Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2013

Apresyaha sing Bug-os ang mga Kinaiya ni Jehova

Apresyaha sing Bug-os ang mga Kinaiya ni Jehova

“Mangin manug-ilog kamo sa Dios, subong mga anak nga hinigugma.”EFE. 5:1.

1. (a) Ano nga mga kinaiya ni Jehova ang mahimo mahunahuna sang isa ka Cristiano? (b) Paano kita makabenepisyo sa pagtuon sa mga kinaiya sang Dios?

KON hunahunaon mo ang personalidad ni Jehova, ano nga mga kinaiya ang madumduman mo? Madamo sa aton ang magahunahuna sing gugma, hustisya, kaalam, kag gahom. Pero nahibaluan naton nga madamo pa sing hiligugmaon nga kinaiya si Jehova. Ang matuod, sobra sa 40 ka kinaiya ni Jehova ang nabinagbinag na sa aton mga publikasyon. Hunahunaa kon ano pa nga bahin sang iya personalidad ang mahimo naton matun-an sa aton personal ukon pangpamilya nga pagtuon! Paano kita makabenepisyo sa sini nga pagtuon? Magapabakod ini sang aton apresasyon sa aton Amay sa langit. Kon mas mabakod ang aton apresasyon kay Jehova, labi man nga magabakod ang aton handum nga magpalapit sa iya kag ilugon sia.Jos. 23:8; Sal. 73:28.

2. (a) Iilustrar kon paano naton mapabakod ang aton apresasyon sa mga kinaiya ni Jehova. (b) Ano ang aton binagbinagon?

2 Apang ano ang buot silingon sang “pag-apresyar” sa isa ka butang? Ang tinaga nga pag-apresyar nga gamiton naton diri nagakahulugan sing pagkilala sa matuod nga balor sang isa ka butang. Ang apresasyon mahimo magbakod sing amat-amat. Sa pag-ilustrar: Maapresyar pa gid naton ang isa ka bag-o nga pagkaon kon simhutan anay naton ini, tilawan, kag dayon ilugon ang pagluto sini. Sing kaanggid, ginapabakod naton ang aton apresasyon sa isa ka kinaiya ni Jehova kon hibaluon naton ini, pamalandungan, kag dayon ilugon. (Efe. 5:1) Binagbinagon sini kag sang masunod nga duha ka artikulo kon paano naton mapabakod ang aton apresasyon sa mga kinaiya sang Dios nga mahimo talagsa lang naton ginahunahuna sangsa iya panguna nga mga kinaiya. Sa tagsa ka kinaiya, sabton naton ang mga masunod: Ano ang kahulugan sini? Paano ini ginpakita ni Jehova? Kag paano naton mailog si Jehova sa pagpakita sini nga kinaiya?

 SI JEHOVA MADALI PALAPITAN

3, 4. (a) Paano mo masiling nga ang isa madali palapitan? (b) Paano kita ginapasalig ni Jehova nga madali sia palapitan?

3 Una naton nga binagbinagon ang kinaiya nga madali palapitan. Paano mo masiling nga ang isa madali palapitan? Mahimo ka magsiling, ‘Ang isa madali palapitan kon mabuot sia, nagahatag sing tion, kag mahapos istoryahon.’ Masami nga mahibaluan mo kon ang isa madali palapitan paagi sa iya panghambal kag panghulag—ekspresyon sang nawong kag iban pa nga paggiho.

4 Paano ginpakita ni Jehova nga madali sia palapitan? Bisan si Jehova ang labing gamhanan nga Manunuga sang aton masangkad nga uniberso, ginapasalig niya kita nga handa sia kag luyag gid niya magpamati kag magsabat sa aton mga pangamuyo. (Basaha ang Salmo 145:18; Isaias 30:18, 19.) Mahimo naton masugilanon ang Dios sa bisan ano nga tion ukon lugar. Makapalapit kita gilayon sa iya, nga nakahibalo nga indi gid niya kita pagsawayon sa paghimo sini. (Sal. 65:2; Sant. 1:5) Ang Pulong sang Dios naggamit sing tawhanon nga mga ekspresyon sa paglaragway kay Jehova para ipakita nga luyag gid niya nga palapitan sia. Halimbawa, si salmista David nagsulat nga “ang mga mata sang GINOO yara” sa aton kag ang iya “too nga kamut nagtib-ong” sa aton. (Sal. 34:15; 63:8) Ginpaanggid man ni manalagna Isaias si Jehova sa isa ka manugbantay, paagi sa pagsiling: “Kungkungon niya sa iya butkon ang mga cordero, dalhon sila sa iya dughan.” (Isa. 40:11) Ginapakita gid sini nga gusto ni Jehova nga mangin malapit kita sa iya subong sang kordero nga ara sa dughan sang matinatapon nga manugbantay. Huo, madali gid palapitan ang aton Amay! ­Paano naton mailog si Jehova sa sini nga ­bahin?

