una amo ang nagbulos sa apostata nga pungsod sang Israel subong katawhan para sa ngalan ni Jehova. Ang bag-o nga organisasyon, nga ginkahamut-an gid sang Dios, naluwas sa kalaglagan sang Jerusalem sang 70 C.E. (Luc. 21:20, 21) Ang mga hitabo sang unang siglo amo ang panugod sang mga pag-uswag sa mga alagad ni Jehova sa aton tion. Ang sistema sang mga butang ni Satanas malaglag sa indi madugay, pero ang organisasyon sang Dios makalampuwas sa katapusan nga mga adlaw. (2 Tim. 3:1) Ngaa mapat-od naton ini?

2. Ano ang ginsiling ni Jesus parte sa “dakung kapipit-an,” kag paano ini magasugod?

2 Parte sa iya indi makita nga presensia kag sa katapusan sang sistema sang mga butang, si Jesus nagsiling: “May dakung kapipit-an, nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo liwat.” (Mat. 24:3, 21) Ining wala sing kaanggid nga dakung kapipit-an  magasugod sa paglaglag ni Jehova sang “Babilonia nga Daku,” nga amo ang bug-os kalibutan nga emperyo sang butig nga relihion, paagi sa paggamit sa pulitikal nga mga kagamhanan. (Bug. 17:3-5, 16) Ano dayon ang matabo?

ANG PAGSALAKAY NI SATANAS MAGARESULTA SA ARMAGEDON

3. Sa tapos malaglag ang butig nga relihion, ano nga plano sang pagsalakay ang himuon sa katawhan ni Jehova?

3 Sa tapos malaglag ang butig nga relihion, si Satanas kag ang lainlain nga elemento sang iya kalibutan magasalakay sa mga alagad ni Jehova. Halimbawa, parte kay “Gog, sa duta sang Magog,” ang Kasulatan nagtagna: “Magaabut ka kaangay sang unus, manginkaangay ka sang gal-um nga magatabon sang duta, ikaw kag ang tanan mo nga guban, kag ang madamu nga mga katawohan upud sa imo.” Bangod ang mga Saksi ni Jehova wala sing armado nga kusog kag sila ang pinakamalinong nga mga tawo sa kalibutan, daw mahapos lang sila salakayon. Pero nagsala gid sila sa sini nga pagsalakay!—Ezeq. 38:1, 2, 9-12.

4, 5. Ano ang himuon ni Jehova sa mga pagtinguha ni Satanas nga laglagon ang Iya mga alagad?

4 Ano ang himuon sang Dios sa mga pagtinguha ni Satanas nga papason ang Iya katawhan? Magapasilabot si Jehova para sa ila, bilang pagpakita sang iya kinamatarong subong Soberano sa bug-os nga uniberso. Para kay Jehova, ang pagsalakay sa iya mga alagad, pagsalakay man sa iya. (Basaha ang Zacarias 2:8.) Gani, ang aton Amay sa langit magahulag gilayon agod luwason kita. Ini nga kaluwasan matapos sa paglaglag sang kalibutan ni Satanas sa Armagedon, ang “inaway sang daku nga adlaw sang Dios nga Labing Gamhanan.”—Bug. 16:14, 16.

5 Parte sa Armagedon, ang Biblia nagtagna: “‘Ang GINOO may kasaba batok sa mga pungsud; sia magasulud sa hukmanan upud sa tanan nga unud, kag ang mga malauton itugyan niya sila sa espada, nagasiling ang GINOO.’ ‘Amo ini ang ginasiling sang GINOO sang mga kasoldadosan, Yari karon, ang malaut magalapnag sa pungsud pa pungsud, kag ang daku nga unus magagikan sa mga ukbung sang duta! ‘Kag ang pinatay sang GINOO sa sadto nga adlaw manginkutub sa isa ka ukbung sang duta tubtub gid sa isa ka ukbung sang duta. Indi sila paghayaan, ukon tiponon, ukon ilubung; mangin-ipot sila sa kadaygan sang duta.’” (Jer. 25:31-33) Tapuson sang Armagedon ining malaut nga sistema sang mga butang. Ang kalibutan ni Satanas madula, pero ang dutan-on nga bahin sang organisasyon ni Jehova magapabilin.

KON NGAA PADAYON NGA NAGAUSWAG ANG ORGANISASYON NI JEHOVA SUBONG

6, 7. (a) Diin magahalin ang mga nalakip sa “dakung kadam-an”? (b) Ano nga mga pag-uswag ang natabo sa sini nga mga tinuig?

