Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Pebrero 2014

Si Jehova—Ang Aton Pinakamaayo nga Abyan

Si Jehova—Ang Aton Pinakamaayo nga Abyan

“Gintawag [si Abraham] nga ‘abyan ni Jehova.’”—SANT. 2:23.

1. Bangod gintuga kita sa dagway sang Dios, ano ang aton ikasarang?

“KON ano ang tatay, amo man ang bata,” amo ini ang pirme naton mabatian. Huo, madamo nga kabataan ang pareho gid sa ila mga ginikanan. Kay man, napanubli sang bata ang gene sang iya amay kag iloy. Si Jehova, nga aton Amay sa langit, amo ang Manughatag sang kabuhi. (Sal. 36:9) Kag kita nga tawhanon niya nga mga anak may pagkaanggid sa iya sa pila ka paagi. Gintuga kita sa iya dagway, gani may ikasarang kita sa pagpangatarungan, pagdesisyon, kag pagpalambo sang mga pag-abyanay.—Gen. 1:26.

2. Paano nangin posible ang aton pagpakig-abyan kay Jehova?

2 Si Jehova mahimo naton mangin pinakamaayo nga Abyan. Ina nga pag-abyanay nangin posible bangod sa gugma sang Dios sa aton kag sa aton pagtuo sa iya kag sa iya Anak. Si Jesus nagsiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) May mga halimbawa kita sang mga tawo nga nakatigayon sing suod nga kaangtanan kay Jehova. Binagbinagon naton ang duha sa ila.

SI “ABRAHAM, NGA AKON ABYAN”

3, 4. Ano ang kinatuhayan sang pagpakig-abyan ni Abraham kay Jehova sa kaangtanan sang Israel kay Jehova?

3 Ginpatuhuyan ni Jehova ang patriarka kag katigulangan sang  mga Israelinhon subong si “Abraham, nga akon abyan.” (Isa. 41:8) Ang 2 Cronica 20:7, nagtawag man kay Abraham nga Abyan sang Dios. Diin nabase ang suod nga pagpakig-abyan sinang matutom nga tawo sa iya Manunuga? Nabase ini sa iya pagtuo.—Gen. 15:6; basaha ang Santiago 2:21-23.

4 Sang primero, si Jehova ang Amay kag Abyan sang kaliwatan ni Abraham nga nangin pungsod sang Israel sadto. Apang makapasubo kay nadula nila ang ila pagpakig-abyan sa Dios. Ngaa? Bangod wala sila nagtuo sa iya mga saad.

5, 6. (a) Paano mo nangin Abyan si Jehova? (b) Ano nga mga pamangkot ang dapat naton binagbinagon?

5 Samtang nagadamo ang imo nahibaluan parte kay Jehova, magabakod ang imo pagtuo kag gugma sa iya. Hunahunaa sang primero mo pa lang nahibaluan nga matuod nga Persona ang Dios, kag mahimo ka mangin suod sa iya. Natun-an mo man nga tanan kita natawo sa sala bangod sang paglapas ni Adan. Nahangpan mo nga ang katawhan sa kabilugan nahamulag sa Dios. (Col. 1:21) Dayon nahibaluan mo nga ang aton mahigugmaon nga Amay sa langit indi malayo kag interesado sia sa aton. Sang natun-an naton nga gin-aman niya ang halad-gawad ni Jesus kag nagtuo kita sa sini, nangin abyan naton ang Dios.

6 Samtang ginapamalandungan naton ina, mahimo naton pamangkuton ang aton kaugalingon: ‘Nagabakod bala ang akon pagpakig-abyan sa Dios? Nagabakod bala kada adlaw ang akon pagsalig, kag ang akon gugma sa akon pinalangga nga Abyan, si Jehova?’ Ang isa pa ka tawo sadto nga may suod nga kaangtanan kay Jehova amo si Gideon. Binagbinagon naton ang iya maayo nga halimbawa kag ilugon ini.

“ANG GINOO PAGHIDAIT”

7-9. (a) Ano ang talalupangdon nga eksperiensia ni Gideon, kag ano ang resulta sini? (Tan-awa ang piktyur sa umpisa sini nga artikulo.) (b) Paano naton matigayon ang pagpakig-abyan kay Jehova?

