Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Abril 2013

Naghalad sang Ila Kaugalingon sing Kinabubut-on—Sa Mexico

Naghalad sang Ila Kaugalingon sing Kinabubut-on—Sa Mexico

MAKALILIPAY gid makita nga nagadamo ang pamatan-on nga mga Saksi nga nagapasimple sang ila kabuhi para mapasangkad ang ila ministeryo. (Mat. 6:22) Ano nga mga pagbag-o ang ila ginhimo? Ano nga mga kabudlayan ang ila naatubang? Para mahibaluan ini, kilalahon naton ang pila nga nagaalagad subong sa Mexico.

“KINAHANGLAN NGA MAGHIMO KAMI SING PAGBAG-O”

Sanday Dustin kag Jassa sang Estados Unidos nagpakasal sang Enero 2007. Wala madugay, nalab-ot nila ang ila madugay na nga handum nga makatigayon sing isa ka sakayan kag mag-istar diri. Gin-angkla nila ini malapit sa Astoria, Oregon, U.S.A., isa ka matahom nga banwa nga napalibutan sang madabong nga kabukiran kag mga bukid nga nakulapan sang niebe, nga malapit lang sa Dagat Pasipiko. “Bisan diin ka magtulok,” siling ni Dustin, “katahom gid sang palibot!” Nagpensar ang mag-asawa nga simple ang ila kabuhi, kag nagasalig kay Jehova. ‘Kay man,’ hunahuna nila, ‘nagaistar kami sa 7.9 metros nga sakayan, nagatrabaho sing part-time, nagapakig-upod sa dumuluong sing lenguahe nga kongregasyon, kag kon kaisa nagaauxiliary payunir.’ Pero narealisar nila nga ginadaya nila ang ila kaugalingon. “Sa baylo nga suportahan ang kongregasyon, masako kami pirme sa pagkay-o sang amon sakayan,” siling ni Dustin. “Nahibaluan namon nga kon gusto namon unahon si Jehova, kinahanglan nga maghimo kami sing pagbag-o.”

 Si Jassa nagsiling pa: “Sang wala pa ako nakapamana, nag-istar ako sa Mexico, kag nagapakig-upod sa Ingles nga kongregasyon. Nanamian gid ako mag-alagad didto, kag gusto ko magbalik.” Para mapalig-on ang ila handum nga mag-alagad sa iban nga lugar, ginbasa nanday Dustin kag Jassa sa tion sang ila pangpamilya nga pagsimba ang eksperiensia sang mga kauturan nga nagsaylo sa mga pungsod diin ang kaumhan handa na anihon. (Juan 4:35) “Gusto man namon maeksperiensiahan ini nga kalipay,” siling ni Dustin. Sang nabalitaan nila sa ila mga abyan sa Mexico nga nagakinahanglan sing bulig ang bag-o lang naporma nga grupo, naghimo sila sing desisyon. Gin-untatan nila ang ila trabaho, ginbaligya ang ila sakayan, kag nagsaylo sa Mexico.

“ANG PINAKAMAAYO NGA BUTANG NGA AMON NAHIMO”

Sanday Dustin kag Jassa nag-istar sa banwa sang Tecomán—nga malapit man sa Dagat Pasipiko pero mga 4,345 kilometros sa bagatnan sang Astoria. “Imbes nga mabugnaw nga dapya sang hangin kag matahom nga kabukiran, naeksperiensiahan namon ang nagatagiti nga init kag puro lang puno sang lemon ang amon makita,” siling ni Dustin. Sang primero, indi sila makakita sing obra. Bangod ginakulang sila, nagakaon sila sing kan-on kag beans sing duha ka beses sa isa ka adlaw sa sulod sang mga sinemana. “Sang daw indi na namon maagwanta ang amon ginakaon,” siling ni Jassa, “ginhatagan kami sang amon mga Bible study sing mga paho, saging, kapayas kag, siempre, plinastik nga mga lemon!” Sang ulihi, nakakita sila sing trabaho nga pagtudlo sing lenguahe sa internet, nga nakabase sa Taiwan. Ang ila kita sa sini nga trabaho makatrespaser na sa ila mga kinahanglanon kada adlaw.

