Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ENERO 2014

Maghimo sing Maalamon nga mga Desisyon Subong Pamatan-on

Maghimo sing Maalamon nga mga Desisyon Subong Pamatan-on

“Mga pamatan-on nga lalaki kag mga ulay, . . . magdayaw sila sang ngalan sang GINOO.”SAL. 148:12, 13.

1. Ano ang dalayawon nga mga kahigayunan nga natigayon sang madamo nga Cristiano nga pamatan-on?

NAGAKABUHI kita sa importante gid nga mga tion. Subong pa lang natabo nga minilyon gikan sa tanan nga pungsod ang nagabaton sang matuod nga pagsimba. (Bug. 7:9, 10) Madamo nga pamatan-on ang malipayon sa pagbulig sa iban nga mahangpan ang nagaluwas kabuhi nga kamatuoran sa Biblia. (Bug. 22:17) Ang pila sa ila nagadumala sing mga pagtuon sa Biblia, nga nagabulig sa mga tawo nga matigayon ang mas maayo nga kabuhi. Ang iban makugi nga nagabantala sa dumuluong sing lenguahe nga mga teritoryo. (Sal. 110:3; Isa. 52:7) Paano mo matigayon ang dugang nga kalipay sa pagpakigbahin sa ginahimo sang katawhan ni Jehova?

2. Paano ang halimbawa ni Timoteo nagapakita nga handa si Jehova sa paghatag sing mga responsibilidad sa mga pamatan-on? (Tan-awa ang piktyur sa umpisa sini nga artikulo.)

2 Subong pamatan-on, makahimo ka sing mga desisyon nga mahimo magbukas sing makalilipay nga mga kahigayunan sa pag-­ala­gad sa Dios. Halimbawa, si Timoteo sang Listra maathag nga naghimo sing maalamon nga mga desisyon, amo nga nangin misyonero na sia sa edad nga mga beintehon. (Binu. 16:1-3) Mahimo nga pagligad lamang sang pila ka bulan, sa tapos magbiya si apostol Pablo sa bag-o naporma nga kongregasyon sa Tesalonica bangod sang mapintas nga pagpamatok, ginhatagan niya ang pamatan-on nga si Timoteo sing asaynment nga magbalik sa Tesalonica para palig-­unon ang mga ­kauturan. (Binu. 17:5-15; 1 Tes. 3:1, 2, 6) Mahunahuna mo bala ang ginbatyag ni Timoteo sang nabaton niya ini nga asaynment?

ANG IMO PINAKAIMPORTANTE NGA DESISYON

3. Ano ang pinakaimportante nga desisyon nga imo mahimo, kag san-o mo ini kinahanglan himuon?

3 Ang pagkapamatan-on isa ka tion sa paghimo sing importante nga mga desisyon. Pero may isa ka desisyon nga importante sa tanan­—ang imo desisyon nga mag-­ala­gad kay Jehova. San-o ang pinakamaayo nga tion sa paghimo sini? Si Jehova nagsiling: “Dumduma . . . ang imo Manunuga sa mga adlaw sang imo pagkapamatan-on.” (Man. 12:1) ‘Madumdom’ lamang naton si Jehova kon alagaron naton sia sing bug-os. (Deut. 10:12) Ang pag-­ala­gad sa Dios sing bug-os tagipusuon amo ang pinakaimportante nga desisyon nga imo mahimo. May epekto ini sa imo palaabuton.Sal. 71:5.

4. Ano pa ang iban nga importante nga desisyon nga makaapektar sa imo pag-alagad sa Dios?

4 Matuod, indi lamang ang imo desisyon nga alagaron si Jehova ang makaapektar sa imo palaabuton. Halimbawa, mahimo nagahunahuna ka kon bala maminyo ka, kon sin-o ang imo pamanahon ukon pangasaw-on, kag kon paano makakita sing palangabuhian. Importante ini nga mga desisyon, pero maalamon nga magdesisyon ka anay kon bala gusto mo alagaron si Jehova sing bug-os. (Deut. 30:19, 20) Ngaa? Kay man, ang imo desisyon parte sa pagminyo kag pagtrabaho makaapektar sa imo pag-­ala­gad sa Dios. (Ipaanggid ang Lucas 14:16-20.) Sa kabaliskaran, ang imo handum nga mag-­ala­gad sa Dios may impluwensia man sa imo mga desisyon parte sa pagminyo kag pagtrabaho. Gani magdesisyon anay sa pinakaimportante nga mga butang.Fil. 1:10.

