Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Abril 2014

Ginaapresyar Mo Bala ang Pagbantay ni Jehova?

Ginaapresyar Mo Bala ang Pagbantay ni Jehova?

“Ang mga mata sang GINOO yara sa tagsa ka duug, nga nagabantay sang malaut kag maayo.”—HULU. 15:3.

1, 2. Ngaa ang pagbantay ni Jehova tuhay sa pagbantay sang mga kamera?

IMADAMO nga pungsod, nagadamo ang nagagamit sing mga kamera para bantayan ang trapiko kag marekord ang mga aksidente. Kon marekord sang mga kamera ang salakyan nga nagbunggo sa mga tawo, makabulig ini sa mga awtoridad nga madakpan ang drayber nga nagpalagyo. Paagi sini nga mga kamera, mabudlay na gid palagyuhan sang mga tawo ang ila ginhimo.

2 Ining lapnag bala nga paggamit sang mga kamera nagapahanumdom sa aton kay Jehova, ang aton mahigugmaon nga Amay? Ang Biblia nagsiling nga ang iya mga mata “yara sa tagsa ka duug.” (Hulu. 15:3) Pero buot bala silingon sini nga padayon niya nga ginabantayan ang aton ginahimo? Ginabantayan bala kita sang Dios para silutan kon makasala? (Jer. 16:17; Heb. 4:13) Indi gid! Ginabantayan kita ni Jehova bangod ginahigugma niya kita kag interesado sia sa aton kaayuhan.—1 Ped. 3:12.

3. Ano ang lima ka paagi nga ginabantayan kita sing mahigugmaon sang Dios?

3 Paano naton maapresyar nga ginabantayan kita sang Dios tungod ginahigugma niya kita? Binagbinagon naton kon paano niya ini ginapakita. Ginahimo niya ini paagi sa (1) pagpaandam sa aton kon nagapakita kita sing malain nga mga huyog, (2) pagtadlong sa aton kon nagahimo kita sing sayop, (3) paggiya sa aton paagi sa  mga prinsipio nga mabasa sa iya Pulong, (4) pagbulig sa aton kon makaatubang kita sing lainlain nga pagtilaw, kag (5) pagpadya sa aton kon may makita sia nga maayo sa aton.

ANG NAGABANTAY NGA DIOS NAGAPAANDAM SA ATON

4. Ngaa ginpaandaman ni Jehova si Cain nga ang sala “nagapuut sa gawang”?

4 Una, binagbinagon naton kon paano kita ginapaandaman sang Dios kon nagatubo sa aton ang malain nga mga huyog. (1 Cron. 28:9) Para maapresyar ini nga pagbantay sang Dios, binagbinaga kon paano niya ginpakig-angutan si Cain, nga ‘nagsingkal sing tama’ sang wala nahamuot sa iya ang Dios. (Basaha ang Genesis 4:3-7.) Ginlaygayan sia sang Dios nga ‘maghimo sing maayo.’ Kay kon indi, si Jehova nagpaandam sa iya nga “ang sala nagapuut [na] sa gawang.” Ginsilingan sia sang Dios: “Gahumi sia.” Luyag sang Dios nga pamatian ni Cain ang Iya paandam para ‘mabayaw’ sia liwat. Kon namati si Cain sa paandam, nagpabilin kuntani ang iya maayo nga kaangtanan sa Dios.

5. Sa ano nga mga paagi ginapaandaman kita ni Jehova parte sa indi nagakaigo nga mga huyog?

5 Kamusta naman subong? Ang mga mata ni Jehova nagalusot sa aton tagipusuon, amo nga indi naton matago sa iya ang aton matuod nga mga huyog kag mga motibo. Luyag sang aton mahigugmaon nga Amay nga sundon naton ang dalanon sang pagkamatarong; pero wala niya kita ginapilit. Paagi sa iya Pulong, ang Biblia, ginapaandaman niya kita kon nagapadulong na kita sa sala nga dalan. Paano? Sa aton pagbasa sing Biblia kada adlaw, masami naton masapwan ang mga teksto nga makabulig sa aton nga mabatuan ang malain kag indi nagakaigo nga mga huyog. Luwas sini, mahimo ipaathag sang aton mga publikasyon ang problema nga ayhan ginabatas naton kag ipakita kon paano naton ini maatubang. Kag sa aton mga miting sa kongregasyon, tanan kita nagabaton sing suno sa tion nga laygay!

