Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Septiembre 2013

Ang mga Pahanumdom ni Jehova Masaligan

Ang mga Pahanumdom ni Jehova Masaligan

“Ang mga [pahanumdom, NW ] sang GINOO masaligan, kag nagahatag ini sing kaalam sa mga nakulangan.”—SAL. 19:7. Maayong Balita nga Biblia, HPV.

1. Ano nga mga topiko ang regular nga ginabinagbinag sang katawhan sang Dios, kag paano kita makabenepisyo sa pag-usisa sini liwat?

SAMTANG nagahanda ka para sa Pagtinuon sa Ang Lalantawan, nahunahuna mo bala, ‘Daw amo man ini ang gintun-an naton sadto?’ Kon madugay ka na nga nagapakig-upod sa kongregasyon, mahimo natalupangdan mo nga ang pila ka topiko makapila na ginbinagbinag. Ang pagtuon parte sa Ginharian sang Dios, gawad, paghimo sing disipulo nga hilikuton, kag mga kinaiya pareho sang gugma kag pagtuo, regular na nga bahin sang aton espirituwal nga pagkaon. Paagi sa pag-usisa liwat sini nga mga topiko, mabuligan kita nga magpabilin nga mapagros sa aton pagtuo kag “mangin mga manugtuman sing pulong, kag indi mga manugpamati lamang.”—Sant. 1:22.

2. (a) Sa masami, ano ang ginapatuhuyan sang mga pahanumdom sang Dios? (b) Ano ang kinatuhayan sang mga pahanumdom sang Dios sa iya sang tawo?

2 Ang Hebreo nga tinaga nga ginbadbad “pahanumdom” masami nagapatuhoy sa mga kasuguan, mando, kag mga pagsulundan nga ginhatag sang Dios sa iya katawhan. Indi pareho sa kasuguan sang tawo, nga masami kinahanglan bag-uhon kag dugangan, ang mga kasuguan kag mga pagsulundan ni Jehova masaligan gid pirme. Bisan pa ang pila sa sini ginhimo sa isa ka partikular nga tion ukon sitwasyon, wala ini nagasayop kag mapuslanon gihapon. Ang salmista nag-amba: “Ang imo mga [pahanumdom, NW ] matarong sa walay katubtoban.”—Sal. 119:144, HPV.

3, 4. (a) Ano ang nalakip sa mga pahanumdom ni Jehova? (b) Paano makabenepisyo ang mga Israelinhon kon pamatian nila ini?

3 Mahimo natalupangdan mo nga ang mga pahanumdom ni Jehova nagalakip kon kaisa sing mga paandam. Ang pungsod sang Israel pirme ginahatagan sing mga paandam paagi sa mga manalagna sang Dios. Halimbawa, sang manugsulod na ang mga Israelinhon sa Ginsaad nga Duta, si Moises nagpaandam sa ila: “Andami ang inyo kaugalingon basi nga madayaan ang inyo tagiposoon, kag maglipas kamo kag mag-alagad sa iban nga mga dios kag magsimba sa ila, kag ang kaakig sang GINOO magdabdab  batok sa inyo.” (Deut. 11:16, 17) Ginapakita sang Biblia nga naghatag ang Dios sing madamo nga paandam nga makabulig sa iya katawhan.

4 Sa iban pa nga sitwasyon, ginsilingan ni Jehova ang mga Israelinhon nga kahadlukan sia, pamatian ang iya tingog, kag pakabalaanon ang iya ngalan. (Deut. 4:29-31; 5:28, 29) Kon pamatian nila ini nga mga pahanumdom, pat-od nga mabaton nila ang madamo nga pagpakamaayo.—Lev. 26:3-6; Deut. 28:1-4.

