Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) PEBRERO 2013

Magpabilin sa Nalupyakan ni Jehova nga Nagahatag sing Proteksion

Magpabilin sa Nalupyakan ni Jehova nga Nagahatag sing Proteksion

“Magagowa ang GINOO kag magapakig-away batok sa sadtong mga pungsud subong sang pag-away niya sa adlaw sang inaway.”—ZAC. 14:3.

1, 2. Anong matuod nga inaway ang nagahilapit, kag ano ang indi kinahanglan himuon sang mga alagad sang Dios?

SANG Oktubre 30, 1938, minilyon ka tawo sa Estados Unidos ang nagapamati sa isa ka drama sang kilala nga programa sa radyo. Ang drama sina nga gab-i ginsunod sa science fiction nga nobela nga The War of the Worlds. Ang mga aktor nga nagatungod subong mga reporter nagsiling nga may mga tinuga halin sa Mars nga magasalakay sa Duta kag gub-on ini. Bisan pa ginpahibalo nga ang programa sa radyo isa lang ka drama, abi sang madamo nga tagpalamati matuod gid ang pagsalakay kag ginkulbaan sila. Ang iban nangita sing paagi para proteksionan ang ila kaugalingon batok sa ginakunokuno nga mga alien.

2 Sa karon, may matuod nga inaway nga malapit na lang matabo. Pero wala ini ginasapak sang mga tawo. Ini nga inaway gintagna, indi sa isa ka science fiction nga nobela, kundi sa inspirado nga Pulong sang Dios, ang Biblia. Amo ini ang inaway sa Armagedon—ang inaway sang Dios batok sa sining malaut nga sistema sang mga butang. (Bug. 16:14-16) Sa sini nga inaway, indi kinahanglan nga pangapinan sang mga alagad sang Dios ang ila kaugalingon batok sa mga taga-iban nga planeta. Pero makibot gid sila sa makatilingala nga mga hitabo kag sa makahalawhaw nga pagpakita sang gahom sang Dios.

3. Ano nga tagna ang aton binagbinagon, kag ngaa interesado kita sa sini?

3 Ang tagna sa Biblia sa Zacarias kapitulo 14 nagasugid sa aton parte sa inaway sa Armagedon. Bisan pa ginsulat ini 2,500 ka tuig na ang nagligad, ini nga tagna importante gid para sa aton karon. (Roma 15:4) Madamo ang ginasugid sini parte sa mga kahimtangan nga nagaapektar sa katawhan sang Dios sugod sang gintukod ang Mesianikong Ginharian sa langit sang 1914  kag parte sa makalilipay nga mga hitabo sa malapit nga palaabuton. Ang importante nga bahin sang tagna nagalakip sang pagluntad sang isa ka “daku gid nga nalupyakan” kag sang pag-ilig sang “mga tubig nga buhi.” (Zac. 14:4, 8) Ini nga nalupyakan may importante nga papel sa paghatag sing proteksion sa mga sumilimba ni Jehova. Kag kon mahangpan naton ang kahulugan sang mga tubig nga buhi para sa aton, indi lamang naton marealisar nga kinahanglan kita makig-ambit sa sini kundi luyag man naton nga mag-inom sa sini. Gani, makabenepisyo gid kita sa pagbinagbinag sing maayo sa sini nga tagna.—2 Ped. 1:19, 20.

NAGSUGOD “ANG ADLAW SANG GINOO”

4. (a) San-o nagsugod ang “adlaw sang GINOO?” (b) Ano ang ginpahayag sang mga sumilimba ni Jehova mga dekada antes sang 1914, kag ano ang reaksion sang mga lider sang kalibutan?

4 Ang kapitulo 14 sang Zacarias nagaumpisa sa pagpatuhoy sa “adlaw sang GINOO.” (Basaha ang Zacarias 14:1, 2.) Ano ini nga adlaw? Amo ini ang “adlaw sang Ginuo” nga nagsugod sang “ang ginharian sang kalibutan nangin ginharian sang aton Ginuo kag sang iya Cristo.” (Bug. 1:10; 11:15) Ina nga adlaw nagsugod sang 1914 sang nabun-ag ang Mesianikong Ginharian sa langit. Mga dekada antes sang 1914, ginpahayag sang mga sumilimba ni Jehova sa mga pungsod nga ang katapusan sang “gintalana nga mga tion sang mga pungsod” magaabot sa sina nga tuig kag sugod sina nga tion, mahanabo ang mas grabe nga kagamo sa kalibutan. (Luc. 21:24) Ano ang reaksion sang mga pungsod? Imbes nga mamati sa sini nga paandam, ginyaguta kag ginhingabot sang pulitikal kag relihioso nga mga lider ang makugi nga hinaplas nga mga ebanghelisador. Sa paghimo sini, gintamay sang mga lider sang kalibutan ang Labing Gamhanan nga Dios mismo, kay ang mga hinaplas nga mga embahador sang Ginharian nagarepresentar kag bahin sang “langitnon nga Jerusalem”—ang Mesianikong Ginharian.—Heb. 12:22, 28.

