Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2013

“Sin-o Gid ang Matutom kag Mainandamon nga Ulipon?”

“Sin-o Gid ang Matutom kag Mainandamon nga Ulipon?”

“Sin-o gid ang matutom kag mainandamon nga ulipon nga gintangdo sang iya agalon sa pagdumala sa iya panimalay?”—MAT. 24:45.

1, 2. Paagi sa ano nga palaagyan ginapakaon kita ni Jesus karon, kag ngaa importante nga makilala naton ini?

“MGA utod, indi ko na maisip kon pila ka beses nga nagbalhag kamo sing mga artikulo nga nagabinagbinag sang mga butang nga kinahanglan ko gid sa sina mismo nga tion.” Amo ini ang ginsiling sang isa ka sister sa iya sulat bilang pagpasalamat sa mga kauturan nga nagatrabaho sa ulong talatapan. Amo man bala sini ang imo nabatyagan? Madamo sa aton ang nakabatyag sini. Matingala pa bala kita? Indi gid.

2 Ang suno sa tion nga espirituwal nga pagkaon nga aton natigayon pamatuod nga ginatuman ni Jesus, ang Ulo sang kongregasyon, ang iya saad nga pakaunon kita. Sin-o ang ginagamit niya sa paghimo sini? Sang ginsugid niya ang mga tanda sang iya presensia, si Jesus nagsiling nga gamiton niya “ang matutom kag mainandamon nga ulipon” sa paghatag sing “pagkaon sa nagakaigo nga tion” sa iya panimalay. * (Basaha ang Mateo 24:45-47.) Ining matutom nga ulipon amo ang palaagyan nga gamiton ni Jesus para pakaunon ang iya matuod nga mga sumulunod sa tion sang katapusan. Importante nga makilala naton ang matutom nga ulipon. Ang aton espirituwal nga kapagros kag kaangtanan sa Dios nagadepende sa sini nga palaagyan.—Mat. 4:4; Juan 17:3.

3. Ano ang ginsiling sang aton mga publikasyon parte sa ilustrasyon sang matutom nga ulipon?

3 Gani, paano naton hangpon ang ilustrasyon ni Jesus parte sa matutom nga ulipon? Sang una, amo sini ang ginsiling sa aton mga publikasyon: Sang Pentecostes 33 C.E., si Jesus nagtangdo sang matutom nga ulipon para sa iya panimalay. Ang ulipon nagarepresentar sang tanan nga hinaplas nga Cristiano sa duta subong isa ka grupo sa bisan ano nga tion sugod sadto. Ang panimalay nagapatuhoy sa mga hinaplas subong mga indibiduwal. Sang 1919, gintangdo ni Jesus ang matutom nga ulipon “sa tanan niya nga pagkabutang”—ang tanan niya nga intereses sang Ginharian sa duta. Pero, paagi sa maukod nga pagtuon kag pagpamalandong upod ang pangamuyo, ang aton paghangop sa ginsiling ni Jesus parte sa matutom kag mainandamon  nga ulipon kinahanglan athagon. (Hulu. 4:18) Usisaon naton ang ilustrasyon kag kon paano kita nadalahig sa sini, sa langit man ukon sa duta ang aton paglaum.

SAN-O NATUMAN ANG ILUSTRASYON?

4-6. Ngaa makasiling kita nga ang ilustrasyon ni Jesus parte sa matutom nga ulipon nagsugod nga matuman pagkatapos lamang sang 1914?

4 Ang konteksto sang ilustrasyon parte sa matutom kag mainandamon nga ulipon nagapakita nga wala ini natuman sugod sang Pentecostes 33 C.E., kundi sa tion sang katapusan. Usisaon naton ang Kasulatan kon ngaa.

5 Ang ilustrasyon parte sa matutom nga ulipon bahin sang tagna ni Jesus tuhoy sa “tanda sang [iya] presensia kag sang katapusan sang sistema sang mga butang.” (Mat. 24:3) Ang una nga bahin sang tagna nga narekord sa Mateo 24:4-22, may duha ka katumanan—una, sugod sang 33 C.E. tubtob 70 C.E., kag ikaduha, sa aton tion sa karon. Buot bala silingon sini nga ang ginsiling ni Jesus parte sa matutom nga ulipon may duha man ka katumanan? Indi.

