Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) NOBIEMBRE 2013

Mga Manugbantay, Iluga ang Pinakamaayo nga mga Manugbantay

Mga Manugbantay, Iluga ang Pinakamaayo nga mga Manugbantay

“Si Cristo mismo nag-antos tungod sa inyo, nga nagabilin sa inyo sang huwaran agod sundon ninyo sing maayo ang iya mga tikang.”—1 PED. 2:21.

1, 2. (a) Ano ang resulta kon atipanon sing maayo ang mga karnero? (b) Ngaa mapaanggid ang madamo nga tawo sang panahon ni Jesus sa mga karnero nga wala sing manugbantay?

MANGIN mapagros ang mga karnero kon tatapon sing maayo sang manugbantay ang iya panong. Suno sa isa ka manwal sa pagsagod sing karnero, “kon dalhon lang sang tawo ang iya panong sa halalban kag dayon pabay-an lang ukon indi na pag-ulikdan, mangin masakiton kag maluya ang iya mga karnero pagligad sang pila lang ka tuig.” Pero kon ginaatipan sing maayo sang manugbantay ang mga karnero, mangin mapagros ini.

2 Ang pag-atipan kag atension sang mga manugbantay sang panong sang Dios sa tagsa ka karnero nga gintugyan sa ila may epekto sa espirituwalidad sang bilog nga kongregasyon. Mahimo madumduman mo nga naluoy si Jesus sa kadam-an bangod “ginpanitan sila kag nag-alaplaag kaangay sa mga karnero nga wala sing manugbantay.” (Mat. 9:36) Ngaa amo sini ang ila kahimtangan? Bangod ang mga may responsibilidad sa pagtudlo sang Kasuguan sang Dios sa katawhan mga mapintas, tama ka estrikto, kag salimpapaw. Imbes buligan kag saguron sang mga lider sang relihion sang Israel ang mga miembro sang ila panong, ginpapas-an nila sila “sang mga lulan nga mabug-at.”—Mat. 23:4.

3. Ano ang dapat dumdumon sang mga gulang samtang ginatuman nila ang ila katungdanan subong espirituwal nga mga manugbantay?

3 Ang Cristianong mga manugbantay karon—ang gintangdo nga mga gulang—may mabug-at nga responsibilidad. Ang mga karnero sa panong nga ila ginaatipan iya ni Jehova kag subong man ni Jesus, nga nagpakilala sang iya kaugalingon subong “maayo nga manugbantay.” (Juan 10:11) Ang mga karnero “ginbakal . . . sa daku nga bili,” nga ginbayaran ni Jesus sang iya “hamili nga dugo.” (1 Cor. 6:20; 1 Ped. 1:18, 19) Palangga gid niya ang mga karnero amo nga handa niya isakripisyo ang iya kabuhi para sa ila. Dapat dumdumon pirme sang mga gulang nga kabulig sila nga mga manugbantay, nga ginadumalahan sang mahigugmaon nga Anak sang Dios, si Jesucristo,  “ang daku nga manugbantay sang mga karnero.”—Heb. 13:20.

4. Ano ang binagbinagon sa sini nga artikulo?

4 Kon amo, paano dapat pakig-angutan sang Cristianong mga manugbantay ang mga karnero? Ang mga miembro sang kongregasyon ginapalig-on nga “mangin matinumanon sa mga nagapanguna” sa ila. Sa pihak nga bahin, ang mga gulang ginlaygayan nga indi ‘magpakaginuo sa mga palanublion gikan sa Dios.’ (Heb. 13:17; basaha ang 1 Pedro 5:2, 3.) Gani, paano ang mga gulang makapanguna nga wala nagapakaginuo sa panong? Buot silingon, paano nila maatipan ang mga kinahanglanon sang mga karnero nga wala nagaabuso sa awtoridad nga ginhatag sang Dios sa mga manugtatap?

