Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ENERO 2013

Naghalad sang Ila Kaugalingon sing Kinabubut-on—Sa Norway

Naghalad sang Ila Kaugalingon sing Kinabubut-on—Sa Norway

SANG nagligad nga mga tinuig, sanday Roald kag Elsebeth, isa ka mag-asawa nga manugsingkuenta na, may masulhay nga pangabuhi sa Bergen, nga ikaduha sa pinakadaku nga siudad sa Norway. Kaupod sa ila kabataan nga sanday Isabel kag Fabian, matutom sila nga nagapakigbahin sa mga hilikuton sa kongregasyon. Si Roald isa ka gulang kag si Elsebeth payunir, samtang sanday Isabel kag Fabian naman mapisan nga mga manugbantala.

Pero sang Septiembre 2009, ini nga pamilya nagdesisyon nga magbantala sing isa ka semana sa naligwin nga lugar. Gani sanday Roald kag Elsebeth, kaupod ni Fabian, nga 18 anyos na sadto, naglakbay pakadto sa Nordkyn, isa ka lugar sa rehiyon sang Finnmark, sa ibabaw sang Arctic Circle. Didto, sa baryo sang Kjøllefjord, nagbantala sila upod sa mga kauturan nga nagkadto man sa sina nga rehiyon para magbantala. “Sa umpisa sang semana,” hinumdom ni Roald, “daw kontento na ako nga naiskedyul ko ang akon mga hilikuton para makapakigbahin sa sining pinasahi nga hilikuton sa bilog nga semana.” Pero sang ulihi sina man nga semana, indi mapahamtang si Roald. Ngaa?

 WALA GINAPAABOT NGA PAMANGKOT

“Hinali lang,” siling ni Roald, “nga ginpamangkot kami ni Mario, isa ka payunir sa Finnmark, kon puede kami makasaylo sa banwa sang Lakselv para magbulig sa kongregasyon nga may 23 ka manugbantala.” Nakibot gid si Roald sa sining wala ginapaabot nga pamangkot. Nagpaathag sia: “Nabinagbinag namon ni Elsebeth ang pag-alagad sa lugar nga mas daku ang kinahanglanon—pero sa ulihi na lang kon wala na sa amon poder ang mga kabataan.” Pero, sa nabilin nga mga inadlaw nga nagabantala sia sa sini nga lugar, nakita ni Roald nga interesado gid ang mga tawo nga makatuon parte kay Jehova. Kinahanglan na gid nila subong ang bulig. “Yadto nga pamangkot nagtublag sa akon kag pila ka gab-i nga wala ako makatulog,” hinumdom niya. Dayon gindala ni Mario si Roald kag ang iya pamilya sa Lakselv, nga mga 240 kilometros sa bagatnan sang Kjøllefjord. Luyag niya ipakita sa mga bisita ang gamay nga kongregasyon didto.

Sa Lakselv, ginpakita sa ila ni Andreas, nga isa sa duha ka gulang didto, ang lugar kag ang Kingdom Hall. Gin-abiabi gid sila sang kongregasyon kag ginsilingan sanday Roald kag Elsebeth nga malipay gid sila kon magsaylo ang ila pamilya didto para magbulig sa hilikuton sa Ginharian. Nagayuhum nga nagsiling si Andreas nga nakakita na sila sing posible nga trabaho para kanday Roald kag Fabian! Ano ang himuon sang pamilya?

ANO ANG DAPAT PILION?

