Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MAYO 2014

Si Jehova Isa ka Dios sang Organisasyon

Si Jehova Isa ka Dios sang Organisasyon

“Ang Dios isa ka Dios, indi sang kagamo, kundi sang paghidait.”—1 COR. 14:33.

1, 2. (a) Sin-o ang una nga gintuga sang Dios, kag paano sia gingamit ni Jehova? (b) Ano ang nagapakita nga organisado ang tinuga nga mga anghel?

SI Jehova, nga Manunuga sang uniberso, nagahimo sang mga butang sa organisado nga paagi. Ang una niya nga gintuga amo ang iya bugtong nga espiritu nga Anak nga gintawag man “ang Pulong” bangod sia ang panguna nga humalambal sang Dios. Ang Pulong madugay na nga nagaalagad kay Jehova, kay ang Biblia nagsiling: “Sa ginsuguran amo ang Pulong, kag ang Pulong kaupod sang Dios.” Ginsilingan man kita: “Ang tanan nga butang nagluntad paagi sa iya [ang Pulong], kag wala sing bisan isa ka butang nga nagluntad nga indi paagi sa iya.” Mga sobra 2,000 ka tuig na ang nagligad, ginpadala sang Dios ang Pulong sa duta, diin matutom niya nga ginhimo ang kabubut-on sang iya Amay subong himpit nga tawo nga si Jesucristo.—Juan 1:1-3, 14.

2 Antes sia nangin tawo, ang Anak sang Dios mainunungon nga nag-alagad subong Iya “pangolo nga manugpangabudlay.” (Hulu. 8:30) Paagi sa iya, gintuga ni Jehova ang minilyon ka espiritu nga tinuga sa langit. (Col. 1:16) Parte sa sini nga mga anghel, ang isa ka rekord sa Biblia nagasugid sa aton: “Ang mga linibo sang mga linibo nag-alagad [sa GINOO], kag linaksa sa mga linaksa nagtilindug sa atubangan niya.” (Dan. 7:10) Ang madamo nga espiritu nga tinuga sang Dios ginapatuhuyan subong naorganisar sing  maayo nga “kasoldadosan” ni Jehova.—Sal. 103:21.

3. Daw ano kadamo ang mga bituon kag planeta, kag paano ini naorganisar?

3 Kamusta naman ang pisikal nga mga tinuga, pareho sang indi maisip nga mga bituon kag planeta? Parte sa mga bituon, ang Chronicle sa Houston, Texas, nagreport nga ginapakita sang pinakabag-o nga pagtuon nga may “300 sextillion sini, ukon nagdamo sing tatlo ka pilo kon ikomparar sa nagligad nga kalkulasyon sang mga sientipiko.” Nagdugang pa ang report: “Buot silingon, 3 nga ginsundan sing 23 ka sero. Ukon 3 trilyones ka 100 bilyones.” Ang mga bituon naorganisar sa mga galaksiya, nga ang tagsatagsa nagaunod sing binilyon ukon trinilyon ka bituon, subong man sing madamo nga planeta. Ang kalabanan nga galaksiya naorganisar sa mga grupo nga ginatawag cluster, kag sa mas dalagku nga grupo nga ginatawag supercluster.

4. Ngaa makahinakop kita nga ang mga alagad sang Dios sa duta organisahon man?

4 Kaangay sang matarong nga espiritu nga mga tinuga sa langit, tama man ka organisado ang pisikal nga kalangitan. (Isa. 40:26) Gani, makahinakop kita nga organisahon man ni Jehova ang iya mga alagad sa duta. Gusto niya nga magpabilin sila nga naorganisar sing maayo, kag importante gid ini bangod madamo sila sing hilikuton nga dapat himuon. Ang dalayawon nga rekord sang matutom nga pag-alagad sang mga sumilimba ni Jehova sadto kag subong, nagapamatuod gid nga kaupod niya sila kag sia “isa ka Dios, indi sang kagamo, kundi sang paghidait.”—Basaha ang 1 Corinto 14:33, 40.

