Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MARSO 2014

Kon Paano Mahuptan ang Positibo nga Pagtamod

Kon Paano Mahuptan ang Positibo nga Pagtamod

“Kon ang tawo magkabuhi sing madamu nga mga tuig, magkalipay sia sa ila tanan.”MAN. 11:8.

1. Ano nga mga pagpakamaayo ni Jehova ang nagabulig sa aton para mangin malipayon?

GUSTO ni Jehova nga mangin malipayon kita, kag madamo sia sing pagpakamaayo sa aton para mabatyagan gid ini. Ang isa sini amo ang aton kabuhi. Gani magamit naton ang aton kabuhi para madayaw ang Dios, kay ginbuyok niya kita sa matuod nga pagsimba. (Sal. 144:15; Juan 6:44) Ginapasalig kita ni Jehova sang iya gugma kag ginabuligan nga makapadayon sa pag-alagad sa iya. (Jer. 31:3; 2 Cor. 4:16) Nagakalipay kita sa espirituwal nga paraiso, diin may bugana nga espirituwal nga pagkaon kag mahigugmaon nga paghiliutod. Labaw sa tanan, may hamili kita nga paglaum sa palaabuton.

2. Ano ang ginapakigbatuan sang pila ka matutom nga alagad sang Dios?

2 Bisan pa sa sini nga mga rason sa pagkalipay, ang pila ka matutom nga alagad sang Dios nagapakigbato sa negatibo nga pagtamod sa ila kaugalingon. Mahimo nagabatyag sila nga wala sila ginapabaloran ni Jehova ukon ang ila pag-alagad sa iya. Para sa mga nagapakigbato gihapon sa negatibo nga mga balatyagon, ang pagkalipay sa “madamu nga mga tuig” daw isa lang ka damgo. Ang kabuhi daw puno sing kadulom.—Man. 11:8.

3. Ano ang mahimo nga rason sang negatibo nga mga balatyagon?

3 Ini nga mga kauturan nagabatyag sing negatibo bangod sang mga kapaslawan, balatian, ukon mga limitasyon sang katigulangon.  (Sal. 71:9; Hulu. 13:12; Man. 7:7) Dapat man batunon sang tagsa ka Cristiano nga ang tagipusuon malimbungon kag mahimo magkondenar sa aton bisan pa ginakahamut-an kita sang Dios. (Jer. 17:9; 1 Juan 3:20) Nagapalapnag ang Yawa sing kabutigan parte sa mga alagad sang Dios. Kag ang tanan nga may panghunahuna ni Satanas mahimo mag-impluwensia sa aton pagtamod, pareho sang ginsiling sang wala sing pagtuo nga si Elifaz—nga wala kita sing pulos para sa Dios. Kabutigan ina sang tion ni Job kag amo man karon.—Job 4:18, 19.

4. Ano ang aton binagbinagon sa sini nga artikulo?

4 Sa Kasulatan, maathag nga nagsiling si Jehova nga magaupod sia sa mga nagalakat sa “nalupyakan sang landong sang kamatayon.” (Sal. 23:4) Ang isa nga ginagamit niya sa pag-upod sa aton amo ang iya Pulong. Ang Biblia “gamhanan paagi sa Dios agod pukanon ang mga butang nga natukod sing malig-on,” lakip na ang aton sala nga mga pagpati kag negatibo nga mga panghunahuna. (2 Cor. 10:4, 5) Binagbinagon naton kon paano kita mabuligan sang Biblia para mapalambo kag mahuptan ang positibo nga pagtamod. Mahimo ka makabenepisyo sa sini, kag makakita sing mga paagi para mapalig-on ang iban.

