Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ENERO 2013

Magpabilin nga Malapit kay Jehova

Magpabilin nga Malapit kay Jehova

“Magpalapit kamo sa Dios, kag magapalapit sia sa inyo.”—SANT. 4:8.

1, 2. (a) Ano ang “mga pahito” ni Satanas? (b) Ano ang makabulig sa aton nga mangin malapit sa Dios?

GINTUGA ni Jehova nga Dios ang mga tawo nga may handum nga magpalapit sa iya. Pero luyag ni Satanas nga ilugon naton ang iya panghunahuna—nga indi naton kinahanglan si Jehova. Isa ini ka kabutigan nga ginpalapnag ni Satanas sugod pa sang nadaya si Eva sa hardin sang Eden. (Gen. 3:4-6) Sugod sadto, madamo nga tawo ang naghunahuna nga indi nila kinahanglan ang Dios.

2 Indi kinahanglan nga mahulog kita sa siod ni Satanas. “Indi kita wala sing nahibaluan sa iya mga pahito.” (2 Cor. 2:11) Ginatinguhaan ni Satanas nga mapahilayo kita kay Jehova paagi sa pagsulay sa aton nga maghimo sing sayop nga mga desisyon. Pero subong sang ginpakita sang nagligad nga artikulo, makahimo kita sing husto nga pagpili parte sa karera, kalingawan, kag mga butang may kaangtanan sa pamilya. Ipakita naman sini nga artikulo nga ang pagbutang sang teknolohiya, ikaayong lawas, kuarta, kag bugal sa husto nga lugar makabulig sa aton nga “magpalapit . . . sa Dios.”—Sant. 4:8.

TEKNOLOHIYA

3. Iilustrar kon paano ang teknolohiya mahimo magamit sa maayo ukon sa malain.

3 Sa bilog nga kalibutan, kinaandan na ang moderno nga mga kagamitan. Kon gamiton ini sing nagakaigo, mapuslanon gid ini. Pero kon indi, magapahilayo ini sa aton gikan sa aton Amay sa langit. Binagbinaga ang kompyuter. Ang magasin nga imo ginabasa subong ginsulat kag ginbalhag sa bulig sang mga kompyuter. Ang kompyuter epektibo gid sa research kag komunikasyon, kag kon kaisa makahatag man sing makapaumpaw nga kalingawan. Pero, mahimo man kita maadik sa sini nga teknolohiya. Malimbungon nga ginakumbinsi sang mga negosyante ang mga tawo nga kinahanglan magbakal sila sing pinakabag-o. Ang isa ka tawo nga gusto gid makatigayon sing tablet nga kompyuter sekreto nga nagbaligya sang isa niya ka kidney para mabakal ini. Kabuangan gid ang iya ginhimo!

4. Ano ang ginhimo sang isa ka Cristiano para mauntat ang iya sobra nga paggamit sang kompyuter?

 4 Ang mas makahalalit pa amo ang pagsakripisyo sang imo kaangtanan kay Jehova paagi sa sala ukon sobra nga paggamit sang teknolohiya. “Nahibaluan ko nga nagsiling ang Biblia nga dapat naton ‘baklon ang nagakaigo nga tion’ para sa espirituwal nga mga butang,” siling ni Jon, isa ka Cristiano nga manugtreinta anyos na. * “Pero kon kompyuter na ang hambalan, daw indi ko mapunggan ang akon kaugalingon.” Pirme nagapulaw si Jon sa paggamit sing Internet. “Kon kapoy na gani ako, didto pa gid nga daw indi ako mag-untat sa pag-chat kag pagtan-aw sang malip-ot nga mga video—kag indi ini pirme maayo nga mga talan-awon,” siling niya. Para mauntat niya ini nga bisyo, gin-set ni Jon ang iya kompyuter nga awtomatik nga mag-shut down kon inugtulog na niya.—Basaha ang Efeso 5:15, 16.

Mga ginikanan, buligi ang inyo kabataan nga mangin maalamon sa paggamit sang teknolohiya

5, 6. (a) Ano ang mga responsibilidad sang mga ginikanan sa ila kabataan? (b) Paano mapat-od sang mga ginikanan nga may maayo nga kaupdanan ang ila kabataan?

5 Mga ginikanan, indi kinahanglan nga kontrolon ninyo ang tanan nga hulag sang inyo kabataan, pero kinahanglan ninyo monitoron ang paggamit nila sing kompyuter. Indi sila pagtuguti nga magkadto sa imoral ukon espiritistiko nga mga Web-site, maghampang sing masingki nga games, ukon makig-angot sa malain nga mga tawo sa Internet para lang malingaw sila kag indi magsinabad sa inyo. Kon magpabaya lang kamo, mahimo magsiling sila, ‘Wala man ini siguro sing kaso, kay daw OK man lang kanday Nanay kag Tatay.’ Bilang mga ginikanan, responsibilidad ninyo nga proteksionan ang inyo kabataan—lakip na ang mga tin-edyer—sa tanan nga butang nga makapahilayo sa ila kay Jehova. Bisan gani ang mga sapat nagaamlig gid sa ila mga anak. Imadyina ang himuon sang nanay nga oso kon may maghalit sa iya mga totoy!—Ipaanggid ang Oseas 13:8.