ANO ANG IMO HIMUON SAMTANG PAMATAN-ON?

5, 6. Isaysay kon paano ang paghimo sing husto nga mga desisyon nagaresulta sa maayo nga mga eksperiensia sa ulihi. (Tan-awa ang artikulo nga “Ang Akon Desisyon sang Bata Pa Ako” sa sini nga isyu.)

5 Kon nakadesisyon ka na nga alagaron ang Dios, mahimo mo pamalandungan kon ano ang gusto niya nga himuon mo, kag dayon magdesisyon ka kon paano mo sia alagaron. Ang isa ka brother nga Hapon nagsulat: “Sang 14 anyos ako, nakaupod ko sa pagbantala ang isa ka gulang sa kongregasyon nga nakatalupangod nga wala ako sing gana sa ministeryo. Mainayuhon sia nga nagsiling sa akon: ‘Pauli ka lang anay Yui­chiro. Pungkui kag hunahunaa sing maayo kon ano ang nahimo ni Jehova para sa imo.’ Gintuman ko ang iya ginsiling. Ang matuod, pila ka adlaw ako nga nagpamensar kag nagpangamuyo. Amat-­amat nga nagbag-o ang akon panimuot. Wala madugay, nalipay na ako sa pag-­ala­gad kay Jehova. Nanamian ako magbasa parte sa mga misyonero kag nagpamensar nga alagaron pa sing bug-os ang Dios.

6 “Nagsugod ako sa paghimo sing mga desisyon para sa ulihi maalagad ko si Jehova sa iban nga pungsod,” padayon ni Yui­chiro. “Halimbawa, nagkuha ako sing kurso sa Ingles. Sang nag-­untat ako eskwela, nagdesisyon ako nga magtudlo sing Ingles sing ­part-­time para makapayunir. Sang 20 anyos ako, nagtuon na ako sing Mongolian kag nakakadto sa isa ka Mongolian nga grupo sang mga manugbantala. Duha ka tuig sang ulihi, sang 2007, nagkadto ako sa Mongolia. Sang nagbantala ako upod sa pila ka payunir kag nakita nga madamo ang interesado sa kamatuoran, napahulag ako nga magsaylo didto kag magbulig. Nagbalik ako sa Japan para maghimo sing mga plano. Kag sugod sang Abril 2008, nagapayunir na ako sa Mongolia. Indi mahapos ang kabuhi diri. Pero nagapamati ang mga tawo sa maayong balita, kag mabuligan ko sila nga mangin suod kay Jehova. Nagapati ako nga ang akon desisyon amo ang pinakamaayo nga pagkabuhi.”

7. Ano nga mga desisyon ang dapat naton himuon, kag ano ang halimbawa ni Moises para sa aton?

7 Ang kada isa dapat magdesisyon kon paano niya gamiton ang iya kabuhi subong Saksi ni Jehova. (Jos. 24:15) Indi kami makasiling nga magminyo ka, kon sin-o ang imo pangasaw-on ukon pamanahon, ukon kon ano ang imo pilion nga trabaho. Pilion mo bala ang trabaho nga nagakinahanglan lamang sing diutay nga paghanas? Ang pila sa inyo nagaistar sa imol nga mga lugar, ang iban naman sa mainuswagon nga mga siudad. Daku gid ang kinatuhayan sang inyo personalidad, abilidad, eksperiensia, nanamian, kag pagtuo. Mahimo nga magkatuhay kamo pareho sang pagkatuhay sang Hebreo nga mga pamatan-on sa Egipto sadto kay Moises. Si Moises may daku nga oportunidad sa palasyo, samtang ang iban nga Hebreo mga ulipon. (Ex. 1:13, 14; Binu. 7:21, 22) Pareho sa imo, nagkabuhi sila sa importante nga mga tion. (Ex. 19:4-6) Ang kada isa sa ila kinahanglan magdesisyon kon ano ang ila himuon sa ila kabuhi. Si Moises naghimo sing husto nga desisyon.Basa­ha ang Hebreo 11:24-27.

