Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MAYO 2013

 SUGILANON SANG KABUHI

Kon Ngaa May Matuod nga Katuyuan ang Amon Kabuhi

Kon Ngaa May Matuod nga Katuyuan ang Amon Kabuhi

SANG natawo ang akon anak nga si Gary sang 1958, natalupangdan ko nga may diperensia sia. Pero, napulo pa ka bulan kag nahibaluan sang mga doktor ang iya balatian, kag lima pa gid ka tuig ang nagligad sang nakumpirmar ini sang mga espesyalista sa London. Grabe man ang akon kasubo sang ang akon bata nga babayi nga si Louise, nga manghod kay Gary sing siam ka tuig, may amo man sini nga mga sintomas, pero mas malala pa.

“Ang imo mga bata may LMBB syndrome, * kag wala gid ini sing bulong,” mainayuhon nga ginsiling sa akon sang mga doktor. Sadto nga tion, diutay pa lang ang nahibaluan parte sa sining talagsahon nga balatian. Ang mga sintomas sini nagalakip sang diperensia sa panulok nga nagaresulta sa pagkabulag, sobra nga katambukon, dugang nga mga tudlo sa kamot ukon tiil, mahinay nga pagdaku, indi makahulag sing maayo, diabetes mellitus, osteoarthritis, kag diperensia sa kidney. Gani, ang pag-atipan sa akon kabataan indi gid mahapos. Ginabulubanta sang isa ka pagtuon sining karon lang nga 1 sa 125,000 ka tawo sa Britanya ang may amo sini nga balatian, kag madamo sa sini ang indi gid man malala.

SI JEHOVA ‘NANGIN MATAAS NGA TORRE’ SA AMON

Bag-o lang ako nakasal sang naistorya ko ang isa sa mga Saksi ni Jehova, kag narealisar ko dayon nga amo ini ang kamatuoran. Pero indi interesado ang akon bana. Bangod sa iya trabaho, pirme kami nagasaylosaylo, gani indi ako makapakig-upod sa isa ka kongregasyon. Pero padayon ako nga nagabasa sang Biblia kag nagapangamuyo kay Jehova. Makapalig-on gid mabasa nga si Jehova “manginmataas nga torre tungud sa mga pinigus, mataas nga torre sa mga tion sang kagamo” kag “wala magbiya sa mga nagapangita sa [iya]”!—Sal. 9:9, 10.

Indi makakita sing maayo si Gary, gani sang anom sia ka tuig, ginpaeskwela sia sing pinasahi nga edukasyon sa isa ka boarding school sa bagatnan nga baybayon sang Inglaterra. Regular niya ako nga ginatawgan parte sa iya mga problema, kag paagi sa telepono nabuligan ko sia nga mahangpan ang panguna nga mga prinsipio sa Biblia. Mga pila ka tuig pagkatapos matawo si Louise, nagbalatian man ako sang multiple sclerosis kag fibromyalgia. Nagpauli si Gary halin sa boarding school sang 16 anyos sia. Pero naglala na gid ang iya panulok, kag sang 1975 narehistro sia subong bulag. Sang 1977, ginbiyaan kami sang akon bana.

Wala madugay pagbalik ni Gary, nakigbahin kami sa mga hilikuton sang isa ka mahigugmaon nga kongregasyon, kag nabawtismuhan ako sang 1974. Nagapasalamat gid ako kay ginbuligan sang isa ka gulang si Gary nga maatubang sing madinalag-on ang pisikal nga mga pagbag-o sa tion sang iya pagkatin-edyer. Ang iban nga Saksi nagabulig sa akon sa mga hilikuton sa balay, kag sang ulihi, ang lokal nga gobierno nagsueldo sing lima ka Saksi para regular nga mag-atipan sa amon. Daku gid ini nga pagpakamaayo!

Padayon nga nag-uswag si Gary sa kamatuoran kag nagpabawtismo sang 1982. Luyag gid niya mag-auxiliary payunir, gani gin-updan ko sia sa sina nga hilikuton kag nagpadayon sa sini sa sulod sang pila ka tuig. Nalipay gid si Gary, sang ginpamangkot sia sang ulihi sang amon manugtatap sang sirkito, “Gusto mo bala magregular payunir, Gary?” Kinahanglan  gid niya ini nga pagpalig-on, kag sang 1990 nangin regular payunir sia.

