Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2013

Magpadihon sa Disiplina ni Jehova

Magpadihon sa Disiplina ni Jehova

“Magatuytuy ka sa akon sang imo laygay, kag ugaling batonon mo ako sa himaya.”—SAL. 73:24.

1, 2. (a) Ano nga mga butang ang kinahanglan para matigayon ang maayo nga kaangtanan kay Jehova? (b) Paano kita makabenepisyo sa pag-usisa sang mga rekord sa Kasulatan parte sa reaksion sang katawhan sa disiplina sang Dios?

“MAAYO sa akon nga magpalapit sa Dios; ginhimo ko nga akon dalangpan ang Ginoong DIOS.” (Sal. 73:28) Ginpabutyag diri sang salmista ang iya pagsalig sa Dios. Ngaa nasiling niya ini? Sang natalupangdan niya ang kalinong sang malain nga mga tawo, ang salmista nangasubo sang primero. Nagreklamo sia: “Walay pulus ang pagtinlo ko sang akon tagiposoon kag ang paghinaw ko sang akon mga kamut sa pagkawalay sala.” (Sal. 73:2, 3, 13, 21) Apang sang nagkadto sia “sa santuario sang Dios,” nabuligan sia nga bag-uhon ang iya panghunahuna kag magpabilin nga suod sa Dios. (Sal. 73:16-18) Ini nga hitabo nagtudlo sa sining mahinadlukon sa Dios nga tawo sing importante nga leksion: Para mangin suod kay Jehova, dapat makig-upod kita sa katawhan sang Dios, batunon ang iya laygay, kag iaplikar ini.—Sal. 73:24.

2 Handum man naton nga matigayon ang suod nga kaangtanan sa matuod kag buhi nga Dios. Gani importante nga magpadihon kita sa iya laygay ukon disiplina agod mangin kalahamut-an kita sa iya! Sang una, ang Dios maluluy-on nga naghatag sing kahigayunan sa mga indibiduwal kag mga pungsod sa pagbaton sang iya disiplina. Ang ila reaksion narekord sa Biblia “sa pagtudlo sa aton” kag “subong paandam sa aton nga naabtan sang katapusan sang mga sistema sang mga butang.” (Roma 15:4; 1 Cor. 10:11) Paagi sa pag-usisa sini sing maayo, mahangpan naton ang personalidad ni Jehova kag matun-an kon paano kita makabenepisyo sa iya pagdihon.

 KON PAANO GINAPAKITA SANG MANINIHON ANG IYA AWTORIDAD

3. Sa Isaias 64:8 kag Jeremias 18:1-6, paano gin-ilustrar ang awtoridad sang Dios sa mga tawo? (Tan-awa ang piktyur sa umpisa sang artikulo.)

3 Para ilaragway ang awtoridad ni Jehova sa mga indibiduwal kag mga pungsod, ang Isaias 64:8 nagsiling: “O GINOO, ikaw amon Amay; kami ang lunang, kag ikaw ang amon maninihon; kami tanan binuhatan sang imo mga kamut.” Ang maninihon may bug-os nga awtoridad kon paano dihunon ang lunang ukon daga para mangin suludlan nga luyag niya himuon. Wala sing mahimo ang daga. Amo man sini ang kaangtanan sang tawo kag Dios. Wala sing kinamatarong ang tawo nga magreklamo sa Dios pareho sa daga nga wala sing mahimo sa maninihon nga nagaporma sa iya.—Basaha ang Jeremias 18:1-6.