5, 6. (a) Ano ang gintagna nga himuon sang mga pungsod batok sa “banwa” kag sa ‘mga banwahanon’ sini? (b) Sin-o ang “salin sang katawohan”?

5 Gintagna ni Zacarias ang himuon sang mga pungsod, nga nagasiling: “Ang banwa [Jerusalem] agawon.” “Ang banwa” amo ang simbuliko nga Ginharian sang Dios. Ang mga representante sini sa duta amo ang mga ‘banwahanon’ sini, nga nagapatuhoy sa nagkalabilin nga mga hinaplas nga Cristiano. (Fil. 3:20) Sang Bug-os Kalibutan nga Inaway I, ang nagapanguna nga mga miembro sang dutan-on nga bahin sang organisasyon ni Jehova ‘gin-agaw’ ukon gin-aresto, kag ginbilanggo sa Atlanta, Georgia, U.S.A. Ang mga kaaway nagpakita sing inhustisya kag kapintas sa mga hinaplas nga Cristiano, nagdumili sang ila mga literatura, kag nagpauntat sang ila pagbantala. Daw pareho lang nga ‘gin-ati’ ukon mapintas nga ginkawatan ang mga balay sang banwa.

6 Bisan pa gamay lang ang katawhan sang Dios kag ginpakalain, ginpamatukan, kag ginhingabot sang mga kaaway, wala mapapas ang matuod nga pagsimba. May mga “salin sang katawohan,” nga amo ang mga hinaplas nga nagkalabilin nga indi gid magpasugot nga ‘mapapas sila sa banwa.’

7. Ano nga halimbawa ang ginpakita sang hinaplas nga mga Saksi ni Jehova para sa matuod nga mga sumilimba subong?

7 Ini bala nga tagna natuman sing bug-os pagkatapos sang Bug-os Kalibutan nga Inaway I? Wala. Nagpadayon pa ang pagsalakay sang mga pungsod sa mga hinaplas nga nagkalabilin kag sa ila mainunungon nga mga kaupod nga nagalaum nga magkabuhi sa duta. (Bug. 12:17) Ginpamatud-an ini sang Bug-os Kalibutan nga Inaway II. Ang halimbawa sang katutom sang hinaplas nga mga Saksi nagpalig-on sa mga alagad sang Dios subong nga magbatas sa tanan nga pagtilaw, lakip na sa pagpamatok sang di-tumuluo nga mga paryente, mga katrabaho, ukon mga kaeskwela nga nagayaguta sa ila bangod sa ila pagtuo. (1 Ped. 1:6, 7) Diin man sila nagaistar, ang matuod nga mga sumilimba determinado  pa gid nga ‘magtindog nga malig-on sa isa ka espiritu,’ nga “wala nagakahadlok sa [ila] mga kasumpong.” (Fil. 1:27, 28) Gani, diin makakita ang katawhan ni Jehova sing pangamlig sa kalibutan nga nagadumot sa ila?—Juan 15:17-19.

SI JEHOVA NAGHIMO SING “DAKU GID NGA NALUPYAKAN”

8. (a) Sa Biblia, ano ang mahimo ginasimbuluhan sang mga bukid? (b) Ano ang ginarepresentar sang “Bukid sang mga Olivo”?

8 Bangod ang Jerusalem—“ang banwa”—amo ang simbuliko nga langitnon nga Jerusalem, ang “Bukid sang mga Olivo nga yara sa atubang sang Jerusalem,” simbuliko man. Ano ang ginarepresentar sang bukid? Paano ini “mapihak sa tunga”? Ngaa ginpatuhuyan ini ni Jehova nga “akon mga bukid”? (Basaha ang Zacarias 14:3-5.) Sa Biblia, ang mga bukid mahimo magrepresentar sa mga ginharian, ukon gobierno. Ang mga pagpakamaayo kag proteksion nagahalin man sa bukid sang Dios. (Sal. 72:3; Isa. 25:6, 7) Gani, ang bukid sang mga olibo diin nagatindog ang Dios sa sidlangan sang dutan-on nga Jerusalem nagarepresentar sa bug-os uniberso nga pagkasoberano ni Jehova, ang iya supremo nga paggahom.

