Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2013

 SUGILANON SANG KABUHI

Handa Mag-alagad kay Jehova Bisan Diin

Handa Mag-alagad kay Jehova Bisan Diin

Wala pa gid ako nakaagi magbantala nga ako lang. Ginakulbaan gid ako kag nagapalangurog ang akon mga tiil kada maggua ako. Ang mas malain pa, indi gid mabinatunon ang mga tawo sa teritoryo. Ang iban sa ila maakigon kag nagapamahog nga kastiguhon ako. Sa una nga bulan sang akon pagpayunir, isa lang ka bukleta ang akon napahamtang!—Markus.

NATABO ini sang 1949, sobra 60 ka tuig na ang nagligad. Pero ang akon istorya nag-umpisa mga tinuig pa antes sini. Ang akon amay, nga si Hendrik, sapatero kag hardinero sa Donderen, isa ka gamay nga baryo sa aminhan nga Drenthe, sa Netherlands. Natawo ako didto sang 1927, ikap-at sa pito ka mag-ulutod. Ang amon balay ara sa higad sang indi sementado nga dalan sa isa ka uma. Kalabanan sang amon kaingod mga mangunguma, kag nanamian gid ako sa kabuhi sa uma. Sang 1947, sang 19 anyos ako, nahibaluan ko ang kamatuoran paagi sa isa namon ka kaingod, nga si Theunis Been. Nadumduman ko pa nga wala gid ako nanamian kay Theunis sang primero, pero pagkatapos sang Bug-os Kalibutan nga Inaway II, nangin Saksi ni Jehova sia kag nangin mainabyanon na. Natingala gid ako sa iya pagbag-o, gani namati ako sa iya sang ginsugiran niya ako parte sa saad sang Dios nga himuon ang duta nga isa ka paraiso. Ginbaton ko gilayon ang kamatuoran, kag nangin madugay kami nga mag-abyan. *

Nagsugod ako sa pagbantala sang Mayo 1948, kag pagkasunod gid nga bulan, sang Hunyo 20, nabawtismuhan ako sa isa ka kombension sa Utrecht. Sang Enero 1, 1949, nagpayunir ako kag gin-asayn sa Borculo, sa sidlangan sang Netherlands, nga may isa lang ka gamay nga kongregasyon. Kinahanglan ko maglakbay sing mga 130 kilometros para makalab-ot didto, gani nagbisikleta ako. Abi ko mga 6 ka oras lang ang akon paglakbay, pero bangod sa mabunok nga ulan kag mabaskog nga hangin, naglab-ot ini sa 12 ka oras, bisan pa nagsakay ako sa tren sa nabilin  nga 90 kilometros! Gab-i na gid sang makaabot ako sa akon destinasyon, sa balay sang isa ka Saksi nga pamilya nga akon gindayunan sang nagpayunir ako sa sina nga lugar.

Sa mga tinuig antes sang inaway, diutay lang ang gamit sang mga tawo. Ang ara lang sa akon isa ka amerikana kag isa ka pares nga delargo—ang amerikana tama ka halog kag ang delargo tama ka bakatin! Subong sang ginsambit ko sa umpisa, ang una ko nga mga binulan sa Borculo mabudlay, pero ginpakamaayo ako ni Jehova sing pila ka Bible study. Pagligad sang siam ka bulan, gin-asayn ako sa Amsterdam.

HALIN SA KAUMHAN PAKADTO SA SIUDAD

Halin sa akon gindak-an nga uma, nakalab-ot ako sa Amsterdam, ang pinakadaku nga siudad sa Netherlands. Mabungahon gid ang ministeryo diri. Sa una nga bulan, nakapahamtang ako sang mas madamo nga literatura sangsa nagligad nga siam ka bulan. Sang ulihi, nagadumala na ako sing indi magkubos sa walo ka Bible study. Sa tapos ako matangdo subong congregation servant (ginatawag karon nga koordenitor sang hubon sang mga gulang), nakabaton ako sing asaynment nga maghatag sang akon una nga pamulongpulong publiko. Kinulbaan ako, pero naumpawan gid ako sang ginsaylo ako sa iban nga kongregasyon antes mismo sang iskedyul sang akon pamulongpulong. Wala ko gid mahunahuna nga sa sulod sang mga tinuig, makahatag ako sing sobra sa 5,000 ka pamulongpulong!