7 Ang hukom nga si Gideon nag-alagad kay Jehova sang tion nga mabudlay ang kahimtangan sang Israel sa tapos sila makasulod sa Ginsaad nga Duta. Ang Hukom kapitulo 6 nagsaysay nga ginbisitahan si Gideon sang anghel ni Jehova sa Ofra. Sa sina nga tion, makatalagam ang kaingod nga mga Midianhon sa Israel. Bangod sini, nagalinas sing trigo si Gideon, indi sa latagon, kundi sa linasan sang ubas, diin matago niya gilayon ang mga uyas. Bangod nakibot si Gideon sang nagpakita sa iya ang anghel kag nagtawag sa iya subong “isganan nga lalaki,” ginpamangkot niya ini kon bala buligan sila gihapon ni Jehova, pareho sang pagluwas Niya sa mga Israelinhon gikan sa Egipto. Ang anghel nga nagahambal subong tiglawas sang Manunuga, nagpasalig kay Gideon nga buligan gid sila ni Jehova.

8 Nagpalibog si Gideon kon paano niya ‘luwason ang Israel sa kamut sang Midian.’ Direkta sia nga nakabaton sing sabat: “Apang ako magaupud sa imo,” siling ni Jehova, “kag laglagon mo ang mga Midianhon subong sang isa ka tawo.” (Huk. 6:11-16) Bangod nagapalibog pa si Gideon kon paano ini matabo, nangayo sia sing palatandaan. Talupangda nga sa sini nga pag-istoryahanay, matuod gid nga Persona si Jehova para kay Gideon.

9 Ang masunod nga hitabo nagpabakod sang pagtuo ni Gideon kag nagpasuod pa gid sa iya sa Dios. Naghanda si Gideon sing pagkaon kag ginserbe ini sa anghel. Sang milagruso nga nasunog ang pagkaon paagi sa punta sang sungkod sang anghel, nakumbinsi si Gideon nga tiglawas gid man ni Jehova ang anghel. Bangod kinulbaan si Gideon, nakasiling sia: “Kailo, O Ginoong Dios! Kay karon nakita ko ang manugtunda sang GINOO sa nawung kag nawung!” (Huk. 6:17-22) Nabalabagan bala ang kaangtanan ni Gideon kag sang Dios bangod sina nga hitabo? Wala gid! Kabaliskaran ang natabo. Nakilala ni Gideon si Jehova sa paagi nga nakatigayon sia sang mahidaiton nga kaangtanan sa Dios. Nahibaluan naton ini kay ginhingalanan ni Gideon nga Jehova-salom ang altar nga iya ginpatindog. Ina nga ngalan nagakahulugan “ang GINOO paghidait.” (Basaha ang Hukom 6:23, 24.) Kon pamalandungan naton ang ginahimo ni  Jehova sa aton kada adlaw, marealisar naton nga matuod gid sia nga Abyan. Ang regular nga pagpangamuyo sa Dios nagapadugang sang aton kalinong kag nagapabakod ang aton pagpakig-abyan sa iya.

SIN-O BALA ANG MAGADAYON SA KAYANGKAYANG NI JEHOVA?

10. Suno sa Salmo 15:3, 5, ano ang ginapatuman ni Jehova sa aton para mangin abyan niya?

10 Apang, para mangin Abyan naton si Jehova, kinahanglan matuman naton ang pila ka kondisyon. Sa Salmo 15, nag-amba si David parte sa mga ginapatuman sa aton para ‘makadayon sa kayangkayang’ ni Jehova, buot silingon, mangin abyan sang Dios. (Sal. 15:1) Binagbinagon naton ang duha sa sini—ang indi pagpatupato kag ang pagkabunayag sa tanan naton nga pagpakig-angot. Parte sa sini, si David nagsiling sa nagadayon sa kayangkayang ni Jehova: ‘Wala sia nagapatopato sa iya dila. Wala sia nagabaton sing balus batok sa walay sala.’—Sal. 15:3, 5.

11. Ngaa indi naton dapat pagpatupatuan ukon pagpasipalahan ang iban?

11 Sa isa pa ka Salmo, si David nagpaandam: “Andami ang imo dila gikan sa malaut.” (Sal. 34:13) Kon indi naton pagsundon ini nga laygay, mapahilayo kita sa aton matarong nga Amay sa langit. Ang matuod, ang pagpatupato kinaiya sang panguna nga kaaway ni Jehova, si Satanas. Ang termino nga “Yawa” naghalin sa Griegong tinaga nga nagakahulugan sing “pagpasipala” ukon pagpatupato. Ang pagkontrol sa aton ginahambal parte sa iban makabulig para magapabilin kita nga suod kay Jehova. Matuod gid ini kon parte sa aton pagtamod sa gintangdo nga mga lalaki sa kongregasyon.—Basaha ang Hebreo 13:17; Judas 8.

12, 13. (a) Ngaa dapat kita mangin bunayag sa tanan nga butang? (b) Ano ang epekto sang aton pagkabunayag sa iban?

