Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2013

Mga Gulang—Mapaumpawan Bala Ninyo “ang Kalag nga Nalapyo”?

Mga Gulang—Mapaumpawan Bala Ninyo “ang Kalag nga Nalapyo”?

Si Angela, * nga isa ka dalaga nga utod nga mga treintahon, daw indi mapahamtang. Ginahulat niya ang mga gulang. Ano ayhan ang isiling nila sa iya? Matuod, pila ka beses na sia nga wala makatambong sa mga miting, bangod ginakapoy sia sa iya obra nga pag-atipan sa mga tigulang sa bilog nga adlaw. Luwas pa sa sini, nabalaka man sia sa panglawas sang iya iloy.

Kon ikaw ang mabisita kay Angela, paano mo mapalig-on ining “kalag nga nalapyo”? (Jer. 31:25) Ano nga paghanda ang imo himuon para mangin makapaumpaw ang imo pagduaw?

HUNAHUNAA ANG KAHIMTANGAN SANG IMO KAUTURAN

Kon kaisa, tanan kita ginakapoy bangod sang aton sekular nga trabaho ukon mga responsibilidad sa organisasyon. Halimbawa, si manalagna Daniel “napunaw” sang nakakita sia sing palanan-awon nga indi niya mahangpan. (Dan. 8:27) Nabuligan sia sang nagpakita sa iya ang anghel nga si Gabriel. Ang mensahero sang Dios nagpaathag kay Daniel, nagpasalig nga ginpamatian ni Jehova ang iya mga pangamuyo, kag nagsiling nga sia “ginapakamahal [gihapon] sing daku.” (Dan. 9:21-23) Sang ulihi, ang maayo nga mga pinamulong sang isa pa ka anghel nagpabakod sa ginakapoy nga manalagna.—Dan. 10:19.

Antes magbisita, binagbinaga ang kahimtangan sang inyo masigkatumuluo

Sing kaanggid, antes magbisita sa masigkatumuluo nga nalapyo ukon naluyahan, hunahunaa anay sing maayo ang iya kahimtangan. Ano ang iya mga problema? Paano ini nga mga problema  nagpaluya sa iya? Ano ang iya maayo nga mga kinaiya? “Nagakonsentrar ako sa maayo nga mga kinaiya sang mga kauturan,” siling ni Richard, nga gulang sing sobra na sa 20 ka tuig. “Paagi sa pagbinagbinag sing maayo sa ila kahimtangan antes magbisita,” siling pa niya, “nangin mahapos sa akon nga makakita sing paagi para makahatag sing pagpalig-on nga bagay sa ila mga kinahanglanon.” Kon updan ka sang isa pa ka gulang, binagbinaga ninyo ang kahimtangan sang inyo kauturan.

TINGUHAI NGA MADULA ANG ILA KATAHAP

Mahimo mag-ugyon ka nga mabudlay iistorya ang imo mga ginabatyag. Sa pag-ilustrar: Mahimo nga nabudlayan ang kauturan sa pagpabutyag sang ila balatyagon sa nagabisita nga mga gulang. Paano mo madula ini nga katahap? Ang imo sinsero nga yuhum kag makapaumpaw nga mga pinamulong mahimo nga may maayo nga epekto. Si Michael, nga gulang sing sobra na sa 40 ka tuig, masami nga nagasugod sa iya pagbisita paagi sa pagsiling: “Abi ninyo, ang isa sa pinakamaayo nga pribilehiyo sang isa ka gulang amo ang pagbisita sa mga kauturan sa ila balay kag makilala sila sing maayo. Gani nalangkag gid kami sa pagbisita sa inyo karon.”

Mahimo kamo mangamuyo sing tinagipusuon antes sang pag-istoryahanay. Sa pangamuyo ni apostol Pablo, ginpadaku niya ang pagtuo, gugma, kag pagbatas sang iya mga kauturan. (1 Tes. 1:2, 3) Paagi sa pagpabutyag sang imo pagtamod sa maayo nga mga kinaiya sang imo mga kauturan, ginahanda mo ang imo tagipusuon, kag subong man ang iya tagipusuon, para sa makapalig-on nga pag-istoryahanay. Mahimo man makapaumpaw ang imo ginasiling. “Kon kaisa, malipatan naton ang maayo nga butang nga aton nahimo,” siling sang eksperiensiado nga gulang nga si Ray. “Gani makapaumpaw gid kon may magpahanumdom sini sa aton.”

