Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) DISIEMBRE 2013

Gin-amligan Sila ni Jehova sa mga Landong sang Kabukiran

Gin-amligan Sila ni Jehova sa mga Landong sang Kabukiran

SANG naggua ang isa ka babayi sa iya balay sang isa ka aga, may natalupangdan sia nga pinutos sa puertahan. Ginkuha niya ini kag nagtulutan-aw sa palibot, pero wala man sing tawo. Mahimo nga sang gab-i, ginbilin ini sang isa ka tawo nga wala niya mahibaluan kon sin-o. Gintukis niya ang pinutos kag nagsulod dayon kag ginsiraduhan ang puertahan. Kay man, nagaunod ini sang ginadumilian nga mga literatura sa Biblia! Ginhakos niya ang pinutos kag nangamuyo sing mahipos, nga nagapasalamat kay Jehova sa hamili nga espirituwal nga pagkaon.

Amo gid sini ang nagakatabo sa Germany sang dekada 1930. Sugod sang naggahom ang mga Nazi sang 1933, ang hilikuton sang mga Saksi ni Jehova gindumilian sa halos bilog nga pungsod. “Nagapati kami nga ang pagbantala parte kay Jehova kag sa iya ngalan indi mabalabagan sining kasuguan sang tawo,” siling ni Richard Rudolph, nga sobra 100 anyos na karon. * “Importante gid sa amon pagtuon kag pagministeryo ang mga literatura sa Biblia. Pero indi na namon ini matigayon bangod sang pagdumili. Nabalaka kami kon paano padayunon ang hilikuton.” Narealisar sang ulihi ni Richard nga makabulig sia sa sini sa indi kinaandan nga paagi. Himuon niya ini sa mga landong sang kabukiran.—Huk. 9:36.

SA ALAGYAN SANG MGA ISMAGLER

Kon subayon mo patakas ang suba Elbe (ukon Labe), makalab-ot ka sa Giant Mountains (Krkonoše), nga dulunan subong sang Czech Republic kag Poland. Bisan 1,600 metros lang ini kataas, ini nga kabukiran gintawag nga arctic island sa tunga sang Europa. Sa sulod sang anom ka bulan, nagalab-ot sa tres metros ang kadamulon sang niebe sa patag nga bahin sang bukid. Ang mga wala nagapangaman sa gulpi nga pagbag-o sang klima mahimo nga maabtan sang madamol nga alipuop nga hinali lang nagatabon sa mga putukputukan.

Sa sulod sang ginatos ka tuig, ini nga kabukiran ginhimo nga dulunan sang mga probinsia, ginharian, kag estado. Ang delikado nga mga alagyan sa kabukiran mabudlay bantayan, gani sang una, diri ginapaagi sang madamo ang ilegal nga  mga produkto. Sang dekada 1930, sang nangin dulunan sang Czechoslovakia kag Germany ang Giant Mountains, gingamit sang determinado nga mga Saksi ining ginaagyan sang una sang mga ismagler. Ano ang ila katuyuan? Para dalhon ang hamili nga mga literatura sa Biblia halin sa lugar nga matigayon ini. Isa sa ila amo ang pamatan-on nga si Richard.

Mga kauturan nga nagabayo sing pang-hiking kag nagatabok sa Giant Mountains dala ang mga literatura pakadto sa Germany

DELIKADO NGA PAGTAKLAD

“Kada katapusan sang semana, nagagrupo kami sing mga tag-pito ka pamatan-on nga lalaki para magtaklad sa kabukiran nga nagabayo sing pang-hiking,” hinumdom ni Richard. “Halin sa Germany, mga tatlo ka oras nga matabok namon ang kabukiran pakadto sa Špindlerův Mlýn”—isa ka balakasyunan nga mga 16.5 kilometros halin sa Czechoslovakia. Sadto nga tion, madamo nga German ang nagaistar sa sina nga lugar. Ang isa sa ila amo ang mangunguma nga nagbulig sa mga kauturan. Paagi sa karwahe nga kinaandan nga ginasakyan sang mga bakasyunista, ginakuha niya sa malapit nga banwa ang mga karton sang literatura, nga ginkarga sa tren halin sa Prague. Ginadala niya ini sa iya uma kag ginatago sa talambakan sang mga dagami, dayon may makuha sini para dalhon sa Germany.

Si Richard nagsiling pa: “Pag-abot namon sa sina nga uma, ginapangsudlan namon ang amon mga backpack, nga ginhimo gid para butangan sing mabug-at nga mga dala. Kada isa sa amon nagadala sing mga 50 kilos.” Para indi matalupangdan, dulom na sila nagalakat, nga nagasugod sa pagtunod sang adlaw kag nagapauli antes magbutlak ang adlaw. Si Ernst Wiesner, nga manugtatap sang sirkito sa Germany sadto nga tion, nagsiling parte sa pagpangaman sang mga utod: “Nagauna ang duha ka utod kag kon may masugata sila, nagapaandam sila dayon paagi sa ila mga flashlight. Sinyales na ini sa nagasunod nga mga utod, nga mga 100 metros ang kalayuon kag nagadala sing mabug-at nga mga backpack, nga magpanago sa mga kasiutan sa higad sang dalan asta nga ang duha ka utod sa una nila magbalik kag maghatag sing password nga ginaislan kada semana.” Pero indi lang ang German nga mga pulis ang dapat bantayan.

