Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Nobiembre 2013

Tumana ang mga Manugbantay ni Jehova

Tumana ang mga Manugbantay ni Jehova

“Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag.”—HEB. 13:17.

1, 2. Ngaa talalupangdon nga ginpaanggid ni Jehova ang iya kaugalingon sa isa ka manugbantay?

GINPAANGGID ni Jehova ang iya kaugalingon sa isa ka manugbantay. (Ezeq. 34:11-14) Talalupangdon gid ini kay nagabulig ini sa aton nga mahangpan kon ano nga klase sang Dios si Jehova. Ang mahigugmaon nga manugbantay nga tawo nagapat-od nga luwas sa katalagman kag maayo ang kahimtangan sang mga karnero nga iya ginabantayan. Ginatuytuyan niya sila sa mga halalban kag mga tubig (Sal. 23:1, 2); ginabantayan sa adlaw kag gab-i (Luc. 2:8); ginaamligan sa mga manunukob (1 Sam. 17:34, 35); ginakungkong ang mga tinday (Isa. 40:11); ginapangita ang mga nadula, kag ginaatipan sing maayo ang mga nasamaran.—Ezeq. 34:16.

2 Ang kalabanan nga katawhan sang Dios sang una mga manugbantay kag mangunguma, gani naintiendihan nila dayon ang buot silingon sang pagpaanggid kay Jehova nga Dios sa mahigugmaon nga manugbantay. Nahibaluan nila nga kinahanglan atipanon ang karnero para magpagros. Sa espirituwal nga kahulugan, amo man sini ang katawhan. (Mar. 6:34) Magaantos ang mga tawo kon wala sila ginaatipan kag ginatuytuyan sa espirituwal. Magaluya sila kag magatalang sa moral, “subong sang mga carnero nga walay manugpahalab” nga nagaalaplaag. (1 Hari 22:17) Pero si Jehova mahigugmaon nga nagaaman sang kinahanglanon sang iya katawhan.

3. Ano ang binagbinagon naton sa sini nga artikulo?

3 Ang pagpaanggid kay Jehova sa manugbantay may kahulugan man bisan sa moderno nga tion. Ginaamanan gihapon ni Jehova ang iya tulad-karnero nga katawhan. Hibaluon naton kon paano niya sila ginatuytuyan kag ginaamanan sang ila mga kinahanglanon karon. Binagbinagon man naton kon paano dapat tamdon sang karnero ang mahigugmaon nga pag-atipan ni Jehova.

 ANG MAAYO NGA MANUGBANTAY NAG-AMAN SANG KABULIG NGA MGA MANUGBANTAY

4. Ano ang papel ni Jesus sa pag-aman sa mga karnero ni Jehova?

4 Gintangdo ni Jehova si Jesus subong ulo sang Cristianong kongregasyon. (Efe. 1:22, 23) Subong “maayo nga manugbantay,” ginpabanaag ni Jesus ang pag-ulikid, katuyuan, kag mga kinaiya sang iya Amay. ‘Ginhatag pa gani ni Jesus ang iya kalag para sa mga karnero.’ (Juan 10:11, 15) Daku gid nga pagpakamaayo ang halad gawad ni Cristo para sa katawhan! (Mat. 20:28) Kay man, katuyuan ni Jehova nga “ang tagsatagsa nga nagatuo [kay Jesus] indi malaglag kundi makatigayon sang kabuhi nga walay katapusan”!—Juan 3:16.

5, 6. (a) Sin-o ang gintangdo ni Jesus nga magtatap sa iya mga karnero, kag ano ang dapat himuon sang mga karnero para makabenepisyo sa sini nga kahimusan? (b) Ano dapat ang panguna nga rason sa pagtuman sa mga gulang?

5 Ano ang pagtamod sang mga karnero sa Maayong Manugbantay, si Jesucristo? “Ang akon mga karnero nagapamati sa akon tingog, kag kilala ko sila, kag nagasunod sila sa akon.” (Juan 10:27) Ang pagpamati sa tingog sang Maayong Manugbantay nagapahangop sang pagsunod sa iya panuytoy sa tanan nga butang. Nagalakip ini sa pagkooperar sa espirituwal nga kabulig nga mga manugbantay nga iya gintangdo. Ginpakita ni Jesus nga ang iya mga apostol kag mga disipulo amo ang magapadayon sang hilikuton nga iya ginsugdan. ‘Tudluan’ nila kag ‘pakaunon ang gamay nga mga karnero ni Jesus.’ (Mat. 28:20; basaha ang Juan 21:15-17.) Samtang nagalapnag ang maayong balita kag nagadamo ang mga disipulo, nagtangdo si Jesus sing hamtong nga mga Cristiano nga magabantay sa mga kongregasyon.—Efe. 4:11, 12.

