Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Hunyo 2013

Si Jehova Mainunungon kag Mapinatawaron

Si Jehova Mainunungon kag Mapinatawaron

“Ikaw, GINOO, maayo kag handa sa pagpatawad, bugana sa malig-on nga paghigugma sa tanan nga nagatawag sa imo.”—SAL. 86:5.

1, 2. (a) Ngaa ginaapresyar naton ang mga abyan nga mainunungon kag mapinatawaron? (b) Ano nga mga pamangkot ang aton pagasabton?

ANO ang matuod nga abyan? “Para sa akon, ang matuod nga abyan handa pirme magbulig kag magpatawad sa akon mga kakulangan,” siling sang sister nga si Ashley. Ginaapresyar naton tanan ang mga abyan nga mainunungon kag mapinatawaron. Ginabuligan nila kita nga makatigayon sing kalig-unan kag magbatyag nga may nagahigugma sa aton.—Hulu. 17:17.

2 Si Jehova ang labing mainunungon kag mapinatawaron nga Abyan nga mahimo naton matigayon. Amo ini ang ginsiling sang salmista: “Ikaw, GINOO, maayo kag handa sa pagpatawad, bugana sa malig-on nga paghigugma [ukon, “mainunungon nga gugma”] sa tanan nga nagatawag sa imo.” (Sal. 86:5) Ano ang buot silingon sang pagkamainunungon kag pagkamapinatawaron? Paano ginpakita ni Jehova ining matahom nga mga kinaiya? Paano naton mailog ang iya halimbawa? Ang mga sabat sa sini magapabakod sang aton gugma sa aton pinakamaayo nga Abyan, si Jehova. Magabulig man ini sa aton para magbakod ang aton mga pag-abyanay sa isa kag isa.—1 Juan 4:7, 8.

SI JEHOVA MAINUNUNGON

3. Ano ang buot silingon sang pagkamainunungon?

3 Ang pagkamainunungon isa ka maayo nga kinaiya nga nagalakip sing debosyon, katutom, kag indi mabungkag nga panaad. Ang mainunungon nga tawo wala nagabag-obag-o. Sa baylo, mahigugmaon sia nga nagaunong sa isa ka persona (ukon butang), nga nagapabilin nga suod sa sina nga persona (ukon butang) bisan sa mabudlay nga mga kahimtangan. Huo, si Jehova ang “Isa nga mainunungon” kag wala na sing maglabaw pa sa iya.—Bug. 16:5.

4, 5. (a) Paano ginpakita ni Jehova ang pagkamainunungon? (b) Paano kita mapabakod sa pagpamalandong sa mga buhat sang pagkamainunungon sang Dios?

4 Paano ginpakita ni Jehova ang pagkamainunungon?  Wala niya ginabiyaan ang iya matutom nga mga sumilimba. Ang isa sa mga sumilimba niya amo si Hari David, nga nagpamatuod sang pagkamainunungon ni Jehova. (Basaha ang 2 Samuel 22:26. *) Sa tion sang mga pagtilaw kay David, mainunungon sia nga gingiyahan, gin-amligan, kag ginluwas ni Jehova. (2 Sam. 22:1) Nahibaluan ni David nga indi lang sa hambal mainunungon si Jehova. Ngaa nangin mainunungon si Jehova kay David? Bangod si David mismo mainunungon man. Ginapakabahandi ni Jehova ang pagkamainunungon sang iya mga sumilimba, amo nga mainunungon man sia sa ila.—Hulu. 2:6-8.

5 Mapabakod kita paagi sa pagpamalandong sa mga buhat sang pagkamainunungon ni Jehova. “Nakabulig gid sa akon ang pagbasa parte sa pagpakig-angot ni Jehova kay David sa tion sang mga kabudlayan,” siling sang matutom nga brother nga si Reed. “Sang nagapalagyo si David kag nagasaylosaylo sa mga kueba, padayon sia nga ginbuligan ni Jehova. Nagpalig-on gid ini sa akon! Nagapahanumdom ini sa akon nga ano man ang akon kahimtangan, ano man kalain sang sitwasyon, si Jehova handa sa pagbulig basta magpabilin ako nga mainunungon sa iya.” Pat-od nga amo man sini ang imo ginabatyag.—Roma 8:38, 39.

