Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) OKTUBRE 2013

“Magpaulipon kay Jehova”

“Magpaulipon kay Jehova”

“Indi kamo magtinamad sa inyo hilikuton. . . . Magpaulipon kay Jehova.”—ROMA 12:11.

1. Ipatuhay ang kinaandan nga pagtamod sa pagpaulipon sangsa ginpalig-on sa Roma 12:11.

ANG Cristianong pagpaulipon lain gid sa ginahunahuna sang madamo nga tawo nga pagpaulipon. Para sa ila ang mga ulipon ginadominahan, ginapigos, kag ginamaltratar. Pero may ginasambit ang Pulong sang Dios parte sa kinabubut-on nga pagpaulipon sa mahigugmaon nga Agalon. Sang ginlaygayan ni apostol Pablo ang mga Cristiano sang unang siglo nga “magpaulipon kay Jehova,” ginpalig-on niya sila nga himuon ang sagrado nga pag-alagad bangod sa gugma sa Dios. (Roma 12:11) Ano ang nadalahig sa sini nga pagpaulipon? Paano naton malikawan nga mangin ulipon ni Satanas kag sang iya kalibutan? Kag ano ang mga padya sang matutom nga pagpaulipon kay Jehova?

“GINAHIGUGMA KO ANG AKON AGALON”

2. (a) Ano ang nagapahulag sa isa ka Israelinhon nga isikway ang kahigayunan nga mangin hilway? (b) Ano ang kahulugan sang pagbuho sa dulunggan sang isa nga nagpaulipon sing kinabubut-on?

2 Sa Kasuguan nga ginhatag sang Dios sa Israel, may matun-an kita parte sa pagpaulipon nga ginapatuman ni Jehova sa aton. Ang Hebreo nga ulipon ginahilway sa ikapito nga tuig sang iya pag-alagad. (Ex. 21:2) Pero para sa isa ka ulipon nga nagahigugma gid sa iya agalon kag gusto nga magpadayon sa pag-alagad sa iya, naghimo si Jehova sing talalupangdon nga kahimusan. Dalhon sang agalon ang ulipon sa gawang ukon sa bakalan kag buhuan ang iya dulunggan paagi sa dulat. (Ex. 21:5, 6) May kahulugan ang pagbuho sa dulunggan. Sa Hebreo nga lenguahe, ang ideya sang pagkamatinumanon naangot sa tinaga nga may kaangtanan sa pagpamati. Ang kinabubut-on nga nagpaulipon gusto magpadayon sa pag-alagad sing matinumanon sa iya agalon. Magabulig ini sa aton nga mahangpan kon ano ang nadalahig sa aton dedikasyon kay Jehova—ang kinabubut-on nga pagtuman bangod sang gugma sa Dios.

3. Ano ang basihan sang aton dedikasyon sa Dios?

3 Sang nagpabawtismo kita, nagdesisyon na kita nga alagaron si Jehova, ukon mangin ulipon niya. Gindedikar naton ang aton kaugalingon bangod gusto naton tumanon  si Jehova kag himuon ang iya kabubut-on. Wala sing may nagpilit sa aton. Bisan gani ang mga pamatan-on, nagpabawtismo lamang sa tapos sila nakahimo sing personal nga dedikasyon kay Jehova, kag indi para pahamut-an ang ila mga ginikanan. Ang basihan sang Cristianong dedikasyon amo ang gugma sa aton Agalon sa langit, si Jehova. “Amo ini ang kahulugan sang gugma sa Dios,” sulat ni apostol Juan, “nga tumanon naton ang iya mga sugo.”—1 Juan 5:3.

HILWAY PERO ULIPON

4. Ano ang kinahanglan para mangin ‘ulipon sang pagkamatarong’?

4 Nagapasalamat kita kay Jehova nga ginhatagan niya kita sing kahigayunan nga mangin mga ulipon niya! Nahilway kita sa gota sang sala bangod sang aton pagtuo sa halad gawad sang Cristo. Bisan pa indi kita himpit, kinabubut-on kita nga nagpasakop sa awtoridad ni Jehova kag ni Jesus. Ginpaathag ini sing maayo ni Pablo sa iya sulat: “Kabiga ninyo ang inyo kaugalingon nga patay gid sa sala apang buhi sa Dios paagi kay Cristo Jesus.” Dayon nagpaandam sia: “Wala bala kamo makahibalo nga kon padayon ninyo nga ginatugyan ang inyo kaugalingon sa bisan kay sin-o subong mga ulipon sa pagtuman sa iya, mga ulipon kamo niya bangod ginatuman ninyo sia, sang sala man nga nagadul-ong sa kamatayon ukon sang pagkamatinumanon nga nagadul-ong sa pagkamatarong? Apang salamat sa Dios nga kamo anay mga ulipon sang sala apang nangin matinumanon kamo gikan sa tagipusuon sa sahi sang pagtulun-an nga gintugyan kamo. Huo, sanglit ginhilway kamo gikan sa sala, nangin mga ulipon kamo sang pagkamatarong.” (Roma 6:11, 16-18) Talupangda nga ginsambit sang apostol ang ‘pagkamatinumanon gikan sa tagipusuon.’ Gani sang nagdedikar kita kay Jehova, nangin ‘ulipon kita sang pagkamatarong.’