ANG ORGANISADO NGA KATAWHAN SANG DIOS SANG UNA

5. Paano naupangan ang organisado nga kahimusan nga pun-on sang tawhanon nga pamilya ang duta?

5 Sang gintuga ni Jehova ang una nga mga tawo, ginsilingan niya sila: “Magmabungahon kag magbuad, kag magtugub sang duta kag magpakaagalon sa iya; kag maggahum sang kaisdaan sang dagat kag sang kapispisan sang kahanginan kag sang tagsa ka buhi nga butang nga nagagiho sa duta.” (Gen. 1:28) Kinahanglan magdamo ang tawhanon nga pamilya sa organisado nga paagi agod mapuno nila ang duta kag mapasangkad ang Paraiso sa bug-os nga globo. Ang katumanan sining organisado nga kahimusan temporaryo nga naupangan sang nagrebelde sanday Adan kag Eva. (Gen. 3:1-6) Pagligad sang tion, “nakita sang GINOO nga ang pagkamalaut sang tawo daku sa duta, kag nga ang tagsa ka painoino sang mga hunahuna sang iya tagiposoon malaut [gid] sing dalayon.” Subong resulta, “ang duta dunut sa atubangan sang Dios, kag ang duta napun-an sing panglugus.” Gani, ginpahanabo sang Dios ang anaw agod laglagon ang mga di-diosnon.—Gen. 6:5, 11-13, 17.

6, 7. (a) Ngaa nahamuot si Jehova kay Noe? (Tan-awa ang piktyur sa umpisa sini nga artikulo.) (b) Ano ang natabo sa mga tawo nga wala sing pagtuo sang panahon ni Noe?

6 “Apang si Noe nakapahamuut sa mga mata sang GINOO,” bangod sia “tawo nga matarung” nga “himpit sa iya mga kadungan.” Bangod “si Noe naglakat upud sa Dios,” ginsugo sia ni Jehova nga magtukod sing daku katama nga arka. (Gen. 6:8, 9, 14-16) Gindesinyo gid ini agod maamligan ang kabuhi sang tawo kag sapat. Matinumanon nga “ginhimo ni Noe [ang] sono sa tanan nga ginsogo sang GINOO sa iya,” kag sa bulig sang iya pamilya, natapos niya ang pagtukod sa organisado nga paagi. Sang napasulod na niya ang buhi nga mga tinuga sa arka, “gintakpan sang GINOO” ang ganhaan.—Gen. 7:5, 16.

7 Sang ginpahanabo ni Jehova ang Anaw sang 2370 B.C.E., “ginlaglag niya ang tagsa ka buhi nga butang nga yara sa kadaygan sang duta,” pero gin-amligan niya si Noe kag ang pamilya sini sa arka. (Gen. 7:23) Tanan nga katawhan karon mga kaliwat ni Noe, sang iya mga anak nga lalaki, kag sang ila mga asawa. Pero ang tanan nga wala sing pagtuo nga ara sa gua sang arka nagkalamatay bangod wala  sila namati kay Noe, “nga isa ka manugbantala sang pagkamatarong.”—2 Ped. 2:5.

Bangod sa maayo nga pag-organisar, naluwas ang walo ka tawo sa Anaw (Tan-awa ang parapo 6 kag 7)

