Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2013

Pat-ura “ang Mas Importante nga mga Butang”

Pat-ura “ang Mas Importante nga mga Butang”

“Mapat-od ninyo ang mas importante nga mga butang.”FIL. 1:10.

1, 2. Ano nga tagna parte sa katapusan nga mga adlaw ang mahimo nagkuha gid sing interes sang mga disipulo ni Jesus, kag ngaa?

KAUPOD nanday Pedro, Santiago, Juan, kag Andres ang ila Agalon. Ang ginsiling sadto ni Jesus parte sa kalaglagan sang templo indi gid nila malipatan. (Mar. 13:1-4) Gani, namangkot sila: “Sugiri kami, San-o mahanabo ining mga butang, kag ano ang mangin tanda sang imo presensia kag sang katapusan sang sistema sang mga butang?” (Mat. 24:1-3) Ginsugid sa ila ni Jesus ang mga hitabo, ukon mga kahimtangan, nga indi lamang magaresulta sing daku nga pagbag-o sa kabuhi kundi magapakilala man sang katapusan nga mga adlaw sang malaut nga sistema sang mga butang ni Satanas. Ang isa sini nga mga hitabo ang mahimo nagkuha gid sing interes sang mga disipulo. Sa tapos niya masugid ang makapasubo nga mga hitabo subong sang inaway, kakulang sing kalan-on, kag pagdugang sang pagkamalinapason, gintagna ni Jesus ang isa ka positibo nga butang nga mangin tanda man sang katapusan nga mga adlaw. Nagsiling sia: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.”Mat. 24:7-14.

2 Ang mga disipulo ni Jesus nalipay sa pagbantala sang maayong balita sang Ginharian kaupod niya. (Luc. 8:1; 9:1, 2) Ayhan nadumduman nila ang ginsiling ni Jesus: “Sa pagkamatuod, ang alanyon bugana, apang pila lamang ang mamumugon. Busa pakiluoy kamo sa Agalon sang alanyon nga magpadala sia sang mga mamumugon sa iya alanyon.” (Luc. 10:2) Pero paano nila mabantalaan ang “bug-os napuy-an nga duta” kag maghatag sing “panaksi sa tanan nga pungsod”? Sa diin magahalin ang mga mamumugon? Kon nahibaluan lang kuntani nila ang palaabuton samtang nagapungko sila kaupod ni Jesus, pat-od nga magadayaw gid sila sa katumanan sang mga pinamulong sa Mateo 24:14!

3. Paano ang Lucas 21:34 nagakatuman karon, kag ano ang dapat naton ipamangkot sa aton kaugalingon?

 3 Nagakabuhi na kita sa tion sang katumanan sang tagna ni Jesus. Minilyon ang nagapakigbahin sa pagbantala sang maayong balita sang Ginharian sa bug-os nga duta. (Isa. 60:22) Pero ginpakita ni Jesus nga ang iban mabudlayan sa pag-una sini sa ila kabuhi sa sining katapusan nga mga adlaw. Mahimo sila matublag kag “mabug-atan.” (Basaha ang Lucas 21:34.) Nakita man naton ang katumanan sini nga mga pinamulong. Ang pila sa katawhan sang Dios nagatalang. Mahimo ini makita sa ila mga desisyon parte sa ila mga trabaho, sekular nga edukasyon, kag pagtigayon sang mga pagkabutang, subong man sa kadakuon sang tion nga ila ginahinguyang sa mga sport kag kalingawan. Ang iban ginakapoy bangod sa mga pag-ipit kag mga kabalaka kada adlaw. Pamangkuta ang imo kaugalingon: ‘Kamusta ako? Ano ang ginapakita sang akon mga desisyon parte sa akon mga prioridad?’

4. (a) Ano ang ginpangamuyo ni Pablo para sa mga Cristiano sa Filipos, kag ngaa? (b) Ano ang binagbinagon naton sa sini kag sa masunod nga artikulo, kag sa ano nga katuyuan?

4 Ang mga Cristiano sang unang siglo nanikasog sa pag-una sang ila pag-alagad sa Dios. Nakita ni Pablo nga kinahanglan ipangamuyo niya nga “mapat-od [sang mga taga-Filipos] ang mas importante nga mga butang.” (Basaha ang Filipos 1:9-11.) Kaangay ni apostol Pablo, ang kalabanan sadto “nagapakita sang labi pa nga kaisog sa paghambal sing pulong sang Dios nga wala sing kahadlok.” (Fil. 1:12-14) Sing kaanggid, ang kalabanan sa aton subong maisugon nga nagabantala sang Pulong sang Dios. Pero, ang pagbinagbinag bala sang mga ginahimo karon sang organisasyon ni Jehova magabulig sa aton nga makakonsentrar pa gid sa pinakaimportante nga buluhaton nga pagbantala? Huo! Sa sini nga artikulo, binagbinagon naton ang kahimusan ni Jehova para matuman ang Mateo 24:14. Ano ang ginahimo sang iya organisasyon, kag paano ang paghibalo sa sini magapahulag sa aton kag sa aton pamilya? Sa masunod nga artikulo, binagbinagon naton kon ano ang makabulig sa aton nga makapadayon kag makadungan sa organisasyon ni Jehova.