8. Ano ang makabulig sa mga pamatan-on nga nagabinagbinag kon ano ang ila himuon sa ila kabuhi?

8 Buligan ka ni Jehova nga maghimo sing maalamon nga mga desisyon subong pamatan-on. Nagaaman sia sing laygay paagi sa mga prinsipio nga mahimo maaplikar sa imo kahimtangan. (Sal. 32:8) Isa pa, ang imo tumuluo nga mga ginikanan kag ang mga gulang makabulig sa imo kon paano maaplikar ini nga mga prinsipio. (Hulu. 1:8, 9) Binagbinagon naton ang tatlo ka panguna nga prinsipio sa Biblia nga makabulig sa imo sa paghimo sing maalamon nga mga desisyon agod mangin maayo ang imo palaabuton.

TATLO KA PRINSIPIO SA BIBLIA NGA MAGAGIYA SA IMO

9. (a) Paano kita ginapadunggan ni Jehova paagi sa paghatag sa aton sing kahilwayan sa pagdesisyon? (b) Ano nga mga kahigayunan ang aton matigayon sa ‘pagpangita anay sang Ginharian’?

9 Pangitaa anay ang Ginharian sang Dios kag ang iya pagkamatarong. (Basaha ang Mateo 6:19-21, 24-26, 31-34.) Ginapadunggan kita ni Jehova paagi sa paghatag sa aton sing kahilwayan sa pagdesisyon. Wala sia nagasiling kon daw ano kadaku nga tion sang imo pagkapamatan-on ang dapat mo gamiton sa pagbantala sing Ginharian. Pero ginhatagan kita ni Jesus sing mapuslanon nga prinsipio nga pangitaon anay ang Ginharian. Kon iaplikar mo ini, may mga kahigayunan ka nga mapabutyag ang imo gugma sa Dios, kabalaka sa imo mga isigkatawo, kag apresasyon sa paglaum nga kabuhi nga dayon. Samtang ginabinagbinag mo ang pagminyo kag pagtrabaho, hunahunaa kon bala ang imo mga desisyon magaresulta sa imo pagkabalaka sa materyal nga mga kinahanglanon ukon sa imo kakugi para sa Ginharian sang Dios kag sa iya pagkamatarong.

10. Ngaa malipayon si Jesus, kag ano nga mga desisyon ang magahatag sa imo sing kalipay?

10 Magkalipay sa pag-alagad sa iban. (Basaha ang Binuhatan 20:20, 21, 24, 35.) Mainayuhon nga gintudluan kita ni Jesus sining panguna nga prinsipio sa kabuhi. Malipayon gid sia kay ginhimo niya ang kabubut-on sang iya Amay imbes nga ang iya kabubut-on. Nalipay si Jesus nga makita nga ginabaton sang mga mapainubuson ang maayong balita. (Luc. 10:21; Juan 4:34) Ayhan naeksperiensiahan mo na ang kalipay sa pagbulig sa iban. Kon ibase mo ang imo importante nga mga desisyon sa mga prinsipio nga gintudlo ni Jesus, sigurado nga mangin malipayon ka, kag malipay man si Jehova.Hulu. 27:11.

11. Ngaa nadula ang kalipay ni Baruc, kag ano ang laygay ni Jehova sa iya?

11 Ang aton pinakadaku nga kalipay nagahalin sa pag-­ala­gad kay Jehova. (Hulu. 16:20) Maathag nga nalimtan ini sang sekretaryo ni Jeremias nga si Baruc. Nag-­abot ang tion nga indi na sia malipayon sa pag-­ala­gad kay Jehova. Ginsilingan sia ni Jehova: “Nagapangita ka bala sing mga butang nga dalagku tungud sa imo kaugalingon? Dili sila pagpangitaa; kay, yari karon, magadala ako sing malaut sa tanan nga unud, . . . apang ang imo kabuhi ihatag ko sa imo nga inagaw sa tanan nga duug diin ka nagakadto.” (Jer. 45:3, 5) Ano sa banta mo? Ano ang makapahalipay kay Baruc—ang pagpangita bala sing dalagku nga mga butang, ukon ang iya kaluwasan sa kalaglagan sang Jerusalem subong matutom nga alagad sang Dios?Sant. 1:12.