6 Ang organisasyon sang Dios makalampuwas kag padayon nga nagauswag sa duta bangod ang mga tawo nga bahin sini ginakahamut-an niya. Ang Biblia nagapasalig sa aton: “Ang mga mata ni Jehova nagatulok sa mga matarong, kag ang iya mga dulunggan nagapamati sa ila pag-ampo.” (1 Ped. 3:12) Nalakip sa mga matarong ang “isa ka dakung kadam-an” nga “naggua gikan sa dakung kapipit-an.” (Bug. 7:9, 14) Ini nga mga nakalampuwas indi lamang “isa ka kadam-an,” kundi “isa ka dakung kadam-an”—ukon madamo katama nga tawo. Nakita mo bala ang imo kaugalingon nga isa sa mga nakaluwas sa “dakung kapipit-an”?

7 Diin magahalin ining mga nalakip sa dakung kadam-an? Natipon sila tanan bangod gintagna ini ni Jesus. Ini nga tagna bahin sang tanda sang iya presensia. Nagsiling sia: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mat. 24:14) Amo ini ang panguna nga hilikuton sang organisasyon sang Dios sa sining katapusan nga mga adlaw. Bangod sa bug-os kalibutan nga  pagbantala kag pagtudlo sang mga Saksi ni Jehova, minilyon ang nakatuon nga simbahon ang Dios sa “espiritu kag kamatuoran.” (Juan 4:23, 24) Halimbawa, sang nagligad nga napulo ka tuig—sang 2003 tubtob 2012 nga mga tuig sang pag-alagad—sobra 2,707,000 ka indibiduwal ang ginbawtismuhan subong simbulo sang ila dedikasyon sa Dios. Sa bilog nga kalibutan, sobra na sa 7,900,000 ang mga Saksi, kag minilyon pa ang nagapakig-upod sa ila, labi na sa pagsaulog sang Memoryal kada tuig. Wala naton ginapabugal ang aton kadamuon, bangod ‘ang Dios ang nagapatubo sini.’ (1 Cor. 3:5-7) Pero ginapakita sini nga ang dakung kadam-an nagadamo kag padayon nga nagadaku kada tuig.

8. Ngaa daku gid ang pag-uswag sang organisasyon ni Jehova subong?

8 Daku gid ang pag-uswag sa kadamuon sang mga alagad sang Dios bangod si Jehova mismo ang nagabulig sa iya mga Saksi. (Basaha ang Isaias 43:10-12.) Ini nga pag-uswag gintagna: “Ang diotay mangin-isa ka libo, kag ang diotay manginmabakud nga pungsud; Ako amo ang GINOO; magapadali ako sini sa iya tion.” (Isa. 60:22) Sang una, ang hinaplas nga mga nagkalabilin “diotay” lamang, pero ang ila kadamuon nagdugang samtang ginatipon sa organisasyon sang Dios ang iban pa nga espirituwal nga mga Israelinhon. (Gal. 6:16) Bangod sang pagpakamaayo ni Jehova sa sulod sang mga tinuig, ang pag-uswag nagapadayon paagi sa pagtipon sa dakung kadam-an.

KON ANO ANG GINAPATUMAN NI JEHOVA SA ATON

9. Ano ang dapat naton himuon kon luyag naton maeksperiensiahan ang masanag nga palaabuton nga ginsaad sa Pulong sang Dios?

9 Hinaplas man kita nga mga Cristiano ukon miembro sang dakung kadam-an, mahimo naton maeksperiensiahan ang masanag nga palaabuton nga ginsaad sa Pulong sang Dios. Pero para matigayon ini, dapat naton himuon ang mga ginapatuman ni Jehova. (Isa. 48:17, 18) Binagbinaga ang mga Israelinhon nga yara sa idalom sang Mosaikong Kasuguan. Ang isa ka katuyuan sang Kasuguan amo nga amligan ang katawhan sang Israel paagi sa paghatag sa ila sing nagakaigo nga mga pagsulundan parte sa sekso, negosyo, pag-atipan sa bata, husto nga pagpakig-angot sa isigkatawo, kag iban pa. (Ex. 20:14; Lev. 19:18, 35-37; Deut. 6:6-9) Amo man sini ang aton mga benepisyo kon ginahimo naton ang mga ginapatuman sang Dios—kag wala naton ginakabig nga kabug-atan ang paghimo sang iya kabubut-on. (Basaha ang 1 Juan 5:3.) Ang matuod, subong nga ang mga Israelinhon gin-amligan sang Kasuguan, ang aton pagtuman sa mga kasuguan kag mga prinsipio ni Jehova nga Dios wala lamang nagaamlig sa aton kundi nagabulig man sa aton nga mangin ‘mapagros sa pagtuo.’—Tito 1:13.