ANG REAKSION SANG ISRAEL SA MGA PAHANUMDOM SANG DIOS

5. Ngaa nakig-away si Jehova para kay Hari Ezequias?

5 Sa magamo nga kasaysayan sang Israel, gintuman gid sang Dios ang iya saad. Halimbawa, sang ginsakop ni Hari Senaquerib sang Asiria ang Juda kag ginpahog nga pahalinon si Ezequias subong hari, nagpasilabot si Jehova paagi sa pagpadala sing isa ka anghel. Sa isa lang ka gab-i, ginpamatay sang anghel sang Dios ang “tanan nga gamhanan nga tawo nga isganan” sa hangaway sang Asiria, amo nga napilitan si Senaquerib nga magpauli nga nahuy-an. (2 Cron. 32:21; 2 Hari 19:35) Ngaa nakig-away ang Dios para kay Hari Ezequias? Bangod “nagtapik [si Ezequias] sa GINOO; wala sia magbiya sa pagsonod sa iya, kondi ginbantayan niya ang mga sogo nga ginsogo sang GINOO.”—2 Hari 18:1, 5, 6.

Ang mga pahanumdom ni Jehova nagpahulag kay Josias nga manghikot para sa matuod nga pagsimba (Tan-awa ang parapo 6)

6. Paano si Hari Josias nagsalig kay Jehova?

6 Ang isa pa nga nagtuman sa mga sugo ni Jehova amo si Hari Josias. Walo pa lang sia ka tuig, “naghimo [na] sia sang matarung sa mga mata sang GINOO, . . . kag wala maglipas sa too ukon sa wala.” (2 Cron. 34:1, 2) Ginpakita ni Josias ang iya pagsalig kay Jehova sang gindula niya ang mga diosdios sa pungsod kag ginpasag-uli ang matuod nga pagsimba. Bangod sini, indi lang si Josias ang nakabaton sing mga pagpakamaayo kundi ang bug-os man nga pungsod.—Basaha ang 2 Cronica 34:31-33.

7. Ano ang resulta sang ginbalewala sang Israel ang mga pahanumdom ni Jehova?

7 Pero makapasubo nga ang katawhan sang Dios wala pirme nagsalig sing bug-os sa mga pahanumdom ni Jehova. Sa sulod sang ginatos ka tuig, may tion nga nagatuman sila, may tion man nga wala. Sa masami, sang nagatahaw na ang ila pagtuo, nangin pareho sila sa ginsiling ni apostol Pablo nga “ginaanod-anod sang mga balod kag ginapalidpalid sang tagsa ka hangin sang panudlo.” (Efe. 4:13, 14) Kag subong sang gintagna, sang wala na sila nagsalig sa mga pahanumdom sang Dios, nag-ani sila sing mapait nga mga bunga.—Lev. 26:23-25; Jer. 5:23-25.

8. Ano ang matun-an naton sa halimbawa sang Israel?

8 Sa ano nga paagi kita makabenepisyo sa halimbawa sang Israel? Kaangay nila, ang mga alagad sang Dios subong nagabaton man  sing laygay kag disiplina. (2 Ped. 1:12) Ang Pulong sang Dios nagapahanumdom sa aton sa tagsa ka tion nga ginabasa naton ini. Bangod may kahilwayan kita sa pagpili, makadesisyon kita kon tumanon naton ang mga panuytoy ni Jehova ukon himuon ang ginahunahuna naton nga matarong. (Hulu. 14:12) Binagbinagon naton ang pila ka rason kon ngaa makasalig kita sa mga pahanumdom ni Jehova kag kon paano kita makabenepisyo sa pagpamati sa sini.

MAGPASAKOP SA DIOS KAG MAGKABUHI

9. Sang ara sa kamingawan ang mga Israelinhon, paano ginpakita ni Jehova nga ginasuportahan niya sila?

9 Sang ang mga Israelinhon handa na sa ila pagpanglakaton sa “makahalangawa nga kamingawan,” nga naglawig sing 40 ka tuig, wala sila ginhatagan ni Jehova sing espesipiko nga mga detalye kon paano niya sila giyahan, amligan, kag atipanon. Pero pila ka beses niya ginpakita nga makasalig sila sa iya kag sa iya mga instruksion. Paagi sa haligi nga panganod kon adlaw kag haligi nga kalayo kon gab-i, ginpahanumdom ni Jehova ang mga Israelinhon nga ginagiyahan niya sila samtang nagatabok sa sinang mabudlay nga kamingawan. (Deut. 1:19; Ex. 40:36-38) Gin-aman man niya ang ila mga kinahanglanon. “Ang ila mga panapton wala magdaan kag ang ila mga tiil wala magbanug.” Huo, “wala sila makulangi sing bisan ano.”—Neh. 9:19-21.