GAMITA ANG BIBLIA PARA MAPALAMBO ANG POSITIBO NGA PAGTAMOD

5. Ano ang makabulig sa aton para makatigayon sing positibo nga pagtamod?

5 Si apostol Pablo naglaragway sang pila ka butang nga mahimo makabulig sa aton para mapalambo ang positibo nga pagtamod. Ginpalig-on niya ang kongregasyon sa Corinto: “Padayon nga tilawi kon yara kamo sa pagtuo.” (2 Cor. 13:5) Ang “pagtuo” amo ang kabug-usan nga pagpati sang mga Cristiano nga nabase sa Biblia. Kon ang aton ginahambal kag ginabuhat nahisuno sa sini nga mga pagpati, nian nakapasar kita sa pagtilaw kag nagapakita nga yara kita sa “pagtuo.” Siempre pa, kinahanglan man naton ipaanggid ang aton pagkabuhi sa tanan nga Cristianong panudlo. Indi puede nga mapili lang kita kon ano ang gusto naton sundon.—Sant. 2:10, 11.

6. Ngaa dapat naton tilawan ang aton kaugalingon kon bala ‘yara kita sa pagtuo’? (Tan-awa ang piktyur sa umpisa sini nga artikulo.)

6 Mahimo nga nagapangalag-ag ka nga tilawan ang imo kaugalingon, ilabi na kon pamatyag mo indi ka makapasar. Pero, ang pagtamod ni Jehova sa aton mas importante sangsa aton pagtamod, kag ang iya panghunahuna mas mataas gid sangsa aton. (Isa. 55:8, 9) Ginausisa niya ang iya mga sumilimba, indi para silutan sila, kundi para makita ang ila maayo nga mga kinaiya kag buligan sila. Kon gamiton mo ang Pulong sang Dios sa pagtilaw sang imo kaugalingon para mahibaluan ‘kon yara ka sa pagtuo,’ makita mo ang imo kaugalingon pareho sang pagtan-aw sang Dios sa imo. Makabulig ini sa imo para mabuslan ang panghunahuna nga wala ka sing pulos sa Dios sang pasalig sang Biblia nga, ‘Hamili ka para kay Jehova.’ Ang resulta sini mapaanggid sa pagbukas sang kurtina para makasulod ang silak sang adlaw sa madulom nga kuarto.

7. Paano kita makabenepisyo sa mga halimbawa sang mga matutom nga ginsambit sa Biblia?

7 Ang isa ka epektibo nga paagi para mausisa ang aton kaugalingon amo ang pagpamalandong sa mga halimbawa sang matutom nga mga tawo nga ginsambit sa Biblia. Ipaanggid ang ila mga kahimtangan kag mga balatyagon sa imo, kag hunahunaa kon ano ang imo himuon sa ila sitwasyon. Usisaon naton ang tatlo ka halimbawa nga nagapakita kon paano mo magamit ang Biblia para mapat-od kon bala yara ka “sa pagtuo” kag mapalambo ang positibo nga pagtamod sa imo kaugalingon.

ANG IMOL NGA BALO

8, 9. (a) Ano ang kahimtangan sang imol nga balo? (b) Ano ang posible nga ginbatyag sang balo?

8 Sa templo sa Jerusalem, gintan-aw ni Jesus ang imol nga balo. Ang iya halimbawa makabulig sa aton nga magpabilin nga positibo bisan pa sa aton mga limitasyon. (Basaha ang Lucas 21:1-4.) Binagbinaga ang kahimtangan  sang balo. Kinahanglan niya batason indi lamang ang kasubo sa pagkapatay sang iya bana kundi ang nagakatabo man sa relihion nga ginadumalahan sang mga lider nga “nagapanguha sang pagkabutang sang mga balo nga babayi” imbes nga magbulig sa ila. (Luc. 20:47) Imol gid sia katama amo nga ang iya maamot sa templo katumbas lang sang mahimo isueldo sa trabahador sa sulod sang pila ka minuto nga pagtrabaho.