Si Markus (pinakapunta sa tuo) nga nagabantala malapit sa Amsterdam sang 1950

Sang Mayo 1950, gin-asayn ako sa Haarlem. Nakabaton ako gilayon sing imbitasyon nga mag-alagad sa sirkito. Tatlo ka adlaw nga daw indi ako makatulog. Ginsilingan ko si Robert Winkler, isa sa mga nagaalagad sa sanga talatapan, nga nagabatyag ako nga indi kalipikado, pero nagsiling sia: “Sulati lang ang aplikasyon. Matun-an mo gid ina.” Wala madugay pagkatapos sadto, ginhanas ako sing isa ka bulan kag dayon nangin alagad (manugtatap) sang sirkito. Sang ginduaw ko ang isa sa mga kongregasyon, nakilala ko si Janny Taatgen, isa ka malipayon nga pamatan-on nga payunir. Masinakripisyuhon sia kay may daku nga gugma kay Jehova. Nagpakasal kami sang 1955. Pero antes ko padayunon ang akon pagsaysay, ipaathag ni Janny kon paano sia nangin payunir kag kon paano kami nag-alagad sing magkaupod sa tapos kami nagpakasal.

PAG-ALAGAD BILANG MAG-ASAWA

Janny: Ang akon iloy nangin Saksi sang 1945 sang 11 anyos ako. Narealisar niya gilayon nga dapat niya tudluan sa Biblia ang iya tatlo ka kabataan, pero ginpamatukan sang akon amay ang kamatuoran, gani ginatudluan niya lang kami kon wala si Tatay sa balay.

Ang una nga pagtilipon nga akon natambungan amo ang kombension sa The Hague sang 1950. Pagligad sang isa ka semana, nagtambong ako sa akon pinakauna nga miting sa Kingdom Hall sa Assen (Drenthe). Naakig gid si Tatay kag ginpalayas ako sa balay. Si Nanay nagsiling, “Nahibaluan mo na kon diin ka maistar.” Nakahibalo ako nga ang ginatumod niya amo ang akon espirituwal nga mga kauturan. Sang primero, nag-istar ako sa Saksi nga pamilya nga  malapit lang sa amon, pero ginhingabot ako gihapon ni Tatay, gani nagsaylo ako sa kongregasyon sa Deventer (Overijssel), nga mga 95 kilometros ang kalayuon. Pero bangod menor de edad pa ako, namroblema si Tatay sa sibil nga awtoridad kay ginpalayas niya ako sa iya balay. Gani, ginsilingan niya ako nga magpauli. Bisan pa wala niya ginbaton ang kamatuoran, gintugutan niya ako sang ulihi nga magtambong sa mga miting kag magbantala.

Si Janny (pinakapunta sa tuo) nga nagaalagad subong vacation pioneer sang 1952

Wala madugay sang nakapauli na ako, nagmasakit sing malubha si Nanay kag kinahanglan ko himuon ang tanan nga ulubrahon sa balay. Bisan pa sini, padayon ako nga nag-uswag sa espirituwal kag ginbawtismuhan sang 1951 sa edad nga 17. Sang 1952, sang nag-ayo na si Nanay, duha ka bulan ako nga nag-alagad subong vacation (auxiliary) pioneer upod sa tatlo ka payunir nga sister. Nag-istar kami sa isa ka houseboat kag nagbantala sa duha ka banwa sa Drenthe. Nangin regular payunir ako sang 1953. Pagligad sang isa ka tuig, may bataon nga manugtatap sa sirkito nga nagduaw sa amon kongregasyon—si Markus. Nagpakasal kami sang Mayo 1955 kay para sa amon, maalagad namon sing mas maayo si Jehova subong mag-asawa.—Man. 4:9-12.

Sang ginkasal kami sang 1955

Markus: Pagkatapos sang amon kasal, gin-asayn kami anay subong payunir sa Veendam (Groningen). Nag-istar kami sa isa ka kuarto nga mga dos por tres metros lamang ka daku. Pero ginhimo ini ni Janny nga matahom kag komportable. Kada gab-i, ginapahigad namon ang amon lamesa kag duha ka gamay nga pulungkuan para maplastar ang amon hiligdaan.

Pagligad sang anom ka bulan, gin-agda kami subong nagalakbay nga manugtatap sa Belgium. Sang 1955, mga 4,000 lamang ang mga manugbantala sa sini nga pungsod. Subong, sobra na ini sa 24,000! Sa Flanders, sa aminhan sang Belgium, ang lenguahe sang mga tawo pareho sa Netherlands. Pero tuhay ang ila tono, gani binudlayan kami sang primero sa sini nga lenguahe.