“DALHON SILA SA IYA DUGHAN”

5. Ano ang ginapakita sa aton sang paglaragway sang Isaias 40:11 parte kay Jehova?

5 Parte kay Jehova, si manalagna Isaias nagsiling: “Sia magapahalab sang iya panong kaangay sang manugpahalab kungkungon niya sa iya butkon ang mga cordero, dalhon sila sa iya dughan, kag magatuytuy sing mahinay sang mga may tinday.” (Isa. 40:11) Ini nga paglaragway nagapakita nga si Jehova nagahatag sang mga kinahanglanon sang maluya nga mga miembro sang kongregasyon. Subong nga nahibaluan sang manugbantay ang mga kinahanglanon sang tagsa ka karnero sa iya panong kag handa sa paghatag sini, si Jehova nakahibalo man sang mga kinahanglanon sang mga miembro sang kongregasyon kag nalipay sia sa pag-aman sini. Kon kinahanglanon, ginakungkong sang manugbantay ang bag-o nabun-ag nga kordero. Subong “Amay nga may mapinalanggaon nga kaluoy,” daw ginakungkong man kita ni Jehova sa tion sang mga kabudlayan. Ginalugpayan niya kita kon may mabudlay nga pagtilaw ukon kon may pinasahi kita nga kinahanglanon.—2 Cor. 1:3, 4.

6. Subong espirituwal nga manugbantay, paano mailog sang gulang ang halimbawa ni Jehova?

6 Makatuon gid ang espirituwal nga manugbantay sa aton Amay sa langit! Kaangay ni Jehova, dapat nahibaluan gid niya ang mga kinahanglanon sang mga karnero. Kon nahibaluan sang gulang ang mga kabudlayan kag espesipiko nga mga kinahanglanon sang mga karnero nga dapat dayon tatapon, makahatag sia sing nagakaigo nga pagpalig-on kag pagsakdag. (Hulu. 27:23) Maathag nga kinahanglan nga may maayo nga komunikasyon ang gulang sa iya mga masigkatumuluo. Ginarespeto niya ang pribado nga kabuhi sang mga kauturan, pero interesado sia sa iya makita kag mabatian sa mga miembro sang kongregasyon kag handa sia nga “buligan ang mga maluya.”—Binu. 20:35; 1 Tes. 4:11.

7. (a) Paano gintratar ang mga karnero sang Dios sang adlaw ni Ezequiel kag ni Jeremias? (b) Ano ang matun-an naton sa pagpakamalaut ni Jehova sa indi matutom nga mga manugbantay?

7 Binagbinaga ang panimuot sang mga manugbantay nga ginpakamalaut ni Jehova. Sang adlaw ni Ezequiel kag ni Jeremias, ginpakamalaut ni Jehova ang mga gintangdo nga mag-atipan sa iya mga karnero pero wala nagtuman sini sing maayo. Kon wala sing nagabantay sa mga karnero, salakayon ini kag magaalaplaag. Imbes nga pakan-on, ginhingalitan sini nga mga manugbantay ang panong kag ‘ginpakaon ang ila kaugalingon.’ (Ezeq. 34:7-10; Jer. 23:1) Ang pagpakamalaut sang Dios sa sini nga mga manugbantay mahimo man mapatuhoy sa mga lider sang Cristiandad. Pero ginapadaku man sini kon daw ano ka importante para sa Cristianong mga gulang nga hatagan sing nagakaigo kag mahigugmaon nga atension ang panong.

