Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ENERO 2014

“Magkari ang Imo Ginharian”—Pero San-o?

“Magkari ang Imo Ginharian”—Pero San-o?

Kon makita ninyo ini tanan nga butang, mahibaluan ninyo nga malapit na sia sa mga ganhaan.”MAT. 24:33.

1, 2. (a) Ano ang mahimo makaimpluwensia sa aton makita? (b) Ano ang aton mapat-od parte sa Ginharian sang Dios?

AYHAN matalupangdan mo nga sa masami indi pareho ang mga detalye nga madumduman sang mga nakasaksi sa isa ka hitabo. Mahimo nga indi man madumduman sang isa ang eksakto nga ginsiling sa iya sang doktor sa tapos sia maeksamin. Ukon mahimo nabudlayan ang isa nga pangitaon ang iya mga yabi ukon antipara, bisan pa ara lang ini sa iya tupad. Ini nga mga sitwasyon mahimo nga amo ang ginasiling sang mga researcher nga isa ka sahi sang pagkabulag—ang indi pagkatalupangod ukon ang pagkalipat sa isa ka butang bangod sa pagkonsentrar sa lain nga butang. Ginasiling nga bahin ini sang pagpanghikot sang aton utok.

2 Amo man sini nga pagkabulag ang naeksperiensiahan sang madamo sa karon parte sa mga hitabo sa kalibutan. Mahimo nagasiling sila nga daku na ang ginbag-o sang kalibutan sugod sang 1914, pero wala nila mahangpan ang matuod nga kahulugan sini nga mga hitabo. Paagi sa pagtuon sa Biblia, nahibaluan naton nga nagkari ang Ginharian sang Dios sang 1914 sang ginpapungko si Jesus subong Hari sa langit. Pero, nahibaluan naton nga indi lang amo sini ang sabat sa aton pangamuyo nga “Magkari ang imo ginharian. Matuman ang imo kabubut-on sa duta, subong sang sa langit.” (Mat. 6:10) Maathag nga nalakip sa sini ang kalaglagan sang presente nga malaut nga sistema. Kon matabo na ini, matuman na ang kabubut-on sang Dios sa duta subong sang sa langit.

3. Ano ang aton bentaha sa pagtuon sa Pulong sang Dios?

3 Bangod regular kita nga nagatuon sa Pulong sang Dios, nahangpan naton nga nagakatuman na karon ang mga tagna. Kabaliskaran gid ini sa mga tawo sa kabilugan! Masako gid sila sa ila kabuhi kag mga tulumuron amo nga wala nila matalupangdan ang maathag nga pamatuod nga naggahom na si Cristo sang 1914, kag sa indi madugay ipadapat na niya ang paghukom sang Dios. Apang binagbinaga ini nga pamangkot: Kon madugay ka na nga nagaalagad sa Dios, ang imo bala ginabatyag kag ginahunahuna parte sa kahulugan sang aton tion pareho gihapon sang una? Kon bag-o ka lang nga Saksi, sa ano ka nagakonsentrar? Ano man ang aton sabat sa sini, binagbinagon naton ang tatlo ka importante nga rason kon ngaa makasalig kita nga ang hinaplas sang Dios nga Hari magahimo pa sing mga tikang para matuman sing bug-os ang kabubut-on sang Dios sa duta.

ANG MGA MANUGKABAYO NAGPAKITA

4, 5. (a) Ano ang ginahimo ni Jesus sugod sang 1914? (Tan-awa ang piktyur sa umpisa sini nga artikulo.) (b) Ano ang ginalaragway sang tatlo ka manugkabayo, kag paano ini natuman?

4 Sang 1914, si Jesucristo—nga ginlaragway nga nagasakay sa puti nga kabayo—gintangdo subong hari sa langit. Naghulag sia gilayon para tapuson ang iya pagpangdaug sa malaut nga sistema ni Satanas. (Basaha ang Bugna 6:1, 2.) Base sa malaragwayon nga tagna sa Bugna kapitulo 6, may rason kita nga magpaabot nga sa tapos matukod ang Ginharian sang Dios, matabo ang malain nga mga kahimtangan sa dutainaway, kakulang sing pagkaon, balatian, kag iban pa nga ginabangdan sang kamatayon. Ini nga mga hitabo ginlaragway paagi sa tatlo ka manugkabayo nga nagasunod kay Jesucristo.Bug. 6:3-8.

