Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2013

“Indi Kita Mangampo”

“Indi Kita Mangampo”

“Indi kita mangampo sa paghimo sing maayo.”GAL. 6:9.

1, 2. Paano napabakod ang aton pagsalig sa pagpamalandong sa bug-os uniberso nga organisasyon ni Jehova

MAKAHAYANGHAG gid pamalandungan nga bahin kita sang isa ka masangkad nga organisasyon sa uniberso. Ginalaragway sing maayo sang mga palanan-awon sa Ezequiel kapitulo 1 kag Daniel kapitulo 7 ang pagkontrol ni Jehova sang mga butang para matuman ang iya katuyuan. Ginadumalahan ni Jesus ang paggiya sa dutan-on nga bahin sang organisasyon ni Jehova para makakonsentrar sa pagbantala sing maayong balita, pagtatap sang espirituwalidad sang mga nagahimo sini nga hilikuton, kag sa pagpasanyog sang matuod nga pagsimba kay Jehova. Nakabulig gid ini sa aton nga magsalig sa organisasyon ni Jehova!Mat. 24:45.

2 Nagadungan bala kita sa sining dalayawon nga organisasyon? Ang aton bala kakugi sa kamatuoran nagadugang ukon nagabuhin? Samtang ginabinagbinag ini nga mga pamangkot, mahimo matalupangdan naton nga nagaamat-amat na kita lapyo ukon ayhan nagaugdaw na ang aton kakugi. Mahimo ina matabo. Sang unang siglo, kinahanglan laygayan ni apostol Pablo ang iya masigka-Cristiano nga binagbinagon ang kakugi ni Jesus. Nagsiling si Pablo nga makabulig ini sa ila para indi ‘pagkapuyon kag punawon ang ila kalag.’ (Heb. 12:3) Sing kaanggid, ang pag-usisa sing maayo sa nagligad nga artikulo, diin ginpakita ang mga nahimo sang organisasyon ni Jehova, makabulig sa aton para makapadayon kag makapabilin nga makugi.

3. Ano pa ang kinahanglan para indi kita paglapyuon, kag ano ang aton binagbinagon sasini nga artikulo?

3 Pero ginpakita ni Pablo nga may kinahanglan pa himuon para indi kita paglapyuon. Nagsiling sia nga dapat kita magtinguha “sa paghimo sing maayo.” (Gal. 6:9) Ginapakita sini nga dapat kita maghulag. Binagbinagon naton ang lima ka bahin sang hilikuton nga makabulig sa aton nga magpabilin nga malig-on kag nagadungan sa organisasyon ni Jehova. Dayon makadesisyon kita kon may mga butang pa nga kinahanglan naton hatagan sing daku nga atension ukon sang aton pamilya.

 PAGTIPON PARA SA PAGPALIG-ON KAG PAGSIMBA

4. Ngaa makasiling kita nga ang patipon sing tingob isa ka bahin sang matuod nga pagsimba?

4 Ang pagtipon sing tingob panguna pirme nga hilikuton sang mga alagad ni Jehova. Sa langit, ginaagda ang espiritu nga mga tinuga nga magtipon sa atubangan ni Jehova sa nagakaigo nga mga tion. (1 Hari 22:19; Job 1:6; 2:1; Dan. 7:10) Ang pungsod sang Israel sang una nagatipon “agud nga magpamati sila kag . . . magtoon.” (Deut. 31:10-12) Kinabatasan man sang mga Judiyo sang unang siglo nga magkadto sa sinagoga para basahon ang Kasulatan. (Luc. 4:16; Binu. 15:21) Ginapadaku sini nga ang pagtipon sing tingob nagapadayon sang ginporma ang Cristianong kongregasyon, kag panguna gihapon ini nga bahin sang aton pagsimba. Ang matuod nga mga Cristiano ‘nagahunahuna sa isa kag isa agod pahulagon sa gugma kag sa maayong mga buhat.’ Kinahanglan nga padayon kita nga “nagapalig-unay sa isa kag isa, kag labi na gid samtang nakita [naton] nga malapit na ang adlaw [ni Jehova].”Heb. 10:24, 25.

5. Paano naton mapalig-on ang kada isa sa aton mga miting?

5 Ang isa ka importante nga paagi para mapalig-on naton ang isa kag isa amo ang pagpakigbahin sa aton mga miting. Mahimo naton mapahayag sing dayag ang aton pagtuo paagi sa pagsabat sa naimprinta nga mga pamangkot, paghatag sing aplikasyon sa mga teksto, pagsugid sing malip-ot nga eksperiensia nga nagapakita nga maalamon gid nga sundon ang mga prinsipio sang Biblia, ukon iban pa nga paagi. (Sal. 22:22; 40:9) Pat-od gid nga magaugyon ka nga bisan pila ka tuig na kita nga nagatambong sa mga miting, napalig-on gihapon kita sa pagpamati sa tinagipusuon nga mga komento sang aton mga kauturan—bata man ukon tigulang.