“NAGHATAG AKO SA INYO SANG SULUNDAN”

8. Paano si Jesus nagpakita sing pinakamaayo nga sulundan sa pagtadlong sang sayop nga mga panimuot?

8 Bangod indi himpit, mahimo nga indi dayon mahangpan sang pila ka karnero sang Dios kon ano ang ginapaabot ni Jehova sa ila. Mahimo nga mapaslawan sila sa pagsunod sa laygay sang Kasulatan, ukon makahimo sing mga butang nga nagapakita nga  indi pa sila hamtong sa espirituwal. Ano ang himuon sang mga gulang? Dapat nila ilugon ang pagpasensia ni Jesus sa iya mga disipulo, sang nagbaisay sila kon sin-o ang pinakadaku sa ila sa Ginharian. Imbes nga maubusan sing pasensia, padayon sila nga gintudluan ni Jesus kag ginhatagan sing mahigugmaon nga laygay parte sa pagpakita sing pagpaubos. (Luc. 9:46-48; 22:24-27) Paagi sa paghinaw sang ila mga tiil, ginpakita ni Jesus ang isa ka leksion sang pagpaubos, isa ka kinaiya nga kinahanglan ipakita sang Cristianong mga manugtatap.—Basaha ang Juan 13:12-15; 1 Ped. 2:21.

9. Ano nga panimuot ang ginsiling ni Jesus nga ipakita sang iya mga disipulo?

9 Ang pagtamod ni Jesus sa katungdanan sang espirituwal nga manugbantay tuhay sa pagtamod anay nanday Santiago kag Juan. Ining duha ka apostol nagtinguha nga makatigayon sing prominente nga posisyon sa Ginharian. Pero gintadlong ni Jesus ang ila panimuot, nga nagasiling: “Nahibaluan ninyo nga ang mga manugdumala sang mga nasyon may gahom sa ila mga sakop kag pagusto lang sila kon ano ang ila himuon sa ila. Pero indi amo ini ang sa inyo. Kay kon sin-o sa inyo ang gusto nga mangin gamhanan, dapat mangin suluguon siya ninyo.” (Mat. 20:25, 26, APD) Kinahanglan pakigbatuan sang mga apostoles ang huyog nga ‘magpakaginuo’ sa ila mga kaupdanan, ukon ‘magpagusto lang kon ano ang himuon nila sa ila.’

10. Ano ang gusto ni Jesus nga pagtratar sang mga gulang sa panong, kag paano nangin halimbawa sa sini si Pablo?

10 Ginapaabot ni Jesus nga trataron sang Cristianong mga gulang ang panong pareho sang pagtratar niya sa sini. Dapat sila mangin handa sa pag-alagad sa ila mga kaupdanan, kag indi mangin agalon nila. Amo man sini ang panimuot ni apostol Pablo, kay ginsilingan niya ang mga gulang nga lalaki sa kongregasyon sang Efeso: “Nahibaluan gid ninyo nga sa nahaunang adlaw nga nagtapak ako sa Asia kaupod ko kamo sa tanan nga tion, nga nagapaulipon sa Ginuo nga may daku gid nga pagpaubos sang hunahuna.” Gusto sang apostol nga buligan sadtong mga gulang ang iban sa sinsero kag mapainubuson nga paagi. Sia nagsiling: “Ginpakita ko sa inyo sa tanan nga butang nga sa pagpangabudlay sing subong sini dapat ninyo buligan ang mga maluya.” (Binu. 20:18, 19, 35) Ginsilingan ni Pablo ang mga taga-Corinto nga indi sia agalon sang ila pagtuo. Sa baylo, mapainubuson sia nga masigkamanugpangabudlay para sa ila kalipay. (2 Cor. 1:24) Maayo gid nga halimbawa si Pablo para sa mga gulang karon kon parte sa pagpaubos kag pagpangabudlay.

‘MAGPANGUYAPOT SING MALIG-ON SA MASALIGAN NGA PULONG’

11, 12. Paano mahimo mabuligan sang gulang ang iya masigkatumuluo sa paghimo sing desisyon?