9 Hunahunaa kon ano ang ginbatyag sang balo sang nagsulod sia sa luwang sang templo nga duha lang ka gamay nga sensilyo ang iya dala. Ginahunahuna bala niya nga tuman ka gamay sang iya amot kon ipaanggid sa iya kuntani maamot kon buhi ang iya bana? Nahuya bala sia sang nakita niya ang dalagku nga mga donasyon sang mga nauna sa iya, ayhan nagahunahuna kon bala may pulos ang iya amot? Kon amo gid man sini ang iya ginabatyag, ginhimo niya gihapon ang iya masarangan para sa matuod nga pagsimba.

10. Paano ginapakita ni Jesus nga ginapabaloran sang Dios ang balo?

10 Ginpakita ni Jesus nga ang balo kag ang iya amot ginpabaloran ni Jehova. Sia nagsiling nga ‘naghulog ini sing kapin pa sangsa mga manggaranon.’ Ang iya donasyon magasimpon sa ginhatag sang iban, pero gindayaw gid sia ni Jesus. Ang nagabantay sa bahandian nga makakita sa ulihi sining duha ka gamay nga sensilyo wala makahibalo kon daw ano ini ka hamili kay Jehova kag ang naghatag sini. Ginapakita sini nga ang pagtamod sang Dios amo ang importante, indi ang hunahunaon sang iban nga tawo ukon ang pagtamod sang balo sa iya kaugalingon. Magamit mo bala ini nga kasaysayan para tilawan kon bala yara ka sa pagtuo?

Ano ang imo matun-an sa halimbawa sang imol nga balo? (Tan-awa ang parapo 8-10)

11. Ano ang imo matun-an sa kasaysayan sang balo?

11 Ang imo mga kahimtangan mahimo may epekto sa imo mahatag kay Jehova. Bangod sang edad ukon kasablagan, ang tion nga magamit sang pila sa pagbantala sang maayong balita limitado gid. Husto ayhan nga duhaduhaan nila kon bala ireport pa nila ini? Bisan indi ka pa tigulang ukon wala sing kasablagan, mahimo magbatyag ka nga ang imo mga panikasog gamay lang nga bahin sang  tanan nga oras nga ginahinguyang sang katawhan sang Dios kada tuig sa pagsimba sa iya. Pero matun-an naton sa kasaysayan sang imol nga balo nga ginatalupangod kag ginapabaloran ni Jehova ang tanan nga ginhimo naton para sa iya, ilabi na sa mabudlay nga mga kahimtangan. Hunahunaa ang imo pagsimba kay Jehova sang nagligad nga tuig. Ang isa bala ka oras sa sini nga imo ginhinguyang sa pag-alagad nagakinahanglan sing daku nga pagsakripisyo? Kon amo, makapat-od ka nga ginapabaloran niya ang imo nahimo sa sina nga oras. Kon pareho sa imol nga balo, ginahimo mo ang imo bug-os nga masarangan sa pag-alagad kay Jehova, may mabakod ka nga rason sa pagpati nga ‘yara ka sa pagtuo.’

“KUHAA ANG AKON KABUHI”

12-14. (a) Ano ang epekto kay Elias sang negatibo nga balatyagon? (b) Ngaa mahimo nga amo sina ang nabatyagan ni Elias?

12 Si manalagna Elias mainunungon kay Jehova kag may mabakod nga pagtuo. Pero may tion nga nasubuan gid sia amo nga nangabay sia kay Jehova nga patyon sia, nga nagasiling: “Tuman na; karon, O GINOO, kuhaa ang akon kabuhi.” (1 Hari 19:4) Ang mga wala makaagi sini nga kasubo mahimo magsiling nga ang pangamuyo ni Elias “nanginmadalas” ukon wala nahunahuna sing maayo. (Job 6:3) Pero matuod gid ang iya nabatyagan. Talupangda nga imbes silutan si Elias kay gusto na niya mapatay, ginbuligan sia ni Jehova.