5. Ano nga pagpakig-away ang aton ginapakigbatuan, kag ngaa?

5 May duha ka balagbag nga dapat naton batuan para matuman ang aton dedikasyon. Una, may kaawayon kita kaangay ni Pablo, nga nagsulat: “Nagakalipay gid ako sa kasuguan sang Dios suno sa akon pagkatawo sa sulod, apang nakita ko sa mga bahin sang akon lawas ang isa pa ka kasuguan nga nagapakig-away batok sa kasuguan sang akon hunahuna kag nagadala sa akon nga bihag sa kasuguan sang sala nga yari sa mga bahin sang akon lawas.” (Roma 7:22, 23) Nakapanubli kita sing di-kahimpitan. Gani padayon naton nga ginabatuan ang aton undanon nga mga kailigbon. Si apostol Pedro naglaygay sa aton: “Mangin subong sang hilway nga mga tawo, apang ginahuptan ang inyo kahilwayan, indi subong tabon sang kalainan, kundi subong mga ulipon sang Dios.”—1 Ped. 2:16.

6, 7. Paano ginahimo ni Satanas nga daw makagalanyat ang kalibutan?

6 Ikaduha, nagapakig-away man kita sa kalibutan nga naimpluwensiahan sang mga demonyo. Si Satanas nga manuggahom sang kalibutan, nagataya sang iya mga baslay sa aton para bungkagon ang aton pagkamainunungon kay Jehova kag kay Jesus. Ginatinguhaan niya nga ulipunon kita paagi sa pagsulay sa aton nga magpadala sa iya malain nga impluwensia. (Basaha ang Efeso 6:11, 12.) Ang isa ka paagi ni Satanas amo ang paghimo sini nga kalibutan nga makagalanyat. “Kon ang bisan sin-o nagahigugma sa kalibutan,” paandam ni apostol Juan, “ang gugma sa Amay wala sa iya; bangod ang tanan nga butang sa kalibutan—ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa—indi gikan sa Amay, kundi gikan sa kalibutan.”—1 Juan 2:15, 16.

7 Ang handum nga magmanggaranon nagapangibabaw sa kalibutan. Ginapalig-on ni Satanas ang pagpati nga ang kuarta nagakahulugan sing kalipay. Madamo sing dalagku nga balaligyaan. Ginapasanyog sang mga pasayod ang pagkabuhi nga nasentro sa pagtigayon sing mga pagkabutang kag sa pagpangalipay. Ang mga travel agency nagatanyag sing mga pagbiyahe sa pinasahi  nga mga destinasyon, nga sa masami upod ang mga tawo nga may kalibutanon nga pagtamod. Huo, ginapagua sang tanan sa palibot naton nga kinahanglan naton ang “mas maayo”—pero suno sa mga talaksan sang kalibutan.

8, 9. Ano nga katalagman ang nagaluntad, kag ngaa?

8 Parte sa mga miembro sang kongregasyon sang unang siglo nga nagbaton sang kalibutanon nga pagtamod, si Pedro nagpaandam: “Ginakabig nila nga kalipay ang maluho nga pagkabuhi kon adlaw. Mga higko sila kag mga depekto, nga nagapatuyang sa wala sing pagpugong nga pagkalipay sa ila madaya nga mga panudlo samtang nagasinalusalo upod sa inyo. Kay nagatinikal sila nga wala sing kapuslanan, kag paagi sa mga kailigbon sang unod kag paagi sa lugak nga pamatasan ginahaylo nila ang mga halos makapalagyo sa mga tawo nga nagagawi sing sayop. Samtang nagasaad sila sang kahilwayan sa ila, sila mismo mga ulipon sang pagkamadinulunton. Kay ang bisan sin-o nga madaug sang isa ginaulipon sining isa.”—2 Ped. 2:13, 18, 19.

9 Ang pagbusog sa “kailigbon sang mga mata” wala nagahilway sa isa ka tawo. Sa baylo, naulipon sia sa indi makita nga agalon sining kalibutan, si Satanas nga Yawa. (1 Juan 5:19) Makatalagam gid nga mangin ulipon sang materyalismo bangod mabudlay makapalagyo gikan sa sini.

MAKALILIPAY NGA KARERA

10, 11. Sin-o sa karon ang puntariya gid ni Satanas, kag paano ang mga kurso sa kalibutan nagapabudlay sa ila?