6, 7. (a) Ngaa masiling nga ang mga materyal nga ginhanda para sa minilyon pamatuod sang mahigugmaon nga pag-ulikid sang Dios sa imo? (b) Paano ka makabenepisyo sa pag-atipan ni Jehova sa imo?

6 Ini nga mga paandam pamatuod gid nga mahigugmaon nga ginabantayan ni Jehova ang kada isa sa aton. Matuod, ang mga ginasiling sang Biblia siniglo na nga ginsulat, ang mga publikasyon nga ginhanda sang organisasyon sang Dios ginhimo para sa minilyon, kag ang mga laygay sa mga miting gin-aman para sa bug-os nga kongregasyon. Pero ini tanan pamaagi ni Jehova sa paggiya sa imo sa iya Pulong agod mabag-o mo ang imo mga huyog. Gani masiling gid nga pamatuod ini sang mahigugmaon nga pag-ulikid ni Jehova sa imo.

Ang nahanas sa Biblia nga konsiensia makabulig sa aton nga malikawan ang mga katalagman (Tan-awa ang parapo 6 kag 7)

7 Para makabenepisyo sa mga paandam sang Dios, dapat kita anay magpati nga nagaulikid gid sia sa aton. Dayon, dapat naton pamatian ang iya Pulong, nga nagatinguha nga dulaon ang tanan nga panghunahuna nga indi makapahamuot sa Dios. (Basaha ang Isaias 55:6, 7.) Kon pamatian naton ang iya mga paandam, malikawan naton ang madamo nga kasakit. Pero, paano kon nadala kita sang aton malain nga mga huyog? Ano nga bulig ang ginahatag sang aton mahigugmaon nga Amay?

ANG ATON MAINULIKDON NGA AMAY NAGATADLONG SA ATON

8, 9. Paano ang laygay nga ginahatag ni Jehova paagi sa iya mga alagad nagapakita sang iya pag-ulikid sa aton? Maghatag sing halimbawa.

8 Mahimo nga mas nabatyagan naton ang pag-ulikid ni Jehova kon makabaton kita sing pagtadlong. (Basaha ang Hebreo 12:5, 6.) Matuod, wala kita nalipay kon ginalaygayan kita ukon ginadisiplina. (Heb. 12:11) Pero, hunahunaa kon ano ang dapat binagbinagon sang isa nga nagalaygay sa aton. Dapat mahibaluan niya kon ano ang aton ginahimo nga makaapektar sa aton kaangtanan kay Jehova  nga Dios. Kinahanglan man nga may kabalaka sia sa aton mga balatyagon, handa sa paghatag sang iya tion, kag nagapanikasog nga mapakita sa aton sa Biblia kon paano kita magbag-o para kahamut-an sang Dios. Ginatahod naton ini nga laygay bangod ang Ginhalinan sini amo si Jehova.

9 Binagbinagon naton ang isa ka halimbawa kon paano mapakita sang mga manuglaygay nga tawo ang pag-ulikid sang Dios. Antes magsulod sa kamatuoran, ang isa ka utod nga lalaki pirme nagatan-aw sing pornograpiya. Bisan pa nauntat na niya ini, ara gihapon ang iya huyog, nga daw nagasiga nga gamay nga baga. Sang nakabakal sia sing bag-o nga cell phone, ang iya kailigbon nagdabdab liwat. (Sant. 1:14, 15) Gingamit niya ang cell phone para makadtuan ang pornograpiko nga mga site sa Internet. Isa ka adlaw, samtang nagapanaksi paagi sa telepono, ginpahulam niya ang iya cell phone sa isa ka gulang para makapangita ini sang mga adres. Sang gingamit sang gulang ang cell phone, nagtuhaw ang kwestionable nga mga site. Nangin pagpakamaayo ini sa utod nga may problema sa espirituwal. Ginlaygayan sia dayon sang gulang, ginpamatian niya ini, kag nadula niya sang ulihi ang iya malain nga huyog. Nagapasalamat gid kita sa aton mainulikdon nga Amay sa langit, nga nakakita bisan sang aton natago nga mga sala kag nagatadlong sa aton antes ini maglala!