6 Sa pag-umpisa sang iya pinamulong nga narekord sa Mateo 24:29, panguna nga nagkonsentrar si Jesus sa mga butang nga matabo sa aton adlaw. (Basaha ang Mateo 24:30, 42, 44.) Tuhoy sa matabo sa dakung kapipit-an, nagsiling sia nga “makita [sang katawhan] ang Anak sang tawo nga nagakari sa mga panganod sa langit.” Dayon, para sa mga nagakabuhi sa katapusan nga mga adlaw, ginpalig-on niya sila nga magbantay, paagi sa pagsiling: “Wala kamo makahibalo kon ano nga adlaw magakari ang inyo Ginuo,” kag “Sa oras nga wala ninyo ginahunahuna, magaabot ang Anak sang tawo.” * Sa sini nga konteksto—sang nagasugid sia parte sa mga hitabo sa katapusan nga mga adlaw—ginsaysay ni Jesus ang ilustrasyon parte sa matutom nga ulipon. Gani, makasiling kita nga ang iya ginsiling parte sa matutom nga ulipon nagsugod nga matuman pagkatapos lamang nga nag-umpisa ang katapusan nga mga adlaw sang 1914. Makatarunganon gid ini. Ngaa?

7. Anong importante nga pamangkot ang nag-utwas samtang nagasugod ang tig-alani, kag ngaa?

7 Hunahunaa sing makadali ang pamangkot: “Sin-o gid ang matutom kag mainandamon nga ulipon?” Sang unang siglo, halos wala sing rason nga mamangkot parte sini. Subong sang natun-an naton sa nagligad nga artikulo, ang mga apostoles makahimo sing mga milagro kag makapaliton sang milagruso nga mga dulot bilang pamatuod sang pagsakdag sang Dios. (Binu. 5:12) Gani, indi na kinahanglan pamangkuton pa kon sin-o gid ang gintangdo ni Cristo nga manguna. Pero sang 1914, tuhay gid ang kahimtangan. Nagsugod ang tig-alani sa sina nga tuig. Nag-abot na gid man ang tion nga painon ang mga gamhon gikan sa mga trigo. (Mat. 13:36-43) Samtang nagasugod ang tion sang pagpangani, nag-utwas ang isa ka importante nga pamangkot: Bangod madamo sa butig nga Cristiano ang nagapangangkon nga mga sumulunod ni Jesus, paano makilal-an ang mga trigo—ang hinaplas nga mga Cristiano? Ang ilustrasyon ni Jesus parte sa matutom nga ulipon nagahatag sing sabat. Ang hinaplas nga mga sumulunod ni Cristo amo ang pakaunon sing maayo sa espirituwal.

SIN-O ANG MATUTOM KAG MAINANDAMON NGA ULIPON?

8. Ngaa nagakaigo lang nga ang matutom nga ulipon ginahuman sang hinaplas nga mga Cristiano?

8 Ang matutom nga ulipon dapat ginahuman sang hinaplas nga mga Cristiano sa duta. Ginatawag sila nga “harianon nga mga saserdote,” kag ginsugo sila nga ipahayag “ ‘sing lapnag ang pagkahalangdon’ sang isa nga nagtawag sa [ila] gikan sa kadudulman pakadto sa iya makatilingala nga kapawa.” (1 Ped. 2:9) Nagakaigo lang nga ang mga miembro sinang “harianon nga mga saserdote” amo ang magatudlo sa ila masigkatumuluo sing kamatuoran.—Mal. 2:7; Bug. 12:17.

9. Ang matutom bala nga ulipon ginahuman sang tanan nga hinaplas sa duta? Ipaathag.

9 Ang matutom bala nga ulipon ginahuman sang tanan nga hinaplas sa duta? Indi. Ang matuod indi tanan nga hinaplas sa duta may  papel sa pag-aman sing espirituwal nga pagkaon sa mga masigkatumuluo sa bilog nga kalibutan. Sa tunga sang mga trigo amo ang hinaplas nga mga utod nga nagaalagad subong ministeryal ukon gulang sa ila kongregasyon. Nagatudlo sila sa mga pamalay kag sa ila kongregasyon, kag matutom nga nagasakdag sa panuytoy sang ulong talatapan. Pero wala sila sing bahin sa pag-aman sang espirituwal nga pagkaon sa mga kauturan sa bug-os nga duta. Isa pa, lakip sa mga hinaplas amo ang mapainubuson nga mga utod nga babayi, nga wala gid nagaagaw sing papel sa pagtudlo sa kongregasyon.—1 Cor. 11:3; 14:34.

