Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) DISIEMBRE 2013

Magasakripisyo Ka Bala Para sa Ginharian?

Magasakripisyo Ka Bala Para sa Ginharian?

“Ginahigugma sang Dios ang nagahatag sing malipayon.”—2 COR. 9:7.

1. Ano nga mga sakripisyo ang ginahimo sang madamo, kag ngaa?

ANG mga tawo handa magsakripisyo para sa mga butang nga importante sa ila. Ginahatag sang mga ginikanan ang ila tion, kuarta, kag kusog para sa kaayuhan sang ila kabataan. Samtang nagahampang kag nagalingawlingaw ang ila mga katubotubo, ang kabataan nga mga atleta nga nagahandum nga irepresentar ang ila pungsod sa Olimpiada nagahinguyang sing pila ka oras kada adlaw sa paghanas kag pag-ensayo sing maayo. Si Jesus naghimo man sing mga sakripisyo para sa mga butang nga importante sa iya. Wala sia nagpangita sing kahamungayaan, kag wala sia sing bata. Sa baylo, nagkonsentrar sia sa pagpauswag sang mga intereses sang Ginharian. (Mat. 4:17; Luc. 9:58) Daku man ang ginbiyaan sang iya mga sumulunod para suportahan ang Ginharian sang Dios. Ang pinakaimportante sa ila amo ang pag-uswag sina nga Ginharian, kag naghimo sila sing mga sakripisyo para makapakigbahin sing bug-os sa pagsuporta sa sini. (Mat. 4:18-22; 19:27) Gani mahimo naton pamangkuton ang aton kaugalingon, ‘Ano ang importante sa akon kabuhi?’

2. (a) Ano nga mga sakripisyo ang kinahanglan himuon sang tanan nga matuod nga Cristiano? (b) Ano ang dugang nga mga sakripisyo nga ginahimo sang iban?

2 Ang pila ka sakripisyo kinahanglan gid himuon sang tanan nga matuod nga Cristiano. Importante ini para matigayon kag mahuptan ang maayo nga kaangtanan kay Jehova. Nalakip sa sini nga mga sakripisyo ang paghatag sing tion kag kusog sa pagpangamuyo, pagbasa sing Biblia, pangpamilya nga pagsimba, pagtambong sa mga miting, kag pagministeryo. * (Jos. 1:8; Mat. 28:19, 20; Heb. 10:24, 25) Bangod sa aton mga panikasog kag sa pagpakamaayo ni Jehova, madasig ang pag-uswag sang pagbantala nga hilikuton, kag madamo pa ang nagadugok sa “bukid sang balay sang GINOO.” (Isa. 2:2) Para masuportahan  ang mga hilikuton sang Ginharian, madamo ang nagahimo sing mga sakripisyo para mag-alagad sa Bethel, magbulig sa pagtukod sing mga Kingdom Hall kag Assembly Hall, mag-organisar sing mga kombension, ukon maghatag sing bulig sa tapos sang mga kalamidad. Ining dugang nga hilikuton wala ginapatuman para matigayon ang kabuhi, pero importante ini para masuportahan ang mga intereses sang Ginharian.

3. (a) Paano kita makabenepisyo kon nagahimo sing mga sakripisyo para sa Ginharian? (b) Ano nga mga pamangkot ang dapat naton binagbinagon?

3 Ang aktibo nga pagsuporta sa Ginharian labi na gid nga kinahanglan subong. Makalilipay gid makita nga madamo ang handa maghimo sing mga sakripisyo para kay Jehova. (Basaha ang Salmo 54:6.) Ini nga panimuot nagahatag sa aton sing daku nga kalipay samtang ginahulat naton ang pag-abot sang Ginharian sang Dios. (Deut. 16:15; Binu. 20:35) Pero dapat usisaon sing maayo sang kada isa sa aton ang aton kaugalingon. May mga paagi pa bala nga makahimo kita sing mga sakripisyo para sa Ginharian? Paano naton ginagamit ang aton tion, kuarta, kusog, kag mga ikasarang? Ano ang dapat naton dumdumon kon nagahimo kita sing mga sakripisyo? Usisaon naton ang isa ka halimbawa nga puede naton ilugon kon nagahimo sining kinabubut-on nga mga sakripisyo. Sa amo, madugangan ang aton kalipay.