13 Ngaa amo sina ang ginbatyag ni Elias? Wala madugay antes sini, ginpamatud-an ni Elias paagi sa milagro nga si Jehova amo ang matuod nga Dios, kag nagresulta ini sa pagpamatay sa 450 ka manalagna ni Baal. (1 Hari 18:37-40) Mahimo nga nagpaabot si Elias nga mabalik na sa putli nga pagsimba ang katawhan sang Dios, pero wala ina natabo. Ang malaut nga si Rayna Jezebel nagpadala sing mensahe kay Elias nga ipapatay niya sia. Bangod nahadlok si Elias nga mapatay, nalagyo sia pa bagatnan patabok sa kaingod nga Juda pakadto sa kamingawan.—1 Hari 19:2-4.

14 Samtang nagaisahanon, nakapamensar si Elias nga wala sing pulos ang iya hilikuton subong manalagna. Ginsilingan niya si Jehova: “Indi ako maayo pa sa akon mga ginikanan.” Ginapakita sini nga nagabatyag sia nga wala sing pulos pareho sa yab-ok kag tul-an sang iya patay nga mga katigulangan. Pareho lang nga gintilawan niya ang iya kaugalingon suno sa iya mga talaksan kag naghinakop nga napaslawan sia, kag wala sing pulos sa panulok ni Jehova ukon sa iban.

15. Paano ginpasalig sang Dios si Elias nga ginapabaloran Niya gihapon sia?

15 Pero lain ang pagtamod sang Labing Gamhanan kay Elias. Importante gihapon si Elias sa pagtamod sang Dios, kag naghulag si Jehova para pasaligon sia sini. Ginpadala sang Dios ang anghel para pabakuron si Elias. Nag-aman man si Jehova sing pagkaon kag ilimnon para may kusog si Elias sa 40 ka adlaw nga pagpanglakaton pabagatnan pakadto sa Bukid Horeb. Isa pa, mainayuhon nga gintadlong sang Dios ang sala nga pagpati ni Elias nga wala na sing Israelinhon nga matutom kay Jehova. Talalupangdon nga ginhatagan sang Dios si Elias sing bag-o nga asaynment, kag ginbaton niya ini. Nakabenepisyo si Elias sa bulig ni Jehova, kag nagbalik sia sa iya hilikuton subong manalagna nga may napasag-uli nga kusog.—1 Hari 19:5-8, 15-19.

16. Ano ang pila ka paagi nga ginabuligan ka sang Dios?

16 Ang eksperiensia ni Elias makabulig sa imo nga mapat-od nga yara ka sa pagtuo kag mapalambo ang positibo nga pagtamod. Una, hunahunaa ang mga ginahimo ni Jehova para buligan ka. Mahimo nga ginbuligan ka sang isa niya ka alagad, ayhan isa ka gulang ukon hamtong nga Cristiano, sa tion nga may problema ka! (Gal. 6:2) Nangin mapagros ka bala sa espirituwal paagi sa Biblia, aton mga publikasyon, kag mga miting sa kongregasyon? Sa sunod nga makabenepisyo ka sa sini nga mga aman, hunahunaa ang matuod nga Ginahalinan sini nga bulig kag mangamuyo sa pagpasalamat sa Iya.—Sal. 121:1, 2.

17. Ano ang ginapabaloran ni Jehova sa iya mga alagad?

 17 Ikaduha, batuna nga ang negatibo nga pagtamod malimbungon. Ang importante amo ang pagtamod sang Dios sa aton. (Basaha ang Roma 14:4.) Ginapabaloran ni Jehova ang aton debosyon kag katutom sa iya; wala niya kita ginatakus base sa aton mga hinimuan. Kag mahimo nga pareho kay Elias, mas madamo ka sing nahimo para kay Jehova sangsa ginahunahuna mo. Mahimo nga may isa sa kongregasyon nga nabuligan mo, ukon may isa sa teritoryo nga nakahibalo sang kamatuoran bangod sang imo mga panikasog.