10. Sin-o ang matutom kag mainandamon nga ulipon?

10 Kon amo, sin-o ang matutom kag mainandamon nga ulipon? Subong pagsunod sa pamaagi ni Jesus sa pagpakaon sa madamo paagi sa pila ka tawo, ina nga ulipon ginahuman sang isa ka gamay nga grupo sang hinaplas nga mga utod nga lalaki nga direkta nga nagapakigbahin sa paghanda kag pagpanagtag sang espirituwal nga pagkaon sa tion sang presensia ni Cristo. Sa katapusan nga mga adlaw, ang hinaplas nga mga utod nga nagahuman sang matutom nga ulipon magkaupod nga nagaalagad sa ulong talatapan. Sining mga dekada, ina nga ulipon nakilal-an subong Nagadumala nga Hubon sang mga Saksi ni Jehova. Pero talupangda nga ang tinaga nga “ulipon” sa ilustrasyon ni Jesus pang-isahan, nga nagapahangop nga isa ini ka grupo nga ulipon. Gani, nagadesisyon ang Nagadumala nga Hubon subong isa ka grupo.

SIN-O ANG PANIMALAY?

11, 12. (a) Anong duha ka pagtangdo ang nabaton sang matutom kag mainandamon nga ulipon? (b) San-o gintangdo ni Jesus ang matutom nga ulipon sa pagdumala sa iya panimalay, kag sin-o ang iya ginpili?

11 Talalupangdon nga sa ilustrasyon ni Jesus, ang matutom kag mainandamon nga ulipon nakabaton sing duha ka magkatuhay nga pagtangdo. Ang una amo ang pagdumala sa panimalay; ang ikaduha amo ang pagdumala sa tanan nga pagkabutang sang agalon. Bangod ang ilustrasyon natuman lamang sa tion sang katapusan, ang duha ka pagtangdo matuman pagkatapos sang presensia ni Jesus subong hari nga nagsugod sang 1914.

12 San-o gintangdo ni Jesus ang matutom nga ulipon sa pagdumala sa iya panimalay? Agod masabat ini, mabalik kita sa 1914—nga amo ang pagsugod sang tig-alani. Natun-an naton kaina nga sa sina nga tion madamo nga grupo ang nagapangangkon subong mga Cristiano. Sa diin nga grupo si Jesus magapili kag magatangdo sang matutom nga ulipon?  Ina nga pamangkot ginsabat pagkatapos nga nag-abot si Jesus kag ang iya Amay sa pag-usisa sa templo, ukon ang espirituwal nga kahimusan para sa pagsimba, halin sang 1914 tubtob sa maaga nga bahin sang 1919. * (Mal. 3:1) Nalipay sila nga may isa ka gamay nga grupo sang matutom nga mga Estudyante sang Biblia nga nagapakita nga ang ila tagipusuon nagasakdag kay Jehova kag sa iya Pulong. Siempre, kinahanglan pa sila tinluan, pero mapainubuson nila nga ginbaton ang malip-ot nga tion sang pagtilaw kag pag-ulay. (Mal. 3:2-4) Yadtong matutom nga mga Estudyante sang Biblia amo gid ang matuod nga Cristiano nga trigo. Sang 1919, ang tion sang espirituwal nga pagpasag-uli, nagpili si Jesus sing kalipikado nga hinaplas nga mga utod sa tunga nila para mangin matutom kag mainandamon nga ulipon kag nagtangdo sa ila nga magdumala sa iya panimalay.