11 Ang gulang sang kongregasyon dapat nga ‘magpanguyapot sing malig-on sa masaligan nga pulong may kaangtanan sa iya kalantip sa pagpanudlo.’ (Tito 1:9) Pero ginahimo niya ini “sa espiritu sang kalulo.” (Gal. 6:1) Imbes nga piliton ang iya mga kaupdanan sa kongregasyon kon ano ang dapat himuon, ginatinguhaan sang maayo nga manugbantay nga malab-ot ang ila tagipusuon. Mahimo nga ipatalupangod sang gulang ang mga prinsipio sa Kasulatan nga dapat binagbinagon sang isa ka utod nga magahimo sing importante nga desisyon. Mahimo niya binagbinagon upod sa iya ang mga publikasyon parte sa sini. Mahimo man niya palig-unon nga binagbinagon sang isa kon ano ang epekto sang iya desisyon sa iya kaangtanan kay Jehova. Mahimo ipatalupangod sang gulang nga importante gid nga mangamuyo para sa giya sang Dios antes magdesisyon. (Hulu. 3:5, 6) Sa tapos ini mabinagbinag upod sa iya masigkatumuluo, tugutan sia sang gulang nga maghimo sang iya kaugalingon nga desisyon.—Roma 14:1-4.

12 Dapat nga nabase lamang sa Kasulatan ang awtoridad nga ipakita sang Cristianong mga manugtatap. Gani importante gid nga gamiton nila sing maayo ang Biblia kag sundon ang ginasiling sini. Paagi sini, indi maabusuhan  sang mga gulang ang ila awtoridad. Kay man, kabulig lang sila nga mga manugbantay, kag ang tagsa ka miembro sang kongregasyon manabat kay Jehova kag kay Jesus sa ila mga desisyon.—Gal. 6:5, 7, 8.

“MGA HALIMBAWA SA PANONG”

Ginabuligan sang mga gulang ang ila pamilya sa paghanda sa ministeryo (Tan-awa ang parapo 13)

13, 14. Sa ano nga mga bahin dapat mangin halimbawa ang mga gulang sa panong?

13 Sa tapos mapalig-on ang mga gulang sa kongregasyon nga indi ‘magpakaginuo sa mga gintugyan sa ila,’ ginlaygayan sila ni apostol Pedro nga “mangin mga halimbawa sa panong.” (1 Ped. 5:3; footnote, New World Translation of the Holy ScripturesWith References) Paano ang mga gulang mangin halimbawa sa panong? Binagbinaga ang duha sa mga kalipikasyon nga dapat malab-ot sang isa ka lalaki nga “nagatinguha sa palangakuan sang manugtatap.” Kinahanglan sia mangin “maligdong sing hunahuna” kag “nagadumala sang iya panimalay sa maayo nga paagi.” Kon may pamilya ang gulang, dapat niya ini madumalahan sing maayo, kay “sa pagkamatuod, kon ang bisan sin-o nga lalaki indi makahibalo magdumala sang iya kaugalingon nga panimalay, paano niya maatipan ang kongregasyon sang Dios?” (1 Tim. 3:1, 2, 4, 5) Para mangin kalipikado subong manugtatap, ang isa dapat mangin maligdong sing hunahuna, kag nahangpan niya sing maayo ang mga prinsipio sang Dios kag nahibaluan kon paano ini iaplikar. Nagapamensar sia sing maayo kag wala nagapadasudaso sa paghukom. Kon makita ini nga mga kinaiya sa mga gulang, magasalig sa ila ang mga miembro sang kongregasyon.

14 Nagapakita man sing maayo nga halimbawa ang mga manugtatap sa ila mga masigka-Cristiano paagi sa pagpanguna sa ministeryo. Isa gid ka halimbawa si Jesus para sa mga manugtatap sa sini nga bahin. Ang pagbantala sing maayong balita sang Ginharian importante gid nga bahin sang hilikuton ni Jesus sa duta. Ginpakita niya sa iya mga disipulo kon paano himuon ini nga hilikuton. (Mar. 1:38; Luc. 8:1) Sa aton panahon, makapalig-on para sa mga manugbantala nga makaupod ang mga gulang sa pagbantala, makita ang ila kakugi sa sining nagaluwas-kabuhi nga hilikuton, kag magtuon sa ila pamaagi sang pagtudlo! Ang kakugi kag determinasyon sang mga gulang sa paghatag sing tion kag pagpanikasog sa pagbantala sing maayong balita bisan pa masako sila nagapalig-on sa bilog nga kongregasyon nga ilugon ang ila kakugi. Mangin maayo man sila nga halimbawa sa ila mga kauturan paagi sa paghanda kag pagpakigbahin sa mga miting kag sa iban pa nga hilikuton, subong sang pagpaninlo kag pagmentenar sang Kingdom Hall.—Efe. 5:15, 16; basaha ang Hebreo 13:7.