12 Ang pagkabunayag, indi ang pagpamentaha, kinaiya man sang mga alagad ni Jehova. Si apostol Pablo nagsulat: “Padayon kamo nga magpangamuyo para sa amon, kay nagasalig kami nga may bunayag kami nga konsiensia, bangod luyag namon maggawi sing bunayag sa tanan nga butang.” (Heb. 13:18) Bangod determinado kita nga “maggawi sing bunayag sa tanan nga butang,” wala kita nagapamentaha sa aton mga kauturan. Halimbawa, kon nagatrabaho sila sa aton, ginapat-od naton nga husto ang aton pagtratar sa ila kag ginasuelduhan sila suno sa ginkasugtan. Subong mga Cristiano, nagapakig-angot kita sing bunayag sa aton mga empleyado kag sa tanan. Kag kon nagatrabaho kita sa aton masigka-Cristiano, nagahalong kita nga indi mamentaha sa ila paagi sa pagpangayo sing indi nagakaigo nga mga pabor.

13 Masami kita makabati sing pagdayaw sang mga tawo sa kalibutan nga nakapakig-angot sa mga Saksi ni Jehova! Halimbawa, ang direktor sang isa ka daku nga organisasyon sa mga serbisyo sa konstruksion nakatalupangod nga ginatuman gid sang mga Saksi ni Jehova ang ila ginahambal. “Ginatuman gid ninyo kon ano ang inyo ginkasugtan nga himuon,” siling niya. (Sal. 15:4) Ini nga paggawi nagabulig sa aton nga mahuptan ang aton pagpakig-abyan kay Jehova. Isa pa, nagahatag ini sing kadayawan sa aton mahigugmaon nga Amay sa langit.

BULIGI ANG IBAN NGA MANGIN MGA ABYAN NI JEHOVA

Ginabuligan naton ang iban nga mangin abyan ni Jehova (Tan-awa ang parapo 14 kag 15)

14, 15. Sa aton ministeryo, paano naton mabuligan ang iban nga mangin abyan ni Jehova?

14 Mahimo nga madamo ang masugilanon naton sa ministeryo nga nagapati sa Dios, pero wala nila sia ginakabig nga pinakamaayo nga Abyan. Paano naton sila mabuligan? Binagbinaga ang instruksion ni Jesus sa 70 ka disipulo sang ginpadala sila sing tagduhaduha para magbantala: “Kon magsulod kamo sa isa ka balay, magsiling kamo anay, ‘Kabay nga may paghidait sa sini nga balay.’ Kag kon may abyan sang paghidait didto, ang inyo paghidait magapabilin sa iya. Apang kon wala, magabalik ini sa inyo.” (Luc. 10:5, 6) Maganyat naton ang mga tawo sa kamatuoran kon mainabyanon kita sa ila. Mahimo man ini makabulig  para madula ang kaakig sang mga nagapamatok kag batunon ka nila sa masunod nga pagduaw.

15 Kon may masugilanon kita nga debotado katama sa butig nga relihion ukon nagahimo sing supak sa Biblia nga mga kinabatasan, padayon kita nga mangin mainabyanon kag mahidaiton sa ila. Malipayon naton nga ginaabiabi sa aton mga miting ang mga indi kontento sa kahimtangan sang kalibutan karon kag gusto makatuon sa Dios nga aton ginasimba. Mabasa naton sa serye sang mga artikulo nga “Ang Biblia Nagapabag-o sang Kabuhi” ang madamo kag maayo nga mga halimbawa parte sa sini.

PAGPANGHIKOT UPOD SA ATON PINAKAMAAYO NGA ABYAN

16. Sa ano nga paagi kita makabig nga abyan kag “mga masigkamanugpangabudlay” ni Jehova?

16 Ang mga tawo nga updanay sa pagtrabaho masami nga nangin suod nga mag-abyan. Ang tanan nga nagdedikar kay Jehova may pribilehiyo nga kabigon niya nga mga abyan kag “mga masigkamanugpangabudlay.” (Basaha ang 1 Corinto 3:9.) Ang matuod, samtang nagabantala kita kag nagahimo sing disipulo, mas mahantop naton ang dalayawon nga mga kinaiya sang aton Amay sa langit. Makita naton kon paano ang iya balaan nga espiritu nagabulig sa aton para matuman ang sugo nga magbantala sang maayong balita.