“Isa ka gab-i, madamo ako sing ginaobra,” siling ni Richard, “gani naulihi ako lakat pakadto sa  Czechoslovakia. Madulom na kag grabe ang alipuop, kag ginakurog ako samtang nagalakat bangod sa matugnaw katama nga ulan. Pila ka oras nga nagtalang ako sa tunga sang manubo nga mga pine tree. Madamo nga hiker ang napatay bangod sini. Nakita ko lang ang akon mga kauturan sang nagbalik na sila sang kaagahon.”

Sa sulod sang mga tatlo ka tuig, ang gamay nga grupo sang maisog nga mga utod nagataklad sa kabukiran kada semana. Kon tigtulugnaw, ginadala nila ang hamili nga mga literatura paagi sa mga ski ukon toboggan. May mga tion nga ang mga grupo sang mga 20 ka utod nagatabok sa dulunan kon adlaw, nga nagaagi sa banas sang mga hiker. Para magpati ang iban nga mga hiker lamang sila, nagaupod ang pila ka sister. Ang pila sa ila nagauna sa paglakat kag nagaitsa sang ila kalo kon may matalupangdan sila nga mga katalagman.

Bangod sang nakulapan sing niebe nga mga kabukiran, delikado gid ang pagtabok sa Giant Mountains

Ano dayon ang ginahimo kon makabalik na ang mga nagadala sing mga literatura halin sa ila paglakat sa bilog nga gab-i? May mga kahimusan para mapat-od nga mapanagtag dayon ang mga literatura. Paano? Ang mga publikasyon ginaputos nga daw mga habon kag ginadala sa estasyunan sang tren sa Hirschberg. Dayon ginapadala ini sa lainlain nga lugar sa Germany, diin ang mga kauturan nga lalaki kag babayi mahalungon nga nagadul-ong sini sa ila mga masigkatumuluo subong sang ginsambit sa umpisa. Madamo ang nadalahig sa sining sekreto nga pagpanagtag, amo nga delikado gid kon matukiban ini. Matuod gid ini, kay isa ka adlaw sadto may natabo nga wala ginapaabot nga problema.

Sang 1936, natukiban ang isa ka depot sang mga literatura malapit sa Berlin. Lakip sa mga nasapwan didto amo ang tatlo ka package halin sa wala makilala nga nagpadala sa Hirschberg. Gin-usisa sang mga pulis ang agi sang sulat para mahibaluan kon sin-o ang nagapanguna sa grupo sang mga nagadala sini nga mga literatura kag gin-aresto sia. Wala madugay, duha pa ka suspek, lakip si Richard Rudolph ang gin-aresto. Bangod gin-aku sang mga kauturan nga sila lang ang naghimo sini, ginpadayon sang ulihi sang iban ining delikado nga mga paglakbay.

LEKSION PARA SA ATON

Ang mga publikasyon nga ginasulod sa mga backpack kag ginadala patabok sa Giant Mountains amo ang importante nga suplay sang mga literatura sa Biblia para sa mga Saksi nga German. Pero indi lang Giant Mountains ang puede maagyan. Sang 1939, sang ginsakop sang puersa sang mga German ang Czechoslovakia, may pareho man sini nga mga alagyan sa dulunan sini nga pungsod. Sa iban nga pungsod sa dulunan sang Germany, pareho sang Pransia, Netherlands, kag Switzerland, daku ang ginarisgo sang mga Saksi didto para masuplayan sing espirituwal nga pagkaon ang ila ginahingabot nga mga masigkatumuluo.

Kalabanan sa aton karon makatigayon sing mga literatura sa Biblia nga bastante kag sa lainlain nga pormat. Matigayon mo man ang bag-o nga mga publikasyon sa Kingdom Hall ukon ma-download ini sa Web site nga jw.org, ngaa indi mo pagpamensaron kon ano ang nadalahig para matigayon ini? Mahimo nga indi ini pareho kabudlay sa pagtabok sa nakulapan sing niebe nga mga kabukiran sa kagab-ihon, pero pat-od nga ginpangabudlayan gid ini sang madamo naton nga masigkatumuluo nga handa mag-alagad sa imo.

^ par. 3 Nag-alagad sia sa Kongregasyon sang Hirschberg sa Silesia. Ang siudad sang Hirschberg amo na karon ang Jelenia Góra sa bagatnan-katundan sang Poland.