Ang mga manugtatap nagapakita sing halimbawa sa pag-alagad sa latagon (Tan-awa ang parapo 14)

“SAKDAGON ANG MGA MALUYA”

15. Ano ang pila ka rason kon ngaa naga-shepherding ang mga gulang?

15 Ang maayo nga manugbantay nagabulig dayon kon nasamaran ukon nagamasakit ang isa ka karnero. Sing kaanggid, kinahanglan hatagan dayon sing atension sang mga gulang ang bisan sin-o nga nagaantos ukon nagakinahanglan sing espirituwal nga bulig sa kongregasyon. Ang mga tigulang kag mga nagamasakit mahimo buligan sa ila pisikal  nga mga kinahanglanon, apang ilabi na nga kinahanglan nila ang espirituwal nga bulig kag pagpalig-on. (1 Tes. 5:14) Ang pamatan-on nga mga miembro sang kongregasyon mahimo may mga kabudlayan, subong sang pagpamatok “sa mga kailigbon nga kinaandan sa pagkapamatan-on.” (2 Tim. 2:22) Gani ang pagtatap ukon pag-shepherding nagalakip sa regular nga pagbisita sa mga miembro sang kongregasyon para mahangpan ang ila mga kahimtangan kag mapalig-on sila paagi sa nagakaigo nga laygay sa Kasulatan. Kon maatipan ini gilayon, madamo nga problema ang masolusyunan antes pa maglala.

16. Ano ang ginahimo sang mga gulang para mabuligan ang miembro sang kongregasyon nga nagamasakit sa espirituwal?

16 Ano abi kon ang problema nakaapektar na sa espirituwalidad sang isa ka miembro sang kongregasyon? “May nagamasakit bala sa inyo?” pamangkot sang manunulat sang Biblia nga si Santiago. “Magtawag sia sang mga gulang nga lalaki sang kongregasyon, kag magpangamuyo sila para sa iya, nga nagahaplas sa iya sang lana sa ngalan ni Jehova. Kag ang pangamuyo nga may pagtuo magaayo sa isa nga nagamasakit, kag si Jehova magabangon sa iya. Subong man, kon nakahimo sia sang mga sala, patawaron sia.” (Sant. 5:14, 15) Bisan pa indi magpatawag sing “mga gulang nga lalaki” ang isa nga nagamasakit sa espirituwal, dapat nila sia buligan gilayon sa tion nga mahibaluan nila ang iya sitwasyon. Sa tion nga ginaupod sang mga gulang ang mga utod sa pagpangamuyo, ginapangamuyo ang kaayuhan sang mga utod, kag ginahatagan sila sing kinahanglanon nga mga bulig, mapaumpawan nila kag mapalig-on sa espirituwal ang ila mga ginaatipan.—Basaha ang Isaias 32:1, 2.

17. Ano ang resulta kon ginailog sang mga gulang ang “daku nga manugbantay”?

17 Sa tanan nga hilikuton sang Cristianong mga manugbantay sa organisasyon ni Jehova, ginapanikasugan nila nga ilugon ang “daku nga manugbantay,” si Jesucristo. Paagi sa espirituwal nga bulig sining responsable nga mga lalaki, makabenepisyo gid ang panong kag padayon sila nga mag-uswag. Bangod sini tanan, nagapasalamat gid kita sa aton indi matupungan nga Manugbantay, si Jehova, kag napahulag nga dayawon sia.