Sang primero si Fabian nagsiling: “Wala ako sing handum nga magsaylo diri.” Indi niya gusto nga biyaan ang iya suod nga mga abyan sa ila kongregasyon nga nakaupod niya halin sang gamay pa sia kag mag-istar sa gamay nga banwa. Wala pa man sia makatapos sa pag-eskwela subong elektrisyan. Pero sang si Isabel (nga 21 anyos sadto) ang ginpamangkot, nagsiling sia: “Amo gid sina ang gusto ko himuon!” Pero nagsiling man sia: “Sang ginpamensar ko pa gid ini, naghunahuna ako, ‘Maayo gid bala ini? Basi hidlawon ako sa akon mga abyan? Dapat bala ako magpabilin sa amon kongregasyon diin matawhay kag may kasiguruhan?’” Ano naman ang reaksion ni Elsebeth sa sini nga pangagda? “Nabatyagan ko nga ginhatagan ni Jehova ang amon pamilya sing isa ka asaynment,” siling niya, “pero ginapamensar ko man ang amon bag-o lang nakay-o nga balay kag ang tanan nga pagkabutang nga napundar namon sa sulod sang 25 ka tuig.”

Sanday Elsebeth kag Isabel

Pagkatapos sining pinasahi nga semana, si Roald kag ang iya pamilya nagbalik sa Bergen, pero indi madula sa ila pensar ang ila mga kauturan sa Lakselv, nga mga 2,100 kilometros gikan sa ila. “Nagapangamuyo ako pirme kay Jehova,” siling ni Elsebeth, “kag padayon ako nga nagakomunikar sa mga nangin abyan namon didto paagi sa pagpadala sing mga piktyur kag mga eksperiensia.” Si Roald nagsiling: “Madugay ko nga ginpamensaran ini nga pagsaylo. Dapat ko man binagbinagon kon paano namon masuportahan ang amon kinahanglanon. Paano namon maatipan ang amon kaugalingon? Nangamuyo ako pirme kay Jehova kag nakighambal sa akon pamilya kag sa hamtong nga mga kauturan.” Si Fabian naghinumdom: “Samtang padayon ko ini nga ginpamensar, mas narealisar ko nga wala ako sing rason nga mangindi. Pirme ako nagapangamuyo kay Jehova, kag amat-amat nga nagbakod ang akon handum nga magsaylo.” Kamusta si Isabel? Para mahanda niya ang iya kaugalingon sa pagsaylo, nagpayunir anay sia sa ila lugar. Pagkatapos sang anom ka bulan nga pagpayunir kag paghatag sing daku nga tion sa personal nga pagtuon, nabatyagan niya nga handa na sia magsaylo.

MGA TIKANG SA PAGLAB-OT SANG ILA TULUMURON

Samtang nagabakod ang ila handum sa pag-alagad sa lugar diin mas daku ang kinahanglanon, ang pamilya naghimo sing mga tikang para malab-ot ang ila tulumuron. Daku ang sueldo ni Roald sa obra nga iya gid nanamian, pero nangayo sia sing isa ka tuig nga bakasyon. Apang ginpangabay sia sang iya amo nga magtrabaho sing part-time—duha ka semana nga obra kag anom ka semana nga bakasyon. “Daku ang nabuhin sa akon kita, pero maayo gid ang resulta sini,” siling ni Roald.

Si Elsebeth nagsiling: “Ginpangabay ako sang akon bana nga mangita sing balay sa Lakselv, kag paarkilahan ang amon balay sa Bergen. Nagakinahanglan ini sing daku nga tion kag panikasog, pero nagmadinalag-on kami. Wala madugay, ang mga kabataan nakakita sing part-time nga obra,” siling pa niya, “kag ginbuligan nila kami nga masuportahan ang amon pagkaon kag transportasyon.”

 Si Isabel nagsiling: “Bangod gamay lang nga banwa ang amon ginsayluhan, ang pinakamabudlay para sa akon amo pagpangita sing trabaho nga makasuportar sa akon pagpayunir. Kon kaisa, daw nadulaan na ako sing paglaum.” Pero sang nagkuha sia sing ginagmay nga part-time nga obra—siam sa una nga tuig—nasuportahan ni Isabel ang iya mga kinahanglanon. Kamusta naman si Fabian? “Para makatapos sa pag-eskwela subong elektrisyan, kinahanglan ko mag-obra subong aprentis. Ginhimo ko ini sa Lakselv. Sang ulihi, nakapasar ako sa eksam kag nakakita sing part-time nga obra subong elektrisyan.”