Janny: Kinahanglan gid ang pagsakripisyo sa paglakbay nga hilikuton. Ginaduaw namon ang mga kongregasyon sakay sa bisikleta kag nagadayon sa balay sang mga utod. Bangod wala kami sing kaugalingon nga maistaran antes magkadto sa isa naman ka kongregasyon, nagapabilin kami asta sa Lunes, kag nagalakbay pakadto sa masunod nga kongregasyon sa Martes sang aga. Pero pirme namon ginatamod ang amon pag-alagad subong pagpakamaayo gikan kay Jehova.

Markus: Sang primero, wala gid kami sing kilala nga mga utod sa kongregasyon, pero maabiabihon gid sila. (Heb. 13:2) Sa sulod sang mga tinuig, pila ka beses namon nga naduaw ang tanan nga Dutch nga kongregasyon sa Belgium. Naghatag ini sa amon sing madamo nga pagpakamaayo. Halimbawa, nakilala namon ang halos tanan nga utod sa Dutch nga distrito, kag nangin suod gid sila sa amon. Nakita namon ang ginatos ka pamatan-on nga nagtubo sa pisikal kag espirituwal nga pagkahamtong, nagdedikar sang ila kaugalingon kay Jehova, kag nag-una sang mga intereses sang Ginharian sa ila kabuhi. Makalilipay gid makita nga madamo  sa ila ang matutom nga nagaalagad kay Jehova sing bug-os tion. (3 Juan 4) Bangod sining “pagbayluhanay sing pagpalig-on,” nangin mahapos para sa amon nga magpabilin sing bug-os tagipusuon sa amon asaynment.—Roma 1:12.

DAKU NGA HANGKAT KAG MATUOD NGA PAGPAKAMAAYO

Markus: Halin sang ginkasal kami, handum gid namon nga mag-eskwela sa Gilead. Kada adlaw, nagatuon kami sing Ingles sing mga isa ka oras. Pero indi mahapos magtuon sa mga libro, gani nagdesisyon kami nga magkadto sa Inglaterra sa tion sang amon bakasyon para mahanas sa Ingles samtang nagabantala didto. Sang ulihi, sang 1963, nakabaton kami sing sobre halin sa ulong talatapan sa Brooklyn. May duha ini ka sulat, ang isa para sa akon kag ang isa naman para kay Janny. Ang akon sulat isa ka imbitasyon nga mag-eskwela sing napulo ka bulan sa Gilead. Ang panguna nga katuyuan sang kurso amo ang paghanas sa mga utod nga lalaki kag paghatag sa ila sing instruksion parte sa mga kahimusan sa organisasyon. Gani sa 100 ka estudyante nga gin-agda, 82 ang utod nga lalaki.

Janny: Sa sulat nga akon nabaton sina nga adlaw, ginpangabay ako nga binagbinagon sing maayo kon bala handa ako nga magpabilin sa Belgium samtang nagaeskwela si Markus sa Gilead. Ginaako ko nga naluyahan gid ako sa umpisa. Daw pareho lang nga wala ginpakamaayo ni Jehova ang akon mga panikasog. Pero ginpahanumdom ko ang akon kaugalingon kon ano ang katuyuan sang Gilead School—ang pagbulig sa mga nag-eskwela nga matuman ang pagbantala sang maayong balita sa bilog nga kalibutan. Gani nagpasugot ako nga magpabilin kag gin-asayn bilang espesyal payunir sa siudad sang Ghent sa Belgium, kaupod ang duha ka eksperiensiado nga espesyal payunir nga sanday Anna kag Maria Colpaert.

Markus: Bangod kinahanglan nga mag-uswag ang akon Ingles, gin-agda ako sa Brooklyn sing lima ka bulan antes mag-umpisa ang klase. Nagtrabaho ako sa Shipping kag Service Department. Bangod sa pag-alagad sa ulong talatapan kag pagbulig sa pagpadala sang mga literatura sa Asia, Europa, kag Bagatnan nga Amerika, labi ko nga nahibaluan ang aton internasyonal nga paghiliutod. Nadumduman ko gid si Brother A. H. Macmillan, nga nangin pilgrim (nagalakbay nga manugtatap) sang panahon ni Brother Russell. Tigulang na sia kag medyo bungol na. Pero matutom sia nga nagatambong sa tanan nga miting sa kongregasyon. Nagpalig-on gid ini sa akon, kag gintudluan ako sini nga indi dapat pagbalewalaon ang aton pagtinipon subong Cristiano.—Heb. 10:24, 25.