6 Buligi ang inyo kabataan nga makig-upod sa huwaran nga mga Cristiano, pamatan-on man ukon may edad na. Kag dumduma, kinahanglan sang inyo kabataan ang inyo tion! Gani maghatag sing tion sa pagsinadya, paghampang, kag pagtrabaho upod sa ila agod mangin ‘malapit kamo sa Dios.’ *

IKAAYONG LAWAS

7. Ngaa gusto naton magpabilin nga mapagros?

7 “Kamusta ang pamatyag mo?” Ining kinaandan nga ekspresyon nagapadulom sang masubo nga kamatuoran. Bangod gintugutan sang aton una nga mga ginikanan nga ipahilayo sila ni Satanas kay Jehova, kita tanan nagabalatian. Nalipay si Satanas kon magbalatian kita bangod nagapabudlay ini sa aton pag-alagad kay Jehova. Kag kon mapatay kita, indi na gid kita makaalagad sa iya. (Sal. 115:17) Gani natural lamang nga ginatinguhaan naton nga magpabilin nga magpagros. * Kag dapat man kita mabalaka sa ikaayong lawas kag kaayuhan sang aton mga kauturan.

8, 9. (a) Paano naton malikawan nga magpasobra parte sa ikaayong lawas? (b) Ano ang mga benepisyo sa pagpalambo sang kalipay?

 8 Pero, dapat naton likawan nga magpasobra. Makugi ang iban sa pagrekomendar sang pila ka sahi sang pagkaon, pagbulong, ukon mga produkto—mas makugi pa sangsa pagbantala sang maayong balita sang Ginharian sang Dios. Mahimo nagapati gid sila nga ginabuligan nila ang iban. Pero, indi nagakaigo nga magrekomendar sang mga produkto para sa ikaayong lawas kag pangpatahom antes kag pagkatapos sang mga miting sa Kingdom Hall ukon sa mga asembleya kag kombension. Ngaa?

9 Nagatipon kita para binagbinagon ang espirituwal nga mga butang kag para madugangan ang aton kalipay, isa ka kinaiya nga ginapatubas sang balaan nga espiritu sang Dios. (Gal. 5:22) Sa sina nga tion, ang paghatag sing laygay parte sa ikaayong lawas ukon pagtanyag sing mga produkto, ginapangabay man ukon wala, mahimo makatublag sa aton espirituwal nga katuyuan kag makadula sa kalipay sang iban. (Roma 14:17) Ang pagpabulong sang isa dapat personal niya nga desisyon. Isa pa, wala sing tawo nga makabulong sa tanan nga balatian. Bisan ang pinakamaayo nga doktor nagatigulang, nagabalatian, kag nagakapatay. Kag ang sobra nga kabalaka sa aton ikaayong lawas indi makasugpon sa aton kabuhi. (Luc. 12:25) Pero, “ang tagiposoon nga malipayon maayo nga bolong.”—Hulu. 17:22.

10. (a) Ano nga mga kinaiya ang matahom para kay Jehova? (b) San-o naton matigayon ang perpekto nga panglawas?

10 Nagakaigo man nga mabalaka kita sa aton hitsura. Pero indi naton pagtinguhaan nga dulaon ang tanan nga tanda sang pagtigulang. Ini nga mga tanda mahimo mangin ebidensia sang pagkahamtong, pagkatalahuron, kag nasulod nga katahom. Halimbawa, ang Biblia nagasiling: “Ang ubanon nga olo amo ang purungpurung sang himaya; makita ini sa dalanon sang pagkamatarung.” (Hulu. 16:31) Amo sini ang pagtamod ni Jehova sa aton, kag dapat naton sia ilugon. (Basaha ang 1 Pedro 3:3, 4.) Gani, maalamon bala nga irisgo ang aton kabuhi sa mga katalagman sang pagparetoke ukon pagpabulong para mangin mas matahom tulukon? Ano man ang aton edad ukon panglawas, ang matuod nga katahom nagagikan sa pagtigayon sang “kalipay sang GINOO.” (Neh. 8:10) Sa bag-ong kalibutan lamang naton matigayon ang perpekto nga panglawas kag ang katahom sang pagkapamatan-on. (Job 33:25; Isa. 33:24) Samtang wala pa ini, ang praktikal nga kaalam kag pagtuo makabulig sa aton nga magpabilin nga malapit kay Jehova samtang ginahimo naton ang aton masarangan suno sa aton kahimtangan.—1 Tim. 4:8.