8. Ano ang pamatuod nga naorganisar ang Israel sang ginsugo sila sang Dios nga magsulod sa Ginsaad nga Duta?

8 Pagligad sang sobra walo ka siglo pagkatapos sang Anaw, gin-organisar sang Dios ang mga Israelinhon subong isa ka pungsod. Kinahanglan ang maayo nga pag-organisar sa tanan nga aspekto sang ila kabuhi ilabi na sa ila pagsimba. Magluwas sa madamo nga saserdote kag mga Levinhon sa Israel, may “alagad nga mga babayi nga nag-alagad sa ganhaan sang layanglayang nga tiliponan.” (Ex. 38:8) Pero sang ginsugo ni Jehova nga Dios ang mga Israelinhon nga magsulod sa Canaan, nangin indi matutom yadto nga henerasyon, kag ginsilingan niya sila: “Indi kamo makasulud sa duta nga nahanungud sa iya nagsumpa ako nga akon kamo papuy-on sa iya, luwas si Caleb nga anak ni Jefone kag si Josue nga anak ni Nun,” bangod maayo ang ila report sa tapos sang ila pagpangespiya sa Ginsaad nga Duta. (Num. 14:30, 37, 38) Nahisuno sa panuytoy sang Dios, gintangdo ni Moises si Josue para magbulos sa iya. (Num. 27:18-23) Sang pangunahan na ni Josue ang mga Israelinhon pasulod sa Canaan, ginsilingan sia: “Magpakabakud kag magpakaisug; dili ka mahadluk, ukon mahangawa; kay ang GINOO nga imo Dios nagaupud sa imo bisan diin ka makadto.”—Jos. 1:9.

9. Ano ang pagtamod ni Rahab kay Jehova kag sa Iya katawhan?

9 Nangin kaupod gid ni Josue si Jehova nga Dios bisan diin man sia magkadto. Halimbawa, binagbinaga ang natabo sang ang mga Israelinhon nagkampo malapit sa Jerico nga isa ka siudad sang Canaan. Sang 1473 B.C.E., ginpakadto ni Josue ang duha ka espiya nga lalaki sa Jerico, kag didto nila nakilala ang makihilawason nga si Rahab. Gintago sila ni Rahab sa atop sang iya balay, para indi sila makita sang mga tawo nga ginpadala sang hari sang Jerico. Ginsilingan ni Rahab ang mga Israelinhon nga espiya: “Nakahibalo ako nga ang duta ginhatag sa inyo sang GINOO . . . Kay amon nabatian kon paano nga ginpamala sang GINOO ang tubig sang Dagat nga Mapula sa atubangan ninyo . . . kag kon ano ang ginhimo ninyo sa duha ka hari sang mga Amornon.”  Nagsiling pa sia: “Ang GINOO nga inyo Dios amo sia ang Dios sa langit sa ibabaw kag sa duta sa idalum.” (Jos. 2:9-11) Bangod ginsuportahan ni Rahab ang organisasyon ni Jehova sadto nga tion, ginluwas sia sang Dios kag ang iya panimalay sang ginsalakay sang mga Israelinhon ang Jerico. (Jos. 6:25) Nagtuo si Rahab, kag gintahod niya si Jehova kag ang Iya katawhan.

PAG-ORGANISAR SANG UNANG SIGLO

10. Ano ang ginsiling ni Jesus sa mga lider sang relihion sang mga Judiyo sang panahon niya, kag ngaa?

10 Sa pagpanguna ni Josue, nadaug sang mga Israelinhon ang mga siudad kag ginsakop ang duta sang Canaan. Pero ano ang natabo sang ulihi? Sa sulod sang mga siglo, sulitsulit nga ginlapas sang mga Israelinhon ang kasuguan sang Dios. Sang ginpadala ni Jehova ang iya Anak sa duta, nadayag na gid ang ila pagkamalinapason sa Dios kag ang ila indi pagpamati sa iya mga humalambal, amo nga gintawag ni Jesus ang Jerusalem subong “ang nagapatay sa mga manalagna.” (Basaha ang Mateo 23:37, 38.) Ginsikway sang Dios ang mga lider sang relihion sang mga Judiyo bangod indi sila matutom sa iya. Gani ginsilingan sila ni Jesus: “Ang ginharian sang Dios kuhaon sa inyo kag ihatag sa isa ka pungsod nga nagapatubas sang mga bunga sini.”—Mat. 21:43.

11, 12. (a) Ano ang mga pamatuod nga sang unang siglo, ginsaylo ni Jehova ang iya pagpakamaayo sa Judiyo nga pungsod sa isa ka organisasyon? (b) Sin-o ang nalakip sa bag-o nga organisasyon nga ginkahamut-an sang Dios?