NAGAHULAG ANG LANGITNON NGA BAHIN SANG ORGANISASYON NI JEHOVA

5, 6. (a) Ngaa naghatag si Jehova sing mga palanan-awon sang langitnon nga bahin sang iya organisasyon? (b) Ano ang nakita ni Ezequiel sa palanan-awon?

5 Madamo sing mga butang nga wala ginlakip ni Jehova sa iya nasulat nga Pulong. Halimbawa, wala sia naghatag sing mga detalye kon paano nagapanghikot ang utok ukon kon paano nagahulag ang uniberso, bisan pa ina nga mga impormasyon mahimo nga dalayawon gid! Sa baylo, naghatag si Jehova sing mga impormasyon nga kinahanglan naton para mahangpan ang iya mga katuyuan kag magkabuhi nahisuno sa sini. (2 Tim. 3:16, 17) Gani makalilipay gid nga ang Biblia naghatag sing mga impormasyon parte sa indi makita nga bahin sang organisasyon ni Jehova! Makunyag kita sa pagbasa sang mga paglaragway sa kahimusan ni Jehova sa langit nga ginsulat nanday Isaias, Ezequiel, kag Daniel kag sa rekord sang Bugna kay Juan. (Isa. 6:1-4; Ezeq. 1:4-14, 22-24; Dan. 7:9-14; Bug. 4:1-11) Daw pareho lang nga ginbutong ni Jehova ang kurtina para makita naton ang mga langit. Ngaa ginhatag niya ini nga impormasyon?

6 Luyag ni Jehova nga indi naton pagkalimtan nga bahin kita sang bug-os uniberso nga organisasyon. Luwas sa aton makita, mas madamo pa ang nagakatabo para masuportahan ang mga katuyuan ni Jehova. Halimbawa, nakita ni Ezequiel sa isa ka palanan-awon ang indi makita nga bahin sang organisasyon ni Jehova nga ginalaragway sang daku nga langitnon nga kangga. Ini nga kangga makadalagan sing madasig kag makabag-o gilayon sing direksion. (Ezeq. 1:15-21) Sa kada  pagtiyog sang mga ruweda sini, ang kangga makalakbay sing malayo. Sa palanan-awon, nakita man ni Ezequiel ang nagasakay sa kangga. Nagsiling sia: “Nakita ko ang daw nagabaga nga metal kaangay sang dagway sang kalayo sa sulud sini palibut . . . Amo ini ang dagway sang kaangay sang himaya sang GINOO.” (Ezeq. 1:25-28) Pat-od nga nahayanghag gid si Ezequiel sa iya nakita! Nakita niya nga kontrolado gid ni Jehova ang iya organisasyon, nga ginagiyahan ang mga hulag sini paagi sa iya balaan nga espiritu. Dalayawon gid ini nga paglaragway sa paghulag sang langitnon nga bahin sang organisasyon ni Jehova!

7. Paano ang palanan-awon ni Daniel nagahatag sa aton sing pasalig?

7 Si Daniel nakakita man sing palanan-awon nga nagahatag sa aton sing pasalig. Nakita niya si Jehova nga ginalaragway subong “dumaan sang mga adlaw” nga nagapungko sa nagadabdab nga trono. Ang iya trono may mga ruweda. (Dan. 7:9) Luyag ni Jehova nga makita ni Daniel nga ang Iya organisasyon nagahulag, nga nagatuman sang Iya katuyuan. Nakita man ni Daniel ang “isa nga kaangay sa anak sang tawo,” si Jesus, nga ginhatagan sing awtoridad nga dumalahan ang dutan-on nga bahin sang organisasyon ni Jehova. Ang himpit nga paggahom ni Cristo indi lamang magadugay sing pila ka tuig. Sa baylo, isa ini ka “dayon nga pagbulut-an, nga indi magtaliwan, kag ang iya ginharian . . . indi malaglag.” (Dan. 7:13, 14) Napahulag gid kita nga magsalig kay Jehova kag apresyahon ang iya ginahimo. Ginhatag niya ang “pagbulut-an kag himaya kag ginharian” sa iya natilawan kag napamatud-an na nga Anak, si Jesus. May pagsalig si Jehova sa iya Anak. Gani, makasalig man kita sa pagpanguna ni Jesus.