KON PAANO GINPASANGKAD SANG IBAN ANG ILA PAG-ALAGAD

Sanday Marelius kag Kesia nga nagapanaksi sa isa ka Sami sa Norway

Si Marelius kag ang iya asawa nga si Kesia, luyag man mag-alagad sa lugar nga mas daku ang kinahanglanon. Si Marelius, nga 29 anyos na karon, nagsiling: “Ang mga pamulongpulong kag mga interbyu sa kombension parte sa pagpayunir nagpahulag sa akon nga pasangkaron ang akon pag-alagad.” Pero para kay Kesia, nga 26 anyos na karon, mabudlay ang pagpalayo sa iya pamilya. “Nahadlok ako magpalayo sa akon mga pinalangga,” siling niya. Luwas sini, si Marelius nagatrabaho sing full-time para mabayaran ang ila balay. Nagsiling sia: “Paagi sa bulig ni Jehova kag pagpangamuyo pirme nga buligan niya kami nga makahimo sing mga pagbag-o, nadayon gid ang amon pagsaylo.” Sang primero, nagkonsentrar sila anay sa paghiwat sing mga Bible study. Dayon, ginbaligya sang mag-asawa ang ila balay, nag-untat sa ila obra, kag nagsaylo sang Agosto 2011 sa siudad sang Alta, sa naaminhan nga Norway. Para masuportahan didto ang ila pagpayunir, si Marelius nagtrabaho bilang accountant kag si Kesia nag-obra sa isa ka balaligyaan.

Sanday Knut kag Lisbeth, isa ka mag-asawa nga mga 35 na, natandog gid sa mga eksperiensia sa Tuigan nga Libro parte sa mga nagaalagad sa mga lugar nga mas daku ang kinahanglanon. “Ini nga mga eksperiensia nagbulig sa amon nga hunahunaon ang pag-alagad sa iban nga pungsod,” siling ni Lisbeth, “apang nagaduhaduha ako kay basi indi ini masarangan sang ordinaryo nga tawo pareho ko.” Pero naghimo sila sing tikang para malab-ot ang ila tulumuron. Si Knut nagsiling: “Ginbaligya namon ang amon apartment kag, para makasupotsupot, nagsaylo kami sa balay ni Nanay. Sang ulihi, para matilawan ang pag-alagad sa iban nga pungsod, nagsaylo kami sa Ingles nga kongregasyon sa Bergen sing isa ka tuig, kag nag-istar sa balay sang iloy ni Lisbeth.” Wala madugay, handa na sanday Knut kag Lisbeth nga magsaylo sa Uganda. Nagapauli sila sa Norway kada tuig para magtrabaho sing duha ka bulan. Makabulig ini para masuportahan nila ang ila pagpayunir sa Uganda sa bug-os nga tuig.

“TILAWI KAG TAN-AWA NGA MAAYO” SI JEHOVA

“Nagsuod pa gid ang amon pamilya.”—Roald

Kamusta na karon ining handa nga mga manugbantala? Si Roald nagsiling: “Mas madamo na kami sing tion nga mag-updanay subong pamilya sa sining naligwin nga lugar sangsa didto pa kami sa Bergen. Nagsuod pa gid ang amon pamilya. Pagpakamaayo gid nga makita nga nagauswag sa espirituwal ang amon kabataan.” Nagsiling pa sia: “Wala na kami  nagakabalaka sing sobra sa materyal nga mga butang. Nagsala kami sa paghunahuna nga importante gid ini.”