MGA HALAD SA ISRAEL SANG UNA

4. Paano makabenepisyo ang mga Israelinhon sa ila paghalad?

4 Ang paghalad isa ka sakripisyo nga kinahanglan himuon sang katawhan sang Israel sang una para mapatawad ang ila mga sala. Ang mga halad importante gid para matigayon sang katawhan ang kahamuot ni Jehova. Ang pila sa sini ginapatuman kag ang iban naman boluntaryo. (Lev. 23:37, 38) Ang bilog nga halad nga sinunog mahimo mangin halad nga kinabubut-on, ukon mga dulot, para kay Jehova. Ang isa ka dalayawon nga halimbawa sang mga dulot makita sa tion nga gin-inagurahan ang templo sang panahon ni Solomon.—2 Cron. 7:4-6.

5. Ano ang kahimusan nga ginhimo ni Jehova para sa mga imol?

5 Nahangpan ni Jehova nga indi tanan makahatag sing pareho nga halad, gani ginpatuman niya sa tagsa ka indibiduwal ang suno lamang sa ila masarangan. Sa kasuguan ni Jehova, ang dugo sang sapat kinahanglan patuluon, nga mangin “landong sang maayong mga butang nga magaabot” paagi sa iya Anak, si Jesus. (Heb. 10:1-4) Pero si Jehova indi tuman ka estrikto parte sa ginapatuman sina nga kasuguan. Halimbawa, mahimo batunon  sang Dios ang halad nga tukmo kon indi masarangan sang isa ang halad nga gikan sa panong ukon kabakahan. Gani, ang mga imol makahalad man sing malipayon kay Jehova. (Lev. 1:3, 10, 14; 5:7) Bisan pa lainlain ang ginahalad nga sapat, may duha ka butang nga ginapatuman sa tagsa ka tawo nga nagahimo sing boluntaryo nga paghalad.

6. Ano ang ginapatuman sa kada isa kon nagahalad, kag ngaa importante gid nga tumanon ini?

6 Una, kinahanglan ihatag sang isa ang iya pinakamaayo. Ginsilingan ni Jehova ang pungsod nga ang tanan nga dulot dapat nga mapagros agod “manginkalahamut-an.” (Lev. 22:18-20) Kon ang sapat may depekto, indi ini kalahamut-an nga halad para kay Jehova. Ikaduha, ang isa nga nagahatag sing halad kinahanglan mangin matinlo kag wala sing kasawayan. Kon indi sia matinlo, kinahanglan niya himuon ang halad tungod sa sala ukon ang halad sa paglapas agod mapasag-uli ang iya kaangtanan kay Jehova antes sia maghimo sing boluntaryo nga paghalad. (Lev. 5:5, 6, 15) Serioso ini nga butang. Nagsugo si Jehova nga kon mag-ambit ang isa nga mahigko sang halad sa paghidait, nga nagalakip sang boluntaryo nga mga paghalad, dapat sia patyon gikan sa katawhan sang Dios. (Lev. 7:20, 21) Pero kon ang isa nga nagahalad may maayo nga kaangtanan kay Jehova kag ang iya halad wala sing depekto, mahimo sia magkalipay.—Basaha ang 1 Cronica 29:9.

MGA HALAD SUBONG

7, 8. (a) Ano nga kalipay ang nabatyagan sang madamo bangod sang pagsakripisyo para sa Ginharian? (b) Ano ang aton mga ginapanag-iyahan nga magamit naton para kay Jehova?