13. Sin-o ang nalakip sa panimalay, kag ngaa?

13 Sin-o naman ang panimalay? Sila amo ang mga pakaunon. Sa maaga nga bahin sang katapusan nga mga adlaw, ang panimalay nagapatuhoy sa tanan nga hinaplas. Sang ulihi, ang panimalay nagalakip sa dakung kadam-an sang iban nga mga karnero. Ang iban nga mga karnero amo karon ang kalabanan nga nagahuman sang “isa ka panong” sa idalom sang pagdumala ni Cristo. (Juan 10:16) Ining duha ka grupo pareho nga nagabenepisyo sa suno sa tion nga espirituwal nga pagkaon nga ginaaman sang matutom nga ulipon. Kamusta naman ang mga miembro sang Nagadumala nga Hubon nga nagahuman karon sang matutom kag mainandamon nga ulipon? Ini nga mga utod kinahanglan man pakaunon sa espirituwal. Gani, mapainubuson nila nga ginabaton nga subong mga indibiduwal, bahin sila sang panimalay pareho sang iban nga matuod nga sumulunod ni Jesus.

Sa langit man ukon sa duta ang aton paglaum, tanan kita bahin sang panimalay kag nagakinahanglan sang suno sa tion nga espirituwal nga pagkaon

14. (a) Ano nga responsibilidad ang gintugyan sa matutom nga ulipon, kag ano ang nalakip sa sini? (b) Ano ang ginpaandam ni Jesus sa matutom kag mainandamon nga ulipon? (Tan-awa ang kahon nga “Kon ang Malaut nga Ulipon . . . ”)

14 Ginhatagan ni Jesus sing mabug-at nga responsibilidad ang matutom kag mainandamon nga ulipon. Sang tion sang Biblia, ang ginasaligan nga ulipon ukon tulugyanan amo ang nagadumala sang panimalay. (Luc. 12:42) Gani ang matutom kag mainandamon nga ulipon may responsibilidad nga dumalahan ang panimalay sang pagtuo. Nagalakip ini sa pagtatap sang materyal nga mga pagkabutang, pagbantala, mga programa sa asembleya kag kombension, kag pagbalhag sang mga literatura sa Biblia para magamit sa ministeryo, personal nga pagtuon, kag sa kongregasyon. Ang panimalay nagasalig sa tanan nga espirituwal  nga aman nga ginapanagtag sang grupo nga ulipon.

PAGTANGDO SA TANAN NGA PAGKABUTANG SANG AGALON—SAN-O?

15, 16. San-o itangdo ni Jesus sa matutom nga ulipon ang tanan niya nga pagkabutang?

15 San-o himuon ni Jesus ang pagtangdo “sa tanan niya nga pagkabutang”? Si Jesus nagsiling: “Malipayon ini nga ulipon kon masapwan sia sang iya agalon nga nagahimo sini sa iya pag-abot! Sa pagkamatuod nagasiling ako sa inyo, Tangduan niya sia nga magdumala sa tanan niya nga pagkabutang.” (Mat. 24:46, 47) Talupangda nga ginhimo ni Jesus ang ikaduha nga pagtangdo pagkatapos nga nag-abot sia kag nasapwan niya nga ina nga ulipon “nagahimo sini,” buot silingon, matutom nga nagaaman sang espirituwal nga pagkaon. Gani may ulot sang tion sa duha ka pagtangdo. Para mahangpan kon paano kag san-o gintangdo ni Jesus ang ulipon sa pagdumala sa tanan niya nga pagkabutang, kinahanglan mahibaluan naton kon san-o sia magaabot kag kon ano ang nalakip sa iya mga pagkabutang.

16 San-o magaabot si Jesus? Ang sabat makita sa konteksto. Dumduma nga sang nagsambit ang una nga mga bersikulo nga si Jesus “magakari,” ang tinaga nagapatuhoy sa tion nga magaabot sia sa pagpahayag kag pagpatuman sang paghukom sa katapusan sining sistema. * (Mat. 24:30, 42, 44) Gani, ang “pag-abot,” ukon ‘pagkari,’ nga ginsambit sa ilustrasyon parte sa matutom nga ulipon mahanabo sa dakung kapipit-an.

17. Ano ang nalakip sa mga pagkabutang ni Jesus?

17 Ano ang nalakip “sa tanan . . . nga pagkabutang” ni Jesus? Ang paggamit ni Jesus sang tinaga nga “tanan” nagapakita nga wala lang ini nagapatuhoy sa iya mga pagkabutang sa duta. Ang matuod, may daku sia nga awtoridad sa langit. “Ginhatag sa akon ang bug-os nga awtoridad sa langit kag sa duta,” siling niya. (Mat. 28:18; Efe. 1:20-23) Ang iya mga  pagkabutang nagalakip karon sang Mesianikong Ginharian, nga ginagamhan niya sugod sang 1914 kag ipaambit man niya ini nga paggahom sa iya hinaplas nga mga sumulunod.—Bug. 11:15.