NAGABENIPISYO KITA SA PAG-APLIKAR SA MGA PRINSIPIO SA BIBLIA

10, 11. (a) Ano ang himuon naton para magiyahan kita sang Dios? (b) Paano naeksperiensiahan sang isa ka pamilya nga maalamon ang pagsunod sa giya ni Jehova?

10 Ang salmista nag-amba kay Jehova: “Magatuytuy ka sa akon sang imo laygay.” (Sal. 73:24) Kon kinahanglan naton ang giya, ‘makilala’ naton si Jehova paagi sa pag-usisa sang iya Pulong para mahibaluan ang iya pagtamod. Ang pag-aplikar sa mga prinsipio sang Biblia indi lamang makabulig sa aton sa espirituwal kundi makabulig man ini kon kaisa sa pag-aman sang aton materyal nga mga kinahanglanon.—Hulu. 3:6.

11 Ang isa ka halimbawa kon paano ginagiyahan ni Jehova ang pila ka tawo makita sa eksperiensia sang isa ka mangunguma sa kabukiran sang Masbate sa Pilipinas. Sila nga duha sang iya asawa mga regular payunir kag daku ang ila pamilya. Isa ka adlaw, nakibot sila sang nabaton nila ang sulat sang tag-iya sang duta nga ila ginaumhan nga ginapahalin na sila. Ngaa? Bangod ginpasibangdan sila nga nagdinaya. Nabalaka  gid ang utod kon diin sila maistar sang iya pamilya, pero nagsiling sia: “Magaaman si Jehova. Pirme niya ginahatag ang aton mga kinahanglanon, ano man ang matabo.” Ang pagsalig sang utod napadyaan gid. Pila ka adlaw sang ulihi, nalipay ang pamilya kay indi na sila pagpahalinon. Ngaa? Natalupangdan sang tag-iya nga bisan pa sang akusasyon sa ila, ining Saksi nga pamilya, nga ginagiyahan sang mga prinsipio sang Biblia, nagpabilin nga matinahuron kag kalmado. Nagdayaw gid sa sini ang tag-iya, amo nga wala lamang niya sila gintugutan nga magpabilin kundi ginhatagan pa sing dugang nga duta nga umahon. (Basaha ang 1 Pedro 2:12.) Huo, si Jehova nagagiya sa aton paagi sa iya Pulong para malampuwasan ang mga kabudlayan.

ANG ABYAN NGA NAGABULIG SA ATON NGA BATASON ANG MGA KABUDLAYAN

12, 13. Sa ano nga mga sitwasyon mahimo maghunahuna ang iban kon bala nakita sang Dios ang ila pag-antos?

12 Kon kaisa, ang mga kabudlayan daw wala sing katapusan. Mahimo nga nagaantos kita sing malala nga balatian, madugay nga pagpamatok sang aton pamilya, ukon padayon nga paghingabot. Kag kamusta naman ang indi paghangpanay kon kaisa sa pila ka kauturan bangod sang lainlain nga personalidad?

13 Halimbawa, mahimo ka masakitan sa ginsiling sang isa ka utod. Ayhan magasiling ka, ‘Indi ini dapat matabo sa organisasyon sang Dios!’ Pero yadto nga utod nakabaton sing mga pribilehiyo sa kongregasyon kag daw ginadayaw pa sang iban. ‘Ngaa nga amo sini?’ ayhan mamangkot ka. ‘Wala bala ini nakita ni Jehova? Indi bala niya ini pagtadlungon?’—Sal. 13:1, 2; Hab. 1:2, 3.