Janny: Kada semana, pila ka beses kami nga nagasulatay ni Markus. Nahidlaw gid kami sa isa kag isa! Pero nalipay si Markus sa paghanas sa iya sa Gilead, kag nalipay man ako sa akon ministeryo. Pagpauli ni Markus halin sa Estados Unidos, 17 na ang akon Bible study! Indi mahapos ang paglayuanay namon sing 15 ka bulan, pero nakita ko nga ginpakamaayo ni Jehova ang amon mga sakripisyo. Sang adlaw nga nagpauli si Markus, naatrasar pa ang eroplano sing pila ka oras. Gani sang nakaabot na sia, nagahibi kami nga naghaksanay. Sugod sadto, wala na kami naglayuanay.

NAGAPASALAMAT SA TAGSA KA PRIBILEHIYO SA PAG-ALAGAD

Markus: Pagpauli ko halin sa Gilead sang Disiembre 1964, gin-asayn kami sa Bethel. Abi namon, amo na ini ang amon permanente nga asaynment, pero indi gali. Tatlo ka bulan sang ulihi, gin-asayn kami nga mag-alagad sa distrito sa Flanders. Sang ginpadala  sanday Aalzen kag Els Wiegersma subong mga misyonero sa Belgium, gin-asayn sila nga mag-alagad sa distrito, kag nagbalik kami sa Bethel diin nagtrabaho ako sa Service Department. Sang 1968 asta 1980, nagbag-obag-o ang amon asaynment, kon kaisa sa Bethel kag kon kaisa sa paglakbay nga hilikuton. Sang ulihi, sang 1980 asta 2005, nag-alagad ako liwat subong manugtatap sang distrito.

Masami nga nagbag-obag-o ang amon asaynment, pero wala namon ginakalipatan nga gindedikar namon ang amon kabuhi para alagaron si Jehova sing bug-os kalag. Nalipay gid kami sa tagsa ka asaynment nga amon nabaton, nga nagasalig nga ang katuyuan sini nga mga pagbag-o amo ang pagpauswag sa mga intereses sang Ginharian.

Janny: Isa gid ka makalilipay nga pribilehiyo nga makaupod kay Markus sa Brooklyn sang 1977 kag sa Patterson sang 1997 sang ginhanas pa gid sia subong miembro sang Komite sang Sanga.

NAHIBALUAN NI JEHOVA ANG AMON MGA KINAHANGLANON

Markus: Sang 1982, gin-operahan si Janny kag nag-ayo gid sia. Tatlo ka tuig sang ulihi, ginpaistaran sa amon sang kongregasyon sa Louvain ang isa ka apartment sa ibabaw sang ila Kingdom Hall. Sa una nga tion sa sulod sang 30 ka tuig, may permanente na kami nga ilistaran bisan gamay lang. Kon Martes, kada mag-impaki kami para magduaw sa isa ka kongregasyon, pila ka beses ako nga nagasaka-panaug sa 54 ka halintang para ipapanaug ang amon mga dala! Maayo lang kay sang 2002, ginpaistar kami sa apartment sa idalom. Sang 78 anyos na ako, gin-asayn kami subong espesyal payunir sa banwa sang Lokeren. Nalipay kami sa sini nga pag-alagad kag makagua kami gihapon sa latagon kada adlaw.

“Kumbinsido gid kami nga indi importante kon diin kami nagaalagad ukon kon ano ang amon pribilehiyo, kundi kon sin-o ang amon ginaalagad”

Janny: Sa kabug-usan, naghinguyang kami sing sobra 120 ka tuig sa bug-os tion nga pag-alagad! Naeksperiensiahan gid namon ang kamatuoran sang saad ni Jehova nga ‘indi gid niya kita pagbayaan’ kag kon alagaron naton sia sing matutom, wala sing ‘butang nga makulang’ sa aton.—Heb. 13:5; Deut. 2:7.

Markus: Sang bata pa kami, gindedikar namon ang amon kaugalingon kay Jehova. Wala kami nagpangita sing dalagku nga mga butang para sa amon kaugalingon. Handa kami nga batunon ang tanan nga asaynment nga gintanyag sa amon bangod kumbinsido gid kami nga indi importante kon diin kami nagaalagad ukon kon ano ang amon pribilehiyo, kundi kon sin-o ang amon ginaalagad.

^ par. 5 Sang ulihi, ang akon amay, iloy, magulang nga babayi, kag duha ka utod nga lalaki nangin Saksi man.