10. Ngaa dapat kita maghatag sing tion para sa pagtuon sa Biblia kag sa Pangpamilya nga Pagsimba kada semana?

10 Ang dutan-on nga bahin sang organisasyon ni Jehova padayon nga nagauswag sa lainlain nga paagi. Halimbawa, padayon nga nagaathag ang aton paghangop sa kamatuoran sang Biblia. Mapaabot gid naton ini, bangod “ang banas sang matarung subong sang nagapamanagbanag nga kapawa, nga nagasilak sing labi kag labi tubtub sa himpit nga adlaw.” (Hulu. 4:18) Pero maayo nga mamangkot kita: ‘Nagadungan bala ako sa mga pagbag-o sang aton paghangop sa kamatuoran sang Kasulatan? Kinabatasan ko na bala nga basahon ang Biblia kada adlaw? Palabasa bala ako sang aton mga publikasyon? Ako bala kag ang akon mga pinalangga may Pangpamilya nga Pagsimba kada semana?’ Ang kalabanan sa aton magaugyon nga indi gid man mabudlay himuon ini nga mga butang. Sa masami, kinahanglan lamang nga hatagan ini sing tion. Importante gid nga magkuha sing sibu nga ihibalo sa Kasulatan, iaplikar ini, kag mag-uswag sa espirituwal—ilabi na karon nga malapit na katama ang dakung kapipit-an!

11. Sa ano nga mga paagi ang mga kapiestahan sang una kag ang mga miting, asembleya, kag mga kombension karon mapuslanon?

 11 Ang organisasyon ni Jehova nagapanghikot para sa aton kaayuhan sa tion nga ginapalig-on kita sini nga pamatian ini nga laygay ni apostol Pablo: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.” (Heb. 10:24, 25) Ang mga kapiestahan kada tuig kag ang iban pa nga pagtilipon para sa pagsimba nagapabakod sang espirituwalidad sang mga Israelinhon. Isa pa, ang mga selebrasyon subong sang Piesta sang mga Payagpayag sang panahon ni Nehemias makalilipay gid nga mga okasyon. (Ex. 23:15, 16; Neh. 8:9-18) Amo man sini nga mga benepisyo ang aton matigayon sa aton mga miting, asembleya, kag mga kombension. Panginpuslan gid naton sing bug-os ini nga mga aman para mangin malipayon kita kag mapagros sa espirituwal.—Tito 2:2.

12. Ano dapat ang aton ginabatyag sa pagbantala sing Ginharian?

12 Bangod miembro kita sang organisasyon sang Dios, nalipay kita nga makigbahin sa “balaan nga hilikuton nga pagbantala sing maayong balita sang Dios.” (Roma 15:16) Ang pagpakigbahin sa sining “balaan nga hilikuton” nagahimo sa aton nga “mga masigkamanugpangabudlay” ni Jehova, ang “Isa nga Balaan.” (1 Cor. 3:9; 1 Ped. 1:15) Ang pagbantala sing maayong balita makabulig sa pagpadungog sa balaan nga ngalan ni Jehova. Kag indi gid matupungan ang pribilehiyo nga kita ang ginsaligan sang “mahimayaon nga maayong balita sang malipayon nga Dios.”—1 Tim. 1:11.

13. Sa diin nagadepende ang espirituwal nga kapagros kag maayo nga kabuhi?

13 Luyag sang Dios nga mahuptan naton ang aton kapagros sa espirituwal paagi sa pagpabilin sa iya kag pagsuporta sa lainlain nga buluhaton sang iya organisasyon. Ginsilingan ni Moises ang mga Israelinhon: “Ginatawag sa sining adlaw sa pagsaksi batok sa inyo ang langit kag ang duta, nga nabutang ko sa atubangan mo ang kabuhi kag ang kamatayon, ang pagpakamaayo kag ang pagpakamalaut; busa pili-a ang kabuhi, agud nga magkabuhi ka, ikaw kag ang imo mga kaliwatan, sa paghigugma sa GINOO nga imo Dios, sa pagtuman sang iya tingug, kag sa pagtapik sa iya; kay sia imo kabuhi kag kalawigon sang imo mga adlaw, agud nga magpuyo ka sa duta nga ginsumpa sang GINOO sa imo mga ginikanan, kay Abraham, kay Isaac, kag kay Jacob, nga ihatag sa ila.” (Deut. 30:19, 20) Ang aton kabuhi nagadepende sa paghimo sang kabubut-on ni Jehova, paghigugma sa iya, pagtuman sa iya tingog, kag pagtapik sa iya.