5 Subong sang gintagna, ang paghidait ‘ginkuha sa duta,’ bisan pa sang mga promisa sang tawo parte sa internasyonal nga kooperasyon kag diplomasya. Ang Bug-os Kalibutan nga Inaway I makabig nga panugod sang dalagku nga mga inaway, subong sang ginapakita sa mga nagakatabo sa kalibutan sining karon lang. Kag bisan pa sang madamo nga pag-uswag sa ekonomiya kag siensia sugod sang 1914, ang kakulang sing pagkaon problema gihapon. Isa pa, indi bala nga ang tanan nga sahi sang balatian, kalamidad, kag iban pa nga ‘makamamatay nga mga salot’ padayon nga nagapatay sa minilyon kada tuig? Grabe gid kalapnag, kasunson, kag kalala ini nga mga hitabo. Nahangpan mo bala ang kahulugan sini?

Sang nagsakay ang mga manugkabayo, ang kahimtangan sang kalibutan nagalain kag nagalain pa (Tan-awa ang parapo 4 kag 5)

6. Sin-o ang nakahangop sang katumanan sang mga tagna sa Biblia, kag ano ang ila ginhimo bangod sini?

6 Madamo ang nahadlok sang natabo ang Bug-os Kalibutan nga Inaway I kag ang trangkaso Espanyola. Pero ang hinaplas nga mga Cristiano nagapaabot gid nga sa 1914 matapos ang Panag-on sang mga Gentil, ukon ang “gintalana nga mga tion sang mga pungsod.” (Luc. 21:24) Indi nila mapat-od kon ano gid ang matabo. Pero nahibaluan nila nga ang 1914 mangin tanda sang importante nga pagbag-o sa paggahom sang Dios. Sang nahangpan na nila ang katumanan sang tagna sa Biblia, maisugon nila nga ginsugid gilayon sa iban nga nagsugod na ang paggahom sang Dios. Ang ila mga panikasog nga ibantala ang Ginharian mapintas nga ginpamatukan. Natabo ina sa madamo nga pungsod kag katumanan man ini sang tagna. Mga dekada sang ulihi, ang mga kaaway sang Ginharian “nagapahito sing kalainan paagi sa palatukuran” ukon kasuguan. Ginpintasan nila ang aton mga kauturan, ginbilanggo, ginbitay, gintiro, ukon ginpugutan pa gani sing ulo.Sal. 94:20; Bug. 12:15.

7. Ngaa wala nahangpan sang kalabanan ang matuod nga kahulugan sang mga hitabo sa kalibutan?

7 Madamo gid ang pamatuod nga natukod na ang Ginharian sang Dios sa langit, apang ngaa indi magpati sa sini ang kalabanan? Ngaa indi nila mahangpan nga ang mga nagakatabo sa kalibutan katumanan sang mga tagna sa Biblia nga madugay na ginabantala sang katawhan sang Dios? Indi ayhan nga ang kalabanan sa ila nagakonsentrar lang sa kon ano ang ila makita? (2 Cor. 5:7) Ang kasakuon bala sa ila mga hilikuton nagabulag sa ila sa kon ano ang ginahimo sang Dios? (Mat. 24:37-39) Ang pila bala sa ila natublag sang mga ideya kag tulumuron sang kalibutan ni Satanas? (2 Cor. 4:4) Kinahanglan ang pagtuo kag espirituwal nga paghangop para makita kon ano ang nagakatabo sa langit. Malipayon gid kita kay wala kita nabulagan sa kon ano ang matuod nga nagakatabo!

ANG MALAUT MAGALAIN KAG MAGALAIN PA

8-10. (a) Paano natuman ang 2 Timoteo 3:1-5? (b) Ngaa makasiling kita nga ang kalautan magalain kag magalain pa?

8 Ang ikaduha nga rason kon ngaa nahibaluan naton nga malapit na magpasilabot ang Ginharian sang Dios sa mga nagakatabo sa kalibutan amo: Ang kalautan sa katilingban sang tawo magalain kag magalain pa. Mga isa ka siglo na nga nagakatuman ang gintagna sa 2 Timoteo 3:1-5. Ang mga pamatasan nga ginsambit sang tagna nagalapnag na gid sa bilog nga kalibutan. Nakita mo bala nga grabe na gid subong ang katumanan sini? Binagbinagon naton ang pila ka halimbawa nga nagapamatuod sa sini.Basaha ang 2 Timoteo 3:1, 13.

9 Binagbinaga ang kinatuhayan sa kon ano ang ginakabig nga malain sang mga dekada 1940 ukon 1950 sa mga nagakatabo karon sa mga ulubrahan, kalingawan, sports, kag mga estilo. Ang grabe nga kasingki kag imoralidad kinaandan na. Gusto ipakita sang mga tawo nga mas bayolente sila, mas imoral, ukon mas mapintas. Ang ginakabig nga malain nga programa sa telebisyon sang dekada 1950 ginakabig na subong nga maayo nga talan-awon sang mga pamilya. Kag madamo ang nakatalupangod nga ang mga homoseksuwal nagapangibabaw sa mga kalingawan kag estilo, nga nagapasanyog sang ila pamaagi sang pagkabuhi. Nagapasalamat gid kita nga nahibaluan naton ang pagtamod sang Dios sa sini!Basaha ang Judas 14, 15.

