Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Nobiembre 2013

 HALIN SA AMON ARCHIVE

“Daw Bao Ako”

“Daw Bao Ako”

SA TION sang madasig nga siam ka adlaw nga kampanya sang pagpanaksi sang Agosto/Septiembre 1929, sobra sa 10,000 ka manugbantala ang nagwali sa bilog nga Estados Unidos. Nakapahamtang sila sa mga tawo sing 250,000 ka libro kag mga bukleta. Nalakip sa sini nga mga manugbantala sang Ginharian ang mga isa ka libo nga colporteur. Nagdamo gid sila! Suno sa Bulletin, * “daw indi mapatihan” nga nangin tatlo ka pilo ang kadamuon sang mga payunir sugod sang 1927 asta sang 1929.

Sang ulihi nga bahin sang 1929, may daku nga problema sa pinansial. Sang Black Saturday—Oktubre 29, 1929—nagnubo ang mga presyo sa New York Stock Exchange nga nagresulta sa pagsarurot sang sistema sa ekonomiya sa bilog nga kalibutan, asta nga natabo ang Great Depression. Linibo ka bangko ang naputo. Wala na nagtanom ang mga mangunguma. Nagsira ang dalagku nga mga pabrika. Minilyon ang nadulaan sing trabaho. Sang 1933, ang ginaimbargo nga balay sa Estados Unidos nakalab-ot sing 1,000 kada adlaw.

Ano ang ginhimo sang bug-os tion nga mga manugbantala sa sina nga krisis? Naghimo sila sing salakyan nga balay. Wala ini sing arkila kag buhis. Bangod sang salakyan nga balay ukon treyler nakapadayon ang madamo nga payunir sa ila ministeryo nga gamay lang ang gasto. * Kag sa tion sang kombension, isa ini ka libre nga dalayunan. Sang 1934, ang Bulletin naghatag sing detalyado nga plano para sa gamay pero komportable nga ilistaran nga may sistema sa pagpatubig, lulutuan, mapilopilo nga kama, kag may insulasyon kontra sa tugnaw.

Ang iban nga manugbantala sa bilog nga kalibutan naghimo man sing salakyan nga balay. “Si Noe wala sing eksperiensia sa pagtukod sang sakayan,” siling ni Victor Blackwell, “kag wala ako sing eksperiensia ukon ihibalo sa paghimo sing treyler nga balay.” Pero nakahimo gid sia.

Isa ka balay nga salakyan nga ginakarga patabok sa suba sa panahon sang tig-ululan sa India

Sanday Avery kag Lovenia Bristow may isa ka salakyan nga balay. Si Avery nagsiling, “Daw bao ako—pirme ko dala ang akon balay.” Ang mag-asawa nga Bristow nagpayunir kaupod nanday Harvey kag Anne Conrow, nga ang dingding sang ila salakyan nga balay human sa tar-paper. Nagakataktak ang papel sa tion nga ibalhin nila ang ila balay. “Wala pa sing may nakakita sing amo sini nga treyler,” siling ni Avery, “kag wala pa sing may nakakita sing kaangay sini halin sang una!” Pero si Avery nagsiling nga ang mag-asawa nga Conrow kag ang ila duha ka bata nga lalaki amo ang “pinakamalipayon nga pamilya nga imo makita.” Si Harvey Conrow nagsulat, “Wala gid kami ginakulang, kag wala gid kami sing ginkabalak-an samtang nagaalagad kay Jehova kag nabatyagan gid namon ang iya mahigugmaon nga pag-atipan.” Sang ulihi, nag-eskwela sila nga apat sa Gilead kag gin-asayn sa Peru subong misyonero.

Ang bug-os nga pamilya Battaino nagpayunir man. Sang nahibaluan nanday Giusto kag Vincenza nga mangin mga ginikanan na sila, ginhimo nila nga balay ang ila nga 1929 Model A Ford nga salakyan. “Daw matahom ini nga hotel” kon ipaanggid sa ila  tent nga ginaistaran sang una. Upod sa ila bata nga babayi, nagpadayon sila sa ila nanamian nga asaynment, ang pagbantala sa mga Italyano nga nagaistar sa Estados Unidos.

Madamo sing namati sa maayong balita, pero ang imol kag wala sing trabaho nga mga tawo haluson makaamot sing kuarta para sa mga literatura. Sa baylo, ginabarteran nila ini sang bisan ano lang. Ang duha ka payunir nakalista sing 64 ka klase sang mga butang nga ginhatag sa ila sang mga interesado. Ang listahan “daw imbentaryo sang isa ka tiangge sa uma.”

Si Fred Anderson nakaistorya sa isa ka mangunguma nga gusto magkuha sing isa ka set sang aton libro kabaylo sang antipara sang iya iloy. Sa kaingod nga uma, interesado magkuha sang aton literatura ang isa ka tawo pero nagsiling sia, “Indi ko ini mabasa kay wala ako antipara.” Pero sang ginsuksok niya ang antipara sang iya kaingod nga mangunguma, nabasa niya sing maayo ang mga libro kag nag-amot sing kuarta para sa mga libro kag sa antipara.

Si Herbert Abbott nagadala sang kurungan sang manok sa iya salakyan. Sa tapos sia mabarteran sing tatlo ukon apat ka manok, ginadala niya ini sa merkado agod ibaligya, para may ipatughong sa iya salakyan. “Nagakaubusan man bala kami kon kaisa sing kuarta? Huo,” sulat niya, “pero wala ini nagpauntat sa amon. Kon may gasolina ang amon salakyan, nagabantala kami, nga nagatuo kag nagasalig kay Jehova.”

Ang pagsalig kay Jehova kag ang mabakod nga determinasyon amo ang nakabulig sa iya katawhan sa sining mabudlay nga mga tinuig. Sang nagwaswas ang isa ka bagyo, nakagua lang gid sanday Maxwell kag Emmy Lewis sang natumbahan sang kahoy ang ila treyler kag natunga. “Wala ini nakaupang sa amon,” sulat ni Maxwell, “nagakatabo gid man ini, kag wala gid nagsulod sa amon pensar nga mag-untat. Madamo pa sang mga hilikuton ang kinahanglan tapuson, kag gusto namon ini himuon.” Bangod sang ila determinasyon kag sa bulig sang ila mahigugmaon nga mga abyan, nakahimo liwat sanday Maxwell kag Emmy sing salakyan nga balay.

Mabudlay ang aton panahon karon, gani nagasakripisyo man ang minilyon ka makugi nga mga Saksi ni Jehova. Pareho sa mga payunir sadto, determinado man kita nga magpadayon sa pagbantala tubtob magsiling si Jehova nga tapos na ang hilikuton.

^ par. 3 Ginatawag karon nga Ang Aton Ministeryo sang Ginharian.

^ par. 5 Sadto nga tion, kalabanan sang mga payunir wala sing sekular nga trabaho. Makakuha sila sing mga literatura sa Biblia sa mas manubo nga kantidad kag ang mga amot sa publikasyon amo ang ila ginagamit.