11 Sang unang siglo C.E., ginsikway ni Jehova ang indi matutom nga pungsod sang Israel. Pero, indi buot silingon nga wala na sia sing organisasyon sang matutom nga mga alagad sa duta. Ginsaylo ni Jehova ang iya pagpakamaayo sa bag-o nga organisasyon nga nasentro kay Jesucristo kag sa mga panudlo sini. Nagsugod ini sang Pentecostes 33 C.E. Sadto nga tion, mga 120 ka disipulo ang nagtipon sa isa ka duog sa Jerusalem sang “hinali lang nga may gahod gikan sa langit subong sang nagahagunos nga huyop sang hangin, kag naglanog ini sa bug-os nga balay.” Dayon “nakita nila ang mga dila nga daw kalayo kag naglapta ini, kag may isa nga nagtungtong sa kada isa sa ila, kag napuno sila tanan sing balaan nga espiritu kag nagsugod sila sa paghambal sa lainlain nga hambal, suno sa paghambal nga ginhatag sa ila sang espiritu.” (Binu. 2:1-4) Ini nga hitabo nagpabakod sang ebidensia nga ginasuportahan ni Jehova ang bag-o nga organisasyon, nga nagalakip sang mga disipulo ni Cristo.

12 Sadto nga adlaw, “mga tatlo ka libo ka kalag ang gindugang” sa mga sumulunod ni Jesus. Dugang pa, “padayon nga gindugang sa ila ni Jehova adlaw-adlaw ang mga nagakalaluwas.” (Binu. 2:41, 47) Epektibo gid ang hilikuton sang unang siglo nga mga manugbantala amo nga “ang pulong sang Dios padayon nga nagtubo, kag padayon nga nagdamo sing madasig ang mga disipulo sa Jerusalem.” Bisan ang ‘isa ka daku nga kadam-an sang mga saserdote nangin matinumanon sa pagtuo.’ (Binu. 6:7) Gani madamo nga interesado ang nagbaton sang kamatuoran nga ginpahayag sang miembro sining bag-o nga organisasyon. Sang ulihi, naghatag man si Jehova sing kaanggid nga ebidensia sang iya pagsuporta sang ginbuyok niya ang “mga tawo sang mga pungsod” sa Cristianong kongregasyon.—Basaha ang Binuhatan 10:44, 45.

13. Ano ang hilikuton sang bag-o nga organisasyon sang Dios?

13 Indi maduhaduhaan kon ano nga hilikuton ang ginhatag sang Dios sa mga sumulunod ni Cristo. Si Jesus mismo ang nagpahamtang sing halimbawa sa ila, kay sa tapos sia mabawtismuhan, nagsugod sia sa pagbantala parte sa “ginharian sang langit.” (Mat. 4:17) Gintudlo ni Jesus sa iya mga disipulo nga himuon man ini nga hilikuton. Nagsiling sia sa ila: “Mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binu. 1:8) Ang mga sumulunod sadto ni Cristo pat-od nga nakahangop  sang ginapahimo sa ila. Halimbawa, sa Antioquia sa Pisidia maisugon nga ginhambalan ni Pablo kag ni Bernabe ang mga Judiyo nga nagapamatok sa ila: “Kinahanglan una nga ihambal sa inyo ang pulong sang Dios. Bangod ginasikway ninyo ini kag ginakabig ang inyo kaugalingon nga indi takus sa kabuhi nga walay katapusan, yari karon! nagaliso kami sa mga pungsod. Sa katunayan, si Jehova nagsugo sa amon sa sini nga mga pulong, ‘Gintangdo ko ikaw subong kapawa sa mga pungsod, agod mangin kaluwasan ka tubtob sa ukbong sang duta.’” (Binu. 13:14, 45-47) Sugod sang unang siglo, ang organisasyon sang Dios nagapahayag sang iya aman nga kaluwasan.