MAGPAAMBIT SING ESPIRITUWAL NGA DULOT

Pareho kay Pablo, makapaambit ka man sing “espirituwal nga dulot” paagi sa paggamit sang Kasulatan, bisan isa lang ka teksto. (Roma 1:11) Halimbawa, ang utod nga may depresyon mahimo magbatyag nga wala sia sing pulos, pareho sang salmista nga nagpaanggid sang iya kaugalingon sa nagkigas nga “panit nga [suludlan] sa asohan.” (Sal. 119:83, 176) Sa tapos mapaathag ang teksto, mahimo mo ipabutyag ang imo pagsalig nga ang imo utod “wala . . . malipat” sa mga sugo sang Dios.

Sing kaanggid, indi ayhan ang ilustrasyon parte sa nadula nga drakma makabulig sa isa ka sister nga nagbugnaw ukon napahilayo sa kongregasyon? (Luc. 15:8-10) Ang nadula nga drakma mahimo bahin sang isa ka malahalon nga kulintas nga human sa pilak nga mga sensilyo. Kon binagbinagon mo sa iya ina nga ilustrasyon, mahimo niya marealisar nga hamili sia nga bahin sang Cristiano nga kongregasyon. Dayon, mahimo mo ipadaku nga ginaulikdan gid sia ni Jehova subong iya diutay nga karnero.

Ang aton mga masigkatumuluo masami nga nanamian sa pagpabutyag sang ila mga ideya parte sa Biblia. Gani pahambala man sila. Sa tapos mabasa ang isa ka teksto nga maaplikar sa ila kahimtangan, mahimo mo mapain ang panguna nga tinaga ukon ekspresyon kag pakomentuhan ini sa ila. Halimbawa, sa tapos mabasa ang 2 Corinto 4:16, ang gulang mahimo mamangkot, “Naeksperiensiahan mo na bala ang mga paagi nga ginabag-o ka ni Jehova?” Mahimo ini magresulta sa “pagbayluhanay sing pagpalig-on.”—Roma 1:12.

Ang aton mga masigkatumuluo masami nga nanamian sa pagpabutyag sang ila mga ideya parte sa Biblia

Mahimo mo man mapaumpawan ang imo masigkatumuluo paagi sa pagbinagbinag sang isa ka karakter sa Biblia nga may pareho nga kahimtangan sa iya. Ang mga naluyahan mahimo magbatyag sing kasubo pareho kanday Ana ukon Epafrodito. Kon kaisa nakabatyag man sila sing depresyon pero hamili gihapon sila sa Dios. (1 Sam. 1:9-11, 20; Fil. 2:25-30) Kon amo sini ang iya sitwasyon, ngaa indi pagbinagbinagon ang pila sining maayo nga mga halimbawa sa Biblia?

IPADAYON ANG PAGPAKITA SING INTERES

Mapakita mo ang imo matuod nga kabalaka sa imo mga kauturan paagi sa padayon nga pagpakita sing interes sa tapos mo sila maduaw. (Binu. 15:36) Antes tapuson ang pagbisita, ayhan praktikal kon kontratahon mo sia nga mag-updanay kamo sa ministeryo. Kon maistorya liwat ni Bernard, nga isa ka eksperiensiado nga gulang, ang utod nga iya bag-o lang nabisita, mataktikanhon niya nga ginapamangkot ang utod parte sa iya ginhatag nga suhestyon, “Ti, kamusta, epektibo bala?” Paagi sa pagpakita sing personal nga interes, mahibaluan mo kon kinahanglan niya ang dugang nga bulig.

Isa pa, kinahanglan mabatyagan sang aton mga kauturan nga ginaatipan sila, ginahangop, kag ginahigugma. (1 Tes. 5:11) Gani antes mag-shepherding, binagbinaga anay sing maayo ang kahimtangan sang inyo utod. Ipangamuyo ini. Magpili sing nagakaigo nga mga teksto. Paagi sini, makapaambit kamo sing husto nga mga pinamulong para mapaumpawan “ang kalag nga nalapyo”!

^ par. 2 Gin-islan ang mga ngalan.