17. Paano ang espirituwal nga pagkaon sa aton mga asembleya kag mga kombension nagapakita nga Abyan naton si Jehova?

17 Kon daku nga tion ang aton ginahinguyang sa paghimo sing disipulo, mangin suod pa gid kita kay Jehova. Halimbawa, makita naton kon paano ginapunggan ni Jehova ang mga nagapamatok. Binagbinaga ang natabo sang nagligad nga mga tinuig. Maathag bala naton nga nakita nga ginagiyahan kita sang Dios? Nagadayaw kita sa padayon nga pag-aman sang bugana nga espirituwal nga pagkaon. Ang mga programa sa aton kombension kag asembleya nagapakita nga palangga gid kita ni Jehova kag nahangpan niya ang aton mga problema kag mga kinahanglanon. Ang isa ka pamilya nagsulat parte sa ila apresasyon sa kombension: “Ang programa naglab-ot gid sa amon tagipusuon. Nabatyagan namon kon daw ano ka palangga ni Jehova ang kada isa sa aton kag gusto niya nga magmadinalag-on kita.” Sa tapos makatambong sang espesyal nga kombension sa Ireland, ang mag-asawa nga taga-Germany nagpasalamat sa pag-abiabi kag pag-atipan sa ila. Nagsiling pa sila: “Pero ang ginapasalamatan gid namon amo si Jehova kag ang iya Hari nga si Jesucristo. Gin-agda nila kami nga mangin bahin sining pungsod nga matuod gid nga nahiusa. Wala lang kita nagasugid parte sa paghiusa kundi naeksperiensiahan gid naton ini kada adlaw. Ang amon mga eksperiensia sa espesyal nga kombension sa Dublin pirme magapahanumdom sa amon sang hamili nga pribilehiyo nga alagaron ang aton halangdon nga Dios kaupod ninyo.”

 ANG MGA MAG-ABYAN NAGAKOMUNIKAR

18. Ano ang mahimo naton ipamangkot parte sa aton komunikasyon kay Jehova?

18 Ang pag-abyanay nagabakod kon may maayo nga komunikasyon. Ang social networking kag text messaging amo pirme ang ginagamit sa pagkomunikar bangod sang Internet kag teknolohiya sa telekomunikasyon. Pero kamusta naman ang aton komunikasyon sa aton pinakamaayo nga Abyan, si Jehova? Matuod, sia ang “nagapamati sang pangamuyo.” (Sal. 65:2) Apang daw ano kita kasunson nga nagapakigsugilanon sa iya?

19. Ano ang makabulig kon nabudlayan kita sa pagpabutyag sang aton balatyagon sa aton Amay sa langit?

19 Ang pila ka alagad sang Dios nabudlayan sa pagpabutyag sang ila mga balatyagon. Pero amo sina ang gusto ni Jehova nga himuon naton sa pangamuyo. (Sal. 119:145; Pan. 3:41) Bisan pa nabudlayan kita sa pagpabutyag sang aton ginabatyag, may makabulig sa aton. Si Pablo nagsulat sa mga Cristiano sa Roma: “Ang palaligban amo nga wala kita makahibalo kon ano ang aton ipangamuyo subong dapat naton himuon, apang ang espiritu mismo nagapangabay para sa aton kon nagaugayong kita apang indi makabungat. Apang sia nga nagausisa sa mga tagipusuon nakahibalo kon ano ang katuyuan sang espiritu, bangod nagapangabay ini suno sa kabubut-on sang Dios para sa mga balaan.” (Roma 8:26, 27) Kon basahon naton ang mga tulun-an sang Biblia subong sang Job, Salmo, kag Hulubaton, makakuha kita sing ideya kon paano mapabutyag ang aton mga balatyagon kay Jehova.

20, 21. Ano nga lugpay ang ginsiling ni Pablo sa Filipos 4:6, 7?

20 Kon makaatubang kita sing mabudlay nga mga kahimtangan, pamatian naton ang laygay ni Pablo sa mga taga-Filipos: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay.” Paagi sining bukas nga komunikasyon sa aton pinakamaayo nga Abyan, pat-od gid nga maumpawan kita kag malugpayan, kay si Pablo nagsiling pa: “Ang paghidait sang Dios nga nagalabaw sa tanan nga panghunahuna magabantay sang inyo tagipusuon kag sang inyo ikasarang sa paghunahuna paagi kay Cristo Jesus.” (Fil. 4:6, 7) Kabay pa nga pabaloran naton pirme ang indi matupungan nga “paghidait sang Dios” nga nagabantay gid sa aton tagipusuon kag mga ikasarang sa panghunahuna.

Paano ginapabakod sang pangamuyo ang aton pagpakig-abyan sa Dios? (Tan-awa ang parapo 21)

21 Ang pangamuyo nagabulig sa aton nga mapabakod ang pagpakig-abyan kay Jehova. Gani, indi kita “mag-untat sa pagpangamuyo.” (1 Tes. 5:17) Kabay pa nga ini nga pagtuon magapabakod sang aton hamili nga kaangtanan sa Dios kag sa aton determinasyon nga sundon ang iya mga ginapatuman. Hatagan man naton sing tion nga pamalandungan ang mga pagpakamaayo sa aton ni Jehova, bangod sia gid ang aton Amay, aton Dios, kag aton Abyan.