6. Sa ano pa nga mga paagi ginapakita ni Jehova ang iya pagkamainunungon, kag paano nakabenepisyo sa sini ang iya mga sumilimba?

6 Sa ano pa nga mga paagi ginpakita ni Jehova ang iya pagkamainunungon? Wala niya ginabag-o ang iya mga talaksan. “Bisan tubtub sa katigulangon ako Sia,” pasalig niya sa aton. (Isa. 46:4) Nagadesisyon sia pirme nahisuno sa iya wala nagabag-o nga mga talaksan parte sa husto kag sayop. (Mal. 3:6) Isa pa, ginpakita ni Jehova ang iya pagkamainunungon paagi sa padayon nga pagtuman sang iya ginsaad. (Isa. 55:11) Gani ang tanan nga matutom nga sumilimba ni Jehova nakabenepisyo sa iya pagkamainunungon. Paano? Kon ginahimo naton ang aton bug-os nga masarangan sa pagsunod sang iya mga talaksan, makasalig kita nga tumanon niya ang iya saad nga pakamaayuhon kita.—Isa. 48:17, 18.

ILUGA ANG PAGKAMAINUNUNGON NI JEHOVA

7. Ano ang isa ka paagi nga mailog naton ang pagkamainunungon sang Dios?

 7 Paano naton mailog ang pagkamainunungon ni Jehova? Ang isa ka paagi amo ang pagbulig sa mga ginabudlayan. (Hulu. 3:27) Halimbawa, may kilala ka bala nga utod nga naluyahan, ayhan bangod sang problema sa panglawas, pagpamatok sang pamilya, ukon personal nga mga kapaslawan? Ngaa indi magmatumato sa paghambal sa iya sing “maayo kag makalilipay nga mga polong”? (Zac. 1:13) * Paagi sini, ginapamatud-an mo nga mainunungon ka kag matuod nga abyan, nga “mahirup pa labi sa utud.”—Hulu. 18:24.

8. Sa pag-asawahay, paano naton mailog ang pagkamainunungon ni Jehova?

8 Mailog man naton ang pagkamainunungon ni Jehova paagi sa pagpabilin nga matutom sa aton mga hinigugma. Halimbawa, kon may tiayon kita, nahibaluan naton nga dapat kita mangin matutom sa iya. (Hulu. 5:15-18) Wala kita nagahimo sing bisan ano nga butang nga magadul-ong sa pagpanghilahi. (Mat. 5:28) Dugang pa, ginapakita naton ang aton pagkamainunungon sa aton masigkatumuluo paagi sa paglikaw sa makahalalit nga kutsokutso ukon pagpakalain, kag wala ini ginapanugidsugid ukon ginapamatian.—Hulu. 12:18.

9, 10. (a) Kay sin-o kita ilabi na nga magpabilin nga mainunungon? (b) Ngaa indi pirme mahapos ang pagtuman sa mga sugo ni Jehova?

9 Labaw sa tanan, gusto naton magpabilin nga mainunungon kay Jehova. Paano? Paagi sa pagtinguha nga tamdon ang mga butang suno sa iya pagtamod—higugmaon ang iya mga  ginahigugma kag dumtan ang iya mga ginadumtan—kag dayon magkabuhi nahisuno sa sini. (Basaha ang Salmo 97:10.) Kon ginatinguhaan naton nga ilugon ang mga panghunahuna kag balatyagon ni Jehova, labi pa gid kita nga mapahulag nga tumanon ang iya mga sugo.—Sal. 119:104.