6 Sang gin-istorya ni apostol Pablo ang mga manugtatap sa kongregasyon sa Efeso sang unang siglo, ginpadaku niya nga ang balaan nga espiritu ang nagtangdo sa ila subong mga manugtatap “agod bantayan ang kongregasyon sang Dios.” (Binu. 20:28) Matuod man ini sa Cristianong mga manugtatap karon, bangod gintangdo man sila base sa mga ginapatuman sa Kasulatan nga gin-inspirar sang balaan nga espiritu. Gani ang pagtuman sa Cristianong mga manugtatap nagapakita nga ginatahod naton si Jehova kag si Jesus, ang duha ka pinakamaayo nga Manugbantay. (Luc. 10:16) Amo gid ini ang panguna nga rason kon ngaa nagapasakop kita sa mga gulang. Pero may iban pa nga rason kon ngaa maalamon ang pagtuman sa ila.

7. Paano ka ginabuligan sang mga gulang para mahuptan ang maayong kaangtanan kay Jehova?

7 Para makahatag sing panuytoy sa mga masigkatumuluo, ang mga gulang nagapalig-on kag nagalaygay base sa Kasulatan mismo ukon sa mga prinsipio sini. Ginahimo nila ini indi agod diktahan ang mga kauturan kon paano sila dapat magkabuhi. (2 Cor. 1:24) Sa baylo, ginahatagan nila sila sing panuytoy base sa Kasulatan para buligan sila nga makahimo sing husto nga mga desisyon kag para mahuptan ang kahim-ong kag paghidait sa kongregasyon. (1 Cor. 14:33, 40) Ang mga gulang ‘nagabantay sang mga kalag’ sa kahulugan nga gusto nila buligan ang tagsa ka miembro sang kongregasyon nga mahuptan ang ila maayo nga kaangtanan kay Jehova. Gani maabtik sila magtanyag sing bulig kon matalupangdan nila nga ang isa ka utod daw makahimo, ukon nakahimo na, sing “sayop nga tikang.” (Gal. 6:1, 2; Jud. 22) Indi bala nga maayo gid ini nga mga rason para “mangin matinumanon sa mga nagapanguna”?—Basaha ang Hebreo 13:17.

8. Paano ginaamligan sang mga gulang ang panong sang Dios?

8 Si apostol Pablo, nga isa ka espirituwal nga manugbantay, nagsulat sa iya mga kauturan sa Colosas: “Mag-andam kamo: basi may isa nga magataban sa inyo subong iya natukob paagi sa pilosopiya kag wala pulos nga daya suno sa tradisyon sang mga tawo, suno sa nahauna nga mga butang sang kalibutan kag indi suno kay Cristo.” (Col. 2:8) Ini nga paandam nagahatag sa aton sing isa pa ka rason kon ngaa dapat pamatian ang base sa Kasulatan  nga laygay sang mga gulang. Ginaamligan nila ang panong paagi sa pagpaandam sa mga kauturan batok sa bisan sin-o nga mahimo magpaluya sang ila pagtuo. Si apostol Pedro nagpaandam batok sa “butig nga mga manalagna” kag “di-matuod nga mga manunudlo” nga nagatinguha sa ‘paghaylo sang mga kalag nga indi malig-on’ nga maghimo sing sala. Kon kinahanglanon, nagahimo man sing amo sini nga mga paandam ang mga gulang karon. Subong hamtong nga mga Cristiano, may eksperiensia na sila sa kabuhi. Isa pa, antes sila matangdo, napakita na nila nga nahangpan nila sing maayo ang Kasulatan kag kalipikado sila sa pagtudlo kon ano ang makapapagros. (1 Tim. 3:2; Tito 1:9) Bangod sang ila pagkahamtong, pagkabalanse, kag nabase sa Biblia nga kaalam, makahatag sila sing maayo nga panuytoy sa panong.

