Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2013

Magbenepisyo sing Bug-os sa Pagbasa sing Biblia

Magbenepisyo sing Bug-os sa Pagbasa sing Biblia

“Nagakalipay gid ako sa kasuguan sang Dios.”ROMA 7:22.

1-3. Ano ang mga benepisyo sa pagbasa sa Biblia kag pag-aplikar sa mga panudlo sini?

“KADA adlaw, nagapasalamat ako kay Jehova sa pagbulig sa akon nga mahangpan ang Biblia.” Amo ini ang ginsiling sang may edad na nga sister nga nakabasa sing Biblia sing sobra 40 na ka beses, kag padayon niya ini nga ginahimo. Ang isa ka pamatan-on nga sister nagsulat nga ang pagbasa sing Biblia nakabulig sa iya nga mahangpan nga matuod si Jehova. Bilang resulta, nagsuod pa gid sia sa iya Amay sa langit. Nagsiling sia, “Nangin mas malipayon ang akon kabuhi!”

2 Ginpalig-on ni apostol Pedro ang tanan nga ‘palambuon ang paghandum sa wala simbog nga gatas nga iya sang pulong.’ (1 Ped. 2:2) Ang mga nagapuno sini nga handum paagi sa pagtuon sa Biblia kag pag-aplikar sang mga panudlo sini may matinlo nga konsiensia kag katuyuan sa kabuhi. Nakatigayon sila sing dalayon nga pag-abyanay sa mga nagahigugma man kag nagaalagad sa matuod nga Dios. Tanan ini mabakod nga mga rason sa ‘pagkalipay sa kasuguan sang Dios.’ (Roma 7:22) Pero may dugang pa nga benepisyo. Ano ang pila sa sini?

3 Samtang nagadugang ang imo natun-an kay Jehova kag sa iya Anak, nagadugang man ang imo gugma sa ila kag sa imo isigkatawo. Ang pagtigayon sang sibu nga ihibalo sa Kasulatan nagabulig sa imo nga mahangpan kon paano luwason sang Dios sa indi madugay ang matinumanon nga katawhan sa sining nagatagumatayon nga sistema. May positibo ka nga mensahe sang maayong balita nga mapaambit sa mga tawo sa imo ministeryo. Si Jehova magapakamaayo sa imo samtang ginatudluan mo ang iban sang imo mga natun-an gikan sa pagbasa sa Pulong sang Dios.

BASAHA KAG PAMALANDUNGI

4. Ano ang nalakip sa ‘pagpamalandong’ sang imo nabasahan sa Biblia?

4 Indi luyag ni Jehova nga dalidalion basa sang iya mga alagad ang iya Pulong. Ginsilingan niya si Josue sadto:  “Ining tolon-an sang kasogoan indi magbulag sa imo baba, kondi magpamalandong ka sa iya sa adlaw kag gab-i.” (Jos. 1:8; Sal. 1:2) Buot bala silingon sini nga basahon naton ang bug-os nga Biblia sa matunog ukon mahinay nga tingog? Indi. Nagakahulugan ini nga indi mo dapat pagdasigon ang pagbasa para mapamensaran mo ini sing maayo. Magabulig ini sa imo nga magkonsentrar sa mga bahin nga mapuslanon gid kag makapalig-on sa imo sa sina nga tion. Para makita ina nga mga prase, bersikulo, ukon rekord, basaha ini sing mahinay, ayhan paagi sa pagkutibkutib sang mga tinaga. Ang daku nga kapuslanan sang isa ka punto sa Kasulatan mahimo magtandog gid sa imo. Ngaa importante ini? Bangod ang paghangop sa laygay sang Dios magapahulag sa imo nga iaplikar ini.

5-7. Iilustrar kon paano ang pagbasa sing mahinay sa Pulong sang Dios makabulig sa imo sa (a) pagpabilin nga matinlo sa moral; (b) pagpakig-angot sing mapinasensiahon kag mainayuhon sa iban; (c) pagsalig kay Jehova bisan sa tion sang mga kabudlayan.