10. Paano ginagiyahan ni Jehova ang iya katawhan subong?

10 Ang mga alagad sang Dios subong ara na sa ganhaan sang matarong nga bag-ong kalibutan. Nagasalig bala kita kay Jehova nga iaman niya ang aton mga kinahanglanon agod makalampuwas sa nagahilapit nga “dakung kapipit-an”? (Mat. 24:21, 22; Sal. 119:40, 41) Matuod, si Jehova wala nagabutang sing haligi nga panganod kag kalayo para giyahan kita pasulod sa bag-ong kalibutan. Pero ginagamit niya ang iya organisasyon para buligan kita nga magpabilin nga alisto. Halimbawa, ginapahanumdom kita pirme nga pabakuron ang aton espirituwalidad paagi sa personal nga pagbasa sing Biblia, Pangpamilya nga Pagsimba, kag regular nga pagtambong sa mga miting kag pagpakigbahin sa ministeryo. Naghimo na bala kita sing mga pagbag-o para matuman ini nga mga instruksion? Ang paghimo sini magabulig sa aton nga makatigayon sing pagtuo nga kinahanglan para maluwas padulong sa bag-ong kalibutan.

Paagi sa pag-aplikar sa mga pahanumdom ni Jehova, mangin luwas sa peligro ang aton mga Kingdom Hall (Tan-awa ang parapo 11)

11. Paano ginapakita sang Dios ang iya pag-ulikid sa aton?

11 Luwas sa pagbulig sa aton nga magpabilin nga nagabugtaw sa espirituwal, ang mga pahanumdom makabulig man sa aton adlaw-adlaw nga mga hilikuton. Ang mga halimbawa sini amo ang pagpabilin nga balanse sa aton pagtamod sa materyal nga mga butang kag paghupot sang simple nga mata para mabuhinan ang kabalaka. Makabenepisyo man kita sa mga panuytoy parte sa aton pamayo kag pamustura, pagpili sing maayo nga kalingawan, kag pagkuha sing nagakaigo nga edukasyon. May mga pahanumdom man parte sa kon paano mangin luwas sa katalagman ang aton balay, salakyan, Kingdom Hall, kag kon paano maghanda sa tion sang mga emerhensia. Ini nga laygay nagapakita nga ang Dios nagaulikid sa aton kaayuhan.

ANG MGA PAHANUMDOM NAKABULIG SA MGA CRISTIANO SADTO NGA MAGPABILIN NGA MATUTOM

12. (a) Ano ang isa ka punto nga sulitsulit nga ginsiling ni Jesus sa iya mga disipulo? (b) Ano nga buhat sang pagkamapainubuson ang wala gid malimtan ni Pedro, kag paano ini dapat makaapektar sa aton?

12 Sang unang siglo, ang katawhan sang Dios pirme ginapahanumdom. Sulitsulit nga ginsilingan ni Jesus ang iya mga disipulo nga dapat sila mangin mapainubuson. Pero wala lamang niya ini ginsiling, kundi ginpakita man sa buhat. Sa iya katapusan nga adlaw sa duta subong tawo, gintipon ni Jesus ang mga apostoles para saulugon ang Paskua. Samtang nagakaon ang iya mga apostoles, nagtindog si Jesus kag ginhinawan ang ila mga tiil—isa ka buhat nga masami ginahimo sang mga ulipon. (Juan 13:1-17) Ang  ginhimo ni Jesus indi gid malipatan sang iya mga apostoles. Mga 30 ka tuig sang ulihi, si apostol Pedro, nga ara man sa sadto nga panihapon, naghatag sing laygay sa iya mga masigkatumuluo parte sa pagkamapainubuson. (1 Ped. 5:5) Ang halimbawa ni Jesus dapat magpahulag sa aton tanan nga mangin mapainubuson sa aton pagpakig-angot sa kada isa.—Fil. 2:5-8.

