Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Mayo 2014

Iaplikar ang Bulawanon nga Pagsulundan sa Imo Ministeryo

Iaplikar ang Bulawanon nga Pagsulundan sa Imo Ministeryo

“Ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” —MAT. 7:12.

1. May epekto bala ang aton pagpakig-angot sa mga tawo sa aton ministeryo? Maghatag sing halimbawa. (Tan-awa ang piktyur sa umpisa sini nga artikulo.)

SANG nagligad nga tinuig, ang Cristiano nga mag-asawa sa Fiji nagpakigbahin sa kampanya nga pagpang-imbitar para sa Memoryal sang kamatayon ni Cristo. Samtang nagaistorya sila sa babayi sa gua sang balay, gulpi lang nag-ulan. Ginpagamit sang bana ang iya payong sa babayi, samtang duha sila sang iya asawa sa isa ka payong. Nalipay gid ang mag-asawa sang nagtambong ang babayi sa Memoryal. Nagsiling sia nga halos indi na niya madumduman ang ginsiling sang mga Saksi sang ginbisitahan nila sia. Pero nagdayaw gid sia sa pagpakig-angot nila sa iya, amo nga nagtambong sia sa Memoryal. Ano ang nakaamot sa sini nga reaksion? Bangod gin-aplikar sang mag-asawa ang ginatawag nga Bulawanon nga Pagsulundan.

2. Ano ang Bulawanon nga Pagsulundan, kag paano naton ini maaplikar?

2 Ano ang Bulawanon nga Pagsulundan? Amo ini ang laygay nga ginhatag ni Jesus sang nagsiling sia: “Ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” (Mat. 7:12) Paano naton ini maaplikar? Paagi sa paghimo sang duha ka tikang. Una, pamangkuton naton  ang aton kaugalingon, ‘Kon ako ang ara sa bahin niya, ano ang gusto ko nga pagtratar niya sa akon?’ Dayon, amo man sina ang himuon naton—pakitaan sila sing maayo tubtob posible.—1 Cor. 10:24.

3, 4. (a) Ipaathag kon ngaa wala lamang naaplikar ang Bulawanon nga Pagsulundan sa aton pagpakig-angot sa mga masigkatumuluo. (b) Ano ang binagbinagon sa sini nga artikulo?

3 Masami naton ginaaplikar ang Bulawanon nga Pagsulundan sa aton pagpakig-angot sa mga masigkatumuluo. Pero wala nagsiling si Jesus nga ipakita lamang naton ini sa mga may labot sa aton pagtuo. Ang matuod, ginsambit niya ang Bulawanon nga Pagsulundan sang ginabinagbinag niya ang parte sa pagpakig-angot sa tanan nga tawo, lakip sa aton mga kaaway. (Basaha ang Lucas 6:27, 28, 31, 35.) Kon ginaaplikar naton ang Bulawanon nga Pagsulundan sa aton mga kaaway, mas labi na gid sa aton pagpanaksi sa mga tawo—nga madamo sa ila ang mahimo nga “husto nga nahuyog para sa kabuhi nga walay katapusan”!—Binu. 13:48.

4 Binagbinagon naton karon ang apat ka pamangkot nga dapat naton dumdumon kon nagaministeryo: Sin-o ang mga tawo nga akon ginaistorya? Diin ko sila ginaistorya? San-o ang pinakamaayo nga tion nga mag-istorya sa ila? Paano ko sila dapat istoryahon? Subong sang binagbinagon naton, ini nga mga pamangkot makabulig sa aton nga mahatagan sing konsiderasyon ang balatyagon sang aton ginabantalaan kag mapahisuno ang aton pagpakig-istorya sa ila.—1 Cor. 9:19-23.

SIN-O ANG AKON GINAISTORYA?

5. Ano ang mahimo ipamangkot naton sa aton kaugalingon?

5 Sa ministeryo, masami kita nagapakig-istorya sa mga indibiduwal. Ang kada tawo may lainlain nga kahimtangan kag problema. (2 Cron. 6:29) Kon nagapaambit sing maayong balita, pamangkuta ang imo kaugalingon: ‘Kon ako ang ara sa iya kahimtangan, ano ang gusto ko nga pagtamod sini nga tawo sa akon? Manamian bala ako kon tamdon niya ako nga indi importante? Ukon mas gusto ko nga kilalahon pa gid niya ako?’ Ang pagbinagbinag sini nga mga pamangkot magapahanumdom sa aton nga pakig-angutan ang tagbalay subong indibiduwal.

6, 7. Ano ang himuon naton kon daw nagapangaway ang aton maistorya sa ministeryo?