7 Madamo man subong ang handa magpangabudlay sa pag-alagad kay Jehova, kag nahamuot sia sa sini. Makapaladya gid ang pagpanghikot para sa aton mga kauturan. Ang isa ka utod nga nagapakigbahin sa pagtukod sing mga Kingdom Hall kag nagabulig sa mga naapektuhan sang kalamidad nagsiling nga daw indi niya mapaathag ang iya kalipay sa sini nga pag-alagad. Nagsiling sia, “Bangod sa kalipay kag apresasyon sang mga kauturan sa tapos mahuman ang ila bag-o nga Kingdom Hall ukon kon makabaton sila sing bulig pagkatapos sang kalamidad, nagabatyag kami nga may pulos ang tanan namon nga ginahimo kag mga panikasog.”

Madamo nga dulot ang ginahalad sing kinabubut-on, amo man ang mga sakripisyo naton subong (Tan-awa ang parapo 7-13)

8 Ang organisasyon ni Jehova karon pirme nagapangita sing mga kahigayunan para masuportahan ang Ginharian. Sang 1904, si Brother C. T. Russell nagsulat: “Tamdon sang kada isa ang ila kaugalingon subong gintangdo sang Ginuo nga tulugyanan sang iya tion, posisyon, kuarta, kag iban pa, kag dapat tinguhaan sang kada isa nga gamiton sing  bug-os ini nga mga talento, sa kahimayaan sang Agalon.” Bisan pa daku ang aton ginasakripisyo para kay Jehova, nagahatag ini sing madamo nga pagpakamaayo. (2 Sam. 24:21-24) Magamit bala naton sa pinakamaayo nga paagi ang aton mga ginapanag-iyahan?

Mga Bethelite sa Australia

9. May kaangtanan sa paggamit sang aton tion, ano nga prinsipio gikan sa sugo ni Jesus sa Lucas 10:2-4 ang maaplikar naton?

9 Aton tion. Daku nga tion kag panikasog ang kinahanglan sa pagbadbad kag pag-imprinta sang aton mga literatura, pagpatindog sang mga duog sang pagsimba, pag-organisar sing mga kombension, pagbulig sa tion sang kalamidad, kag sa pagpakigbahin sa iban pa nga importante nga mga hilikuton. May ara lamang kita 24 oras sa isa ka adlaw. Naghatag si Jesus sing prinsipio nga makabulig sa aton. Sang ginpadala niya ang iya mga disipulo sa latagon, ginsilingan niya sila nga indi “magdulog sa pagtamyaw kay bisan sin-o sa dalan.” (Luc. 10:2-4) Ngaa amo sini ang sugo ni Jesus? Ang isa ka iskolar sa Biblia nagsiling: “Ang mga panamyaw sang mga taga-Sidlangan indi lamang pagduko sang ulo subong sang ginahimo naton, ukon pagdaho sang kamot, kundi madamo nga paghaksanay, kag pagduko tubtob sa hawak, kag paghapa pa gani sa duta. Ini tanan nagakinahanglan sing madamo nga tion.” Wala ginapalig-on ni Jesus ang iya mga sumulunod nga indi mangin matinahuron. Sa baylo, ginabuligan niya sila nga mahangpan nga limitado lamang ang ila tion kag ang kalabanan sini dapat nila gamiton sa paghimo sing mas importante nga mga butang. (Efe. 5:16) Maaplikar bala naton ini nga prinsipio agod madugangan ang aton tion sa mga hilikuton para sa Ginharian?

Mga manugbantala sa isa ka Kingdom Hall sa Kenya, Aprika

10, 11. (a) Sa ano nga mga paagi ginagamit ang aton mga donasyon para sa bug-os kalibutan nga hilikuton? (b) Ano nga prinsipio sa 1 Corinto 16:1, 2 ang makabulig sa aton?

