Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MAYO 2014

 SUGILANON SANG KABUHI

Ginbuligan Gid Ako ni Jehova

Ginbuligan Gid Ako ni Jehova

Upod sa akon asawa nga si Evelyn, nanaug kami sa tren sa Hornepayne, sa kaumhan sang aminhan sang Ontario, Canada. Kaagahon pa kag grabe ang katugnaw. Ginsugat kami sang isa ka utod, kag pagkatapos namon pamahaw upod sa iya asawa kag kabataan, ginlatas namon ang niebe kag nagpanaksi sa mga balay. Sina nga hapon, naghatag ako sang una ko nga pamulongpulong subong manugtatap sang sirkito. Lima lang kami nga nagtambong.

ANG matuod, wala gid ako natublag nga gamay lang ang nagtambong sa akon pamulongpulong sang 1957. Kay man, mahuluy-on gid ako halin sang una. Sang gamay pa ako, nagapanago ako kon may mag-abot nga bisita sa balay, bisan kilala ko pa sila.

Gani mahimo nga makibot gid kamo nga ang kalabanan ko nga asaynment sa organisasyon ni Jehova nagakinahanglan sing pagpakig-angot sa madamo nga tawo, mga abyan ko man kag mga indi ko kilala. Padayon ko nga ginapakigbatuan ang akon pagkamahuluy-on kag kakulang sing kompiansa, gani wala gid ako sing ipabugal sa bisan ano nga kadalag-an sa akon mga asaynment. Sa baylo, nakita ko nga matuod gid ang ginsaad ni Jehova: “Palig-onon ko ikaw, buligan ko ikaw, alay-ayon ko ikaw sang too nga kamut sang akon pagkamatarung.” (Isa. 41:10) Ang isa sa panguna nga paagi nga ginbuligan ako ni Jehova amo ang suporta sang mga masigka-Cristiano. Isugid ko sa inyo ang pila sa ila, umpisahan ko sang bata pa ako.

GINGAMIT NIYA ANG BIBLIA KAG ANG GAMAY NGA ITOM NGA LIBRO

Sa amon uma sa bagatnan-katundan sang Ontario

Sang isa ka aga sang Domingo sang katuigan 1940, nagbisita si Elsie Huntingford sa uma sang amon pamilya sa bagatnan-katundan sang Ontario. Ang akon iloy ang nagbukas sing puwertahan samtang ang akon  amay, nga mahuluy-on pareho ko, nagpungko sa sulod sang balay upod sa akon nga nagapamati. Abi ni Tatay may ginabaligya si Utod Huntingford kag basi magbakal si Nanay sang indi namon kinahanglanon, gani nagpalapit sia kag nagsiling nga indi kami interesado. “Indi kamo interesado nga magtuon sa Biblia?” pamangkot ni Utod Huntingford. “Siempre interesado kami sa sina,” sabat ni Tatay.

Tayming gid ang pagbisita ni Utod Huntingford. Ang akon mga ginikanan aktibo gid sadto nga mga miembro sang United Church of Canada, pero nagdesisyon sila nga maghalin. Ngaa? Bangod ang ministro may ginpatapik sa simbahan nga listahan sang tanan nga nag-amot suno sa kadakuon sang ila ginhatag kag makita ini sang tanan. Tungod imol ang akon mga ginikanan, pirme lang sila ulihi sa listahan, kag ginapilit sila sang mga gulang sang simbahan nga dugangan ang ila amot. Gin-aku sang isa pa ka ministro nga wala niya ginatudlo ang mga butang nga iya gid ginapatihan bangod indi niya gusto pahalinon sa obra. Gani, naghalin kami sa simbahan pero nagapangita gihapon sing paagi nga mabusog ang amon espirituwal nga kinahanglanon.