10 Matuod, indi pirme mahapos ang pagtuman sa mga sugo ni Jehova. Mahimo nagapanikasog kita nga magpabilin nga mainunungon. Halimbawa, ang pila ka di-minyo nga Cristiano gusto magminyo, pero wala pa sila makakita sing nagakabagay nga pangasaw-on ukon pamanahon sa mga sumilimba ni Jehova. (1 Cor. 7:39) Ang isa ka utod nga dalaga mahimo pirme ginapangitaan sing palamanhon sang iya di-tumuluo nga mga katrabaho. Mahimo nga ginapakigbatuan sini nga utod ang kasubo bangod sang pag-isahanon. Pero determinado gid sia nga huptan ang iya integridad kay Jehova. Indi bala nga ginaapresyar gid naton ining dalayawon nga mga halimbawa sang pagkamainunungon? Sigurado nga padyaan ni Jehova ang tanan nga nagapabilin nga matutom sa iya sa pihak sang mga kabudlayan.—Heb. 11:6.

“May abyan nga mahirup pa labi sa utud.”—Hulu. 18:24 (Tan-awa ang parapo 7)

‘Patawara sing kinabubut-on ang isa kag isa.’—Efe. 4:32 (Tan-awa ang parapo 16)

SI JEHOVA MAPINATAWARON

11. Ano ang buot silingon sang pagkamapinatawaron?

11 Ang isa pa sa labing hiligugmaon nga kinaiya ni Jehova amo ang iya kahanda sa pagpatawad. Ano ang buot silingon sang pagkamapinatawaron? Nagapahangop ini sang pagpasaylo sa nakasala kon may nagakaigo nga rason. Wala ini nagapahangop nga ginakunsinti sang mapinatawaron nga tawo ang sala ukon ginapanghiwala nga natabo ini. Sa baylo, wala sia nagatanom sing kalain sang buot. Ang Kasulatan nagatudlo nga si Jehova “handa sa pagpatawad” sa mga nagapakita sing matuod nga paghinulsol.—Sal. 86:5.

12. (a) Paano ginpakita ni Jehova ang pagkamapinatawaron? (b) Ano ang buot silingon sang ‘pagpanas’ sang sala sang isa?

12 Paano ginpakita ni Jehova ang pagkamapinatawaron? Kon nagapatawad si Jehova, ginahimo niya ini “sing bugana”; nagapatawad sia sing bug-os kag permanente. (Isa. 55:7) Paano naton nahibaluan nga si Jehova nagapatawad sing bug-os? Binagbinaga ang pasalig nga aton mabasa sa Binuhatan 3:19. (Basaha.) Si apostol  Pedro nagpalig-on sa iya mga tagpalamati nga “maghinulsol . . . kag magliso.” Kon ang nakasala matuod nga nagahinulsol, nagakasubo gid sia sa iya nahimo nga sala. Determinado man sia nga indi na ini pagsuliton. (2 Cor. 7:10, 11) Dugang pa, ang matuod nga paghinulsol magapahulag sa nakasala nga “magliso,” nga nagabiya sa iya sayop nga dalanon kag nagatinguha nga maglakat sa dalanon nga kalahamut-an sa Dios. Kon ang mga tagpalamati ni Pedro magpakita sing matuod nga paghinulsol, ano ang posible nga resulta? Si Pedro nagsiling nga ang ila mga sala “mapanas.” Ini nga ekspresyon naghalin sa Griego nga tinaga nga nagakahulugan sing “pagpahid, pagdula.” Gani kon nagapatawad si Jehova, ginapahiran niya ang aton mga sala para mangin matinlo. Nagapatawad sia sing bug-os.—Heb. 10:22; 1 Juan 1:7.