14. Ano ang isa sa posible nga mga rason kon ngaa wala nagapasilabot ang Dios sa pagsolbar sa aton mga problema?

14 Mahimo may mabakod nga mga rason si Jehova kon ngaa wala sia nagpasilabot. Halimbawa, ayhan nagahunahuna ka nga ang nakasakit sa imo amo gid ang may sala, pero mahimo nga tuhay ang pagtamod sang Dios sa sini. Mahimo nga para sa iya, ikaw pa ang may sala. Ang matuod, ang ginkabig mo nga makapasakit nga hambal isa gali ka maayo nga laygay nga dapat mo kuntani binagbinagon. Parte sa iya kasaysayan, si Utod Karl Klein, nga miembro anay sang Nagadumala nga Hubon, nag-istorya nga isa ka bes prangka sia nga ginsaway ni Utod J. F. Rutherford. Sang ulihi, malipayon nga gintamyaw ni Utod Rutherford si Utod Klein nga nagasiling, “Hello, Karl!” Pero nagalain gihapon ang buot ni Utod Klein sa pagsaway sa iya, amo nga pakulahaw lang ang iya pagtamyaw. Bangod natalupangdan ni Utod Rutherford nga nagalain gihapon ang buot ni Utod Klein, ginpaandaman niya ini nga mabiktima gid sia sang Yawa kon padayunon niya ini. Sang ulihi, si Utod Klein nagsulat: “Kon magdumot kita sa aton utod bangod sang ginsiling niya sa aton, ilabi na kon may kinamatarong sia sa paghambal sini, ginatugutan naton nga masiod kita sang Yawa.” *

15. Ano ang dapat mo hunahunaon para indi ka madulaan sing pagpailob kon nagahulat sang bulig ni Jehova sa tion sang kabudlayan?

15 Pero mahimo nga indi na kita makapailob kon daw wala nagauntat ang mga kabudlayan. Paano naton ini malampuwasan? Ibutang ta nga nagadrayb ka sing salakyan sa haywey kag natrapik ka. Wala ka makahibalo kon daw ano pa ini kadugay. Kon maugot ka kag mangita sing iban nga alagyan, mahimo nga magtalang ka. Mahimo nga mas maatrasar ka pa sangsa mapailubon ka kuntani nga naghulat. Sing kaanggid, kon magpabilin lang kita sa dalanon nga ginapalaktan sa aton sang Pulong sang Dios, makalab-ot gid kita sa aton destinasyon.

16. Ano ang isa pa ka rason kon ngaa mahimo indi paghilabtan ni Jehova ang aton mga kabudlayan?

16 Mahimo nga indi paghilabtan ni Jehova  ang aton mga kabudlayan bangod luyag niya nga mahanas gid kita. (Basaha ang 1 Pedro 5:6-10.) Pero wala nagahalin sa Dios ang mga kabudlayan. (Sant. 1:13) “Ang inyo kaaway, ang Yawa,” amo ang kabangdanan sang kalabanan nga kabudlayan. Pero puede tugutan sang Dios ang mga kabudlayan para mag-uswag kita sa espirituwal. Nakita niya ang aton pag-antos, kag “bangod nagaulikid sia” sa aton, pat-uron niya nga magapadayon lamang ini “sa malip-ot nga tion.” Ginaapresyar mo bala ang pagbantay ni Jehova kon may mga kabudlayan ka, nga nagasalig nga magahatag sia sing lulutsan?—2 Cor. 4:7-9.