Ano ang nabatyagan nanday Dustin kag Jassa sa ila bag-o nga pagkabuhi? “Ini nga pagsaylo amo ang pinakamaayo nga butang nga amon nahimo,” siling nila. “Ang amon kaangtanan kay Jehova kag sa kada isa nangin mas mabakod sangsa amon ginapaabot. Kada adlaw, magkaupod kami nga nagahimo sing madamo nga butang—pagbantala, paghambalanay kon paano mabuligan ang amon mga Bible study, kag paghanda para sa mga miting. Nadula na ang amon mga kabalaka sang una.” Nagsiling pa sila: “Naapresyar namon subong ang wala gid namon nahangpan sadto—ang kamatuoran sang saad sa Salmo 34:8, ‘Tilawi kag tan-awa nga maayo ang GINOO!’”

ANO ANG NAGPAHULAG SA LINIBO NGA NAGBOLUNTARYO?

Sobra sa 2,900 ka kauturan—minyo kag di-minyo, nga madamo ang beintehon kag treintahon—ang nagsaylo sa mga lugar sa Mexico diin mas daku ang kinahanglanon nga mga manugbantala sang Ginharian. Ngaa ginbaton sini nga mga utod ining indi mahapos nga hilikuton? Sang ginpamangkot ini sa isa ka grupo, naghatag sila sing tatlo ka panguna nga rason. Ano ini?

Sanday Leticia kag Hermilo

 Mapakita ang gugma kay Jehova kag sa isigkatawo. Si Leticia nabawtismuhan sa edad nga 18. Nagsiling sia: “Sang nagdedikar ako kay Jehova, nahangpan ko nga nagakahulugan ini nga alagaron ko sia sing bug-os tagipusuon kag kalag. Gani para mapakita ko ang akon bug-os tagipusuon nga gugma kay Jehova, gusto ko gamiton ang akon daku nga tion kag kusog sa pag-alagad sa iya.” (Mar. 12:30) Si Hermilo, nga bana ni Leticia, mga beintehon sang nagsaylo sa lugar nga daku ang kinahanglanon. Nagsiling sia: “Narealisar ko nga ang pagbulig sa mga tawo nga matigayon ang ila espirituwal nga mga kinahanglanon amo ang pinakamaayo nga paagi sa pagpakita sang gugma sa isigkatawo.” (Mar. 12:31) Gani naghalin sia sa mainuswagon nga siudad sang Monterrey, diin nagaobra sia sa bangko kag nagakabuhi sing matawhay, kag nagsaylo sa isa ka gamay nga banwa.

Si Essly

Maeksperiensiahan ang matuod kag nagadugay nga kalipay. Wala madugay pagkatapos sang iya bawtismo, gin-updan ni Leticia ang isa ka eksperiensiado nga payunir sa isa ka naligwin nga banwa, diin nagbantala sila sing isa ka bulan. Si Leticia naghinumdom: “Nagbilib gid ako. Daku gid ang akon kalipay sang makita ko kon paano ginbaton sang mga tawo ang mensahe sang Ginharian nga amon ginbantala. Pagkatapos sang bulan, nakasiling ako, ‘Amo gid sini ang gusto ko himuon sa akon kabuhi!’” Sing kaanggid, para kay Essly, isa ka dalaga nga mga beintehon na subong, ang kalipay nga iya naobserbahan amo ang nagganyat sa iya sa sini nga pag-alagad. Sang hayskul pa sia, nakilala niya ang pila ka makugi nga Saksi nga nag-alagad sa lugar nga mas daku ang kinahanglanon. Nagsiling sia, “Ang kalipay sini nga mga kauturan nagpahulag sa akon nga ilugon sila.” Pareho kay Essly, madamo nga sister ang naghimo man sini. Ang matuod, sa Mexico sobra sa 680 ka di-minyo nga sister ang nag-alagad sa lugar nga mas daku ang kinahanglanon. Maayo gid sila nga halimbawa para sa mga pamatan-on kag mga may edad na!