6 Tanan kita indi gid gusto kilalahon subong “malain nga tawo.” Sa pag-ilustrar: Bilang mga Cristiano, ginahimo naton ang aton masarangan nga maaplikar ang laygay sang Biblia nga “maghambal . . . pirme nga may pagkamainayuhon.” (Col. 4:6) Pero bangod indi kita himpit, may mahambal kita nga ginahinulsulan naton sa ulihi. (Sant. 3:2) Kon indi maayo ang aton mahambal sa iban—ayhan bangod indi maayo ang aton adlaw—indi naton gusto tawgon nga “bastos” ukon “wala sing konsiderasyon.” Gusto naton nga hangpon kita sang iban. Indi bala nga dapat man naton pakitaan sing konsiderasyon ang iban?

7 Kon may masugilanon kita nga daw palaaway sa ministeryo, puede mo bala hangpon kon ngaa amo sia sina? Indi ayhan madamo lang sia sing ginapaligban sa obra ukon sa eskwelahan? May malubha bala sia nga balatian? Sa madamo nga kahimtangan, ang mga tagbalay nga sang primero nagapangakig nangin maayo sang ginpakig-angutan sila sang katawhan ni Jehova sing malulo kag matinahuron.—Hulu. 15:1; 1 Ped. 3:15.

8. Ngaa indi kita dapat mangalag-ag sa pagpaambit sang mensahe sang Ginharian sa “tanan nga sahi sang mga tawo”?

8 Ginabantalaan naton ang tanan nga sahi sang tawo. Sang nagligad nga pila ka tuig, sobra sa 60 ka eksperiensia ang mabasa sa serye sang Ang Lalantawan nga “Ang Biblia Nagapabag-o sang Kabuhi.” Ang pila ka tawo sa sini nga mga artikulo mga kawatan anay, palahubog, miembro sang gang, ukon mga adik sa droga. Ang iban mga pulitiko, lider sang relihion, ukon mga tawo nga pursigido  gid sa ila karera. Ang pila sa ila mga imoral. Pero sila tanan nagpamati sang maayong balita, nagbaton sing pagtuon sa Biblia, nagbag-o sang ila kabuhi, kag nagsulod sa kamatuoran. Gani, indi naton paghunahunaon nga indi gid pagbatunon sang pila ka tawo ang mensahe sang Ginharian. (Basaha ang 1 Corinto 6:9-11.) Sa baylo, ginabaton naton nga ang “tanan nga sahi sang mga tawo” mahimo mamati sang maayong balita.—1 Cor. 9:22.

DIIN KO GINAISTORYA ANG MGA TAWO?

9. Ngaa dapat naton tahuron ang puluy-an sang iban?

9 Sa diin naton ginaistorya ang mga tawo sa aton ministeryo? Masami naton sila ginaistorya sa ila puluy-an. (Mat. 10:11-13) Ginaapresyar naton kon ginatahod sang iban ang aton puluy-an kag pagkabutang. Kay man, importante para sa aton ang aton puluy-an. Gusto naton nga may pribasiya kita sa sini kag seguridad. Dapat naton ipakita sa aton isigkatawo ini nga pagtahod. Gani sa aton pagpamalaybalay, hunahunaon naton sing maayo kon paano naton mapakita ang pagtahod sa ila puluy-an.—Binu. 5:42.

10. Ano ang aton himuon para indi matublag ang iban sa aton ministeryo?

10 Lapnag ang krimen karon, gani nagasuspetsa ang mga tagbalay sa mga indi nila kilala. (2 Tim. 3:1-5) Dapat nga indi kita maghimo sing mga butang nga magasuspetsa sila. Halimbawa, ibutang ta nga nagapalapit kita sa isa ka balay kag nanuktok sa puertahan. Kon wala sing may magsabat, mahimo kita masulay nga maglingling sa bintana ukon maglibot sa ugsaran para pangitaon ang tagbalay. Sa inyo lugar, mahimo bala ini magtublag sa tagbalay? Ano ang hunahunaon sang iya mga kaingod? Matuod, dapat kita mangin maid-id sa pagbantala. (Binu. 10:42) Nalangkag gid kita sa pagpalapnag sang maayo nga mensahe, kag maayo ang aton motibo. (Roma 1:14, 15) Pero, maalamon nga indi kita maghimo sing bisan ano nga makatublag sa mga tawo sa aton teritoryo. Si apostol Pablo nagsulat: “Wala gid kami nagahatag sang bisan ano nga kasandaran, agod wala sing makita nga sayop sa amon ministeryo.” (2 Cor. 6:3) Kon tahuron naton ang puluy-an kag pagkabutang sang mga tawo sa aton teritoryo, ang aton paggawi mahimo magganyat sa pila ka indibiduwal sa kamatuoran.—Basaha ang 1 Pedro 2:12.