9. Sa ano nga kahulugan napihak ang “Bukid sang mga Olivo”?

9 Ano ang kahulugan sang pagkapihak sang bukid sang mga olibo? Ang bukid, nga yara sa sidlangan sang Jerusalem, natunga sa kahulugan nga si Jehova nagtukod sang isa pa ka pagginahom nga mas kubos sa sini. Ini nga pagginahom amo ang Mesianikong Ginharian nga ginagamhan ni Jesucristo. Amo nga gintawag ni Jehova ining duha ka bukid, nga resulta sang pagkapihak sang “Bukid sang mga Olivo,” subong “akon mga bukid.” (Zac. 14:4) Sia ang nagapanag-iya sining duha ka bukid.

10. Ano ang ginarepresentar sang “daku gid nga nalupyakan” sa tunga sang duha ka bukid?

10 Sang napihak ang simbuliko nga bukid, nga ang katunga nag-idog paaminhan kag ang katunga pabagatnan, si Jehova nagpabilin nga nagatindog sa sining duha ka bukid. Dayon, may “daku gid nga nalupyakan” nga nagluntad sa tiilan ni Jehova. Ining simbuliko nga nalupyakan nagarepresentar sa proteksion sang Dios, diin ang mga alagad ni Jehova ginaamligan sang iya bug-os uniberso nga pagkasoberano kag sang Mesianikong Ginharian sang iya Anak. Pat-uron ni Jehova nga ang matuod nga pagsimba indi gid madula. San-o napihak ang bukid sang mga olibo? Natabo ini sang natukod ang Mesianikong Ginharian sang natapos ang Panag-on sang mga Gentil sang 1914. San-o nagsugod ang pagdangop sang matuod nga mga sumilimba sa simbuliko nga nalupyakan?

NAGSUGOD ANG PAGDANGOP SA NALUPYAKAN!

11, 12. (a) San-o nagsugod ang pagdangop sa simbuliko nga nalupyakan? (b) Ano ang nagapamatuod nga ang gamhanan nga butkon ni Jehova nagabulig sa iya katawhan?

11 Si Jesus nagpaandam sa iya mga sumulunod: “Dumtan kamo sang tanan nga pungsod tungod sa akon ngalan.” (Mat. 24:9) Sa katapusan nga mga adlaw sining sistema sang mga butang, sugod sang 1914, nagbaskog pa gid ina nga pagdumot. Bisan pa sa mapintas nga pagsalakay sang mga kaaway batok sa hinaplas nga nagkalabilin sa tion sang Bug-os Kalibutan nga Inaway I, ining matutom nga grupo wala mapapas. Sang 1919, ginhilway sila gikan sa Babilonia nga Daku—ang bug-os kalibutan nga emperyo sang butig nga relihion. (Bug. 11:11, 12) * Sa sina nga tion nagsugod ang pagdangop sa nalupyakan sang mga bukid ni Jehova.

12 Sugod sang 1919, ang nalupyakan sang Dios nga nagahatag sing proteksion padayon nga nagaamlig sa matuod nga mga sumilimba sa bilog nga duta. Sa sulod sang mga  dekada, gindumilian sa madamo nga bahin sang kalibutan ang pagbantala nga hilikuton kag ang mga literatura sa Biblia sang mga Saksi ni Jehova. Ina nga mga pagdumili nagapadayon gihapon sa pila ka kadutaan. Pero bisan pa sa pagtinguha sang mga pungsod, indi gid sila magmadinalag-on sa pagdula sa matuod nga pagsimba! Ang gamhanan nga butkon ni Jehova magabulig gid sa iya katawhan.—Deut. 11:2.

13. Paano kita makapabilin sa nalupyakan ni Jehova, kag ngaa ilabi na nga importante ini karon?

13 Kon mangin matutom kita kay Jehova kag magtindog sing malig-on sa kamatuoran, sia kag ang iya Anak, nga si Jesucristo, magatuman sang ila papel, kag indi pagtugutan sang Dios ang bisan ano ukon bisan sin-o nga ‘makaagaw sa aton sa Iya kamot.’ (Juan 10:28, 29) Si Jehova handa maghatag sang bisan ano nga kinahanglan naton para matuman sia subong Soberano sang Uniberso kag makapabilin nga matutom nga mga sakop sang Mesianikong Ginharian. Gani, kinahanglan nga magpabilin kita sa nalupyakan nga nagahatag sing proteksion, kay may mas daku pa ini nga kahulugan para sa matuod nga mga sumilimba sa nagahilapit nga dakung kapipit-an.

NAG-ABOT ANG ADLAW SANG ‘PAG-AWAY’

14, 15. Sa adlaw sang “pag-away” sang Dios batok sa iya mga kaaway, ano ang kahimtangan sang mga ara sa gua sang nalupyakan?