6. Paano ang aton mga pagtililipon makabulig sa aton nga magpabilin nga aktibo sa espirituwal?

6 Sa anong iban pa nga rason ginpadaku sang aton Dios nga importante gid ang regular nga pagtipon? Ang aton mga miting, asembleya, kag kombension nagabulig sa aton nga mangin maisog sa paghambal sing masidla kag sa pag-atubang sa pagpamatok ukon di-pagsapak sa aton mga teritoryo. (Binu. 4:23, 31) Napabakod kita kag napalig-on sa pagtuo paagi sa pagbinagbinag sa Kasulatan. (Binu. 15:32; Roma 1:11, 12) Ang pagtudlo kag ang pagbayluhanay sang pagpalig-on sa aton mga pagtilipon nagabulig sa aton nga maeksperiensiahan ang matuod nga kalipay kag nagahatag sa aton sing “pahuway gikan sa mga adlaw sang kapiotan.” (Sal. 94:12, 13) Ang Teaching Committee sang Nagadumala nga Hubon amo ang nagatatap sa paghanda sa tanan nga espirituwal nga programa para matudluan ang katawhan ni Jehova sa bilog nga duta. Nagapasalamat gid kita sa mga aman nga ginhimo para makabenepisyo kita sa maayo nga mga panudlo sa aton mga miting kada semana!

7, 8. (a) Ano ang panguna nga katuyuan sang aton mga miting sa kongregasyon? (b) Paano ang mga miting makabulig sa imo sa espirituwal?

7 Pero may mas importante pa nga rason sangsa personal nga mga benepisyo nga aton matigayon sa mga miting. Ang panguna nga katuyuan sini amo ang pagsimba kay Jehova. (Basaha ang Salmo 95:6.) Daku gid nga pribilehiyo nga mapadunggan naton ang aton dalayawon nga Dios! (Col. 3:16) Takus gid si Jehova sa aton regular nga pagsimba paagi sa aton pagtambong kag pagpakigbahin sa ­teokra­tiko nga mga pagtilipon. (Bug. 4:11) Amo nga ginalaygayan kita nga ‘indi pagpabay-an ang aton pagtilipon, subong sang kinabatasan sang iban’!Heb. 10:25.

8 Ginatamod bala naton ang aton mga pagtilipon subong aman nga makabulig sa aton nga makapadayon tubtob maghulag si Jehova batok sa sining malaut nga sistema sang mga butang? Kon amo, ang mga pagtilipon nalakip sa “mas importante nga mga butang” nga hatagan naton sing tion sa aton masako nga pagkabuhi. (Fil. 1:10) Indi gid naton dapat pagwasihon ang kahigayunan nga makaupod ang aton mga kauturan sa pagsimba kay Jehova, luwas lamang kon may mabug-at katama nga mga rason.

 PAGPANGITA SA MGA INTERESADO

9. Paano naton nahibaluan nga importante ang pagbantala?

9 Ang bug-os nga pagpakigbahin sa pagbantala makabulig man sa aton nga makadungan sa organisasyon ni Jehova. Ginsugdan ni Jesus ini nga hilikuton sang yari sia sa duta. (Mat. 28:19, 20) Sugod sadto, ang pagbantala sing Ginharian kag paghimo sing disipulo nangin panguna nga hilikuton sang organisasyon ni Jehova. Madamo sing mga eksperiensia sa karon ang nagapamatuod nga ginasuportahan sang mga anghel ang aton hilikuton kag ginagiyahan kita pakadto sa mga tawo nga “husto nga nahuyog para sa kabuhi nga walay katapusan.” (Binu. 13:48; Bug. 14:6, 7) Ang dutan-on nga bahin sang organisasyon ni Jehova nakahanda karon kag naorganisar sa pagsuporta sa sining pinakaimportante nga buluhaton. Prioridad bala sa aton kabuhi ang pagministeryo?

10. (a) Iilustrar kon paano kita makapabilin nga makugi sa kamatuoran. (b) Paano ang pagministeryo nakabulig sa imo nga indi paglapyuon?