10 Pareho sang ginhimo niya sa Eden, ginapuntariya man ni Satanas karon ang mga indi eksperiensiado. Gusto gid niya atakehon ang mga pamatan-on. Wala nalipay si Satanas kon ang isa ka pamatan-on, ukon ang bisan sin-o, kinabubut-on nga magpaulipon kay Jehova. Gusto sang kaaway sang Dios nga ang tanan nga nagdedikar kay Jehova mag-untat sa pag-alagad sa Iya sing matutom.

11 Balikan naton ang halimbawa sang ulipon nga nagpasugot nga buhuan ang iya dulunggan. Ini nga ulipon masakitan sing makadali, pero magalipas ini, kag magamarka ang permanente nga tanda sang iya pagkaulipon. Ang pagpili sing dalanon nga lain sa mga katubotubo mahimo mabudlay man, kag masakit pa gani sa isa ka pamatan-on. Ginapasanyog ni Satanas ang ideya nga ang karera sa sini nga kalibutan makalipay sa tawo, pero dapat binagbinagon sang mga Cristiano nga importante ang pagbusog sang ila espirituwal nga kinahanglanon. “Malipayon ang mga mahunahunaon sang ila espirituwal nga kinahanglanon,” siling ni Jesus. (Mat. 5:3) Ginahimo sang dedikado nga mga Cristiano ang kabubut-on sang Dios, indi ang kay Satanas. Ang ila kalipay yara sa kasuguan ni Jehova, kag ginapamalandungan nila ini adlaw kag gab-i.  (Basaha ang Salmo 1:1-3.) Pero madamo nga kurso karon ang nagabuhin sang tion sang isa ka alagad ni Jehova sa pagpamalandong kag sa pagbusog sang ila espirituwal nga kinahanglanon.

12. Ano ang pililian sang madamo nga pamatan-on karon?

12 Ang agalon sa sini nga kalibutan mahimo magpabudlay sa kabuhi sang isa ka Cristiano nga ulipon. Sa iya una nga sulat sa mga taga-Corinto, si Pablo namangkot: “Ulipon ka bala sang gintawag ka?” Dayon ginlaygayan niya sila: “Indi ka magkabalaka sa sini; apang kon ikaw mahimo man nga mangin hilway, himusli ang kahigayunan.” (1 Cor. 7:21) Mas gusto naton nga mahilway sa pagkaulipon. Sa iban nga pungsod karon, ginapatuman sang kasuguan nga mag-eskwela ang mga kabataan tubtob sa espesipiko nga edad. Pagkatapos sini, ginapapili ang mga estudyante kon ano ang ila desisyon. Ang pagpadayon sa pag-eskwela nga nagapasanyog sang karera sa sini nga kalibutan nagapugong sa isa nga magsulod sa bug-os tion nga pag-alagad.—Basaha ang 1 Corinto 7:23.

Kay sin-o ka mapaulipon?

EDUKASYON—ANG MAS MATAAS UKON ANG PINAKAMATAAS?

13. Sa ano nga edukasyon makabenepisyo gid ang mga alagad ni Jehova?

13 Si Pablo nagpaandam sa mga Cristiano sa Colosas: “Mag-andam kamo: basi may isa nga magataban sa inyo subong iya natukob paagi sa pilosopiya kag wala pulos nga daya suno sa tradisyon sang mga tawo, suno sa nahauna nga mga butang sang kalibutan kag indi suno kay Cristo.” (Col. 2:8) Ang “pilosopiya kag wala pulos nga daya suno sa tradisyon sang mga tawo” makita karon sa panghunahuna nga ginapasanyog sang madamo nga maalam sa sini nga kalibutan. Sa masami, ang mga naggradwar sa mas mataas nga edukasyon, nga nagapasanyog sa pagtudlo sang mga pilosopiya, may diutay lamang ukon wala gid sing praktikal nga ikasarang, amo nga indi sila handa sa pag-atubang sang matuod nga pangabuhi. Sa kabaliskaran, ang mga alagad ni Jehova nagpili sing edukasyon nga magabulig sa ila sa pagpauswag sing praktikal nga mga ikasarang para mahuptan ang simple nga kabuhi sa pag-alagad sa Dios. Gintuman nila ang laygay ni Pablo kay Timoteo: “Ang matuod, isa ini ka paagi nga makaganar sing daku, ining diosnon nga debosyon nga may pagkakontento. Gani, kon kita may pagkaon, panapton kag pasilungan, mangin kontento na kita sa sini nga mga butang.” (1 Tim. 6:6, 8) Imbes nga magkuha sing sekular nga kurso kag titulo, ang matuod nga mga Cristiano nagasentro sang ila igtalupangod sa pagpakigbahin sing bug-os sa ministeryo.—Basaha ang 2 Corinto 3:1-3.