4. Nagapalagpat lang bala ang Dios sa pagdihon sa mga tawo ukon pungsod? Ipaathag.

4 Gindihon ni Jehova ang Israel sadto pareho sang ginahimo sang isa ka maninihon sa daga. Ang maninihon makahimo sing bisan ano nga suludlan nga masarangan niya pormahon gikan sa daga. Pero paano si Jehova nangin tuhay sa tawo nga maninihon? Nagapalagpat lang bala si Jehova sa pagdihon sa mga tawo ukon pungsod, nga nagahimo sa pila nga maayo kag sa iban naman malain? Indi, ang sabat sang Biblia. Si Jehova naghatag sa katawhan sang bilidhon katama nga regalo—ang kahilwayan sa pagbuot. Wala niya ginagamit ang iya awtoridad para piliton ang mga tawo nga magtuman sa iya. Ang mga tawo amo dapat ang magdesisyon nga magpadihon sa Manunuga, si Jehova.—Basaha ang Jeremias 18:7-10.

5. Kon ang mga tawo indi magpadihon kay Jehova, paano niya ginagamit ang iya awtoridad?

5 Kamusta kon indi gid magpadihon ang mga tawo sa Dakung Maninihon? Paano niya ginagamit ang iya awtoridad sa sini nga sitwasyon? Hunahunaa kon ano ang matabo sa daga kon indi ini maporma suno sa luyag sang maninihon. Mahimo niya ini pormahon sa lain nga klase sang suludlan ukon ihaboy na lang. Kag sa masami, ang maninihon ang balasulon kon wala niya ini maporma sing maayo. Pero indi amo sini ang kahimtangan sang aton Maninihon. (Deut. 32:4) Kon ang isa ka tawo indi magpadihon kay Jehova, ina nga tawo amo gid ang balasulon. Ginagamit ni Jehova ang tulad-maninihon nga awtoridad sa mga tawo paagi sa pagbag-o sang iya pagpakig-angot sa ila depende sa ila reaksion sa iya pagdihon. Ang mga nagpadihon nakabenepisyo gid! Halimbawa, ang hinaplas nga mga Cristiano “mga suludlan sang kaluoy” nga gindihon nga mangin “suludlan para sa dungganon nga paggamit.” Sa pihak nga bahin, ang mga nagasupak sa Dios mangin “mga suludlan sang kasingkal nga ginhimo nga takus sa kalaglagan.”—Roma 9:19-23.

6, 7. Paano magkatuhay ang reaksion nanday Hari David kag Hari Saul sa laygay ni Jehova?

 6 Ang isa ka paagi nga ginadihon ni Jehova ang mga tawo amo ang paghatag sing laygay ukon disiplina sa ila. Makita naton kon paano niya gingamit ang iya awtoridad sa iya mga ginadihon paagi sa pagbinagbinag sa duha ka hari sang Israel, nga sanday Saul kag David. Sang nagpanghilahi si Hari David kay Bat-seba, ang iya ginhimo nakaapektar gid sa iya kag sa iban. Bisan pa hari si David, gindisiplina gihapon sia ni Jehova. Ginpadala sang Dios si manalagna Natan kay David para ipalab-ot ang matigdas nga mensahe. (2 Sam. 12:1-12) Ano ang reaksion ni David? Nagkasubo gid sia kag naghinulsol. Gani, ginkaluy-an sia sang Dios.—Basaha ang 2 Samuel 12:13.

 7 Sa kabaliskaran, ang ginbuslan ni David nga si Hari Saul wala nagbaton sang laygay. Paagi kay manalagna Samuel, ginsugo ni Jehova si Saul nga laglagon ang tanan nga Amaleknon kag ang ila kasapatan. Apang, wala gintuman ni Saul ini nga sugo. Wala niya ginpatay ang hari nga si Agag, kag ang maayo nga kasapatan. Ngaa? Ayhan bangod gusto man niya padunggan ang iya  kaugalingon. (1 Sam. 15:1-3, 7-9, 12) Sang ginlaygayan si Saul, dapat nga ginpahumok niya ang iya tagipusuon, kag nagpadihon sa Dakung Maninihon. Pero wala nagpadihon si Saul. Ginpakamatarong niya ang iya ginhimo. Nangatarungan sia nga wala sing malain sa iya ginhimo bangod ang mga kasapatan mahimo man gamiton subong halad, kag ginpakadiutay niya ang laygay ni Samuel. Ginsikway ni Jehova si Saul subong hari, kag wala na niya nabalik ang iya maayo nga kaangtanan sa matuod nga Dios.—Basaha ang 1 Samuel 15:13-15, 20-23.