12. Ano nga desisyon ang ginhimo ni Ramiro nga naghatag sa iya sing kalipay?

 12 Ang isa ka utod nga nakabatyag sing ­kalipay sa pag-­ala­gad sa iban amo si ­Ramiro. Sia nagsiling: “Imol ang amon pamilya kag nagaistar kami sa isa ka lugar sa ­Andes Moun­tains. Gani sang gintanyagan ako sang akon ­magulang nga lalaki nga paeskwelahon sa unibersidad, daku gid ini nga oportunidad. Pero bag-o lang ako nabawtismuhan subong Saksi ni Jehova, kag nakabaton ako sing isa pa ka tanyag—gin-­agda ako sang isa ka payunir nga mag-­upod sa iya sa pagbantala sa isa ka gamay nga banwa. Nag-­upod ako sa iya, nagtuon mang­gunting, kag nagbukas sing barberya para masuportahan ang akon kaugalingon. Samtang nagatanyag kami nga tudluan ang mga tawo sa Kasulatan, madamo ang nagaapresyar. Sang ulihi, nakig-­upod ako sa isa ka tumandok sing lenguahe nga kongregasyon nga bag-o lang naporma. Napulo ka tuig na ako nga nagaalagad subong bug-os tion nga ministro. Wala na sing propesyon nga makahatag sa akon sing kalipay sangsa pagbulig sa mga tawo nga makatuon sing maayong balita sa ila lenguahe.”

Nangin malipayon si Ramiro sa pag-alagad kay Jehova sugod sa iya pagkapamatan-on (Tan-awa ang parapo 12)

13. Ngaa ang pagkapamatan-on maayo gid nga tion nga alagaron si Jehova sing bug-os?

13 Magkalipay sa pag-­ala­gad kay Jehova samtang pamatan-on. (Basaha ang Manugwali 12:1.) Indi maghunahuna nga mangita ka anay sing maayo nga trabaho para sa ulihi makaalagad ka kay Jehova. Maayo gid nga sugdan mo na ang pag-­ala­gad kay Jehova sing bug-os samtang pamatan-on. Gamay lang ang responsibilidad sa pamilya sang madamo nga pamatan-on, kag mapagros sila kag mabaskog para mahimo ang mabug-at nga mga asaynment. Ano ang gusto mo himuon para kay Jehova subong pamatan-on? Ayhan may tulumuron ka nga magpayunir. Mahimo gusto mo mag-­ala­gad sa dumuluong sing lenguahe nga teritoryo. Ukon may nakita ka nga mga paagi para makaalagad pa gid sing bug-os sa inyo kongregasyon. Ano man ang imo tulumuron sa pag-­ala­gad sa Dios, kinahanglan nga may palangabuhian ka. Daw ano kadaku nga paghanas ang imo kinahanglan? Ano ang imo pilion?

 PAGHIMO SING MAALAMON NGA MGA DESISYON BASE SA MGA PRINSIPIO SA BIBLIA

14. Sa diin dapat maghalong ang isa kon nagaplano parte sa palaabuton?

14 Ang tatlo ka prinsipio sa Biblia nga aton ginbinagbinag makabulig sa imo nga mausisa ang imo pilion nga trabaho. Pat-od nga nakahibalo ang mga manunudlo sa inyo eskwelahan kon ano ang maayo nga trabaho sa inyo lugar. Ukon may ahensia sang gobierno nga makasugid sa imo kon ano nga trabaho ang kinahanglan sa inyo lugar ukon sa lugar nga gusto mo alagaran. Ang ila impormasyon mahimo ­makabulig—pero dapat ka maghalong. Ang mga tawo nga wala nagahigugma kay Jehova mahimo mag-­implu­wen­sia sa imo nga higugmaon ang kalibutan. (1 Juan 2:15-17) Kon tan-­awon mo ang mga tanyag sang kalibutan, madali ka malimbungan sang imo tagipusuon.Basaha ang Hulubaton 14:15; Jer. 17:9.