GINAPABALORAN GID NGA KINAIYA

5. Ngaa importante nga mangin madali palapitan ang mga gulang?

5 Sining karon lang, ang makugi nga mga Saksi nga nagaistar sa lainlain nga bahin sang kalibutan ginpamangkot, “Ano nga kinaiya sang isa ka gulang ang ginapabaloran mo gid?” Halos tanan sa ila nagsabat, “Madali palapitan.” Matuod, ang tanan nga Cristiano kinahanglan magpakita sini nga kinaiya, ilabi na ang mga gulang. (Isa. 32:1, 2) Ang isa ka sister nagkomento kon ngaa importante gid para sa iya ini nga kinaiya: “Kon madali palapitan ang isa ka gulang, makabenepisyo kita sa iban pa niya nga maayo nga kinaiya.” Indi bala nga matuod gid ang iya ginsiling? Pero, ano ang himuon sang isa para mangin madali sia pala­pitan?

6. Ano ang isa ka paagi para mangin madali palapitan?

6 Ang isa ka paagi para mangin madali palapitan amo ang pagpakita sing matuod nga interes sa iban. Kon nagaulikid ang isa ka gulang kag handa sa paghatag sing tion sa iban, madali ini matalupangdan sang iya mga kauturan, lakip na sang mga kabataan. (Mar. 10:13-16) Ang 12 anyos nga si Carlos nagsiling: “Ang mga gulang sa Kingdom Hall nagayuhum kag mainayuhon, kag amo ina ang nanamian ko sa ila.” Siempre, indi bastante nga magsiling ang isa ka gulang nga madali sia palapitan, kundi dapat niya ini ipakita. (1 Juan 3:18) Paano?

7. Ngaa ang pagsuksok sang badge para sa kombension masami nga nangin panugod sang pag-istoryahanay, kag ano ang aton matun-an sa sini?

7 Binagbinaga ini nga pagpaanggid. Sining karon lang, ang isa ka utod nagsuksok sang iya badge samtang nagasakay sa eroplano sa iya pagpauli pagkatapos sang kombension sa iban nga pungsod. Sang ginbasa sang flight attendant ang nasulat sa badge nga “Magkari ang Ginharian sang Dios!” nagsiling sia sa utod, “Huo, pakariha ini—gusto ko nga istoryahan pa gid naton ina.” Nag-istoryahanay sila, kag malipayon nga ginbaton sang attendant ang aton mga magasin. Madamo sa aton ang may amo sini nga mga eksperiensia. Ngaa sa masami nangin panugod sang pag-istoryahanay ang aton ­badge para sa kombension? Bangod daw ginasilingan sini ang mga tawo: “Palapit kamo sa akon. Pamangkuta n’yo ako kon diin ako makadto.” Ang badge isa ka palatandaan nga nagapahibalo sa mga tawo nga handa kita sa pagsugid sang aton mga pagpati. Gusto man sang mga gulang nga maghatag sing ­mga palatandaan nga daw nagasiling sa ila mga masigkatumuluo: “Palapit kamo sa akon.” Ano ang pila sini nga mga palatandaan?

8. Paano mapakita sang mga gulang ang ila matuod nga interes sa iban, kag ano ang epekto sini sa kongregasyon?

8 Lainlain ang kustombre sa kada pungsod, pero sa masami kon yuhuman, kamustahon, kag tamyawon naton ang aton mga kauturan, ginapakita naton nga interesado gid kita sa ila. Sin-o ang dapat manguna sa pagpakita sini? Talupangda ang halimbawa ni Jesus. Suno kay Mateo, sa isa ka pagtilipon upod sa iya mga disipulo, “si Jesus nagpalapit kag naghambal sa ila.” (Mat. 28:18) Ang mga gulang karon dapat manguna man sa pagpalapit sa ila mga masigkatumuluo kag makig-istorya sa ila. Ano ang epekto sini sa kongregasyon? Ang 88 anyos nga sister nga payunir nagsiling: “Ang matam-is nga mga yuhum kag ang makapalig-on nga mga ginasiling sa akon sang mga gulang pagsulod ko sa Kingdom Hall nagpasuod sa akon sa ila.” Ang isa pa ka matutom nga sister nagsiling: “Mahimo nga daw gamay lang ini nga butang, pero kon yuhuman ako sang isa ka gulang pag-abot ko sa miting, daku ang epekto sini sa akon.”

MADALI PALAPITAN KAG NAGAHATAG SING TION

9, 10. (a) Ano ang maayo nga halimbawa nga ginpakita ni Jehova? (b) Ano ang himuon sang mga gulang para mahatagan sing tion ang iban?