Mangin madinalag-on kag malipayon ang kabuhi. Pagkatapos sang hayskul, gintanyagan si Essly nga mangin iskolar sa isa ka unibersidad. Ginpalig-on sia sang iya mga katubotubo nga batunon ini kag tinguhaan ang “normal nga kabuhi”—makatigayon sing mataas nga edukasyon, karera, salakyan, kag magbulubakasyon. Pero, wala niya ginsunod ang ila laygay. Si Essly nagsiling: “Ang pila ko ka Cristiano nga abyan nagtinguha sa sini nga mga butang, kag natalupangdan ko nga indi na nila prioridad ang espirituwal nga mga tulumuron. Nakita ko man nga nagapalibog sila bangod sang mga problema nga ila naatubang samtang padayon sila nga nadalahig sa mga buluhaton sini nga kalibutan. Gusto ko gamiton ang akon pagkapamatan-on sa pag-alagad sing bug-os kay Jehova.”

Sanday Racquel kag Phillip

Nagkuha si Essly sing bokasyonal nga mga kurso para makakita sing trabaho nga makasakdag sa iya pagpayunir, kag dayon nagsaylo sia sa isa ka lugar nga  kinahanglan gid ang mga manugbantala sang Ginharian. Nagtuon pa gani sia sang mga lenguahe sang mga tumandok nga Otomi kag Tlapaneco. Sa karon, samtang ginahinumdom niya ang tatlo ka tuig nga pagbantala sa naligwin nga mga lugar, nagsiling sia: “Ang pag-alagad sa lugar nga mas daku ang kinahanglanon nakahatag sing kalipay kag matuod nga kahulugan sa akon kabuhi. Labaw sa tanan, napabakod sini ang akon kaangtanan kay Jehova.” Nagaugyon sa sini sanday Phillip kag Racquel, isa ka mag-asawa nga mga treintahon nga taga-Estados Unidos. “Ang kalibutan madasig nga nagabag-o amo nga madamo ang nagabatyag nga wala sing kalig-unan ang ila kabuhi. Pero ang pag-alagad sa lugar diin madamo ang nagapamati sa mensahe sang Biblia nagahatag gid sing kahulugan sa amon kabuhi. Makalilipay gid ini!”

KON PAANO ATUBANGON ANG MGA HANGKAT

Si Verónica

Matuod, indi mahapos ang pag-alagad sa lugar nga mas daku ang kinahanglanon. Ang isa ka hangkat amo ang pagsuporta sa imo kaugalingon sa pinansial. Para mahimo ini, kinahanglan nga handa ka magpasibu sa lugar nga imo alagaran. Ang isa ka eksperiensiado nga payunir nga si Verónica nagpaathag: “Sa isa ka lugar nga akon gin-alagaran, nagaluto ako kag nagabaligya sing barato nga pagkaon. Sa isa pa ka lugar, namaligya ako sing mga bayo kag nanggunting sing buhok. Subong, nagapaninlo ako sing balay kag nagatudlo sa bag-o nga mga ginikanan kon paano magkomunikar sa ila kabataan.”

Ang pagpasibu sa iban nga kultura kag kustombre mahimo nga mabudlay gid kon nagaistar ka upod sa tumandok nga mga tawo sa naligwin nga lugar. Amo ini ang kahimtangan nanday Phillip kag Racquel sang nag-alagad sila sa teritoryo sang mga Nahuatl. “Daku gid ang kinatuhayan sang ila kultura,” siling ni Phillip. Ano ang nakabulig sa ila nga makapasibu? “Nagkonsentrar kami sa positibo nga mga butang nga amon naobserbahan sa mga Nahuatl—ang pagkasuod sang ila pamilya, pagkasinsero sang ila pagpakig-angot sa isa kag isa, kag ang ila kaalwan.” Si Racquel nagsiling pa: “Madamo kami sing natun-an sang nag-istar kami didto kag nag-alagad upod sa mga kauturan sa sina nga lugar.”