5 Ang pagbasa sing mahinay makabulig gid kon ginabinagbinag mo ang mga tulun-an nga indi pamilyar sa imo. Sa pag-ilustrar, binagbinaga ining tatlo ka senaryo. Una, hunahunaa ang isa ka pamatan-on nga brother nga nagabasa sang tagna ni ­Oseas. Sa kapitulo 4, nagdulog sia sang nabasa niya sing mahinay ang bersikulo 11 tubtob 13. (Basaha ang Oseas 4:11-13.) Ngaa? Nakuha sini nga mga bersikulo ang iya atension bangod nagapanikasog sia nga pamatukan ang imoral nga impluwensia sa eskwelahan. Ginpamalandungan niya ini kag naghunahuna: ‘Nakita ni Jehova ang malain nga ginahimo sang mga tawo bisan sa pribado. Indi ko gusto nga maakig sia sa akon.’ Determinado ini nga utod nga magpabilin nga matinlo sa moral sa atubangan sang Dios.

6 Sa ikaduha nga senaryo, ang isa ka sister nagabasa sang tagna ni Joel kag nakalab-ot sa kapitulo 2, bersikulo 13. (Basaha ang Joel 2:13.) Samtang ginabasa niya sing mahinay ina nga bersikulo, nagapamalandong sia kon paano niya mailog si Jehova, nga “mainayohon . . . kag maloloy-on, makuli sa pagpangakig, kag bugana sa malig-on nga paghigugma.” Nagdesisyon sia nga likawan ang mamulayon ukon masakit nga mga tinaga nga kon kaisa mahambal niya sa iya bana kag sa iban.

7 Ikatlo, hunahunaa ang isa ka amay nga nadulaan sing trabaho kag nabalaka sa kaayuhan sang iya asawa kag kabataan. Sa Nahum 1:7, nabasa niya sing mahinay nga “kilala [ni Jehova] ang mga nagadangup sa iya” kag gina­proteksionan sila kaangay sang “pamakud sa adlaw sang kalisud.” Ini nga pinamulong naglugpay sa iya. Nabatyagan niya ang pag-atipan ni Jehova kag wala na nabalaka sing sobra. Dayon ginbasa niya sing mahinay ang bersikulo 15. (Basaha ang Nahum 1:15.) Nahangpan sini nga utod nga paagi sa pagbantala sang maayong balita bisan may mga kabudlayan, mapakita gid niya nga si Jehova amo ang iya pamakod. Samtang padayon nga nagapangita ang utod sing obra, napahulag sia nga suportahan ang pag-alagad sa latagon sa bug-os nga semana.

8. Isaysay sing malip-ot ang bilidhon nga mga butang nga imo nasapwan sa pagbasa sing Biblia.

8 Ang bag-o lang ginsambit nga mga benepisyo naghalin sa mga tulun-an sa Biblia nga para sa iban mabudlay hangpon. Samtang ginausisa mo ang tulun-an nanday Oseas, Joel, kag Nahum upod sa handum nga makatuon, mapahulag ka nga basahon sing mahinay ang iban pa nga bersikulo sini. Hunahunaa kon ano nga kaalam kag lugpay ang imo matigayon sa mga sinulatan sini nga mga manalagna! Kamusta naman ang iban pa nga nasulat sa Biblia? Ang Pulong sang Dios pareho sang minahan nga madamo sing diamante. Minaha ini sing maayo! Huo, basaha ang bug-os nga Biblia sa tulumuron nga makakita sing bilidhon nga mga giya kag pasalig sang Dios.