10 Aton kuarta. Daku nga pondo ang kinahanglan para masuportahan ang mga hilikuton sang Ginharian. Kada tuig, minilyon ka dolyar ang ginagasto sa pag-atipan sang mga kinahanglanon sang mga nagalakbay nga manugtatap, espesyal payunir, kag mga misyonero. Sugod sang 1999, sobra sa 24,500 ka Kingdom Hall ang natukod sa imol nga mga kadutaan. Pero mga 6,400 pa ka Kingdom Hall ang kinahanglanon. Kada bulan, mga 100 milyones ka kopya sang Lalantawan kag Magmata! ang ginaimprinta. Tanan ini ginasuportahan sang inyo boluntaryo nga mga donasyon.

11 Gingiyahan sang Dios si apostol Pablo sa paghatag sing prinsipio nga magamit naton parte sa mga donasyon. (Basaha ang 1 Corinto 16:1, 2.) Ginpalig-on niya ang iya mga kauturan sa Corinto nga indi na sila maghulat nga matapos ang semana para mahibaluan kon pila ang nabilin sa ila. Sa baylo, dapat sila magpain sing pondo sa umpisa sang semana depende sa ila masarangan. Kaangay sang unang siglo, ang mga kauturan sa karon nagaplano na nga daan kon paano sila makahatag suno sa ila mga kahimtangan. (Luc. 21:1-4; Binu. 4:32-35) Ginapabaloran gid ni Jehova ining mahinatagon nga panimuot.

Boluntaryo sang Regional Building Committee sa Tuxedo, New York, U.S.A.

12, 13. Ano nga mga butang ang mahimo magpugong sa iban sa paggamit sang ila kusog kag mga ikasarang, pero paano sila buligan ni Jehova?

12 Aton kusog kag mga ikasarang. Ginasuportahan ni Jehova ang aton mga panikasog sa paggamit sang aton kusog kag mga ikasarang para sa Ginharian. Nagsaad sia nga buligan niya kita kon kapuyon kita. (Isa. 40:29-31) Nagabatyag bala kita nga indi bastante ang aton mga ikasarang sa pagbulig sa hilikuton? Ginahunahuna bala naton nga mas kalipikado ang iban? Dumduma nga mapauswag ni Jehova ang ikasarang sang bisan sin-o, pareho sang ginhimo niya kanday Bezalel kag Oholiab.—Ex. 31:1-6; tan-awa ang piktyur sa umpisa sang artikulo.

13 Ginapalig-on kita ni Jehova nga ihatag ang aton pinakamaayo kag indi naton pagpunggan ang aton kaugalingon sa paghimo sini. (Hulu. 3:27) Sang ginkay-o ang templo, ginsilingan ni Jehova ang mga Judiyo sa Jerusalem nga pamalandungan ang ila ginahimo para sa sini nga hilikuton. (Hag. 1:2-5) Pero natublag sila kag wala na nila gin-una ang hilikuton  ni Jehova. Maayo gid nga binagbinagon naton kon bala ang aton mga prioridad nahisuno sa mga prioridad ni Jehova. Mapamalandungan man bala naton ang aton mga ginahimo agod makapakigbahin sing bug-os sa hilikuton sang Ginharian sa sining katapusan nga mga adlaw?

MGA SAKRIPISYO SUNO SA ATON MASARANGAN

14, 15. (a) Paano kita napalig-on sa halimbawa sang imol naton nga mga kauturan? (b) Ano naman ang dapat naton himuon?

14 Madamo ang nagaistar sa mga lugar diin ang kabudlayan ukon kaimulon kinaandan na. Ang aton organisasyon nagapanikasog nga “mapun-an” ang kakulangan sang aton mga utod sa sina nga mga pungsod. (2 Cor. 8:14) Pero bisan ang imol nga mga kauturan nagaapresyar gid sa pribilehiyo nga makahatag. Nahamuot gid si Jehova kon nalipay sila sa paghatag suno sa ila masarangan.—2 Cor. 9:7.