10 Ang kapisan sa ministeryo nagabulig sa aton para magpabilin nga makugi sa kamatuoran. Binagbinaga ang ginsiling ni Mitchel, nga madugay na nga gulang kag regular payunir. Sia nagsiling: “Nalipay gid ako nga isugid sa mga tawo ang kamatuoran. Ginahunahuna ko ang bag-o nga mga artikulo sa Ang Lalantawan ukon Magmata! kag nagadayaw gid ako sa kaalam, paghangop, kag pagkabalanse sang kada isyu. Gusto ko maggua sa latagon para mahibaluan kon ano ang ­reaksion sang mga tawo kag kon paano ko mapukaw ang ila interes. Paagi sa akon ministeryo, nagapabilin ako nga malig-on. Ginahimo ko ang iban nga  butang antes ukon pagkatapos sang akon pagministeryo.” Sing kaanggid, ang pagpabilin nga masako sa aton sagrado nga pag-alagad makabulig sa aton nga mangin malig-on pirme sa sining katapusan nga mga adlaw.Basaha ang 1 Corinto 15:58.

PAGTIGAYON SING ESPIRITUWAL NGA MGA AMAN

11. Ngaa dapat naton basahon kag pamalandungan ang tanan nga espirituwal nga pagkaon halin kay Jehova?

11 Si Jehova nagaaman sing bugana nga suplay sang nasulat nga espirituwal nga pagkaon sa pagpabakod sa aton. Mahimo may madumduman ka nga sitwasyon nga sa tapos mo mabasa ang isa ka publikasyon, naghunahuna ka: ‘Amo gid ini ang akon kinahanglan! Daw ginpasulat ini ni Jehova para sa akon!’ Indi ini natabuan lamang. Paagi sa sini nga mga aman, ginatudluan kag ginagiyahan kita ni Jehova. Sia nagsiling: “Ton-an ko ikaw kag tudloan ikaw sang dalanon nga dapat mo laktan.” (Sal. 32:8) Nagapanikasog bala kita nga basahon kag pamalandungan ang tanan nga espirituwal nga pagkaon? Ang paghimo sini magabulig sa aton nga magpadayon sa pagpamunga kag indi malaya sa espirituwal sa sining mabudlay nga katapusan nga mga ­adlaw.Basaha ang Salmo 1:1-3; 35:28; 119:97.

12. Ano ang makabulig sa aton nga indi naton pagbalewalaon ang espirituwal nga mga aman?

12 Maayo gid nga binagbinagon naton ang mga hilikuton nga nadalahig para mabaton naton ining regular nga aman sang masustansia nga espirituwal nga pagkaon. Ginadumalahan sang Writing Committee sang Nagadumala nga Hubon ang pag-research, pagsulat, pag-proofread, pagpili sing mga laragway, kag pagbadbad sang aton naimprinta nga mga publikasyon, lakip ang mga ginabutang sa aton Web site. Ang nagaimprinta nga mga sanga talatapan nagapadala sang mga literatura sa malapit kag malayo nga mga kongregasyon. Ngaa ginahimo ini nga mga buluhaton? Para ang katawhan ni Jehova mapakaon sing maayo sa espirituwal. (Isa. 65:13) Kabay nga mangin maukod kita sa pagbasa sang tanan nga espirituwal nga pagkaon nga aton matigayon paagi sa organisasyon ni Jehova.Sal. 119:27.

PAGSUPORTA SA MGA KAHIMUSAN SANG ORGANISASYON

13, 14. Sin-o ang nagasuporta sa mga kahim-usan ni Jehova sa langit, kag paano man naton mapakita ini nga pagsuporta sa duta?

13 Sa palanan-awon nga ginhatag kay apostol Juan, si Jesus nagasakay sa puti nga kabayo sa pagpangdaug sa mga nagarebelde kay Jehova. (Bug. 19:11-15) Makapalig-on gid sa pagtuo nga mahibaluan nga yara sa likod ni Jesus ang matutom nga mga anghel kag ang hinaplas nga nagdaug gikan sa duta, nga nakabaton na sang ila padya sa langit! (Bug. 2:26, 27) Dalayawon gid ini nga halimbawa sang pagsuporta sa mga kahimusan ni Jehova!

14 Ang dakung kadam-an bug-os man nga nagasuporta sa buluhaton sang hinaplas nga mga kauturan ni Cristo nga yara pa sa duta kag nagapanguna sa organisasyon karon. (Basaha ang Zacarias 8:23.) Subong indibiduwal, paano naton masuportahan ang mga kahimusan ni Jehova? Ang isa ka paagi amo ang pagpasakop sa mga nagapanguna. (Heb. 13:7, 17) Nagasugod ini sa aton kongregasyon. Ang aton bala mga komento nagapalig-on nga tahuron ang mga gulang kag ang ila katungdanan? Ginapalig-on bala naton ang aton kabataan nga tahuron ining matutom nga mga lalaki kag mangayo sang ila laygay nga nabase sa Kasulatan? Isa pa, ginahinun-anunan bala naton subong pamilya kon paano kita makasuportar sa bug-os kalibutan nga buluhaton paagi sa aton mga donasyon? (Hulu. 3:9; 1 Cor. 16:2; 2 Cor. 8:12) Ginatamod bala naton nga importante ang pribilehiyo nga pagpaninlo kag pagmentinar sa Kingdom Hall? Yara ang espiritu ni Jehova kon may amo sini nga pagtahod kag paghiusa. Paagi sa sini nga espiritu, mabaton naton ang padayon nga bulig para indi kita paglapyuon sa sining katapusan nga mga adlaw.Isa. 40:29-31.