Ginpakadiutay ni Saul ang laygay kag ginsikway ini. Wala sia nagpadihon! (Tan-awa ang parapo 7)

Nagkalisod si David kag nagbaton sang laygay. Nagpadihon sia sa Dios. Ikaw man bala? (Tan-awa ang parapo 6)

ANG DIOS WALA SING GINAPASULABI

8. Ano nga leksion ang aton matun-an sa reaksion sang pungsod sang Israel sa pagdihon ni Jehova?

8 Indi lamang sa mga indibiduwal nagahatag si Jehova sing kahigayunan para batunon ang iya pagdihon, kundi sa mga pungsod man. Sang 1513 B.C.E., ang mga anak sang Israel, nga ginhilway sa pagkaulipon sa Egipto, nakigkatipan sa Dios. Ang Israel amo ang pinili nga pungsod sang Dios kag may pribilehiyo nga madihon niya, nga daw ara sa nagatiyog nga dilihunan sang Dakung Maninihon. Pero ang katawhan padayon nga naghimo sing malain sa atubangan ni Jehova, kag nagsimba pa gani sa mga dios sang mga pungsod sa palibot nila. Sulitsulit nga nagpadala si Jehova sing mga manalagna para makamarasmas sila, pero wala namati ang Israel. (Jer. 35:12-15) Bangod batinggilan ang Israel, kinahanglan sila disiplinahon sing matigdas. Pareho sang suludlan nga takus sa kalaglagan, ang naaminhan nga napulo ka tribo nga ginharian ginlutos sang Asiria kag amo man ang natabo sa nabagatnan nga duha ka tribo nga ginharian sa kamot sang Babilonia. Daku gid nga leksion ang ginatudlo sini sa aton! Ang  pagdihon ni Jehova magabulig lang sa aton kon batunon naton ini.

9, 10. Ano ang reaksion sang mga taga-Ninive sa paandam sang Dios?

9 Ginhatagan man ni Jehova sing kahigayunan ang katawhan sang Ninive, ang kapital sang Asiria, nga mamati sa iya paandam. Ginsilingan niya si Jonas: “Tindug, kadto sa Ninive, inang banwa nga daku, kag magsinggit batok sa iya; kay ang ila pagkamalaut nagdangat sa atubangan nakon.” Ang Ninive takus gid nga laglagon.—Jon. 1:1, 2; 3:1-4.

10 Pero sang ginpahayag ni Jonas ang mensahe sang kalaglagan, “ang katawohan sang Ninive nagtoo sa Dios; nagbantala sila sing puasa, kag nagpanaput sing sako, kutub sa kadalagkuan tubtub gid sa mga magamay sa ila.” Ang ila hari “nagtindug . . . sa iya trono, gin-uba niya ang iya bayo sa iya, kag nagpangalumbut sia sing sako, kag naglingkod sa mga abo.” Ginbaton sang mga taga-Ninive ang pagtinguha ni Jehova nga dihunon sila, kag naghinulsol. Gani, wala gindayon ni Jehova ang kalaglagan.—Jon. 3:5-10.

11. Ano nga kinaiya ni Jehova ang nagapangibabaw sa iya pagpakig-angot sa Israel kag sa Ninive?

11 Bisan pa pinili nga pungsod ang Israel, gindisiplina sila gihapon. Sa pihak nga bahin, ang mga taga-Ninive wala nakigkatipan sa Dios. Pero ginpahayag gihapon ni Jehova ang iya mensahe sang paghukom sa ila. Kag sang nangin kaangay sila sang mahumok nga daga sa iya mga kamot, ginkaluuyan niya sila. Ginapakita gid sining duha ka halimbawa nga si Jehova nga aton Dios “walay pinilian”!—Deut. 10:17.