10 Mahimo man pamalandungan sang isa ka Cristiano kon ano nga mga buhat sang mga pamatan-on ang ginakabig nga pagrebelde sang dekada 1950 kon ipaanggid sa mga nagakatabo sa karon. Sadto, ang mga ginikanan nagakabalaka kay basi ang ila kabataan nagapanigarilyo, nagapahubog, ukon nagasaot sing binastos. Pero sa karon, kinaandan na ining malain nga mga balita: Gintiro sang 15 anyos nga estudyante ang iya mga klasmeyt, 2 ang patay kag 13 ang pilason. Mapintas nga ginpatay sang grupo sang hubog nga mga tin-edyer ang nuebe anyos nga babayi kag ginkastigo ang amay kag pakaisa sini. Sa isa ka pungsod sa Asia, mga pamatan-on ang responsable sa katunga sang mga krimen nga natabo sa sina nga pungsod sang nagligad nga napulo ka tuig. May makasiling bala nga wala pa naggrabe ang kahimtangan?

11. Ngaa madamo nga tawo ang wala makarealisar nga nagalala na ang mga sitwasyon?

11 Si apostol Pedro sibu nga nagsiling: “Sa katapusan nga mga adlaw ang mga mayubiton magaabot nga may pagyubit, nga ginapasundan ang ila mga kailigbon kag nagasiling: ‘Diin na ining ginsaad nga presensia niya? Sugod sang nagtulog sa kamatayon ang aton mga katigulangan, ang tanan nga butang nagapadayon nga amo gid gihapon kutob sa ginsuguran sang pagpanuga.’ ” (2 Ped. 3:3, 4) Ngaa amo sini ang reaksion sang pila ka tawo? Ginapakita sini nga kon kinaandan na sa mga tawo ang isa ka sitwasyon, wala na nila ini ginahatagan sing atension. Mahimo kita makibot kon hinali nga magbag-o ang batasan sang aton suod nga abyan, pero kon ang batasan kag moralidad sang mga tawo sa kabilugan amat-amat nga nagabag-o sa sulod sang malawig nga tion, mahimo nga indi naton ini matalupangdan. Pero ining amat-amat nga pagkadunot sang moralidad makatalagam gid.

12, 13. (a) Ngaa indi kita dapat maluyahan sing buot sa mga nagakatabo sa kalibutan? (b) Ano ang makabulig sa aton para mabatas ang mga kahimtangan nga “mabudlay atubangon”?

12 Si apostol Pablo nagpaandam sa aton nga “sa katapusan nga mga adlaw,” ang mga kahimtangan mangin “mabudlay atubangon.” (2 Tim. 3:1) Pero masarangan naton ini atubangon, gani indi naton ini pagpalagyuhan. Sa bulig ni Jehova, sang iya espiritu, kag sang kongregasyon, mabatuan naton ang bisan ano nga pagluya sing buot ukon kahadlok. Makapabilin kita nga matutom. “Ang gahom nga labaw sa kinaandan” iya sang Dios, indi aton.2 Cor. 4:7-10.

13 Matalupangdan naton nga ang tagna ni Pablo parte sa katapusan nga mga adlaw ginsugdan niya paagi sa pagsiling nga “hibalua ini.” Ini nga ekspresyon nagagarantiya nga matabo gid ang masunod niya nga ginsiling. Ang indi diosnon nga katilingban magalain kag magalain pa tubtob maghulag si Jehova para tapuson ini. Ang mga istoryador nagsulat nga nabungkag ang pila ka katilingban ukon pungsod bangod sa gulpi nga pagnubo sang moralidad sini. Apang, subong pa lang natabo sa kasaysayan nga ang pagnubo sang moralidad naglapnag sa bilog nga kalibutan. Madamo ang wala nagasapak sa kahulugan sini, pero ining talalupangdon nga hitabo sugod sang 1914 dapat magkumbinsi sa aton nga sa indi madugay tapuson sang Ginharian sang Dios ang tanan nga kalautan.

INI NGA KALIWATAN INDI MAGTALIWAN

14-16. Ano ang ikatlo nga rason sa pagpati nga malapit na “magkari” ang Ginharian sang Dios?

14 May isa pa ka rason sa pagsalig nga malapit na ang katapusan. Ini amo ang nagakatabo sa katawhan sang Dios. Halimbawa, antes natukod ang Ginharian sang Dios sa langit, ang isa ka grupo sang matutom nga mga hinaplas aktibo sa pag-alagad sa Dios. Sang wala natabo ang pila sang ila ginapaabot sang 1914, ano ang ila ginhimo? Kalabanan sa ila nagpabilin nga matutom bisan pa sang mga pagtilaw kag paghingabot kag nagpadayon sa pag-alagad kay Jehova. Pagligad sang mga tinuig, ang kalabanan nga hinaplas matutom nga nakatapos sang ila pag-alagad sa duta.