HANGPA SING MAAYO

9. Paano naton mapauswag ang aton paghangop sa kabubut-on sang Dios?

9 Kon importante ang pagbasa sing Biblia kada adlaw, importante man ang paghangop kag paghantop. Gani, gamita sing maayo ang mga publikasyon sang organisasyon ni Jehova sa pag-research parte sa mga tawo, lugar, kag  mga hitabo nga imo nabasa. Ukon kon nagapalibog ka kon paano makabenepisyo sa isa ka panudlo sang Biblia, mahimo ka makapangayo sing bulig sa gulang sa kongregasyon ukon sa isa ka hamtong nga Cristiano. Para mahibaluan ang importansia sang pagpauswag sang aton paghangop, binagbinagon naton ang halimbawa sang isa ka Cristiano sang unang siglo nga nagtinguha sa paghimo sini. Sia amo si Apolos.

10, 11. (a) nabuligan si Apolos nga mag-uswag subong ministro sang maayong balita? (b) Ano ang matun-an naton parte kay Apolos? (Tan-awa ang kahon nga “Ang Imo Bala Panudlo Suno sa Tion?”

10 Si Apolos isa ka Judiyo nga Cristiano nga “batid . . . sa Kasulatan” kag “nagasilabo sa espiritu.” Ang tulun-an sang Binuhatan nagasiling parte sa iya: “Padayon sia nga naghambal kag nagpanudlo sing sibu sang mga butang tuhoy kay Jesus, apang ang pagbawtismo ni Juan amo lamang ang iya nahibaluan.” Wala narealisar ni Apolos nga indi na suno sa tion ang iya ginatudlo parte sa bawtismo. Sang nabatian sang Cristiano nga mag-asawa nga sanday Priscila kag Aquila ang iya panudlo sa Efeso, “ginpaathag [nila] sa iya sing sibu pa ang dalanon sang Dios.” (Binu. 18:24-26) Paano si Apolos nakabenepisyo sa sini?

11 Pagkatapos makabantala sa Efeso, nagkadto si Apolos sa Acaya. “Sang nag-abot sia didto, daku ang iya nabulig sa mga nagpati tungod sa wala tupong nga kaayo sang Dios; kay mapag-on kag bug-os nga ginpamatud-an niya sing dayag nga sayop ang mga Judiyo, samtang ginpakita niya paagi sa Kasulatan nga si Jesus amo ang Cristo.” (Binu. 18:27, 28) Sina nga tion, mapaathag na sing sibu ni Apolos ang kahulugan sang Cristianong bawtismo. Bangod nag-uswag ang iya paghangop, “daku ang iya nabulig” sa mga bag-uhan nga mag-uswag sa matuod nga pagsimba. Ano ang aton matun-an sa sini? Kaangay ni Apolos, ginatinguhaan naton nga mahangpan ang aton nabasahan sa Biblia. Pero, kon ang isa ka eksperiensiado nga masigkatumuluo maghatag sing suhestyon kon paano kita makatudlo sing mas  epektibo, luyag naton batunon sing mapainubuson kag may pagpasalamat ina nga bulig. Kon himuon naton ini, magauswag ang kalidad sang aton sagrado nga pag-alagad.

GAMITA ANG IMO NATUN-AN SA PAGBULIG SA IBAN

12, 13. Iilustrar kon paano ang mataktikanhon nga paggamit sang Kasulatan makabulig sa mga Bible study nga mag-uswag.

12 Kaangay nanday Priscila, Aquila, kag Apolos, mahimo man kita mangin pagpakamaayo sa iban. Kon ang imo pagpalig-on nakabulig sa isa ka interesado nga malampuwasan ang mga balagbag sa iya pag-uswag sa espirituwal, ano ang imo nabatyagan? Ukon subong isa ka gulang, ano ang imo nabatyagan kon ang isa ka utod nagpasalamat sa imo bangod sa laygay halin sa Kasulatan nga nakabulig sa iya sa tion sang kabudlayan? Pat-od gid nga ang paggamit sang Pulong sang Dios para buligan ang iban nga mangin maayo ang ila kabuhi magapahalipay sa aton. * Talupangda kon paano mo ini mahimo.