 9 Siempre, mangin madali kita palapitan sang iban kon nagahatag kita sing tion sa ila. Si Jehova nagpakita sing maayo nga halimbawa sa sini. “Indi sia malayo sa tagsa sa aton.” (Binu. 17:27) Ang isa ka paagi nga mahimo ini sang mga gulang amo ang paghatag sing tion sa pagpakig-istorya sa mga kauturan—bata man ukon tigulang—antes kag pagkatapos sang  miting. Ang isa ka brother nga payunir nagsiling: “Kon kamustahon ako sang isa ka gulang kag dayon pamatian ang akon sabat, nagabatyag ako nga ginaapresyar ako.” Ang isa ka sister nga halos 50 ka tuig na nga nagaalagad kay Jehova nagkomento: “Ang mga gulang nga nagahatag sing tion sa pagpakig-istorya sa akon pagkatapos sang miting ­nagapabatyag sa akon nga ginapabaloran ako.”

10 Siempre, kinahanglan man atipanon sang mga gulang ang iban nila nga katungdanan. Pero dapat nga mangin tulumuron nila sa tion sang miting ang paghatag anay sing atension sa panong.

SI JEHOVA WALA SING GINAPASULABI

11, 12. (a) Ano ang nalakip sa pagkawalay pinasulabi? (b) Paano si Jehova nangin halimbawa sa aton sang pagkawalay pinasulabi?

11 Ang pagkawalay pinasulabi isa man sa hiligugmaon nga kinaiya ni Jehova. Ano ang buot silingon sini? Nagakahulugan ini nga ang isa may alalangay nga pagtamod sa tanan, kag wala sing pinilian ukon paboritismo. Ang matuod nga pagkawalay pinasulabi may duha ka elemento: ang panimuot kag buhat. Ngaa importante ining duha? Bangod kon ang isa may panimuot nga wala sing pinasulabi, mapahulag sia nga pakig-angutan ang tanan sing alalangay. Sa Cristianong Griegong Kasulatan, ang ekspresyon nga “wala sing ginapasulabi” literal nga nagakahulugan nga wala “nagatan-aw sa mga nawong,” buot silingon, wala nagapabor base sa hitsura sang isa. (Binu. 10:34; Kingdom Interlinear) Gani ang isa nga wala sing ginapasulabi nagatamod sa isa ka indibiduwal base sa iya personalidad, indi sa iya hitsura ukon mga kahimtangan.

12 Si Jehova ang pinakamaayo nga halimbawa sang pagkawalay pinasulabi. Ang iya Pulong nagsiling nga “wala [sia] sing ginapasulabi” kag “walay pinilian.” (Basaha ang Binuhatan 10:34, 35; Deuteronomio 10:17.) Ginpakita ini sa isa ka hitabo sang panahon ni Moises.

Gin-apresyar sang mga anak nga babayi ni Zelofehad ang pagkawalay pinasulabi sang Dios (Tan-awa ang parapo 13, 14)

13, 14. (a) Ano ang sitwasyon sang lima ka anak nga babayi ni Zelofehad? (b) Paano si Jehova nagpakita sing pagkawalay pinasulabi?

 13 Antes nagsulod ang mga Israelinhon sa Ginsaad nga Duta, may lima ka dalaga nga mag-utod nga nagaatubang sing problema. Ano ini? Nakahibalo sila nga ang ila pamilya, pareho sang iban nga pamilya sa Israel, magabaton sing duta nga parte sang ila amay. (Num. 26:52-55) Apang napatay ang ila amay nga si Zelofehad, nga kaliwat sang tribo ni Manases. Suno sa kinabatasan, ang kinamatarong sa pagpanag-iya sang duta ipapanubli sa mga anak nga lalaki ni Zelofehad, pero mga babayi lang ang iya bata. (Num. 26:33) Bangod wala sing lalaki sa pamilya, ihatag na lang ­bala sa mga paryente ang ila parte nga duta?

14 Ang lima ka mag-utod nagpalapit kay Moises kag namangkot: “Ngaa bala panason ang ngalan sang amon amay sa tunga sang iya panimalay, bangud bala nga wala sia sing anak nga lalaki?” Nagpakiluoy sila: “Hatagi kami sing panublion sa tunga sang mga utud nga lalaki sang amon amay.” Nagsabat bala si Moises, ‘Amo ina ang kasuguan, kag wala na kita sing mahimo pa’? Wala, kundi  “gindala ni Moises ang ila pangayo sa atubangan sang ­GINOO.” (Num. 27:2-5) Ano ang sabat ni Jehova? Ginsilingan niya si Moises: “Nagpamolong sing matarung ang babayi nga mga anak ni Zelofehad; hatagan mo sila sing kaugalingon nga panublion sa tunga sang mga utud sang ila amay kag ipaliton mo sa ila ang panublion sang ila amay.” Ini nga eksempsion ginhimo ni Jehova nga kasuguan. Ginsilingan niya si Moises: “Kon ang isa ka tawo mapatay, kag wala sing anak nga lalaki, niyan ipaliton ninyo ang iya panublion sa iya anak nga babayi.” (Num. 27:6-8; Jos. 17:1-6) Sugod sadto, ang tanan nga Israelinhon nga babayi nga may amo sini nga problema maproteksionan.