Subong nga ginaamligan sang manugbantay ang iya panong, ginaamligan man sang mga gulang ang mga karnero nga ginsalig sa ila (Tan-awa ang parapo 8)

ANG MAAYO NGA MANUGBANTAY NAGAPAKAON KAG NAGAAMLIG SANG PANONG

9. Paano ginatuytuyan kag ginapakaon ni Jesus ang Cristianong kongregasyon karon?

9 Paagi sa iya organisasyon, nagaaman si Jehova sing bugana nga espirituwal nga pagkaon sa tanan nga kauturan sa bilog nga kalibutan. Ang kalabanan nga laygay base sa Kasulatan ginaaman paagi sa aton mga publikasyon. Kon kaisa, ang organisasyon nagahatag man sing giya sa mga gulang, paagi sa mga sulat ukon mga instruksion nga ginahatag sang mga nagalakbay nga manugtatap. Paagi sa sini, ang mga karnero makabaton sing maathag nga panuytoy.

10. Ano ang responsibilidad sang espirituwal nga mga manugbantay sa nagtalang nga mga karnero?

10 Ang mga manugtatap may responsibilidad sa pag-amlig, pag-atipan, kag pag-ulikid  sa espirituwal nga kapagros sang mga miembro sang kongregasyon, ilabi na ang mga maluya ukon mga nagamasakit sa espirituwal. (Basaha ang Santiago 5:14, 15.) Ang pila sa sini nga indibiduwal mahimo nagtalang kag nag-untat sa pagpakigbahin sa Cristianong mga hilikuton. Kon matabo ini, indi bala nga ginahimo sang mainulikdon nga mga gulang ang ila bug-os nga masarangan para pangitaon ang nadula nga karnero kag palig-unon nga magbalik sa toril, ukon sa kongregasyon? Amo gid sini ang ila ginahimo! Si Jesus nagpaathag: “Indi luyag sang akon Amay nga yara sa langit nga ang isa sining mga kubos malaglag.”—Mat. 18: 12-14.

PAANO NATON DAPAT TAMDON ANG KAKULANGAN SANG KABULIG NGA MGA MANUGBANTAY?

11. Ngaa mahimo mabudlayan ang pila sa pagsunod sa mga gulang?

11 Si Jehova kag si Jesus himpit nga mga Manugbantay. Apang ang mga tawo nga manugbantay nga ginasaligan nila sang mga kongregasyon indi himpit. Bangod sini, mahimo mabudlay ang pagsunod sa pagpanguna sang mga gulang. Mahimo mangatarungan ang isa: ‘Indi sila himpit pareho naton. Ngaa pamatian naton ang ila laygay?’ Matuod, indi himpit ang mga gulang. Pero, dapat may nagakaigo kita nga pagtamod sa ila mga kakulangan kag mga kaluyahon.

12, 13. (a) Ano ang mga kakulangan sang pila nga gingamit ni Jehova nga manguna sadto? (b) Ngaa ginpasulat ni Jehova ang mga kakulangan sang responsable nga mga tawo?

12 Ang Kasulatan maathag nga nagasugid sang mga kakulangan sang mga gingamit ni Jehova nga magpanguna sa iya katawhan sadto. Halimbawa, si David gintangdo subong hari kag lider sang Israel. Pero nagpadala sia sa pagsulay kag nakasala sing panghilahi kag pagpatay. (2 Sam. 12:7-9) Binagbinaga man si apostol Pedro. Bisan pa ginsaligan sia sing mabug-at nga responsibilidad sang unang siglo sa Cristianong kongregasyon, nakahimo sia sing serioso nga mga sala. (Mat. 16:18, 19; Juan 13:38; 18:27; Gal. 2:11-14) Luwas kay Jesus, wala sing tawo nga himpit sugod kay Adan kag kay Eva.

13 Ngaa ginpasulat ni Jehova sa mga manunulat sang Biblia ang mga kakulangan sang mga tawo nga iya gintangdo? Ginhimo ini sang Dios para mapakita nga mahimo niya gamiton ang indi himpit nga mga tawo agod manguna sa iya katawhan. Ang matuod, pirme niya ini ginahimo. Gani indi naton dapat paggamiton nga balibad ang indi kahimpitan sang mga nagapanguna sa aton para magkumod batok sa ila ukon isikway ang ila awtoridad. Ginapaabot ni Jehova nga tahuron naton kag tumanon ini nga mga utod.—Basaha ang Exodo 16:2, 8.

14, 15. Ano ang matun-an naton sa pagpakig-angot ni Jehova sa iya katawhan sadto?