15 Sa isa ka pigado katama nga pungsod sa Aprika, ang pila ka utod may ginapain nga gamay nga bahin sa ila talamnan. Ang bili sang patubas sini ginadonar nila sa mga hilikuton sang Ginharian. Sa sina man nga pungsod, ang mga kauturan luyag magbulig sa pagatukuron nga Kingdom Hall. Pero ini nga proyekto himuon sa tigtalanom. Bangod gusto gid nila magbulig, nagaboluntaryo sila sa pagtukod sing Kingdom Hall kon adlaw kag dayon nagapananom kon gab-i. Dalayawon gid ang ila pagkamasinakripisyuhon! Ginapahanumdom sini sa aton ang mga kauturan sa Macedonia sang unang siglo. ‘Tuman ang ila kaimulon,’ apang nangabay sila nga hatagan sila sing pribilehiyo sa pagbulig sa hilikuton. (2 Cor. 8:1-4) Kabay nga ang kada isa sa aton ‘magahatag man sono sa aton masarangan, sono sa pagpakamaayo nga nahatag sa aton sang GINOO.’—Basaha ang Deuteronomio 16:17.

16. Paano naton mapat-od nga ang aton mga sakripisyo ginakahamut-an ni Jehova?

16 Pero may dapat kita dumdumon. Kaangay sang mga Israelinhon sadto, dapat naton pat-uron nga ang aton kinabubut-on nga mga halad ukon mga sakripisyo ginakahamut-an sang Dios. Kinahanglan kita mangin balanse para maatipan ang panguna naton nga mga responsibilidad sa aton pamilya kag sa pagsimba kay Jehova. Bisan pa ginahatag naton ang aton tion kag mga ginapanag-iyahan para sa iban, indi ini dapat mangin kabangdanan nga mapabay-an naton ang espirituwal ukon pisikal nga kaayuhan sang aton pamilya. Kon himuon naton ini, daw pareho lang nga nagahatag kita sang wala sa aton. (Basaha ang 2 Corinto 8:12.) Luwas sini, dapat naton huptan ang aton espirituwalidad. (1 Cor. 9:26, 27) Pero makasalig kita nga kon nagakabuhi kita nahisuno sa mga talaksan sang Biblia, ang aton mga sakripisyo magapahalipay gid sa aton, kag mangin ‘labi ini nga kalahamut-an’ kay Jehova.

DAKU ANG BALOR SANG ATON MGA SAKRIPISYO

17, 18. Ano ang aton ginabatyag sa tanan nga nagasakripisyo para sa Ginharian, kag ano ang dapat binagbinagon sang kada isa sa aton?

17 Madamo sa aton mga kauturan ang ‘nagbubo sang ila kaugalingon kaangay sang dulot nga ilimnon’ paagi sa ila pagsuporta sa importante nga mga hilikuton sang Ginharian. (Fil. 2:17) Ginaapresyar gid naton ang mga nagapakita sining mahinatagon nga panimuot. Ang mga asawa kag kabataan sang mga utod nga nagapanguna sa mga hilikuton sa Ginharian dapat man hatagan sing komendasyon bangod sang ila kaalwan kag pagkamasinakripisyuhon.

18 Daku gid nga pagpangabudlay ang kinahanglan agod masuportahan ang mga intereses sang Ginharian. Kabay nga binagbinagon sing maayo sang kada isa sa aton kon paano kita makapakigbahin sa sini sing bug-os. Makasalig kita nga daku ang padya sini sa karon kag mas daku pa gid sa “nagapakari nga sistema sang mga butang.”—Mar. 10:28-30.

^ par. 2 Tan-awa ang artikulo nga “Bug-os Kalag nga mga Halad Para kay Jehova” sa Enero 15, 2012, nga Ang Lalantawan, pahina 21-25.