13. Ano ang ginpahanumdom ni Jesus sa iya mga disipulo nga dapat nila pauswagon?

13 Ang isa pa ka punto nga pirme ginabinagbinag ni Jesus sa iya mga disipulo amo ang pagtigayon sing mabakod nga pagtuo. Sang napaslawan sila nga tabugon ang demonyo sa isa ka bata, ginpamangkot sang mga disipulo si Jesus: “Ngaa indi namon matabog ini?” Si Jesus nagsabat: “Bangod sang inyo diutay nga pagtuo. Kay sa pagkamatuod nagasiling ako sa inyo, Kon may pagtuo kamo kaangay sa kadakuon sang lamigas sang mustasa, . . . wala sing imposible sa inyo.” (Mat. 17:14-20) Sa bug-os nga ministeryo ni Jesus, gintudluan niya ang iya mga disipulo nga importante ang pagtuo. (Basaha ang Mateo 21:18-22.) Ginakalitan bala naton ang kahigayunan nga mapabakod ang aton pagtuo paagi sa makapalig-on nga instruksion sa aton mga kombension, asembleya, kag mga miting? Indi lamang ini makalilipay nga mga pagtilipon; kahigayunan man ini nga mapakita ang aton pagsalig kay Jehova.

14. Ngaa importante nga palambuon naton ang gugma nga pareho sang ginpakita ni Cristo?

14 Ang Cristianong Griegong Kasulatan madamo sing pahanumdom kon paano naton mapakita ang gugma sa isa kag isa. Si Jesus nagsiling nga ang ikaduha nga pinakadaku nga sugo amo ang ‘paghigugma sa isigkatawo subong sang kaugalingon.’ (Mat. 22:39) Ang utod sa iloy ni Jesus nga si Santiago nagtawag man sa gugma subong “harianon nga kasuguan.” (Sant. 2:8) Si apostol Juan nagsulat: “Mga hinigugma, nagasulat ako sa inyo, indi sang isa ka bag-o nga sugo, kundi sang isa ka daan nga sugo nga nabaton na ninyo kutob pa sa ginsuguran.” (1 Juan 2:7, 8) Ano ang ginapatuhuyan ni Juan nga “daan nga sugo”? Ginapatuhuyan niya ang sugo nga maghigugmaanay. “Daan” ini kay ginhatag ini ni Jesus mga dinekada na ang nagligad, “kutob pa sa ginsuguran.” Pero “bag-o” man ini kay ginapatuman sini ang gugma nga may pagsakripisyo, nga mahimo kinahanglan gid sang mga disipulo sa pag-atubang sa bag-o nga mga kahimtangan. Subong mga disipulo ni Cristo, indi bala nga ginaapresyar gid naton ang mga paandam nga makabulig sa aton nga magbantay batok sa maiyaiyahon nga espiritu sini nga kalibutan, nga mahimo magdula sang aton gugma sa aton isigkatawo?

15. Ano ang panguna nga hilikuton ni Jesus?

15 Si Jesus nagpakita sing personal nga interes sa mga tawo. Makita naton ang iya mahigugmaon nga pag-ulikid sang gin-ayo niya ang mga may balatian kag mga may kasablagan, kag sang ginbanhaw niya ang mga patay.  Apang indi ang pagpang-ayo ang panguna nga hilikuton ni Jesus. Ang iya pagbantala kag pagpanudlo may mas nagapadayon nga epekto sa kabuhi sang mga tawo. Paano? Halimbawa, nahibaluan naton nga ang mga gin-ayo kag ginbanhaw ni Jesus sang unang siglo nagtigulang man kag napatay sang ulihi, pero yadtong nagtuman sa mensahe nga iya ginbantala may kahigayunan nga magkabuhi sing walay katapusan.—Juan 11:25, 26.