13 Madamo nga Israelinhon sang panahon ni Elias ang indi makadesisyon kon bala ang matuod ukon ang butig nga pagsimba ang ila sundon. Ang laygay ni Elias sa ila makabulig sa mga Bible study nga indi pa makadesisyon sa pag-alagad kay Jehova. (Basaha ang 1 Hari 18:21.) Binagbinaga ang isa pa ka sitwasyon: Kon ang isa ka interesado nahadlok sa reaksion sang iya mga abyan ukon pamilya, mahimo mo pabakuron ang iya determinasyon sa pagsimba kay Jehova paagi sa pagpangatarungan base sa Isaias 51:12, 13.Basaha.

14. Ano ang makabulig sa imo para madumduman ang mga teksto kon kinahanglan mo ini para buligan ang iban?

14 Maathag nga ang Biblia nagaunod sing madamo nga pinamulong nga makapalig-on, makatadlong, ukon makapabakod sa mga nagabasa sini. Pero mahimo ka mamangkot, ‘Paano ko mahibaluan ang teksto nga dapat gamiton kon kinahanglan ko ini?’ Basaha ang Biblia kag pamalandungi ang panghunahuna sang Dios kada adlaw. Paagi sa sini, makatipon ka sing mga pinamulong sang Dios nga ipahanumdom sa imo sang espiritu ni Jehova sa tion nga kinahanglan mo ini.Mar. 13:11; basaha ang Juan 14:26. *

15. Ano ang makabulig sa imo para mahangpan sing bug-os ang Pulong sang Dios?

15 Pareho kay Hari Solomon, mangamuyo kay Jehova para makatigayon sing kaalam sa pagtuman sang teokratiko nga mga responsibilidad. (2 Cron. 1:7-10) Kaangay sa mga manalagna sang una, maghimo sing “maukod nga pag-usisa kag mahalungon nga pagpanalawsaw” sa Pulong sang Dios para matigayon ang sibu nga ihibalo parte kay Jehova kag sa iya kabubut-on. (1 Ped. 1:10-12) Ginpalig-on ni apostol Pablo si Timoteo nga saguron ang iya kaugalingon “sang mga pulong sang pagtuo kag sang maayong panudlo.” (1 Tim. 4:6) Kon himuon mo ini, mangin epektibo ka sa pagbulig sa iban sa espirituwal. Mapabakod mo man ang imo pagtuo.

PAT-OD NGA PANGAMLIG BASE SA PULONG SANG DIOS

16. (a) Paano ang ‘pag-usisa sing maayo sa Kasulatan adlaw-adlaw’ nakabulig sa mga taga-Berea? (b) Ngaa importante nga basahon naton ang Biblia kada adlaw?

16 Ang mga Judiyo sa Berea, nga isa ka siudad sa Macedonia, may kinabatasan nga ‘usisaon sing maayo ang Kasulatan adlaw-adlaw.’ Sang ginbantalaan sila ni Pablo, ginpaanggid nila ang iya ginsiling sa ila nahibaluan sa Kasulatan. Ano ang resulta? Madamo ang nakumbinsi nga nagatudlo sia sing kamatuoran, kag “nangin mga tumuluo” sila. (Binu. 17:10-12) Ginapakita sini nga ang pagbasa sing Biblia kada adlaw nagapabakod sang pagtuo kay Jehova. Ina nga pagtuo—“ang masaligan nga pagpaabot sa mga butang nga ginalauman” —importante para maluwas kita pasulod sa bag-ong kalibutan sang Dios.Heb. 11:1.

17, 18. (a) Paano ang mabakod nga pagtuo kag gugma magaamlig sa malaragwayon nga tagipusuon sang isa ka Cristiano? (b) Paano ang paglaum nagaamlig sa aton batok sa katalagman?