Pirme naton tahuron ang pagkabutang kag pribasiya sang tagbalay (Tan-awa ang parapo 10)

SAN-O KO GINAISTORYA ANG MGA TAWO?

11. Ngaa ginaapresyar naton kon ginatahod sang iban ang aton tion?

11 Subong mga Cristiano, masako ang kalabanan sa aton. Para matuman ang aton mga obligasyon, kinahanglan nga magpahamtang kita sing mga prioridad, kag planuhon sing maayo ang aton iskedyul. (Efe. 5:16; Fil. 1:10) Kon may magtublag sa aton iskedyul, mahimo maakig kita. Gani ginaapresyar naton kon ginatahod sang iban ang aton tion, kag kon nahangpan nila nga indi kita makapadugay sa pagpakig-istorya sa ila. Bilang pag-aplikar sa Bulawanon nga Pagsulundan, paano naton mapakita ang pagtahod sa aton ginabantalaan?

12. Paano naton mahibaluan ang pinakamaayo nga tion sa pagpakig-istorya sa mga tawo sa aton teritoryo?

12 Dapat naton hibaluon ang pinakamaayo nga tion sa pagpakig-istorya sa mga tagbalay. Sa aton teritoryo, ano nga oras masami nga ara sa balay ang mga tawo? San-o sila may tion nga mamati? Kinahanglan nga mangita kita sing mga paagi para mabag-o ang aton iskedyul. Sa iban nga bahin sang kalibutan, ang aton pamalaybalay mas mabungahon sa hapon ukon sa sirom. Kon amo man sini ang kahimtangan sa inyo lugar, mahimo ka bala makabantala sa sini nga mga oras? (Basaha ang 1 Corinto 10:24.) Makapat-od kita nga pakamaayuhon ang bisan ano nga sakripisyo naton para makapakigbahin sa ministeryo sa tion nga pinakamaayo nga maistorya ang mga tawo.

13. Paano naton mapakita ang pagtahod sa tagbalay?

13 Paano pa naton mapakita ang pagtahod sa isa ka indibiduwal? Kon may makita kita  nga interesado, dapat naton sia panaksihan sing maayo pero indi kita dapat magdugay. Mahimo nga may nakaiskedyul na nga himuon ang tagbalay nga importante para sa iya. Kon maghambal sia nga masako sia, puede naton mahambal sa iya nga indi man kita magdugay—kag dapat naton ina tumanon. (Mat. 5:37) Sa tapos sang pag-istoryahanay, mahimo naton sia pamangkuton kon san-o sia puede maistorya liwat. Nakita sang iban nga manugbantala nga epektibo ang pagsiling: “Nalipay gid ako nga maistorya ka liwat. OK lang bala kon matawag anay ako ukon ma-text antes magbisita?” Kon magpahisuno kita sa iskedyul sang mga tawo sa aton teritoryo, ginailog naton ang halimbawa ni Pablo, nga ‘wala nagapangita sang iya kaugalingon nga kaayuhan kundi sang kaayuhan sang madamo, agod maluwas sila.’—1 Cor. 10:33.

PAANO KO DAPAT ISTORYAHON ANG MGA TAWO?

14-16. (a) Ngaa dapat naton athagon sa tagbalay ang katuyuan sang aton pagbisita? Iilustrar. (b) Ano nga pamaagi ang nakita sang nagalakbay nga manugtatap nga epektibo?

14 Handurawa nga isa ka adlaw nakabaton ka sing tawag sa telepono pero indi mo kilala ang tingog. Indi mo sia kilala, pero namangkot sia parte sa pagkaon nga gusto mo. Magapalibog kita kon sin-o ang nagtawag kag kon ano gid ang iya tuyo. Bangod sa pagtahod sa iya, mahimo nga makig-istorya anay kita sa iya sing makadali, dayon ipabatyag naton sa iya nga gusto na naton untaton ang pag-istoryahanay. Sa pihak nga bahin, ano abi kon nagpakilala ang nagtawag, nagpahibalo sa aton nga may labot sa nutrisyon ang iya trabaho, kag mainayuhon nga nagsiling nga may impormasyon sia nga makabulig sa  aton. Mahimo nga mamati kita sa iya. Kay man, ginaapresyar naton kon direkta sa punto pero mataktikanhon ang tawo nga nagapakig-istorya sa aton. Paano naton mailog ina nga pamaagi sa aton masugilanon sa ministeryo?