Bangod ginadumilian pa sadto ang hilikuton sang mga Saksi ni Jehova sa Canada, nagadumala si Utod Huntingford sing pagtuon sa amon pamilya nga Biblia lang ang ginagamit kag pila ka nota sa iya gamay nga itom nga libro. Sang narealisar niya sang ulihi nga indi namon sia pag-isugid sa awtoridad, ginhatagan niya kami sing mga literatura sa Biblia. Ginatago gid namon ang mga publikasyon kada tapos sang amon pagtuon. *

Ginbaton sang akon mga ginikanan ang pamalaybalay nga ministeryo kag nabawtismuhan sila sang 1948

Bisan pa sang mga pagpamatok kag kabudlayan, makugi nga ginbantala ni Utod Huntingford ang maayong balita. Nagdayaw gid ako sa iya kakugi kag nagpahulag ini sa akon nga manindugan sa kamatuoran. Isa ka tuig pagkatapos mabawtismuhan ang akon mga ginikanan subong mga Saksi ni Jehova, ginsimbuluhan ko man ang akon dedikasyon sa Dios. Ginbawtismuhan ako sang Pebrero 27, 1949, sa salsalon nga pasungan nga ginagamit sang mga mangunguma sa pagpainom sang ila mga sapat. Disisiete anyos ako sadto. Pagkatapos sina, determinado ako nga magsulod sa bug-os tion nga ministeryo.

GINBULIGAN AKO NI JEHOVA NGA MANGIN MAISUGON

Nakibot gid ako sang nakabaton ako sing imbitasyon nga mag-alagad sa Bethel sang 1952

Nagpangalag-ag pa ako nga magpayunir dayon. Nag-obra anay ako sa bangko kag sa opisina kay abi  ko kinahanglan ko makasupot sing kuarta para may isuporta sa akon pagpayunir. Pero bangod bata pa ako kag indi eksperiensiado, kadasig lang maubos sang akon kinitaan. Gani ang utod nga si Ted Sargent nagpalig-on sa akon nga mangin maisugon kag magsalig kay Jehova. (1 Cron. 28:10) Bangod sini, nagpayunir ako sang Nobiembre 1951. May 40 dolyares lang ako, daan nga bisikleta, kag bag-o nga bag. Pero ginaaman gid pirme ni Jehova ang akon kinahanglanon. Nagapasalamat gid ako nga ginpalig-on ako ni Ted nga magpayunir! Naghatag ini sa akon sing dugang pa nga pagpakamaayo.

Isa ka gab-i sang ulihi nga bahin sang Agosto 1952, may nagtawag sa akon halin sa Toronto. Gin-agda ako sang sanga talatapan sang mga Saksi ni Jehova sa Canada nga mag-alagad sa Bethel sugod sa Septiembre. Bisan pa mahuluy-on ako kag wala pa gid nakakadto sa sanga, nalangkag gid ako kay maayo gid ang ginasugid sang iban nga payunir parte sa Bethel. Wala gid ako namag-o pag-abot ko didto.

“IPAKITA SA MGA KAUTURAN NGA NAGAULIKID KA SA ILA”

Duha ka tuig pagkatapos ako nag-abot sa Bethel, ginbuslan ko si Bill Yacos subong congregation servant (ginatawag karon nga koordenitor sang hubon sang mga gulang) sa Yunit sang Shaw sa Toronto. * Beinte tres anyos pa lang ako, kag pamatyag ko daw ka inosente sa akon. Pero mapainubuson kag mahigugmaon ako nga gintudluan ni Utod Yacos sang akon himuon. Kag ginbuligan gid ako ni Jehova.

Si Utod Yacos—nga mabukod kag palayuhum—interesado gid sa mga tawo. Palangga niya ang mga kauturan, kag palangga man nila sia. Regular niya sila nga ginabisitahan sa ila mga balay indi lang kon may problema sila. Ginpalig-on ako ni Bill Yacos nga amo man sini ang himuon ko kag makig-upod sa mga kauturan sa pagministeryo sa latagon. “Ken,” siling niya, “ipakita sa mga kauturan nga nagaulikid ka sa ila. Matabunan sini ang madamo nga kakulangan.”

ANG AKON ASAWA NAGPAKITA SING MAINUNUNGON NGA GUGMA

Ginbuligan ako ni Jehova sa pinasahi nga paagi sugod sang Enero 1957. Sadto nga bulan ginkasal kami ni Evelyn, nga naggradwar sa ika-14 nga klase sang Gilead. Antes kami ginkasal, nag-alagad sia sa Pranses sing lenguahe nga probinsia sang Quebec. Halos kontrolado gid sadto sang Iglesia Katolika Romana ang Quebec. Gani nangin mabudlay gid ini kay Evelyn, pero mainunungon sia sa iya asaynment kag kay Jehova.