14. Suno sa Filipos 3:8, paano gintamod ni Pablo ang iya pribilehiyo nga magpaulipon sa Dios kag kay Cristo?

 14 Binagbinaga ang halimbawa ni apostol Pablo. Natudluan sia sa tiilan sang Judiyong manunudlo sang Kasuguan nga si Gamaliel. Ang edukasyon nga natigayon ni Pablo mapaanggid sa isa ka kurso sa unibersidad karon. Pero paano ini gintamod ni Pablo kon ipaanggid sa pribilehiyo nga magpaulipon sa Dios kag kay Cristo? Sia nagsulat: “Ginakabig ko . . . nga kadulaan ang tanan nga butang tungod sa labaw gid nga balor sang ihibalo tuhoy kay Cristo Jesus nga akon Ginuo.” Dayon nagdugang sia: “Tungod sa iya ginbaton ko ang kadulaan sang tanan nga butang kag ginakabig ko ini nga mga basura, agod maagom ko si Cristo.” (Fil. 3:8) Ang ginsiling ni Pablo makabulig sa mga pamatan-on nga Cristiano kag sa ila mahinadlukon sa Dios nga mga ginikanan sa paghimo sing maalamon nga desisyon parte sa edukasyon. (Tan-awa ang mga piktyur.)

BENEPISYO SANG PINAKAMATAAS NGA EDUKASYON

15, 16. Ano nga edukasyon ang ginahatag sang organisasyon ni Jehova, kag ano ang ginapasanyog sini?

15 Ano ang matalupangdan mo sa madamo nga institusyon sang mas mataas nga edukasyon sa sini nga kalibutan? Indi bala nga kon kaisa sila ang ginahalinan sang kagamo sa pulitika kag sa katilingban? (Efe. 2:2) Sa kabaliskaran, ang organisasyon ni Jehova nagahatag sing pinakamataas nga edukasyon sa sulod sang malinong nga Cristianong kongregasyon. Tanan kita may kahigayunan nga makabenepisyo sa Teokratikong Eskwelahan Para sa Ministeryo kada semana. May pinasahi man nga kurso para sa di-minyo nga mga payunir nga lalaki (Bible School for Single Brothers) kag sa mga mag-asawa nga payunir (Bible School for Christian Couples). Ining teokratiko nga paghanas nagabulig sa aton nga tumanon si Jehova, ang aton Agalon sa langit.

16 Makakutkot kita sing bugana nga espirituwal nga bahandi sa Watch Tower Publications Index ukon sa Watchtower Library sa CD-ROM. Ang ginapasanyog sa sini nga edukasyon amo ang pagsimba kay Jehova. Ginatudluan kita sini kon paano buligan ang iban nga magpasag-uli sa Dios. (2 Cor. 5:20) Magabulig man ini sa ila para tudluan ang iban.—2 Tim. 2:2.

ANG PADYA SANG ULIPON

17. Ano ang mga padya sa pagpili sing pinakamataas nga edukasyon?

17 Sa parabola ni Jesus parte sa talanton, ang duha ka matutom nga ulipon ginhatagan sing komendasyon kag nagkalipay upod sa ila agalon bangod gintangduan sila sing dugang nga buluhaton. (Basaha ang Mateo 25:21, 23.) Ang pagpili sing pinakamataas nga edukasyon karon nagahatag sing kalipay kag mga padya. Binagbinaga ang halimbawa ni Michael. Maalam sia sa eskwelahan amo nga gin-istorya sia sang iya mga manunudlo nga puede sia mag-eskwela sa unibersidad. Nakibot gid sila sang nagsiling si Michael nga mas gusto niya magkuha sing bokasyonal nga kurso para masuportahan ang iya pagpayunir. Naghinulsol bala sia? “Ang teokratiko nga edukasyon nga akon nabaton subong payunir—kag sa karon bilang gulang—mapuslanon gid,” siling niya. “Ang mga pagpakamaayo kag mga pribilehiyo nga akon natigayon indi matupungan sang kuarta nga mahimo ko kitaon. Nalipay gid ako nga wala ko ginpili ang mas mataas nga edukasyon.”

18. Ngaa dapat mo pilion ang pinakamataas nga edukasyon?

18 Ang pinakamataas nga edukasyon nagatudlo sa aton sang kabubut-on sang Dios kag nagabulig sa aton nga magpaulipon kay Jehova. Bangod sini, may paglaum kita nga “pagahilwayon . . . gikan sa pagkaulipon sa pagkamadinulunton” kag sa ulihi maagom ang “mahimayaon nga kahilwayan sang mga anak sang Dios.” (Roma 8:21) Labaw sa tanan, amo ini ang pinakamaayo nga paagi para mapakita nga ginahigugma gid naton ang aton Agalon sa langit, si Jehova.—Ex. 21:5.