17 Si Pablo may maayo nga rason sa pagsulat: “Para sa aton nga iya sang adlaw, huptan naton ang aton kaligdong kag isuklob ang pagtuo kag gugma subong panaming sa dughan kag ang paglaum nga kaluwasan subong helmet.” (1 Tes. 5:8) Ang tagipusuon sang isa ka soldado nagakinahanglan sing proteksion batok sa kaaway. Sing kaanggid, ang malaragwayon nga tagipusuon sang isa ka Cristiano nagakinahanglan sing pangamlig batok sa gahom sang sala. Ano ang resulta kon ipakita sang isa ka alagad ni Jehova ang mabakod nga pagtuo sa mga saad sang Dios kag ang gugma sa Iya kag sa iya isigkatawo? Nagasul-ob sia sing pinakamaayo nga espirituwal nga taming. Ayhan indi gid sia makahimo sing mga butang nga makadula sang kahamuot sang Dios.

18 Ginsambit man ni Pablo ang helmet, nga amo “ang paglaum nga kaluwasan.” Sang panahon sang Biblia, kon indi pagproteksionan sang isa ka soldado ang iya ulo, mahapos sia mapatay sa inaway. Pero kon nagasuksok sia sing maayo nga helmet, indi sia grabe nga mahalitan kon maigo sia sa ulo. Nagabakod ang aton paglaum sa pagluwas ni Jehova paagi sa pagtuon sa iya Pulong. Ang mabakod nga paglaum nagabulig sa aton nga pamatukan ang mga apostata kag ang ila makahalalit kag “wala pulos nga mga hambalanon.” (2 Tim. 2:16-19) Magapabakod man ini sa aton nga isikway yadtong magaimpluwensia sa aton sa paghimo sang mga butang nga ginapakamalaut ni Jehova.

KINAHANGLANON PARA SA KALUWASAN

19, 20. Ngaa ginaapresyar gid naton ang Pulong sang Dios, kag paano naton ini mapakita? (Tan-awa ang kahon nga “Ginhatag ni Jehova ang Akon Gid Kinahanglanon.”)

19 Samtang nagahilapit kita sa katapusan, mas kinahanglan naton nga magsalig sa Pulong ni Jehova. Ang mga laygay sini makabulig sa aton para matadlong ang malain nga mga batasan kag makontrol ang aton makasasala nga mga huyog. Paagi sa pagpalig-on kag lugpay sini, makalampuwas kita sa mga pagtilaw ni Satanas kag sang iya kalibutan. Sa panuytoy ni Jehova paagi sa iya Pulong, makapabilin kita sa dalan padulong sa kabuhi.

20 Dumduma nga kabubut-on sang Dios nga “ang tanan nga sahi sang mga tawo maluwas.” Ang mga alagad ni Jehova nalakip sa “tanan nga sahi sang mga tawo.” Amo man ang mga tawo nga mahimo naton mabuligan sa aton pagbantala kag pagtudlo nga hilikuton. Pero ang tanan nga luyag maluwas dapat magtigayon sing “sibu nga ihibalo tuhoy sa kamatuoran.” (1 Tim. 2:4) Gani, kon luyag naton maluwas sa katapusan nga mga adlaw, kinahanglan naton basahon ang Biblia kag iaplikar ang mga laygay sini. Huo, ang pagbasa sing Biblia kada adlaw nagapakita nga ginaapresyar gid naton ang bilidhon nga Pulong sang kamatuoran ni Jehova.Juan 17:17.

^ par. 12 Siempre, wala naton ginagamit ang laygay sang Biblia para piliton ukon pakamalauton ang iban. Dapat kita mangin mapinasensiahon kag mainayuhon sa aton Bible study, pareho sang ginpakita sa aton ni Jehova.Sal. 103:8.

^ par. 14 Ano abi kon ang madumduman mo lang amo ang panguna nga mga tinaga pero indi ang tulun-an, kapitulo, kag bersikulo? Kon pangitaon mo ina nga mga tinaga sa indese sa likod sang Biblia, sa Watchtower Library, ukon sa konkordansia sang New World Translation, mahimo mo makita ang teksto.