SI JEHOVA MAKATARUNGANON KAG MAPASIBUSIBUON

12, 13. (a) Ngaa ginabag-o sang Dios ang iya katuyuan kon batunon sang mga tawo ang iya pagdihon? (b) Ano ang buot silingon sang ‘pagkalisud’ ni Jehova sa kaso ni Saul? sa kaso sang Ninive?

12 Ang kahanda sang Dios sa pagdihon sa aton nagapakita nga makatarunganon sia kag mapasibusibuon. Makita ini sa mga sitwasyon nga desidido na si Jehova sa pagpatuman sang iya matarong nga paghukom sa katawhan, apang nagbag-o ang iya hunahuna bangod sang ila reaksion. Suno sa Kasulatan, si Jehova ‘nagkalisud’ sa pagtangdo niya kay Saul subong hari. (1 Sam. 15:11) Sang naghinulsol ang katawhan sang Ninive kag nagbiya sa ila malain nga dalanon, ang Biblia nagsiling: “Nagkalisud ang Dios sang malaut nga ginsiling niya nga himoon niya kuntani sa ila; kag wala niya paghimoa ini.”—Jon. 3:10.

13 Ang Hebreo nga termino nga ginbadbad “nagkalisud,” nagapatuhoy sa pagbag-o sing pagtamod ukon katuyuan. Halimbawa, sang primero ginkahamut-an ni Jehova si Saul. Pero sang nangin indi sia matinumanon, ginsikway sia ni Jehova subong hari. Natabo ini, indi bangod nagsayop si Jehova sa pagpili sa iya, kundi bangod nadula ang iya pagtuo kag nangin indi matinumanon. Ang matuod nga Dios nagkalisod man sa kahimtangan sang mga taga-Ninive; buot silingon, nagbag-o ang iya katuyuan parte sa ila. Makapalugpay gid mahibaluan nga si Jehova, ang aton Maninihon, makatarunganon kag mapasibuon, mainayuhon kag maluluy-on, nga handa sa pagbag-o sang iya desisyon kon magbag-o ang mga nakasala.

INDI NATON PAG-ISIKWAY ANG DISIPLINA NI JEHOVA

14. (a) Paano kita ginadihon ni Jehova? (b) Ano dapat ang aton reaksion sa pagdihon ni Jehova?

14 Sa karon, ang panguna nga ginagamit ni Jehova sa pagdihon sa aton amo ang iya Pulong, ang Biblia, kag ang iya organisasyon. (2 Tim. 3:16, 17) Indi bala nga dapat gid naton batunon ang bisan ano nga laygay ukon disiplina paagi sa sini? Daw ano man kita ka dugay nga nabawtismuhan ukon daw ano ka damo nga pribilehiyo ang aton nabaton, dapat naton padayon nga batunon ang laygay ni Jehova. Tugutan naton ini sa pagdihon sa aton agod mangin mga suludlan kita para sa dungganon nga paggamit.

15, 16. (a) Ano nga negatibo nga mga balatyagon ang mahimo mabatyagan kon ang disiplina nagadalahig sa pagkadula sang mga pribilehiyo? Iilustrar. (b) Ano ang makabulig sa aton nga madaug ang negatibo nga mga balatyagon bangod sa disiplina?