8. Paano nakaapektar kanday Ezequiel kag Isaias ang mga palanan-awon gikan kay Jehova, kag ano dapat ang epekto sini sa aton?

 8 Paano dapat makaapektar sa aton ang palanan-awon parte sa indi makita nga bahin sang organisasyon ni Jehova? Kaangay ni Ezequiel, pat-od nga nahayanghag gid kita kag nagabatyag nga kubos parte sa ginahimo ni Jehova. (Ezeq. 1:28) Ang pagpamalandong sa organisasyon ni Jehova magapahulag sa aton nga manghikot, subong sang ginhimo ni ­Isaias. Sang ginhatagan sia sing kahigayunan nga isugid sa iban ang ginahimo ni Jehova, ginbaton niya ini nga wala sing pagpangduhaduha. (Basaha ang Isaias 6:5, 8.) Nagasalig si Isaias nga sa bulig ni Jehova, maatubang niya sing madinalag-on ang mga kabudlayan. Sing kaanggid, ang palanan-awon parte sa indi makita nga bahin sang organisasyon ni Jehova dapat magpahayanghag kag magpahulag sa aton nga manghikot. Makapalig-on gid nga pamalandungan ina nga organisasyon, nga pirme nagahulag, kag nagakonsentrar sing bug-os sa pagtuman sang mga katuyuan ni Jehova!

ANG DUTAN-ON NGA BAHIN SANG ORGANISASYON NI JEHOVA

9, 10. Ngaa kinahanglan ang makita nga bahin sang organisasyon ni Jehova?

9 Paagi sa iya Anak, naghimo si Jehova sing kahimusan diri sa duta nga magapanghikot nahisuno sa indi makita nga bahin sang iya organisasyon. Ngaa kinahanglan ang kahimusan diri sa duta para matuman ang hilikuton nga ginalaragway sa Mateo 24:14? Binagbinaga ang tatlo ka rason.

10 Una, nagsiling si Jesus nga ining pagbantala nga hilikuton magadala sa iya mga disipulo “tubtob sa ukbong sang duta.” (Binu. 1:8) Ikaduha, kinahanglan ang mga kahimusan para maaman ang espirituwal nga pagkaon kag maatipan ang mga nagapakigbahin sa sini nga hilikuton. (Juan 21:15-17) Ikatlo, kinahanglan man ang kahimusan agod yadtong mga nagabantala sang maayong balita makatipon sing tingob para simbahon si Jehova kag matudluan kon paano himuon ang hilikuton. (Heb. 10:24, 25) Ini nga mga tulumuron indi mahimo kon wala sing kahimusan. Para mangin madinalag-on ang mga sumulunod ni Cristo, kinahanglan nga mangin organisado katama ang hilikuton.

11. Paano naton mapakita ang aton pagsuporta sa mga kahimusan sang organisasyon ni Jehova?

11 Paano naton mapakita ang aton pagsuporta sa mga kahimusan sang organisasyon ni Jehova? Ang isa ka importante nga paagi amo ang pagsalig pirme sa mga gintugyanan ni Jehova kag ni Jesus nga manguna sa aton sa pagbantala. Madamo sing buluhaton ukon kawsa sa kalibutan subong nga mahimo magtublag sa aton sa pagsunod sa mga nagapanguna. Pero, sa ano pirme nagakonsentrar ang makita nga bahin sang organisasyon ni Jehova?

MAGKONSENTRAR SA “MAS IMPORTANTE NGA MGA BUTANG”

12, 13. Paano ginahimo sang mga gulang ang ila asaynment, kag ngaa makapalig-on ini sa imo?

12 Ang eksperiensiado nga mga gulang sa bilog nga kalibutan gintangdo para magdumala kag magpalig-on sa pagbantala sing Ginharian sa lugar nga ila ginaalagaran. Gani, kon nagahimo sing desisyon ini nga mga utod, nagapagiya sila sa Pulong sang Dios, nga ginahimo ini nga ‘suga sa ila mga tiil kag kapawa sa ila mga banas,’ kag hanuot nga nagapangamuyo para sa panuytoy ni Jehova.Sal. 119:105; Mat. 7:7, 8.

13 Kaangay sang mga nagapanguna sang unang siglo, ang mga gulang nga nagadumala sa pagbantala nga hilikuton karon makugi sa “ministeryo may kaangtanan sa pulong.” (Binu. 6:4) Nagakalipay gid sila sa pag-uswag sang pagbantala sang maayong balita sa ila lugar kag sa bug-os nga kalibutan. (Binu. 21:19, 20) Wala sila nagahimo sing wala katapusan nga mga pagsulundan kag pamaagi. Sa baylo, ginasunod nila ang Kasulatan kag ang paggiya sang balaan nga espiritu sang Dios  samtang nagahimo sing mga kahimusan nga makabulig para mapadayon ang pagbantala nga hilikuton. (Basaha ang Binuhatan 15:28.) Sa paghimo sini, ining responsable nga mga utod nangin maayo nga halimbawa sa tanan sa kongregasyon.Efe. 4:11, 12.