Nagtuon man si Elsebeth sing bag-o nga lenguahe. Ngaa? Nalakip sa teritoryo sang Kongregasyon sang Lakselv ang Karasjok, ang lugar nga madamo sing Sami—mga tumandok sang naaminhan nga rehiyon sang Norway, Sweden, Finland, kag Rusya. Gani para mahapos sila mabantalaan, nagtuon si Elsebeth sang lenguahe sang mga Sami. Sa karon, makauluistorya na sia sa sini nga lenguahe. Nalipay bala sia sa iya bag-o nga teritoryo? Nagsiling sia: “Anom na ang akon Bible study. Nanamian gid ako mag-alagad diri!”

Si Fabian naman, nga payunir kag ministeryal nga alagad na subong, nagsaysay nga napalig-on nila ni Isabel ang tatlo ka tin-edyer sa ila bag-o nga kongregasyon nga makigbahin sa mga hilikuton sang kongregasyon. Ining tatlo ka pamatan-on aktibo na karon sa ministeryo. Ang duha sa ila bawtismado na kag nangin auxiliary payunir sang Marso 2012. Ang isa ka tin-edyer nga nagluya sa espirituwal nagpasalamat kay Fabian kag Isabel sa pagbulig sa iya nga mangin aktibo liwat. Si Fabian nagsiling: “Natandog gid ako sang ginsiling niya ina. Makalilipay gid nga makabulig sa iban!” Si Isabel nagsiling: “Sa sini nga asaynment, natilawan ko gid kag nakita nga maayo si Jehova.” (Sal. 34:8) Nagsiling pa sia: “Labaw sa tanan, nanamian ako mag-alagad diri!”

Simple na karon ang pagkabuhi nanday Marelius kag Kesia, pero malipayon sila. Ang kongregasyon sa Alta, nga ila ginsayluhan, may 41 na karon ka manugbantala. Si Marelius nagsiling: “Napalig-on gid ako nga hunahunaon kon paano nagbag-o ang amon kabuhi. Ginapasalamatan namon si Jehova kay nakapayunir kami diri. Wala na sing mas makapaladya pa sa sini.” Si Kesia nagsiling pa: “Natun-an ko nga magsalig sing bug-os kay Jehova, kag gin-atipan gid niya kami. Narealisar ko man nga ang pagpalayo sa akon mga paryente nakabulig sa akon nga pabaloran pa gid ang mga tinion nga nag-updanay kami. Wala gid ako naghinulsol sa amon desisyon.”

Sanday Knut kag Lisbeth nga nagatuon sa isa ka pamilya sa Uganda

Kamusta naman sanday Knut kag Lisbeth sa Uganda? Si Knut nagsiling: “Madugay pa antes ako naka-adjust sa bag-o nga palibot kag kultura. Ordinaryo lang diri ang problema sa tubig, koryente, kag sakit sa tiyan, pero makadumala kami sing madamo nga Bible study tubtob gusto namon!” Si Lisbeth nagsiling: “Mga tunga sa oras gikan sa amon ginaistaran, may mga teritoryo nga wala pa mabantalaan sang maayong balita. Pero, kon magkadto kami didto, makita namon ang mga tawo nga nagabasa sing Biblia, kag nagapangabay sa amon nga tudluan sila. Ang kalipay sa pagtudlo sang mensahe sang Biblia sa sining mapainubuson nga mga tawo indi gid matupungan!”

Pat-od gid nga nalipay ang aton Lider nga si Cristo Jesus nga makita gikan sa langit ang pag-uswag sa bilog nga kalibutan sang pagbantala nga hilikuton nga iya ginsugdan! Huo, makalilipay gid para sa tanan nga katawhan sang Dios nga ihalad ang ila kaugalingon sing kinabubut-on sa pagtuman sang sugo ni Jesus nga “maghimo sang mga disipulo sa mga tawo sang tanan nga pungsod.”—Mat. 28:19, 20.

Magtuon sing Dugang Pa

Paano Ginahanas ang mga Payunir?

Anong pinasahi nga paghanas ang ginahatag sa mga payunir nga nagabantala sang Ginharian sing bug-os tion?