15, 16. Sin-o ang pinakamaayo nga makabulig sa imo sa pagpili sing trabaho?

15 Kon nahibaluan mo na ang imo pililian nga trabaho, kinahanglan mo ang maayo nga laygay. (Hulu. 1:5) Sin-o ang makabulig sa imo para mausisa ini base sa mga prinsipio sa Biblia? Mamati sa mga tawo nga nagahigugma kay Jehova, nagahigugma sa imo, nakakilala sa imo, kag nakahibalo sing maayo parte sa imo mga kahimtangan. Mabuligan ka nila nga mabinagbinag mo ang imo mga ikasarang kag mga motibo. Mahimo makabulig sa imo ang ila isiling para mahunahuna mo liwat ang imo mga tulumuron. Daku gid nga pagpakamaayo kon ang imo mga ginikanan nagahigugma kay Jehova! Mahimo ka man magiyahan sang mga gulang kay kalipikado sila sa espirituwal. Isa pa, makig-­istor­ya sa mga payunir kag mga nagalakbay nga manugtatap. Ngaa nagdesisyon sila nga mag-alagad sing bug-os tion? Paano sila nagsugod sa pagpayunir, kag paano nila nasuportahan ang ila kaugalingon? Ano nga kalipay ang ila nabaton sa ila pagministeryo?Hulu. 15:22.

16 Ang mga nakakilala gid sa imo mahimo makahatag sing maayo nga laygay. Halimbawa, gusto mo mag-­untat sa hayskul kag ­magpayunir bangod lang indi mo gusto mabudlayan sa eskwelahan. Ang isa nga nagahigugma sa imo mahimo makahantop sang imo mga motibo kag makabulig sa imo nga ma­realisar nga ang pag-­eskwe­la nagatudlo sa imo nga indi dayon mangampo, nga isa ka importante nga kinaiya kon gusto mo mag-­ala­gad kay Jehova sing bug-os.Sal. 141:5; Hulu. 6:6-10.

17. Ano nga mga desisyon ang dapat naton likawan?

17 Ang tanan nga alagad ni Jehova makaatubang sing espirituwal nga mga katalagmanmga impluwensia nga mahimo magpahilayo sa iya kay Jehova. (1 Cor. 15:33; Col. 2:8) Pero ang pila ka trabaho makatalagam gid sa espirituwal. Ang pagtuo bala sang iban sa inyo lugar “nahalitan kaangay sang naguba nga sakayan” bangod sa ginpili nila nga ­trabaho? (1 Tim. 1:19) Maalamon gid nga likawan ang paghimo sing mga desisyon nga magahalit sa imo kaangtanan sa Dios.Hulu. 22:3.

MAGKALIPAY SUBONG PAMATAN-ON NGA CRISTIANO

18, 19. Kon ang isa wala pa sing handum nga mag-­ala­gad sa Dios, ano ang dapat niya himuon?

18 Kon napalambo mo sa imo tagipusuon ang handum nga alagaron si Jehova, ­ka­li­ti ang mga kahigayunan sa pag-­ala­gad sa iya samtang pamatan-on. Maghimo sing mga desisyon nga makahatag sa imo sing kalipay sa pag-­ala­gad kay Jehova sa sining importante nga mga tion.Sal. 148:12, 13.

19 Pero, ano ang dapat mo himuon kon wala ka pa sing handum nga mag-­ala­gad kay Jehova? Indi mangampo sa pagtinguha nga pabakuron ang imo pagtuo. Sa tapos malaragway ni apostol Pablo ang iya pagtinguha sa kabuhi nga ginapakamaayo sang Dios, sia nagsulat: “Kon kamo may tuhay nga panghunahuna sa bisan ano nga butang, ipahayag sang Dios ang nasambit nga panimuot sa inyo. Apang, sa kasangkaron nga nakahimo kita sang pag-­uswag, padayon kita nga maglakat sing mahim-ong sa sini man nga rutina.” (Fil. 3:15, 16) Padayon nga binagbinaga ang gugma ni Jehova kag ang iya maalamon nga laygay. Sia lamang ang may pinakamaayo nga laygay nga makabulig sa imo sa paghimo sing maalamon nga mga desisyon subong pamatan-on.