16. Daw ano na kasangkad ang pagbantala sang Ginharian kag paghimo sing disipulo nga hilikuton subong?

16 Ang pagbantala nga hilikuton nga ginsugdan ni Jesus sang unang siglo ginahimo subong sing mas masangkad pa. Huo, ginsugo ni Jesus ang iya mga disipulo: “Busa lakat kamo kag maghimo sang mga disipulo sa mga tawo sang tanan nga pungsod.” (Mat. 28:19) Nahimo gid nila ini, kag makasiling kita nga nahimo man naton ini! Sobra sa pito ka milyon ka aktibo nga Saksi ni Jehova ang mapisan nga nagabantala sang Ginharian sang Dios sa sobra 230 ka kadutaan, kag minilyon ang regular nila nga ginatun-an sa Biblia. Ini nga pagbantala nagapamatuod nga nagakabuhi na kita sa katapusan nga mga adlaw.

MAGSALIG KAY JEHOVA SUBONG

17. Ano nga laygay ang ginhatag nanday Pablo kag Pedro?

17 Maathag nga ang mga pahanumdom nakabulig sa mga Cristiano sadto para magpabilin nga mabakod ang ila pagtuo. Hunahunaa ang pagpalig-on nga nabaton ni Timoteo sang si apostol Pablo, nga bilanggo sadto sa Roma, nagsiling sa iya: “Padayon nga [sunda] ang sulundan sang makapapagros nga mga pulong nga nabatian mo sa akon.” (2 Tim. 1:13) Sa tapos mapalig-on ni apostol Pedro ang iya masigka-Cristiano nga magpalambo sing mga kinaiya pareho sang pagbatas, utudnon nga pagpalangga, kag pagpugong sa kaugalingon, sia nagsiling: “Handa ako pirme nga pahanumdumon kamo sini nga mga butang, bisan pa nga nahibaluan ninyo ini kag malig-on kamo sa kamatuoran.”—2 Ped. 1:5-8, 12.

18. Paano gintamod sang mga Cristiano sang unang siglo ang mga pahanumdom?

18 Huo, ang mga sulat nanday Pablo kag Pedro nagapakita sang “mga pulong nga ginsiling anay sang balaan nga mga manalagna.” (2 Ped. 3:2) Naakig bala ang mga kauturan sang unang siglo sa sini nga mga panuytoy? Wala, kay pamatuod ini sang gugma sang Dios, nga nagbulig sa ila nga ‘padayon nga makabaton sing kapin nga wala tupong nga kaayo kag ihibalo sa aton Ginuo kag Manluluwas nga si Jesucristo.’—2 Ped. 3:18.

19, 20. Ngaa dapat kita magsalig sa mga pahanumdom ni Jehova, kag paano kita makabenepisyo sa paghimo sini?

19 Sa karon, madamo kita sing rason nga magsalig sa mga pahanumdom ni Jehova, nga makita sa iya wala nagasayop nga Pulong, ang Biblia. (Basaha ang Josue 23:14.) Mabasa naton diri ang mga pagpakig-angot sang Dios sa indi himpit nga katawhan sa sulod sang linibo ka tuig. Ini nga kasaysayan ginsulat para makabenepisyo kita. (Roma 15:4; 1 Cor. 10:11) Nakita naton ang katumanan sang tagna sang Biblia. Ang tagna mapaanggid sa mga pahanumdom nga ginsiling sing abanse. Halimbawa, minilyon ang nagatipon sa matuod nga pagsimba kay Jehova, subong sang gintagna nga mahanabo sa “olihing mga adlaw.” (Isa. 2:2, 3) Ang nagalain nga kahimtangan sang kalibutan katumanan man sang tagna sang Biblia. Kag subong sang ginsambit na, ang masangkad nga pagbantala karon sa bilog nga kalibutan katumanan gid sang ginsiling ni Jesus.—Mat. 24:14.

20 Napakita sang aton Manunuga nga masaligan gid naton sia. Nagabenepisyo bala kita sa sini? Dapat kita magsalig sa iya mga pahanumdom. Amo sini ang ginhimo ni Rosellen. Nagsiling sia: “Samtang nagasalig ako sing bug-os kay Jehova, labi ko nga nabatyagan ang iya gugma nga nagasakdag kag nagapabakod sa akon.” Kabay nga kita man makabenepisyo sa pagtuman sa mga pahanumdom ni Jehova.