14. Ano ang ginbatyag sang isa ka utod parte sa makita nga bahin sang organisasyon sang Dios?

14 Si Utod Pryce Hughes, nga determinado nga magmatutom sa Dios kag magdungan sa Iya organisasyon, nagsulat anay: “Nagapasalamat gid ako nga nahibaluan ko sang una ang mga katuyuan ni Jehova antes sang 1914 . . . Kon may isa ka butang nga importante gid sa akon, amo ini ang pagpabilin nga suod sa makita nga organisasyon ni Jehova. Ang akon eksperiensia sang una nagtudlo sa akon nga indi gid maayo nga magsalig sa panghunahuna sang tawo. Sang nakapamat-od ako sini, determinado ako nga magpabilin sa sining mainunungon nga organisasyon. Indi bala nga wala na sang iban nga paagi nga mabaton naton ang kahamuot kag pagpakamaayo ni Jehova?”

MAGPADAYON UPOD SA ORGANISASYON SANG DIOS

15. Maghatag sing halimbawa sa Kasulatan nga nagapakita kon paano naton dapat tamdon ang mga pagbag-o sa aton paghangop sa mga topiko sa Biblia.

15 Para mabaton naton ang kahamuot kag pagpakamaayo ni Jehova subong mga indibiduwal, dapat naton suportahan ang iya organisasyon kag batunon ang mga pagbag-o sa aton paghangop sa Kasulatan. Binagbinaga ini: Sa tapos mapatay si Jesus, may linibo ka  Judiyo nga Cristiano nga makugi sa Kasuguan kag nabudlayan sa pag-untat sa pagtuman sa sini. (Binu. 21:17-20) Pero sa bulig sang sulat ni Pablo sa mga Hebreo, ginbaton nila ang kamatuoran nga mapakabalaan sila indi paagi sa mga halad nga “ginadulot suno sa Kasuguan,” kundi “paagi sa pagdulot sing lawas ni Jesucristo sing makaisa gid lang.” (Heb. 10:5-10) Pat-od gid nga ang kalabanan sining Judiyo nga mga Cristiano nagbag-o sang ila panghunahuna kag nag-uswag sa espirituwal. Dapat man kita magtuon sing maayo kag batunon ang mga pagbag-o sa mga paghangop sa Pulong sang Dios ukon sa aton pagbantala nga hilikuton.

16. (a) Ngaa makalilipay gid ang kabuhi sa bag-ong kalibutan? (b) Ano ang ginalauman mo sa bag-ong kalibutan?

16 Ang tanan nga nagapabilin nga matutom kay Jehova kag sa iya organisasyon padayon nga pakamaayuhon. Ang matutom nga mga hinaplas makabaton sing daku nga mga pribilehiyo subong mga masigkamanunubli ni Cristo sa langit. (Roma 8:16, 17) Kon diri sa duta ang aton paglaum, handurawa kon daw ano ka makalilipay nga magkabuhi sa Paraiso. Subong bahin sang organisasyon ni Jehova, nalipay gid kita karon nga isugid sa iban ang saad sang Dios nga bag-ong kalibutan! (2 Ped. 3:13) “Ang mapainubuson magapanubli sang duta,” siling sang Salmo 37:11, “kag magakalipay sila sa kabuganaan sang paghidait.” Ang mga tawo “magapatindug . . . sing mga balay kag puy-an sila” kag magakalipay sila sa “binuhatan sang ila mga kamut.” (Isa. 65:21, 22) Wala na sing pagpamigos, kaimulon, kag gutom. (Sal. 72:13-16) Indi na mapatalang sang Babilonia nga Daku ang bisan sin-o, kay malaglag na ini. (Bug. 18:8, 21) Ang mga patay banhawon kag hatagan sing kahigayunan nga magkabuhi sing dayon. (Isa. 25:8; Binu. 24:15) Makakulunyag gid ini nga palaabuton para sa minilyon nga nagdedikar kay Jehova! Para maeksperiensiahan sang kada isa sa aton ang katumanan sini nga mga saad sang Kasulatan, dapat kita magpadayon sa pag-uswag sa espirituwal, magpadayon upod sa organisasyon sang Dios, kag magpadayon sa pagdungan sa sini.

Makita mo bala ang imo kaugalingon sa Paraiso? (Tan-awa ang parapo 16)

17. Ano dapat ang aton panimuot sa pagsimba kay Jehova kag sa iya organisasyon?

17 Bangod nagahilapit na gid ang katapusan sini nga sistema, dapat kita magpabilin nga malig-on sa pagtuo kag magpakita sing tudok nga pagpasalamat sa kahimusan sang Dios para sa pagsimba. Amo sini ang panimuot sang salmista nga si David, nga nag-amba: “Isa ka butang ang ginpangayo ko sa GINOO, nga pangitaon ko; nga makapuyo ako sa balay sang GINOO sa tanan nga adlaw sang akon kabuhi, sa pagtan-aw sang katahuman sang GINOO, kag sa pagpamalandong sa iya templo.” (Sal. 27:4) Kabay pa nga ang kada isa sa aton magmatutom kay Jehova, magdungan sa iya katawhan, kag magpadayon upod sa iya organisasyon.