Ginkasal kami ni Evelyn sang 1957

Nangin mainunungon man si Evelyn sa akon. (Efe. 5:31) Ang matuod, natilawan ang iya pagkamainunungon sa tapos kami ginkasal! Plano namon nga magbiyahe sa Florida, U.S.A., pero pagkasunod nga adlaw sa tapos sang amon kasal, ginpangabay ako sang sanga nga magtambong sa isa ka semana nga miting sa Bethel sa Canada. Siempre, wala na madayon ang amon mga plano bangod sini nga miting, pero gusto namon ni Evelyn nga tumanon ang ginapahimo sa amon ni Jehova. Gani, ginpaiway namon ang amon honeymoon. Sa sina nga semana, nag-alagad sia sa teritoryo malapit sa sanga. Bisan pa lain gid ang teritoryo kon ikomparar sa Quebec, nagpadayon sia.

 Sa hingapusan sina nga semana, may nabaton ako nga sorpresa—gin-asayn ako subong manugtatap sang sirkito sa aminhan sang Ontario. Bag-o lang ako ginkasal, 25 anyos kag indi eksperiensiado, pero nagkadto kami didto nga nagasalig kay Jehova. Sang tungatunga sang tigtulugnaw sa Canada, nagsakay kami sa tren upod sa iban nga eksperiensiado nga nagalakbay nga manugtatap nga mabalik na sa ila mga asaynment. Ginpalig-on gid nila kami! Nag-insister pa gani ang isa ka utod nga lalaki nga kami ang matulog sa ginreserba niya nga tululugan sa tren, para indi kami magpungko sa bilog nga gab-i. Pagkaaga, 15 ka adlaw pagkatapos sang amon kasal, nagbisita kami sa gamay nga grupo sa Hornepayne, subong sang ginsambit ko sa umpisa.

Madamo pa nga pagbag-o ang kinahanglan namon himuon ni Evelyn. Samtang nagaalagad kami subong manugtatap sang distrito sang ulihi nga bahin sang 1960, nakabaton ako sing imbitasyon nga mag-eskwela sa ika-36 nga klase sang Gilead. Napulo ka bulan ini nga pag-eskwela nga magasugod sa Pebrero 1961 sa Brooklyn, New York. Siempre nalipay ako, pero nasubuan man kay wala nalakip si Evelyn sa imbitasyon. Pareho sang iban nga asawa nga may amo man sini nga sitwasyon, ginpangabay si Evelyn nga magsulat nga nagapasugot nga magbulagay kami sing mga napulo ka bulan. Naghibi si Evelyn, pero nagpasugot kami nga maeskwela ako, kag nalipay sia nga makabaton ako sang mapuslanon nga paghanas sa Gilead.

Temporaryo nga nag-alagad si Evelyn sa sanga sa Canada. Nakapribilehiyo sia nga makaupod sa kuarto ang hinaplas nga utod nga babayi nga si Margaret Lovell. Siempre nahidlaw gid kami ni Evelyn sa isa kag isa. Pero sa bulig ni Jehova, nakapabilin kami sa amon temporaryo nga mga asaynment. Natandog gid ako sa iya kahanda nga isakripisyo ang tion nga para kuntani sa amon pag-updanay, agod mangin mas mapuslanon kami kay Jehova kag sa iya organisasyon.

Pagligad sang mga tatlo ka bulan sa Gilead, si Utod Nathan Knorr, nga amo sadto ang nagapanguna sa bug-os kalibutan nga hilikuton, nagtanyag sa akon sing pinasahi nga imbitasyon. Ginpamangkot niya ako kon handa ako mag-untat sa pag-eskwela sa Gilead kag magbalik sa Canada para mangin temporaryo nga instruktor sa Kingdom Ministry School sa sanga. Si Utod Knorr nagsiling nga puede ko man ini balibaran. Mahimo ko tapuson ang pag-eskwela sa Gilead kon gusto ko kag ayhan iasayn subong misyonero. Nagsiling man sia nga kon magdesisyon ako nga magbalik sa Canada, mahimo nga indi na gid ako maimbitar liwat sa Gilead, kag sa ulihi mahimo nga iasayn ako liwat sa mga teritoryo sa Canada. Ako ang iya ginapadesisyon pagkatapos ko maistorya ang akon asawa.