15 Sa iya detalyado nga tagna parte sa katapusan sang sistema sang mga butang, si Jesus nagsiling: “Ini nga kaliwatan indi gid magtaliwan tubtob mahanabo ini tanan nga butang.” (Basaha ang Mateo 24:33-35.) Nahangpan naton nga sang ginsambit ni Jesus “ini nga kaliwatan,” ginapatuhuyan niya ang duha ka grupo sang hinaplas nga mga Cristiano. Ang una nga grupo nagkabuhi sang 1914, kag nakahangop dayon sang tanda sang presensia ni Cristo sina nga tuig. Ang katapo sini nga grupo indi lang nga nagkabuhi sang 1914, kundi ginhaplasan sila sang espiritu subong mga anak sang Dios sina nga tuig ukon antes sina nga tuig.Roma 8:14-17.

16 Ang ikaduha nga grupo nga nalakip sa ‘sini nga kaliwatan’ amo ang hinaplas nga mga kontemporaryo sang una nga grupo. Wala lamang sila nagkabuhi sa tion nga buhi pa ang una nga grupo, kundi ginhaplasan sila sang balaan nga espiritu sa tion nga yari pa sa duta ang pila ka katapo sang una nga grupo. Gani indi tanan nga hinaplas karon nalakip sa ‘sini nga kaliwatan’ nga ginsambit ni Jesus. Sa karon, tigulang na ang mga katapo sang ikaduha nga grupo. Pero ang ginsiling ni Jesus sa Mateo 24:34 nagahatag sa aton sing pasalig nga ang pila ‘sini nga kaliwatan indi gid magtaliwan’ antes magsugod ang dakung kapipit-an. Dapat ini magpabaskog sang aton kombiksion nga diutay na lang ang nabilin nga tion antes maghulag ang Hari sang Ginharian sang Dios sa paglaglag sang mga malauton kag sa paggiya sa aton pasulod sa matarong nga bag-o nga kalibutan.2 Ped. 3:13.

SA INDI MADUGAY TAPUSON SANG CRISTO ANG IYA PAGPANGDAUG

17. Ano ang aton mahinakop sa tatlo ka pamatuod nga ginbinagbinag naton?

17 Ano ang aton mahinakop sa tatlo ka pamatuod nga ginbinagbinag naton? Si Jesus nagpaandam nga indi gid naton mahibaluan ang eksakto nga adlaw ukon oras. (Mat. 24:36; 25:13) Pero suno kay Pablo, mahibaluan naton “ang panag-on.” (Basaha ang Roma 13:11.) Nagakabuhi na kita sa sina nga panag-on, ang katapusan nga mga adlaw. Kon hatagan naton sing bug-os nga atension ang mga tagna sa Biblia kag ang mga ginahimo ni Jehova nga Dios kag ni Jesucristo, makita gid naton ang makapakumbinsi nga pamatuod nga malapit na gid kita sa katapusan sini nga sistema sang mga butang.

18. Ano ang matabo sa mga nagabalewala sa Ginharian sang Dios?

18 Sa indi madugay, ang mga nagabalewala sa daku nga awtoridad nga ginhatag kay Jesucristo, ang madaugon nga nagasakay sa puti nga kabayo, mapilitan sa pagbaton nga sala sila. Indi na sila makapalagyo sa ila kalaglagan. Sina nga tion, madamo ang magasinggit sa kahadlok: “Sin-o ang sarang makatindog?” (Bug. 6:15-17) Ginasabat ini sang masunod nga kapitulo sang Bugna. Ang mga hinaplas kag ang mga may paglaum sa duta amo ang “makatindog” sa sina nga adlaw nga may kahamuot sang Dios. Dayon ang “isa ka dakung kadam-an” sang iban nga mga karnero makalampuwas sa dakung kapipit-an.Bug. 7:9, 13-15.

19. Bangod kumbinsido ka nga malapit na ang katapusan, ano ang imo ginakalangkagan?

19 Paagi sa pagkonsentrar sa nagakatuman nga mga tagna sa Biblia sa sini nga mga tion, indi kita matublag sang kagahod sang kalibutan ni Satanas, ukon mabulagan sa matuod nga kahulugan sang mga hitabo sa kalibutan. Sa indi madugay, tapuson sang Cristo ang iya pagpangdaug sa sining indi diosnon nga katilingban paagi sa katapusan nga matarong nga pagpakig-away. (Bug. 19:11, 19-21) Hunahunaa kon daw ano kita ka malipayon sa tion nga matigayon na naton ang mga saad sang Biblia!Bug. 20:1-3, 6; 21:3, 4.