15 Sa madamo nga teritoryo, kinahanglan nga mangin maathag sa tagbalay ang aton tuyo sa pagbisita. Matuod, may mapuslanon kita nga impormasyon nga wala nahibaluan sang tagbalay, pero ano abi kon wala kita nagpakilala kag nagsugod lang sa aton presentasyon paagi sa pagpamangkot: “Kon masarangan mo solbaron ang bisan ano nga problema sa kalibutan, ano nga problema ang solbaron mo?” Nagapamangkot kita sini bangod luyag naton mahibaluan ang ginahunahuna sang tawo kag maliton ang pag-istoryahanay sa Biblia. Pero mahimo maghunahuna ang tagbalay: ‘Sin-o ini sia, kag ngaa ginapamangkot niya ako sing amo sini? Para sa ano ini?’ Gani dapat naton tinguhaan nga mapahamtang anay ang buot sang tagbalay. (Fil. 2:3, 4) Paano?

16 Nakita sang isa ka nagalakbay nga manugtatap nga epektibo ang masunod nga pamaagi. Sa tapos sang pagtamyawanay, tanyagan niya ang tagbalay sing tract nga Luyag Mo Bala Mahibaluan ang Kamatuoran? kag nagasiling: “Nagapanagtag kami sini sa tanan nga tawo sa inyo lugar subong nga adlaw. Nagabinagbinag ini sing anom ka pamangkot nga ginapautwas sang madamo nga tawo. Yari ang imo kopya.” Ang utod nagreport nga kalabanan sang mga tawo daw relaks kon mahibaluan nila ang imo tuyo. Sa sini nga kahimtangan, masami nga mahapos na lang mapadayon ang pag-istoryahanay. Ginapamangkot dayon sang nagalakbay nga manugtatap ang tawo: “Ginpaligban mo na bala ang isa sa sini nga mga pamangkot?” Kon mapili ang tagbalay sing pamangkot, ginabuksan sang utod ang tract kag ginabinagbinag ang ginasiling sang Biblia parte sa sini. Ukon sia ang nagapili sang pamangkot kag ginapadayon ang pag-istoryahanay nga wala ginainterogar ang tagbalay. Siempre, madamo sing pamaagi para masugdan ang pag-istoryahanay. Sa iban nga lugar, mahimo nga magpaabot ang tagbalay nga sundon anay ang pila ka kinabatasan antes sila sugiran sang aton tuyo. Ang sekreto amo nga ipahisuno naton ang aton presentasyon para mamati ang mga tawo sa aton lugar.

PADAYON NGA IAPLIKAR ANG BULAWANON NGA PAGSULUNDAN SA IMO MINISTERYO

17. Sa aton pagbinagbinag sa sini nga artikulo, ano ang pila ka paagi nga maaplikar naton ang Bulawanon nga Pagsulundan?

17 Ano ang pila ka paagi nga maaplikar naton ang Bulawanon nga Pagsulundan sa aton ministeryo? Pakig-angutan naton ang tagbalay subong indibiduwal. Tahuron naton ang ila puluy-an kag pagkabutang. Tinguhaan naton nga makapakigbahin sa ministeryo sa tion nga masami ara sa balay ang mga tawo kag may tion sila sa pagpamati. Kag isugid naton ang aton mensahe sa paagi nga batunon ini sang mga tawo sa aton teritoryo.

18. Ano ang benepisyo kon pakig-angutan naton ang mga tawo sa aton teritoryo pareho sang gusto naton nga pagpakig-angot sa aton?

18 Madamo ang benepisyo sang pagpakig-angot sa mga tawo sa teritoryo sa paagi nga gusto naton pakig-angutan. Paagi sa pagpakita sing kaayo kag konsiderasyon, ginatugutan naton nga magsiga ang aton kapawa, ginapadaku ang kapuslanan sang mga prinsipio sa Kasulatan, kag ginahimaya ang aton Amay sa langit. (Mat. 5:16) Kabay nga madamo pa ang maganyat naton sa kamatuoran paagi sa aton maayo nga pagpakig-istorya sa ila. (1 Tim. 4:16) Batunon man nila ukon indi ang mensahe sang Ginharian, nalipay kita kay nahibaluan naton nga ginahimo naton ang aton bug-os nga masarangan para matuman ang aton ministeryo. (2 Tim. 4:5) Kabay pa nga ilugon naton si apostol Pablo, nga nagsulat: “Ginahimo ko ang tanan nga butang tungod sa maayong balita, agod mapaambit ko ini sa iban.” (1 Cor. 9:23) Kabay pa nga padayon naton nga iaplikar ang Bulawanon nga Pagsulundan sa aton ministeryo.