18. Ano ang ginapamatud-an sang imo asaynment halin kay Jehova?

18 Sa katapusan, tamda ang kada asaynment halin kay Jehova nga pamatuod nga kaupod mo sia. (Jer. 20:11) Kaangay ni Elias, mahimo ka maluyahan bangod daw indi mabungahon ang imo pag-alagad ukon indi mo malab-ot ang pila ka espirituwal nga tulumuron. Pero nagapakigbahin ka gihapon sa pinakahamili nga pribilehiyo karon—ang pagbantala sang maayong balita kag pagdala sang ngalan sang Dios. Magpabilin nga matutom. Sa amo, masiling man sa imo ang ginsiling sa isa sa mga parabola ni Jesus: “Magkalipay upod sa imo agalon.”—Mat. 25:23.

ANG “PANGAMUYO SANG NAPIOTAN”

19. Ano ang kahimtangan sang manunulat sang Salmo 102?

19 Ang manunulat sang Salmo 102 naluyahan gid. “Napiotan” sia, nga nagaantos sa pisikal ukon emosyonal, kag wala sia sing kusog para maatubang ang iya mga problema. (Sal. 102, superskripsion) Makita naton sa iya mga ginsiling nga nasentro ang iya atension sa iya kasakit, kasubo, kag personal nga mga balatyagon. (Sal. 102:3, 4, 6, 11) Nagpati sia nga gusto sia ipilak ni Jehova.—Sal. 102:10.

20. Paano ang pangamuyo nakabulig sa isa nga nagapakigbato sa negatibo nga mga panghunahuna?

20 Pero, gingamit gihapon sang salmista ang iya kabuhi sa pagdayaw kay Jehova. (Basaha ang Salmo 102:19-21.) Subong sang aton makita sa Salmo 102, bisan ang mga yara sa pagtuo mahimo masakitan kag mahimo nga amo na lang ini ang iya ginapamensar. Pamatyag sang salmista, “nanginkaangay [sia] sa maya nga isa lamang sa ibabaw sang atop,” nga daw wala sia ginabulagan sang mga problema. (Sal. 102:7) Kon subong sina ang imo ginabatyag, iula ang imo tagipusuon kay Jehova subong sang ginhimo sang salmista. Ang mga pangamuyo sang napiutan—imo mga pangamuyo—makabulig sa imo samtang ginapakigbatuan mo ang negatibo nga mga panghunahuna. Si Jehova nagsaad nga ginatalupangod niya ang “pangamuyo sang mga makalolooy, kag wala magtamay sang ila pangamuyo.” (Sal. 102:17) Saligi ina nga saad.

21. Paano ang isa nga nagapakigbato sa negatibo nga mga balatyagon makatigayon sing mas positibo nga pagtamod?

21 Ginapakita man sang Salmo 102 kon paano ka makatigayon sing mas positibo nga pagtamod. Ginhimo ini sang salmista paagi sa pagsentro sang iya atension sa iya kaangtanan kay Jehova. (Sal. 102:12, 27) Nalugpayan sia sa paghibalo nga si Jehova yara pirme sa pagbulig sa Iya katawhan sa tion sang mga pagtilaw. Gani kon temporaryo ka nga ginaupangan sang negatibo nga balatyagon sa imo pag-alagad sa Dios sing bug-os, ipangamuyo ini. Pangabaya ang Dios nga pamatian ang imo pangamuyo agod indi ka lang makabatyag sing kaumpawan sa imo mga kabudlayan kundi ‘mabantala mo man ang ngalan sang GINOO.’—Sal. 102:20, 21.

22.  Paano mapahamut-an sang kada isa sa aton si Jehova?

22 Huo, magamit naton ang Biblia para pamatud-an ang aton kaugalingon nga yara kita sa pagtuo kag ginapabaloran kita ni Jehova. Matuod, mahimo nga indi naton masarangan dulaon karon ang tanan nga negatibo nga balatyagon ukon pagluya sing buot. Pero ang kada isa sa aton makapahamuot kay Jehova kag maluwas paagi sa matutom nga pag-alagad sa iya.—Mat. 24:13.