KON PAANO IHANDA ANG IMO KAUGALINGON

Kon gusto mo mag-alagad sa naligwin nga mga lugar diin daku ang kinahanglanon, ano ang himuon mo subong? Ang mga kauturan nga nakaeksperiensia na sini nga pag-alagad nagsiling: Antes ka magsaylo, pasimpleha ang imo kabuhi kag mangin kontento. (Fil. 4:11, 12) Ano pa ang puede mo himuon? Si Leticia nagsiling: “Wala ako nagakuha sing trabaho nga magapatener sa akon sing madugay sa isa ka lugar. Gusto ko nga makasaylo sa bisan ano nga oras kon kinahanglanon.” Si Hermilo nagsiling: “Nakatuon ako magluto, manglaba, kag mamalantsa.” Si Verónica nagsiling: “Sang nagaistar pa ako upod sa akon mga ginikanan kag mga utod, nagabulig ako sa pagpaninlo kag nakatuon ako magluto sing barato pero masustansia nga mga pagkaon. Nakatuon man ako magkinot.”

Sanday Amelia kag Levi

Sanday Levi kag Amelia nga taga-Estados Unidos kag walo na ka tuig nga mag-asawa nagsaysay kon paano ang espesipiko nga mga pangamuyo nakabulig sa ila sa paghanda nga mag-alagad sa Mexico. Si Levi nagsiling: “Ginsuma namon kon pila ang amon magasto sa sulod sang isa ka tuig sa pag-alagad sa iban nga pungsod kag dayon nangamuyo kay Jehova nga buligan kami nga makasupot sina nga kantidad.” Sa sulod sang mga binulan, nakasupot sila sing kantidad nga ila ginpangamuyo, kag gilayon sila nga nagsaylo. Si Levi nagsiling: “Ginsabat ni Jehova ang amon espesipiko nga pangabay, gani tion na ini nga maghulag kami.” Si Amelia nagsiling man: “Abi namon kon isa lang ka tuig ang amon pagtener, pero subong, pito na kami ka tuig diri, kag wala kami nagapamensar nga magpauli! Sa amon pag-istar diri, aktual namon nga naeksperiensiahan ang bulig ni Jehova. Kada adlaw, makita namon ang pamatuod sang iya kaayo.”

Sanday Adam kag Jennifer

Para kanday Adam kag Jennifer, isa ka mag-asawa nga taga-Estados Unidos kag nagaalagad sa nagahambal sing Ingles nga teritoryo sa Mexico, importante man ang pangamuyo. Ginrekomendar nila: “Indi na maghulat sang pinakamaayo nga mga kahimtangan. Ipangamuyo ang imo handum nga mag-alagad sa iban nga pungsod, kag dayon maghulag suno sa imo mga pangamuyo. Pasimpleha ang imo kabuhi, sulati ang sanga sang pungsod nga luyag mo alagaran, kag pagkatapos masuma ang kagastuhanan, maghulag gilayon!” * Kon himuon mo ini, matigayon mo ang makalilipay kag bugana sa espirituwal nga kabuhi.

^ par. 21 Para sa dugang nga impormasyon, tan-awa ang artikulo nga ‘Makatabok Ka Bala sa Macedonia’? sa Agosto 2011 nga Ang Aton Ministeryo sa Ginharian.

Magtuon sing Dugang Pa

SIN-O ANG NAGAHIMO SANG KABUBUT-ON NI JEHOVA SUBONG?

Paano Ginahanas ang mga Payunir?

Anong pinasahi nga paghanas ang ginahatag sa mga payunir nga nagabantala sang Ginharian sing bug-os tion?