13. Ano ang ginapasalig sa aton sang mga pinamulong nga “indi na pagdumdumon ang ila sala”?

13 Paano naton nahibaluan nga permanente ang pagpatawad ni Jehova? Binagbinaga ang tagna ni Jeremias parte sa bag-o nga katipan, nga ginpakigkatipan sa hinaplas nga mga Cristiano. Paagi sa sini, mahimo matigayon sang mga nagatuo sa gawad ang matuod nga kapatawaran. (Basaha ang Jeremias 31:34.) Si Jehova nagsiling: “Patawaron ko ang kalautan nila, kag indi na pagdumdumon ang ila sala.” Gani ginapasalig kita ni Jehova nga kon nagapatawad sia, indi gid niya kita pagsilutan sa ulihi base sa sini nga mga sala. Wala niya ginaungkat ang aton mga sala para akusahan kita ukon silutan sing sulitsulit. Sa baylo, ginapatawad ini ni Jehova kag ginakalimtan sing permanente.—Roma 4:7, 8.

14. Paano kita malugpayan sa pagpamalandong sa pagkamapinatawaron ni Jehova? Maghatag sing halimbawa.

14 Malugpayan kita kon pamalandungan naton ang pagkamapinatawaron ni Jehova. Binagbinaga ini nga halimbawa. Sang nagligad nga mga tinuig, nadisfellowship ang isa ka sister nga tawgon naton nga Elaine. Pagligad sang pila ka tuig, nakapanumbalik sia. “Bisan pa nasiling ko sa akon kaugalingon kag sa iban nga napatawad na ako ni Jehova,” siling ni Elaine, “nagabatyag ako pirme nga malayo sia sa akon ukon mas malapit ang iban sa iya kag mas matuod sia para sa ila.” Pero nalugpayan si Elaine sa pagbasa kag pagpamalandong sa pila ka paglaragway sang Biblia parte sa pagkamapinatawaron ni Jehova. “Nabatyagan ko ang gugma kag pagpalangga ni Jehova nga wala ko anay narealisar,” siling pa ni Elaine. Labi sia nga natandog sa sini nga pinamulong: “Kon ginapatawad ni Jehova ang aton mga sala, indi kita dapat magbatyag nga ginadala naton ang mantsa sini sa bug-os naton nga kabuhi.” * Si Elaine nagsiling: “Narealisar ko nga indi ako sadto kumbinsido nga mapatawad ako sing bug-os ni Jehova, kag naghunahuna ako nga pas-anon ko ini nga kabug-atan sa bug-os ko nga kabuhi. Nahibaluan ko nga nagakinahanglan pa ini sing tion, pero nabatyagan ko na nga puede ako mangin suod kay Jehova, kag daw nakuha na ang akon ginapas-an.” Mahigugmaon gid kag mapinatawaron ang Dios nga aton ginaalagad!—Sal. 103:9.

ILUGA ANG PAGKAMAPINATAWARON NI JEHOVA

15. Paano naton mailog ang pagkamapinatawaron ni Jehova?

15 Mailog naton ang pagkamapinatawaron ni Jehova paagi sa pagpatawad sa isa kag isa kon may basihan sa paghimo sini. (Basaha ang Lucas 17:3, 4.) Dumduma nga kon nagapatawad si Jehova, ginakalimtan niya ang aton mga sala, buot silingon, wala na niya ini ginaungkat. Gani kon nagapatawad kita sa iban, mahimo man naton kalimtan ang ila ginhimo sa aton kag indi na ini pag-ungkaton pa.

16. (a) Ang pagkamapinatawaron bala nagakahulugan nga ginakunsinti naton ang mga sala ukon ginatugutan ang iban nga maghingalit sa aton? Ipaathag. (b) Ano ang dapat naton himuon para patawaron kita sang Dios?