14, 15. (a) Ano ang ginahimo nga mga kahimusan para masuportahan ang pagbantala sa bilog nga duta? (b) Ano ang imo nabatyagan sa imo pagsuporta sa pagbantala sang Ginharian?

14 Wala makita sang madamo ang dalayon nga pagpangabudlay sa paghanda sang espirituwal nga pagkaon sa aton mga publikasyon, mga miting, kag mga kombension. Linibo ka boluntaryo ang wala untat nga nagatrabaho sa pagbadbad sining espirituwal nga pagkaon sa mga 600 ka lenguahe agod mas madamo pa ang makatuon parte “sa halangdon nga mga butang sang Dios” sa ila lenguahe. (Binu. 2:7-11) Ang pamatan-on nga mga kauturan—lalaki kag babayi—nagatrabaho agod maimprinta ang aton nga mga literatura sa moderno nga mga imprintahan kag bindery equipment. Ini nga mga literatura ginapanagtag dayon sa mga kongregasyon, bisan sa pinakamalayo nga mga lugar.

15 Madamo sing kahimusan para makakonsentrar kita sa pagbantala sing maayong balita upod sa aton kongregasyon. Ang pila sa sini amo ang linibo ka boluntaryo nga nagabulig sa pagtukod sang Kingdom Hall kag Assembly Hall, pagtatap sa mga naapektuhan sang kalamidad ukon nagaatubang sang medikal nga mga emerhensia, pag-organisar sa aton mga asembleya kag mga kombension, kag pagtudlo sa teokratiko nga mga eskwelahan. Ano ang katuyuan sini nga mga hilikuton? Para mapatuman ang pagbantala sang maayong balita, mapauswag ang espirituwalidad sang mga nagatuman sini, kag mapalapnag ang matuod nga pagsimba. Ang dutan-on bala nga bahin sang organisasyon ni Jehova nagapabilin nga masako sa mas importante nga mga butang? Huo, amo gid sina ang ila ginahimo!

SUNDA ANG HALIMBAWA SANG ORGANISASYON NI JEHOVA

16. Ano ang isa ka maayo nga proyekto sang pagtuon sa Biblia para sa imo kag sa imo pamilya?

16 Nagahatag bala kita sing tion sa pagpamalandong sa mga hilikuton sang organisasyon ni Jehova? Ginpili sang iban nga ilakip sa ila pangpamilya nga pagsimba ukon personal nga pagtuon ang pag-research kag pagpamalandong sa sini. Ang mga palanan-awon nanday Isaias, Ezequiel, Daniel, kag Juan makawiwili gid nga tun-an. Ang libro nga Jehovah’s Witnesses—Proclaimers of God’s Kingdom kag ang iban pa nga publikasyon ukon DVD nagatudlo man sing makapainteres nga mga butang parte sa organisasyon sang Dios.

17, 18. (a) Paano ka nakabenepisyo sa sini nga pagbinagbinag? (b) Ano nga mga pamangkot ang dapat naton binagbinagon?

17 Maayo gid para sa aton ang pagpamalandong sa ginahimo ni Jehova paagi sa iya organisasyon. Upod sa sining dalayawon nga organisasyon, kabay nga mangin determinado kita nga magkonsentrar sa mas importante nga mga butang. Paagi sini, mailog naton ang determinasyon ni Pablo, nga nagsulat: “Sanglit may yari kami sini nga ministeryo suno sa kaluoy nga ginpakita sa amon, wala kami nagapangampo.” (2 Cor. 4:1) Ginpalig-on man niya ang iya mga masigkamanugpangabudlay: “Indi kita magpangampo sa paghimo sing maayo, kay sa nagakaigo nga panahon magaani kita kon indi kita paglapyuon.”Gal. 6:9.

18 May mga kinahanglan bala kita bag-uhon subong mga indibiduwal ukon pamilya para mapat-od ang mas importante nga mga butang sa aton adlaw-adlaw nga mga buluhaton? Mapasimple bala naton ang aton kabuhi ukon mabuhinan ang mga tublag para mas makakonsentrar kita sa pinakaimportante nga buluhaton nga pagbantala? Sa masunod nga artikulo, binagbinagon naton ang lima ka butang nga makabulig sa aton para makadungan sa organisasyon ni Jehova.