Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Agosto 2013

Mga Pamangkot Gikan sa mga Bumalasa

Mga Pamangkot Gikan sa mga Bumalasa

Nagakaigo bala para sa Cristiano nga mga ginikanan nga mapungko sa tupad sang ila nadisfellowship nga bata sa tion sang mga miting sa kongregasyon?

Wala sing problema kon diin mapungko ang isa ka disfellowship sa Kingdom Hall. Ginapalig-on sini nga magasin ang Cristiano nga mga ginikanan nga buligan sa espirituwal ang ila nadisfellowship nga bata nga nagaistar pa sa ila puluy-an, kon nagakaigo nga himuon ini. Subong sang ginasiling sa pahina 19 kag 20 sang Nobiembre 15, 1988 nga Ang Lalantawan, mahimo pa gani tun-an sa Biblia sang mga ginikanan ang isa ka disfellowship nga menor de edad nga nagaistar gihapon sa ila puluy-an. Paagi sini, mahimo matigayon sang bata ang pagpalig-on nga kinahanglanon sa pagtadlong sang iya dalanon.

Kon tuhoy sa pagpungko sa Kingdom Hall, daw mapaabot gid naton nga mapungko ang disfellowship nga menor de edad sa tupad sang iya mga ginikanan. Bangod wala man ginapatuman nga mapungko sa likod ang isa ka disfellowship, wala man sing problema kon mapungko ang isa ka disfellowship nga bata sa tupad sang iya mga ginikanan. Samtang ginaatipan sang mga ginikanan ang ila bata sa espirituwal, mahimo nga luyag gid nila pat-uron nga makabenepisyo sia sing maayo sa mga miting. Gani makabulig gid kon papungkuon nila ang bata sa ila tupad sa baylo nga pabay-an sia.

Pero paano kon ang isa ka disfellowship nga bata wala na nagaistar upod sa iya mga ginikanan? Buot bala silingon, indi na sia puede katupad sa ila? Sang una, maathag nga ginsiling sini nga magasin kon ano ang nagakaigo nga pagtamod nga dapat huptan sang isa ka Cristiano parte sa pagpakig-upod sa nadisfellowship nga kapamilya nga wala na nagaistar sa ila puluy-an. * Pero, ang pagpungko sang isa ka disfellowship sa tupad sang iya pamilya sa tion sang miting tuhay gid sa indi kinahanglanon nga pagpakig-upod sa iya sang iya pamilya. Kon ang matutom nga mga miembro sang pamilya nagapakita sing nagakaigo nga panimuot sa ila disfellowship nga kapamilya kag nagatinguha nga sundon ang laygay sang Biblia parte sa pagpakig-upod sa iya, wala sing dapat kabalak-an.—1 Cor. 5:11, 13; 2 Juan 11.

Indi dapat pagkabalak-an kon ang isa ka disfellowship magpungko sa tupad sang iya pamilya ukon sa kay bisan sin-o nga miembro sang kongregasyon, basta nagagawi lang sia sing nagakaigo. Ang pagdumili kon diin mapungko ang isa mahimo magresulta sa mga problema, depende sa mga kahimtangan. Kon ang tanan nga tumalambong, lakip na ang matutom nga mga kapamilya, nagatinguha nga sundon ang mga prinsipio sa Biblia parte sa pag-disfellowship, kag indi ini mangin kasandaran sa mga kauturan, wala sing problema kon diin mapungko ang mga nagatambong sa miting. *

^ par. 5 Tan-awa ang The Watchtower, Septiembre 15, 1981, pahina 29 kag 30.

^ par. 6 Ginbag-o sini ang ginsiling sa The Watchtower sang Abril 1, 1953, pahina 223.