MADAMO ANG NALAGLAG, PERO NALUWAS ANG MGA ALAGAD SANG DIOS

14. Sang unang siglo, ano ang natabo sa Jerusalem, pero sin-o ang naluwas?

14 Wala ginbaton sang kalabanan nga Judiyo ang maayong balita, gani may maabot sa ila nga kalamidad, kay si Jesus nagpaandam sa iya mga disipulo: “Kon makita ninyo nga ginalibutan ang Jerusalem sang nagakampo nga kasuldadusan, nian hibalua ninyo nga ang paghapay sa iya malapit na. Nian ang mga yara sa Judea magpalagyo sa mga bukid, kag ang mga yara sa sulod niya maggua, kag ang mga yara sa kaumhan indi na magsulod sa iya.” (Luc. 21:20, 21) Natuman ang gintagna ni Jesus. Bangod nagrebelde ang mga Judiyo, ginlibutan sang Romano nga mga hangaway ang Jerusalem sa pagpanguna ni Cestius Galio sang 66 C.E. Pero gulpi lang sila nag-isol, amo nga may kahigayunan na ang mga sumulunod ni Jesus nga magbiya sa Jerusalem kag Judea. Suno sa istoryador nga si Eusebius, madamo ang nalagyo patabok sa Suba Jordan pakadto sa Pella sa Perea. Sang 70 C.E., nagbalik ang Romano nga mga hangaway sa pagpanguna ni Heneral Tito kag ginlaglag ang Jerusalem. Pero, naluwas ang matutom nga mga Cristiano bangod namati sila sa paandam ni Jesus.

15. Ano ang naeksperiensiahan sang mga Cristiano, kag ngaa nag-uswag gihapon ang Cristianismo?

15 Madamo nga kabudlayan, paghingabot, kag iban pa nga pagtilaw sa pagtuo ang naeksperiensiahan sang mga sumulunod ni Cristo, pero nag-uswag gihapon ang Cristianismo sang unang siglo. (Binu. 11:19-21; 19:1, 19, 20) Ang mga Cristiano sadto nag-uswag sa espirituwal bangod ginpakamaayo sila sang Dios.—Hulu. 10:22.

16. Para mag-uswag sa espirituwal, ano ang kinahanglan himuon sang tagsa ka Cristiano?

16 Dapat manikasog ang tagsa ka Cristiano para mag-uswag sa espirituwal. Importante gid ang maukod nga pagtuon sa Kasulatan, regular nga pagtambong sa mga miting, kag makugi nga pagbantala sing Ginharian. Ini nga mga hilikuton nakabulig para sa espirituwal nga kapagros kag paghiusa sang katawhan ni Jehova sadto, kag amo man sa karon. Ang mga miembro sang naorganisar sing maayo nga mga kongregasyon sadto nakabenepisyo gid sa kahanda sa pagbulig sang mga manugtatap kag ministeryal nga mga alagad. (Fil. 1:1; 1 Ped. 5:1-4) Kag makalilipay gid kon magbisita ang mga nagalakbay nga mga gulang, kaangay ni Pablo, sa mga kongregasyon! (Binu. 15:36, 40, 41) Talalupangdon gid ang mga pagkaanggid sang aton pagsimba sa pagsimba sang mga Cristiano sang unang siglo. Nagapasalamat gid kita nga ginaorganisar ni Jehova ang iya mga alagad sadto, kag amo man sa karon! *

17. Ano ang binagbinagon sa masunod nga artikulo?

17 Samtang nagahilapit na ang kalaglagan sang kalibutan ni Satanas sa sining katapusan nga mga adlaw, labi nga nagadasig ang pag-uswag sang dutan-on nga bahin sang bug-os uniberso nga organisasyon ni Jehova. Nagadungan ka bala sa sini? Nagauswag ka man bala sa espirituwal? Ipakita sang masunod nga artikulo kon paano mo ini mahimo.

^ par. 16 Tan-awa ang mga artikulo nga “Ang mga Cristiano Nagasimba sa Espiritu kag Kamatuoran” kag “Padayon Sila nga Naglakat sa Kamatuoran” sa Hulyo 15, 2002, nga Ang Lalantawan. Ang detalyado nga pagbinagbinag parte sa dutan-on nga bahin sang organisasyon sang Dios karon mabasa sa libro nga Jehovah’s Witnesses—Proclaimers of God’s Kingdom.