Bangod ginsugid na nga daan ni Evelyn sa akon kon ano ang iya pagtamod sa teokratiko nga mga asaynment, ginsilingan ko dayon si Utod Knorr, “Ano man ang ginapahimo sa amon sang organisasyon ni Jehova, nalipay kami sa pagtuman sini.” Pirme gid kami nagabatyag nga bisan pa may mga luyag kami, dapat namon sundon kon diin kami iasayn sang organisasyon ni Jehova.

 Gani, sang Abril 1961, naghalin ako sa Brooklyn kag nagbalik sa Canada para magtudlo sing Kingdom Ministry School. Sang ulihi, nangin miembro kami sang pamilya Bethel. Dayon, nakibot gid ako sang nakabaton ako sing imbitasyon para sa ika-40 nga klase sang Gilead, nga nagsugod sang 1965. Sa liwat, kinahanglan magsulat si Evelyn nga nagapasugot nga maglayuay kami. Pero pagligad sang pila ka semana, nalipay gid kami sang nakabaton man sia sing imbitasyon nga mag-eskwela upod ko.

Pag-abot namon sa eskwelahan sa Gilead, ginsilingan kami ni Utod Knorr nga ang mga estudyante nga maeskwela sa Pranses nga klase, kaangay namon, ipadala sa Aprika. Pero sa panahon sang amon gradwasyon, gin-asayn kami liwat sa Canada! Gintangdo ako subong bag-o nga manugtatap sang sanga (karon koordenitor sang Komite sang Sanga). Bangod 34 anyos pa lang ako, ginpahanumdom ko si Utod Knorr, “Bata pa ako kaayo.” Pero ginpalig-on niya ako. Kag sugod sadto, nagakonsulta gid ako anay sa eksperiensiado nga mga utod sa Bethel antes maghimo sing mabug-at nga mga desisyon.

BETHEL—DUOG PARA MAGTUON KAG MAGTUDLO

Ang pag-alagad sa Bethel nakahatag sa akon sing madamo nga kahigayunan nga makatuon sa iban. Ginatahod ko kag ginadayaw gid ang iban nga miembro sang Komite sang Sanga. Maayo man ang impluwensia sa akon sang ginatos ka matutom nga mga Cristiano—bata kag tigulang—nga nakilala namon diri sa sanga kag sa lainlain nga kongregasyon nga naalagaran namon.

Nagadumala sang morning worship sa Bethel sa Canada

Bangod sa pag-alagad sa Bethel, nakahigayon ako sa pagtudlo sa iban kag sa pagpalig-on sang ila pagtuo. Si apostol Pablo nagsiling kay Timoteo: “Magpadayon ka sa mga butang nga imo natun-an.” Nagsiling man sia: “Ang mga butang nga nabatian mo sa akon nga ginasakdag sang madamo nga saksi, itugyan ini nga mga butang sa matutom nga mga lalaki, nga mangin sangkol nga kalipikado man sa pagpanudlo sa iban.” (2 Tim. 2:2; 3:14) Kon kaisa ginapamangkot ako sang mga kauturan kon ano ang natun-an ko sa 57 ka tuig nga pag-alagad sa Bethel. Ang simple ko nga sabat amo, “Mangin handa kag magtuman dayon sa ginapahimo sa imo sang organisasyon ni Jehova, nga nagasalig nga buligan ka ni Jehova.”

Daw kasan-o lang nga nag-abot ako sa Bethel subong mahuluy-on kag indi eksperiensiado nga pamatan-on. Pero sa sulod sining mga tinuig, gin-uyatan gid ni Jehova ang akon tuo nga kamot. Ilabi na paagi sa kaayo kag suno sa tion nga bulig sang mga kauturan, padayon niya ako nga ginapasalig: “Dili magkahadluk, magatabang ako sa imo.”—Isa. 41:13.

^ par. 10 Sang Mayo 22, 1945, ginkuha sang gobierno sang Canada ang pagdumili sa aton hilikuton.

^ par. 16 Sadto nga tion, kon sobra sa isa ang kongregasyon sa isa ka siudad, ang kada kongregasyon ginatawag nga yunit.