14 Samtang nagahilapit ang katapusan sining sistema, pabaskugon pa gid ni Satanas ang iya pagsalakay sa mga alagad ni Jehova. Dayon magaabot ang adlaw sang “pag-away” sang Dios sa iya mga kaaway. Siguruhon ni Jehova nga amo na ini ang katapusan nga pagsalakay ni Satanas. Sa sina nga adlaw, ang Soberano sang uniberso mangin Mangangaway nga mas mahimayaon sangsa nagligad niya nga mga “adlaw sang inaway.”—Zac. 14:3.

15 Sa adlaw sang pag-away sang Dios, ano ang mangin kahimtangan sang mga ara sa gua sang “daku gid nga nalupyakan”? “Wala na sing kapawa” sang kahamuot sang Dios nga magasilak sa ila. Sa sina nga adlaw sang inaway, maapektuhan ‘ang kabayo, mula, camelyo, asno, kag ang tanan nga kasapatan’—nga nagarepresentar sa mga kagamitan sang mga hangaway sang mga pungsod. Ina nga mga kagamitan indi na mapuslan. Gamiton man ni Jehova ang mga peste kag “mga balatian.” Literal man ini ukon indi, ang mga balatian magapahipos sa makahaladlok nga mga pamahog. Sa sina nga adlaw, “madunot ang ila . . . mata kag dila” amo nga indi nila makita ang ila ginasalakay kag indi na sila makapangyaguta. (Zac. 14:6, 7, 12, 15) Bisan diin man sila sa duta, indi gid sila makapalagyo sa kalaglagan. Madamo ang magadampig kay Satanas sa sini nga inaway. (Bug. 19:19-21) “Ang pinatay sang GINOO sa sadto nga adlaw manginkutub sa isa ka ukbung sang duta tubtub gid sa isa ka ukbung sang duta.”—Jer. 25:32, 33.

16. Bangod nagahilapit ang adlaw sang pag-away sang Dios, ano nga mga pamangkot ang dapat naton binagbinagon, kag ano ang dapat naton himuon?

16 Ang inaway masami nagaresulta sing pag-antos, bisan sa mga nagdaug. Mahimo maubos ang pagkaon, madula ang mga pagkabutang, magnubo ang ekonomiya, kag malimitahan ang aton mga kahilwayan. Kon matabo ini sa aton, ano ang aton himuon? Masalasala bala kita? Isikway bala naton ang aton pagtuo? Madulaan bala kita sing paglaum kag maluyahan? Importante gid nga huptan naton ang aton pagtuo sa nagaluwas nga gahom ni Jehova kag magpabilin sa iya nalupyakan nga nagahatag sing proteksion sa tion sang dakung kapipit-an!—Basaha ang Habacuc 3:17, 18.

“ANG MGA TUBIG NGA BUHI MAGAGOWA”

17, 18. (a) Ano ang “mga tubig nga buhi”? (b) Ano ang ginapatuhuyan sang “dagat nga nasidlangan” kag “dagat nga nakatundan”? (c) Ano ang imo determinasyon samtang nagatulok sa palaabuton?

17 Pagkatapos sang Armagedon, ang “mga tubig nga buhi” padayon nga magailig halin  sa Mesianikong Ginharian. Ining “mga tubig nga buhi” amo ang probisyon ni Jehova para sa kabuhi. Ang “dagat nga nasidlangan” nagapatuhoy sa Patay nga Dagat, kag ang “dagat nga nakatundan” sa Dagat Mediteraneo. Pareho ini nga gingamit sa pagpatuhoy sa katawhan. Ang Patay nga Dagat nagakaigo nga nagarepresentar sa mga ara sa kinaandan nga lulubngan sang mga tawo. Bangod ang Dagat Mediteraneo puno sing kabuhi, nagakaigo ini nga paglaragway sa “dakung kadam-an” sang mga nakalampuwas sa Armagedon. (Basaha ang Zacarias 14:8, 9; Bug. 7:9-15) Gani ang duha ka grupo mahilway gikan sa kamatayon nga ginpapanubli ni Adan samtang padayon sila nga nagainom sa simbuliko nga mga tubig nga buhi, ukon “suba sang tubig sang kabuhi.”—Bug. 22:1, 2.

Mangin determinado nga magpabilin sa nalupyakan ni Jehova nga nagahatag sing proteksion

18 Paagi sa proteksion ni Jehova, makalampuwas kita sa katapusan sining malaut nga sistema sang mga butang kag makasulod sa matarong nga bag-ong kalibutan sang Dios. Bisan pa ginadumtan kita sang tanan nga pungsod, kabay pa nga mangin matutom kita nga mga sakop sang Ginharian sang Dios, kag mas determinado nga magpabilin sa nalupyakan ni Jehova nga nagahatag sing proteksion.

[Nota]

^ par. 11 Tan-awa ang Bugna—Malapit Na ang Mahimayaon nga Talipuspusan Sini! sa pahina 169-170.