 PAGKABUHI NAHISUNO SA ATON MENSAHE

15. Ngaa kinahanglan kita pirme makigbato para magkabuhi nahisanto sa halangdon nga katuyuan ni Jehova?

15 Sa katapusan, para makapadayon kita kag makapabilin nga nagadungan sa organisasyon ni Jehova, kinahanglan nga ang aton pagkabuhi nahisuno sa aton mensahe kag ‘pat-uron naton kon ano ang kalahamut-an sa Ginuo.’ (Efe. 5:10, 11) Bangod sang aton di-­kahimpitan kag mga panikasog ni Satanas kag sang iya malaut nga kalibutan, pirme naton ginapakigbatuan ang negatibo nga mga impluwensia. Ang pila sa inyo, pinalangga nga mga kauturan, nagapanikasog sa pagpakigbato adlaw-adlaw para mahuptan ang inyo maayo nga kaangtanan kay Jehova. Ina ang rason kon ngaa palangga gid kamo ni Jehova. Gani, indi magpangampo! Ang pagkabuhi nahisuno sa katuyuan ni Jehova nagahatag sa aton sing daku nga kalipay kag pasalig nga ang aton pagsimba indi wala sing pulos.1 Cor. 9:24-27.

Maukod nga buligi ang iban para mahangpan nila nga mahimo man sila mangin bahin sang masangkad nga organisasyon ni Jehova

16, 17. (a) Ano ang dapat naton himuon kon makahimo kita sing mabug-at nga sala? (b) Ano ang aton matun-an sa natabo kay Anne?

16 Apang ano ang aton dapat himuon kon makahimo kita sing mabug-at nga sala? Mangayo gilayon sing bulig. Ang pagtago sini magapalala lang sang kahimtangan. Dumduma nga nagsiling si David nga sang naghipos sia parte sa iya mga sala, “nahagas ang [iya] mga tul-an tungud sang [iya] pag-ugayong sa bilog nga adlaw.” (Sal. 32:3) Huo, ang pagtago sang sala mangin kabangdanan lamang nga kapuyon kita sa emosyon kag espirituwal, “apang ang bisan sin-o nga nagatu-ad kag nagabiya magaagum sing kalooy.”Hulu. 28:13.

17 Binagbinaga ang halimbawa ni Anne. * Sang manugbeinte na sia, nagregular payunir sia. Pero nangin doble-kara ang iya pagkabuhi. Daku gid ang epekto sini sa iya. Sia nagsiling: “Ginakonsiensia ako. Indi ako malipayon kag pirme ginasubuan.” Ano ang iya ginhimo? Nagsiling sia nga isa ka adlaw sa miting, ginbinagbinag ang Santiago 5:14, 15. Narealisar ni Anne nga kinahanglan niya ang bulig gani nagpalapit sia sa mga gulang. Sa paghinumdom, nagsiling sia: “Ini nga kasulatan isa ka reseta nga ginsulat ni Jehova para mag-ayo ako sa espirituwal. Ini nga bulong mabudlay tunlon, pero makapaayo. Ginsunod ko ang laygay sa sini nga kasulatan, kag epektibo ini.” Pagligad sang pila ka tuig, nangin makugi liwat si Anne sa pag-alagad kay Jehova kag may matinlo na nga konsiensia.

18. Ano ang dapat naton mangin determinasyon?

18 Isa ka pribilehiyo nga mabuhi sa sining katapusan nga mga adlaw kag mangin bahin sang dalayawon nga organisasyon ni Jehova! Mangin determinado kita nga indi pagbalewalaon kon ano ang yara sa aton. Sa baylo, manghikot kita sing magkaupod subong pamilya kag mangin regular sa pagtilipon sa pagsimba sa aton kongregasyon, sa pagpangita sing maid-id sa mga interesado sa aton teritoryo, kag sa pagpabalor sa regular nga mga aman nga espirituwal nga pagkaon nga aton matigayon. Suportahan man naton ang mga nagapanguna kag magkabuhi nahisuno sa aton mensahe. Kon himuon naton ini, indi lang nga nagadungan kita sa organisasyon ni Jehova kundi indi man kita paglapyuon sa paghimo sing maayo!

^ par. 17 Gin-islan ang ngalan.