 15 Ang pila ka disiplina mahimo ihatag sa aton paagi sa pagtudlo ukon pagtadlong. Apang kon kaisa, kinahanglan kita disiplinahon bangod nakahimo kita sing sayop. Bangod sini, mahimo kita madulaan sing mga pribilehiyo. Binagbinaga ang halimbawa ni Dennis, * nga isa ka gulang sadto. Nakahimo sia sing sayop bangod sang sala nga desisyon parte sa negosyo, kag pribado sia nga ginsabdong. Ano ang nabatyagan ni Dennis sang gab-i nga ginpahibalo sa kongregasyon nga indi na sia gulang? “Nagbatyag gid ako nga napaslawan,” siling niya. “Sang nagligad nga 30 ka tuig, madamo ako sing pribilehiyo. Nangin regular payunir ako, Bethelite, ministeryal nga alagad kag dayon nangin gulang. Bag-o lang gani ako nakahatag sang akon una nga bahin sa distrito nga kombension. Sa hinali lang, nadula ini tanan. Luwas pa sa kahuya, nagbatyag ako nga wala na ako sing lugar sa organisasyon.”

16 Kinahanglan bag-uhon ni Dennis ang iya dalanon kag biyaan ang iya sayop nga nahimo. Pero, ano ang nakabulig sa iya para madaug ang negatibo nga balatyagon? Sia nagpaathag: “Determinado ako nga ipadayon ang akon maayo nga espirituwal nga hilikuton. Daku man ang nabulig sang suporta sang mga kauturan kag sang pagpalig-on sa aton mga publikasyon. Ang artikulo nga ‘Nag-alagad Ka Bala Sadto? Makaalagad Ka Bala Liwat?’ sa Agosto 15, 2009, nga Ang Lalantawan daw personal nga sulat bilang sabat sa akon mga pangamuyo. Ang laygay nga ginpabaloran ko gid amo, ‘Samtang wala ka pa sing dugang nga responsibilidad sa kongregasyon, pabakura ang imo suod nga kaangtanan kay Jehova.’” Paano si Dennis nakabenepisyo sa disiplina? Pagligad sang pila ka tuig, sia nagsiling, “Ginpakamaayo ako liwat ni Jehova sing pribilehiyo nga makaalagad subong ministeryal.”

17. Paano makabulig ang pag-disfellowship para maghinulsol ang nakasala? Iilustrar.

17 Ang pag-disfellowship isa pa ka sahi sang disiplina ni Jehova. Nagaamlig ini sa kongregasyon gikan sa malain nga impluwensia kag nagabulig para maghinulsol ang nakasala. (1 Cor. 5:6, 7, 11) Si Robert na-disfellowship sing halos 16 ka tuig. Sina nga tion, ang iya mga ginikanan kag mga utod malig-on kag mainunungon nga nagtuman sa sugo sang Pulong sang Dios nga indi makig-upod sa mga makasasala, bisan magtamyaw sa ila. Mga pila na ka tuig nga nakapanumbalik si Robert kag nagauswag na sa espirituwal. Sang ginpamangkot sia kon ngaa nagbalik sia kay Jehova kag sa Iya katawhan pagkatapos sang malawig nga tion, nagsabat sia nga ang panindugan sang iya pamilya amo ang rason. “Kon nakig-upod sa akon ang akon pamilya bisan gamay lang, halimbawa para kamustahon ako, inang malip-ot nga pagpakig-upod mahimo magpahalipay na sa akon kag ang akon handum nga magpakig-upod [sa ila] mahimo nga indi na magpahulag sa akon nga manumbalik sa Dios.”

18. Mangin ano kita dapat nga sahi sang daga sa kamot sang Dakung Maninihon?

18 Mahimo nga indi naton kinahanglan ini nga disiplina, pero mangin ano kita nga sahi sang daga sa kamot sang Dakung Maninihon? Ano ayhan ang aton reaksion kon disiplinahon kita? Mangin kaangay bala kita ni David ukon ni Saul? Ang Dakung Maninihon amo ang aton Amay. Indi pagkalimti nga “sia nga ginahigugma sang GINOO ginabadlong niya, subong sang amay sa anak nga sa iya nagakahamuut sia.” Gani “dili pagtamaya ang disiplina sang GINOO kag dili magkataka sa iya pagsabdong.”—Hulu. 3:11, 12.

^ par. 15 Gin-islan ang mga ngalan.