PAKAMAAYUHON KA SANG DIOS

17. Sin-o ang ginausisa ni Jehova, kag ngaa?

17 Sa katapusan, ginausisa sang Dios ang aton kabuhi bangod sa isa ka masaligan gid nga rason. Paagi kay manalagna Hanani, ginsilingan Niya si Hari Asa: “Ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.” (2 Cron. 16:9) Nakita sang Dios nga ang tagipusuon ni Asa indi himpit ukon bug-os, pero ipakita sa imo ni Jehova ang iya ‘kabakud,’ kon padayon mo nga himuon ang husto.

18. Kon pamatyag mo wala ka ginaapresyar, ano ang dapat mo dumdumon parte kay Jehova? (Tan-awa ang piktyur sa umpisa sini nga artikulo.)

18 Luyag sang Dios nga ‘pangitaon naton ang maayo,’ ‘higugmaon ang maayo,’ kag “himuon ang maayo” agod ‘pakamaayuhon’ niya kita. (Amos 5:14, 15; 1 Ped. 3:11, 12) Natalupangdan ni Jehova ang mga matarong kag ginapakamaayo sila. (Sal. 34:15) Halimbawa, binagbinaga ang Hebreo nga mga paltera nga sanday Sifra kag Pua. Sang naulipon ang Israel sa Egipto, mas ginkahadlukan sining duha ka babayi ang Dios sangsa kay Paraon, nga nagsugo sa ila nga pamatyon ang tanan nga mabun-ag nga bata nga lalaki nga Hebreo. Maathag nga bangod sa ila diosnon nga konsiensia, gintugutan nila nga mabuhi ang mga lapsag. Sang ulihi, sanday Sifra kag Pua nakatigayon sang kaugalingon nga mga pamilya. (Ex. 1:15-17, 20, 21) Ang ila maayo nga mga hinimuan natalupangdan gid sang nagapanuloktulok nga mga mata ni Jehova. Kon kaisa, mahimo magbatyag kita nga wala sing nagaapresyar sa aton ginahimo nga maayo. Pero ginaapresyar gid ini ni Jehova. Nakita niya ang tanan nga maayo nga ginhimo naton, kag padyaan niya kita.—Mat. 6:4, 6; 1 Tim. 5:25; Heb. 6:10.

19. Paano napamatud-an sang isa ka utod nga natalupangdan ni Jehova ang maayo nga mga hinimuan?

19 Napamatud-an sang isa ka utod nga babayi sa Austria nga ang iya pagpangabudlay natalupangdan sang atentibo nga mga mata sang Dios. Bangod nagdaku sia sa Hungary, nakabaton sia sing adres sang isa ka tawo nga nagahambal sing Hungarian para kadtuan niya sa iya pagministeryo. Ginkadtuan niya ini dayon, pero wala sing tawo ang balay. Ginbalikbalikan niya ini. Kon kaisa, pamatyag niya may tawo ang balay, pero wala sing nagasabat. Nagbilin sia sing literatura, mga sulat, impormasyon para makontak sia, kag iban pa. Pagligad sang isa ka tuig kag tunga nga pagbalikbalik, may nagbukas gid man sang puertahan! Ang utod gintamyaw sang mainabyanon nga babayi, nga nagsiling: “Dali, sulod di anay. Ginbasa ko ang tanan mo nga ginbilin kag ginahulat ko ikaw.” Gina-chemotherapy gali ang babayi kag indi niya gusto mag-istorya sa mga tawo. Ginbaton niya ang pagtuon sa Biblia. Huo, ginpadyaan sang Dios ang mga panikasog sang utod!

20. Ano ang imo ginabatyag sa pagbantay ni Jehova?

20 Nakita ni Jehova ang tanan mo nga ginahimo kag padyaan ka niya sa ulihi. Bangod nahibaluan mo nga ginatan-aw ka sang Dios, indi ini pagtamda nga ginabantayan ka niya para pangitaan sing sala. Sa baylo, kabay pa nga mabatyagan mo ang mas suod nga kaangtanan sa Dios nga nagaulikid gid sa imo!

^ par. 14 Ang kasaysayan ni Utod Klein mabasa sa Oktubre 1, 1984, nga Ang Lalantawan.