 16 Ang pagpatawad wala nagakahulugan nga ginakunsinti naton ang sala ukon ginatugutan ang iban nga maghingalit sa aton. Sa  baylo, nagakahulugan ini nga wala kita nagadumot. Pero agod patawaron kita sang Dios, dapat naton ilugon ang pagkamapinatawaron ni Jehova. (Mat. 6:14, 15) Ang empatiya nagapahulag kay Jehova sa pagdumdom nga “kita yab-ok.” (Sal. 103:14) Gani, indi bala nga dapat pahulagon man kita sang empatiya nga palampason ang mga kakulangan sang iban, nga nagapatawad sa ila sing tinagipusuon?—Efe. 4:32; Col. 3:13.

Kabay pa nga mangin tinagipusuon ang aton mga pangamuyo parte sa pagpatawad (Tan-awa ang parapo 17)

17. Ano ang makabulig sa aton kon masaklaw kita sang isa ka masigkatumuluo?

 17 Matuod, indi pirme mahapos magpatawad. Bisan ang pila ka hinaplas nga Cristiano sang unang siglo nabudlayan man sa paghusay sang ila di-paghangpanay. (Fil. 4:2) Kon nasaklaw kita sang aton masigkatumuluo, ano ang makabulig sa aton? Binagbinaga si Job. Nasakitan gid sia sang ang iya “mga abyan,” nga sanday Elifaz, Bildad, kag Zofar naghambal sa iya sing wala basihan nga mga akusasyon. (Job 10:1; 19:2) Sang ulihi, ginsabdong sila ni Jehova. Ginsugo sila sang Dios nga magkadto kay Job kag maghatag sing halad para sa ila mga sala. (Job 42:7-9) Pero may ginpangabay man si Jehova kay Job. Ano ina? Ginsilingan niya si Job nga ipangamuyo ining mga nagsumbong sa iya. Gintuman ini ni Job, kag ginpakamaayo sia ni Jehova bangod sang iya pagkamapinatawaron. (Basaha ang Job 42:10, 12, 16, 17.) Ano ang aton matun-an sa sini? Ang sinsero nga pangamuyo para sa mga nakasaklaw sa aton makabulig para indi kita magtanom sing kalain sang buot.

PADAYON NGA APRESYAHA SING BUG-OS ANG MGA KINAIYA NI JEHOVA

18, 19. Paano naton padayon nga mapabakod ang aton apresasyon sa hiligugmaon nga mga kinaiya ni Jehova?

18 Makapaumpaw gid ang pagbinagbinag sa hiligugmaon nga mga kinaiya ni Jehova. Natun-an naton nga madali sia palapitan, wala sing ginapasulabi, maalwan, makatarunganon, mainunungon, kag mapinatawaron. Siempre, kamalingking pa lang ini sa mga butang nga matun-an pa naton parte kay Jehova. Malipay kita sa pagtuon sing dugang pa parte kay Jehova sa walay katubtuban. (Man. 3:11) Nagaugyon kita sa ginsulat ni apostol Pablo: “O pagkadalom sang kamanggaran kag kaalam kag ihibalo sang Dios”—wala labot pa sa sini ang gugma kag ang anom ka kinaiya nga aton nabinagbinag.—Roma 11:33.

19 Kabay pa nga padayon naton nga pabakuron ang aton apresasyon sa hiligugmaon nga mga kinaiya ni Jehova. Mahimo naton ini paagi sa pagtuon sa iya mga kinaiya, pagpamalandong sa sini, kag pag-ilog sini sa aton kabuhi. (Efe. 5:1) Samtang ginahimo naton ini, labi pa gid kita nga magaugyon sa salmista nga nag-amba: “Maayo sa akon nga magpalapit sa Dios.”—Sal. 73:28.

^ par. 4 2 Samuel 22:26 (NW): “Mainunungon ka sa tawo nga mainunungon sa imo.”

^ par. 7 Para sa mga suhestyon parte sa sini, tan-awa ang mga artikulo nga “May Napalig-on Ka Bala Kasan-o Lang?” sa Enero 15, 1995, nga Ang Lalantawan kag “Pukawa ang Isa kag Isa sa Gugma kag sa Maayong mga Buhat—Paano?” sa Abril 1, 1995, nga isyu.