18. Ngaa malipay si Jesus sa paghimo sing pagtangdo sa tanan niya nga pagkabutang?

18 Base sa aton mga nabinagbinag, ano ang aton mahinakop? Kon magkari si Jesus sa paghukom sa dakung kapipit-an, masapwan niya ang matutom nga ulipon nga mainunungon nga nagaaman sing suno sa tion nga espirituwal nga pagkaon sa iya panimalay. Gani malipay sia sa pagtangdo sa sina ulipon sang tanan niya nga pagkabutang. Ang mga nagahuman sang matutom nga ulipon makatigayon sini nga pagtangdo kon mabaton nila ang ila padya sa langit, nga maggahom kaupod ni Cristo.

19. Mas daku bala ang padya sa langit sang matutom nga ulipon sangsa iban nga hinaplas? Ipaathag.

19 Mas daku bala ang padya sa langit sang matutom nga ulipon sangsa iban nga hinaplas? Indi. Ang padya nga ginsaad sa isa ka gamay nga grupo mahimo matigayon man sa ulihi sang iban. Halimbawa, binagbinaga ang ginsiling ni Jesus sa iya 11 ka matutom nga apostoles sang gab-i antes sia napatay. (Basaha ang Lucas 22:28-30.) Nagsaad si Jesus nga inang gamay nga grupo makatigayon sing padya bangod sang ila katutom. Magahari sila kaupod niya. Pero mga tinuig sang ulihi, nagsiling sia nga ang tanan nga 144,000 magalingkod sa trono kag magagahom kaupod niya. (Bug. 1:1; 3:21) Sing kaanggid, subong ginsiling sa Mateo 24:47, nagsaad sia nga may isa ka gamay nga grupo sang mga lalaki—ang hinaplas nga mga utod nga nagahuman sang matutom nga ulipon—nga tangduan sa tanan niya nga pagkabutang. Ang tanan nga 144,000 makaupod ni Jesus sa pagtigayon sing daku nga awtoridad sa langit.—Bug. 20:4, 6.

Ang tanan nga 144,000 makaupod ni Jesus sa pagtigayon sing daku nga awtoridad sa langit (Tan-awa ang parapo 19)

20. Ngaa nagtangdo si Jesus sang matutom nga ulipon, kag ano ang imo determinasyon?

20 Paagi sa matutom kag mainandamon nga ulipon, ginsunod ni Jesus ang pamaagi nga iya ginhimo sang unang siglo—ang pagpakaon sa madamo paagi sa pila ka tawo. Gintangdo ni Jesus inang ulipon para mapat-od nga ang iya matuod nga mga sumulunod—hinaplas man ukon iban nga mga karnero—makatigayon sing padayon nga suplay sang suno sa tion nga espirituwal nga pagkaon sa katapusan nga mga adlaw. Kabay pa nga mangin determinado kita nga ipakita ang aton apresasyon paagi sa matutom nga pagsakdag sa hinaplas nga mga utod nga lalaki nga nagahuman sang matutom kag mainandamon nga ulipon.—Heb. 13:7, 17.

 

^ par. 2 Parapo 2: Antes sini, nagsugid si Jesus sing kaanggid nga ilustrasyon sa diin ginpatuhuyan niya ang “ulipon” subong “tulugyanan” kag ang “panimalay” subong “iya hubon sang mga alagad.”—Luc. 12:42-44.

^ par. 6 Parapo 6: Ang ‘pagkari’ ni Cristo (Griego, er′kho·mai) tuhay sa iya “presensia” (pa·rou·si′a). Ang iya indi makita nga presensia magasugod antes sang iya pagkari sa paghukom.

^ par. 12 Parapo 12: Tan-awa ang artikulo nga “Yari Karon! Ako Kaupod Ninyo sa Tanan nga Adlaw,” sa sini nga isyu sa pahina 10-12, parapo 5-8.

^ par. 16 Parapo 16: Tan-awa ang artikulo nga “Sugiri Kami, San-o Mahanabo Ining mga Butang?” sa sini nga isyu, pahina 7-8, parapo 14-18.