Gin-islan ang iya balikawang sang 1999 kag sang 2008. Pero mas malala ang balatian ni Louise. Natawo sia nga bulag, kag sang nakita ko nga may sobra nga tudlo sa isa niya ka tiil, narealisar ko nga may LMBB syndrome man sia. Nakita man sang ulihi sa mga eksaminasyon nga may mga depekto ang iya mga organo. Sa sulod sang mga tinuig, pila ka beses na sia gin-operahan, lakip na ang lima ka operasyon sa kidney. May diabetes man sia pareho kay Gary.

Bangod nahibaluan ni Louise ang mga problema nga mahimo mag-utwas kon kinahanglanon ang operasyon, ginaistorya na niya ang mga manug-opera, manug-anestisya, kag ang tagdumalahan sang ospital sa iya desisyon parte sa pagpabulong nga wala nagagamit sing dugo. Gani, may maayo sia nga kaangtanan sa tanan nga nagaatipan sa iya.

MAY KATUYUAN ANG AMON KABUHI

Sa balay, madamo kami sing hilikuton para sa pagsimba kay Jehova. Sang wala pa ang moderno nga elektroniko nga mga kagamitan, pila ka oras nga ginabasahan ko sanday Gary kag Louise. Sa karon, ang mga CD, DVD, kag mga rekording halin sa www.jw.org nakabulig sa amon nga matun-an sa bisan ano nga tion ang iskedyul kada semana sa pagtuon sing Biblia. Makakomento man kami sa Cristiano nga mga miting.

Nagapasalamat gid kami sa hamili nga mga kamatuoran sa Pulong ni Jehova!

Kon kaisa ginasaulo ni Gary ang iya mga sabat, kag kon may pamulongpulong sia sa Teokratikong Eskwelahan Para sa Ministeryo, ginahatag niya ini sing ekstemporanyo. Gintangdo sia subong ministeryal nga alagad sang 1995 kag masako pirme sa Kingdom Hall sa pag-abiabi sa mga kauturan kag pagbulig sa opereytor sang sound system.

Ginaupdan sang mga kauturan si Gary sa ministeryo, masami nga ginatulod ang iya wheelchair bangod sang iya arthritis. Ang isa nagbulig sa iya sa pagdumala sing Bible study sa isa ka interesado. Napalig-on man ni Gary ang isa ka Cristiano nga di-aktibo sa sulod sang 25 ka tuig. Ining interesado kag di-aktibo nagatambong na karon sa Cristianong mga miting.

Sang siam ka tuig si Louise, nakatuon sia sa iya lola kon paano maggansilyo, kag gintudluan ko sia upod sa isa ka caregiver kon paano magburda. Bangod nanamian gid sia sa sini nga obra, nagagansilyo sia sing matahom nga mga habol para sa mga lapsag kag mga tigulang sa kongregasyon. Nagahimo man sia sing mga kard nga nagagamit sing gagmay nga ginapatapik nga mga piktyur. Ginapabaloran gid ini sang mga nakabaton. Sang tin-edyer si Louise, nakatuon sia mag-touch-type. Sa karon, sa bulig sang kompyuter nga nagahambal, regular niya nga ginakontak ang iya mga abyan paagi sa e-mail. Nabawtismuhan si Louise sang 17 anyos sia. Sa tion sang pinasahi nga kampanya sa pagbantala, magkaupod kami nga naga-auxiliary payunir. Kaangay ni Gary, ginasaulo ni Louise ang mga kasulatan para ipabutyag ang iya pagtuo sa mga saad sang Dios parte sa kalibutan diin “ang mga mata sang mga bulag pamuklaton” kag “ang pumuluyo indi [na] magsiling, ‘Nagamasakit ako.’”—Isa. 33:24; 35:5.

Nagapasalamat gid kami sa hamili nga mga kamatuoran sa Pulong ni Jehova! Nagapasalamat man kami sing daku sa mahigugmaon nga suporta sang amon kongregasyon, kay kon wala sila halos imposible gid nga mahimo namon ang amon hilikuton. Kag labaw sa tanan, bangod sa bulig ni Jehova, may matuod nga katuyuan ang amon kabuhi.

^ par. 5 Ang Laurence-Moon-Bardet-Biedl syndrome ginkuha sa ngalan sang apat ka doktor nga nakatukib sini nga balatian. Sa karon, ginatawag ini nga Bardet-Biedl syndrome. Wala ini sing bulong.