14 Importante ang pagtuman sa mga nagapanguna sa aton. Hunahunaa kon paano nakig-angot si Jehova sa iya katawhan sadto sa tion sang mga kabudlayan. Sang nagbiya ang katawhan sang Israel sa Egipto, ang mga mando sang Dios ginpaagi kanday Moises kag Aaron. Para maluwas sa napulo ka kalalat-an, kinahanglan tumanon sang mga Israelinhon ang instruksion nga maghiwat sing espesyal nga panihapon kag wisikan sing dugo sang gin-ihaw nga karnero ang ibabaw sang ganhaan kag bakalan sang ila mga balay. Ini nga panuytoy wala nila nabatian paagi sa tingog halin sa langit. Kinahanglan nila mamati sa tigulang nga mga lalaki sa Israel, nga nakabaton sing mga instruksion halin kay Moises. (Ex. 12:1-7, 21-23, 29) Sa sini nga mga kahimtangan, si Moises kag ang tigulang nga mga lalaki amo ang nagpaalinton sing mga instruksion ni Jehova para sa iya katawhan. Amo man sini ka importante ang papel sang Cristianong mga gulang karon.

15 Mahimo nga may madumduman ka nga pila ka kasaysayan sa Biblia diin ginhatag ni Jehova ang iya nagaluwas-kabuhi nga mga instruksion paagi sa iya mga representante nga tawo ukon anghel. Sa sina nga mga tinion, nakita sang Dios nga kinahanglan hatagan ang iban sing awtoridad. Ang mga mensahero naghambal paagi sa iya ngalan, kag  ginsilingan nila ang iya katawhan sang ila himuon para malampuwasan ang kabudlayan. Indi ayhan nga amo man sini ang himuon ni Jehova sa tion sang Armagedon? Kon amo, ang mga gulang karon nga ginhatagan sing responsibilidad nga magrepresentar kay Jehova ukon sa iya organisasyon dapat gid maghalong nga indi nila pag-abusuhan ang awtoridad nga ginasalig sa ila.

“ISA KA PANONG NGA MAY ISA KA MANUGBANTAY”

16. Ano nga “polong” ang kinahanglan naton pamatian?

16 Ang katawhan ni Jehova ginahuman sang “isa ka panong” nga ginapangunahan sang “isa ka manugbantay,” si Jesucristo. (Juan 10:16) Si Jesus nagsiling nga magaupod sia sa iya mga disipulo “sa tanan nga adlaw tubtob sa katapusan sang sistema sang mga butang.” (Mat. 28:20) Subong Hari sa langit, kontrolado niya ang tanan nga hitabo antes hukman ang kalibutan ni Satanas. Para magpabilin nga nahiusa kag luwas sa katalagman sa sulod sang panong sang Dios, kinahanglan naton pamatian ang ‘polong sa likod naton,’ nga nagasiling kon diin kita maagi. Ang “polong” nagalakip sang ginasiling sang balaan nga espiritu sang Dios nga mabasa sa Biblia kag sang ginasiling ni Jehova kag ni Jesus paagi sa ila gintangdo nga kabulig nga mga manugbantay.—Basaha ang Isaias 30:21; Bugna 3:22.

Ang mga gulang nagapanikasog nga amligan ang mga pamilya nga may nagasolo nga ginikanan gikan sa makahalalit nga pagpakig-upod (Tan-awa ang parapo 17 kag 18)

17, 18. (a) Ano nga katalagman ang ginaatubang sang panong, apang ano ang aton masaligan? (b) Ano ang binagbinagon naton sa masunod nga artikulo?

17 Si Satanas “nagaluyong subong sang nagangurob nga leon, nga nagapangita sing matukob.” (1 Ped. 5:8) Kaangay sang mapintas kag gutom nga manunukob, ginatiid niya ang panong, nga nagahulat sing kahigayunan para tabanon ang mga wala nagabantay ukon ang mga nagtalang. Amo gid ini ang rason kon ngaa dapat kita magpabilin nga suod sa panong kag “sa manugbantay kag manugtatap sang [aton] kalag.” (1 Ped. 2:25) Tuhoy sa mga nakaluwas sa dakung kapipit-an, ang Bugna 7:17 nagsiling: “Ang Kordero [si Jesus] . . . magabantay sa ila, kag magatuytoy sa ila sa mga tuburan sang tubig sang kabuhi. Kag pahiran sang Dios ang tagsa ka luha sa ila mga mata.” May mas maayo pa bala nga saad sa sini?

18 Nabinagbinag na naton ang pinakaimportante nga papel sang mga gulang subong espirituwal nga kabulig nga mga manugbantay. Gani maayo gid nga mamangkot kita, Paano masiguro sining gintangdo nga mga lalaki nga ginaatipan nila sing nagakaigo ang mga karnero ni Jesus? Ang sabat binagbinagon sa masunod nga artikulo.