15. (a) Paano ginapakig-angutan ni Jehova ang iya katawhan, ilabi na ang mga mahuyang? (b) Ano ang iban pa nga kasaysayan sa Biblia nga nagapakita nga si Jehova wala sing ginapasulabi?

15 Mainayuhon kag wala gid sing pinasulabi ini nga desisyon! Ginpadunggan ni Jehova ining mahuyang nga mga babayi, pareho sang iya pagpakig-angot sa mga Israelinhon nga may maayo nga mga kahimtangan. (Sal. 68:5) Isa lang ini sa madamo nga kasaysayan sa Biblia nga nagailustrar sining makapaumpaw nga kamatuoran: Wala sing ginapasulabi si Jehova sa tanan niya nga alagad.1 Sam. 16:1-13; Binu. 10:30-35, 44-48.

MAHIMO NATON MAILOG SI JEHOVA

16. Paano naton mapalambo kag mapabakod ang aton pagkawalay pinasulabi?

16 Paano naton mailog ang pagkawalay pinasulabi ni Jehova? Dumduma, may duha ka aspekto ang pagkawalay pinasulabi. Kon kita wala sing pinasulabi, ginapakig-angutan naton ang iban sing alalangay. Matuod, gusto naton nga batunon ang tanan kag likawan ang pagpasulabi. Apang, mahimo magaugyon ka nga indi pirme mahapos mahibaluan kon ano ang aton pagtan-aw sa iban. Gani, paano naton mahibaluan kon bala ginatamod kita sang iban nga wala sing ginapasulabi? Sang luyag ni Jesus mahibaluan kon ano ang ginasiling sang mga tawo parte sa iya, ginpamangkot niya ang iya masaligan nga mga abyan: “Sin-o ang Anak sang tawo suno sa ginasiling sang mga tawo?” (Mat. 16:13, 14) Mahimo man naton mailog ang ginhimo ni Jesus. Puede mo pangabayon ang pila mo ka abyan nga sugiran ka sing tampad kon bala wala ka sing pinasulabi. Kon sugiran ka nila nga daw ara pa sa imo ang pagpasulabi base sa rasa, tindog sa katilingban, ukon kahimtangan sa pangabuhi, ano ang dapat mo himuon? Mangamuyo sing hanuot kay Jehova parte sa imo nabatyagan, nga nagapangabay nga buligan ka nga bag-uhon ina nga panimuot para mapakita mo sing bug-os ang Iya pagkawalay pinasulabi.Mat. 7:7; Col. 3:10, 11.

17. Ano ang pila ka paagi nga mapakig-angutan naton nga wala sing pagpasulabi ang iban?

 17 Sa Cristianong kongregasyon, ginapabutyag naton ang aton handum nga ilugon ang pagkawalay pinasulabi ni Jehova paagi sa pagpakig-angot sing matinahuron kag mainayuhon sa tanan naton nga kauturan. Halimbawa, kon parte sa pagpakita sing pagkamaabiabihon, luyag naton agdahon ang tanan nga kauturan, lakip yadtong may tuhay nga kultura, subong man ang mga imol, ilo, ukon balo. (Basaha ang Galacia 2:10; Santiago 1:27.) Luwas sini, sa pagbantala sing Ginharian, ginasugid naton ang maayong balita sa tanan nga sahi sang tawo, lakip na sa mga tawo nga naghalin sa iban nga pungsod. Nalipay man kita nga matigayon ang mga literatura sa Biblia sa mga 600 ka lenguahe. Isa gid ini ka maathag nga pamatuod sang pagkawalay pinasulabi!

18. Paano mo mapakita nga ginaapresyar mo ang mga kinaiya ni Jehova nga madali palapitan kag wala sing ginapasulabi?

18 Huo, samtang ginapamalandungan naton kon paano si Jehova nangin madali palapitan kag wala sing ginapasulabi, nagabakod ang aton apresasyon sa iya. Ang mabakod nga apresasyon magapahulag sa aton nga ilugon sing bug-os ang mga kinaiya ni Jehova, nga ginapakita ini sa aton pagpakig-angot sa mga masigkatumuluo kag sa aton mga ginabantalaan.

“Ang GINOO malapit sa tanan nga nagapanawag sa iya.”—Sal. 145:18 (Tan-awa ang parapo 9)

“Ang GINOO nga inyo Dios . . . walay pinilian.”—Deut. 10:17 (Tan-awa ang parapo 17)