KUARTA

11. Paano mangin siod ang kuarta?

11 Ang kuarta indi malain, kag indi man sayop nga mag-entra sa maayo nga negosyo. (Man. 7:12; Luc. 19:12, 13) Pero, ang pagpalambo sang “gugma sa kuarta” magapahilayo gid sa aton kay Jehova. (1 Tim. 6:9, 10) “Ang kabalaka sining sistema,” ukon sobra nga kabalaka sa pagtigayon sang mga kinahanglanon sa kabuhi, makalumos sa aton sa espirituwal. Amo man “ang madaya nga gahom sang manggad,” ukon ang sala nga pagpati nga ang manggad makahatag sing dayon nga kalipay kag kalig-unan. (Mat. 13:22) Gin-athag ni Jesus nga “wala” sing isa nga nagaalagad sa Dios kag sa manggad ang magamadinalag-on.—Mat. 6:24.

12. Ano nga mga siod para makakuarta ang kinaandan subong, kag paano naton ini malikawan?

12 Ang sayop nga pagtamod sa kuarta nagadul-ong sa sala nga mga buhat. (Hulu. 28:20) Ang pila gusto makakuarta gilayon sing daku, gani nagataya sila sa mga sweepstake ukon loto ukon nagaentra sa multilevel nga mga negosyo, kag ginaganyat pa gani ang iban sa kongregasyon. Ang iban naintuan nga magkapital sa isa ka negosyo nga indi mapatihan ang ganansia. Indi pagtuguti nga madaya ka sang kakagod. Mangin maalamon. Masami nga  imposible nga makatigayon gilayon sing daku nga kuarta.

13. Paano ang pagtamod ni Jehova sa kuarta tuhay sa pagtamod sang kalibutan?

13 Kon unahon naton “ang ginharian kag ang iya pagkamatarong,” pakamaayuhon ni Jehova ang aton balanse nga mga panikasog sa pagtigayon sang aton mga kinahanglanon. (Mat. 6:33; Efe. 4:28) Indi niya gusto nga matulugan kita sa mga miting bangod sa sobra nga pagtrabaho ukon mabalaka sa kuarta samtang nagapungko sa Kingdom Hall. Pero madamo sa kalibutan karon ang nagapati nga paagi lamang sa pagkonsentrar sa pagtigayon sing kuarta mabaton nila ang matuod nga kalig-unan kag kasulhayan sa ulihi. Ginapalig-on man nila sa ila mga kabataan ang materyalistiko nga mga tulumuron. Ginpakita ni Jesus nga indi makatarunganon ini nga panghunahuna. (Basaha ang Lucas 12:15-21.) Ginapahanumdom sini sa aton si Gehazi, nga naghunahuna nga puede sia mangin makagod kag makapabilin nga may maayo nga kaangtanan kay Jehova.—2 Hari 5:20-27.

14, 15. Ngaa indi kita dapat magsalig sa kuarta para sa kalig-unan? Maghatag sing halimbawa.

14 Ang pila ka agila ginreport nga nalumos bangod gintinguhaan nila nga dagiton ang isda nga indi nila madala. Mahimo man bala matabo sa isa ka Cristiano ang kaanggid sa sini? “Makinot gid ako,” siling sang gulang nga si Alex. “Kon nasobrahan ko bubo ang shampoo, ginabalik ko ang sobra sa suludlan.” Pero nasiod si Alex sa isa ka sahi sang negosyo, kay abi niya puede niya biyaan sa ulihi ang iya obra kag magpayunir. Gintun-an niya sing maayo ang iya negosyo. Gingamit niya ang iya sinuptan kag naghulam sang kuarta para makaganansia sing daku. Pero napierde ang iya negosyo. “Gusto ko mabawi ang akon kuarta,” siling ni Alex. Naghunahuna sia nga kon ipadayon niya ang iya negosyo, makaganansia gid sia.

15 Sa sulod sang mga binulan, negosyo lang pirme ang ginapamensar ni Alex. Indi na sia makakonsentrar sa espirituwal nga mga butang kag indi na makatulog. Pero wala gid sia makabawi. Naubos ang sinuptan ni Alex kag kinahanglan niya ibaligya ang iya balay. “Grabe nga kasakit ang nahatag ko sa akon pamilya,” siling niya. Pero nakatuon sia sing importante nga leksion. “Narealisar ko nga ang bisan sin-o nga nagasalig sa sistema ni Satanas mapaslawan gid.” (Hulu. 11:28) Huo, ang pagsalig sa aton mga sinuptan, kapital, ukon abilidad sa pagtigayon sing kuarta sa sining sistema pareho lang sa pagsalig sa “dios sining sistema,” si Satanas. (2 Cor. 4:4; 1 Tim. 6:17) Sugod sadto, ginpasimple ni Alex ang iya kabuhi “tungod sa maayong balita.” Nakabulig ini sa iya kag sa iya pamilya nga mangin mas malipayon kag malapit kay Jehova.—Basaha ang Marcos 10:29, 30.

BUGAL

16. Ano ang bugal nga maayo, kag ano ang bugal nga malain?

16 Ang pagpabugal sa husto nga mga butang maayo. Halimbawa, dapat naton pirme ipabugal nga mga Saksi ni Jehova kita. (Jer. 9:24) Ang balanse nga pagtahod sa kaugalingon makabulig sa aton sa paghimo sing maayo nga mga desisyon kag malikawan nga pakanubuon ang aton moral nga mga talaksan. Pero ang sobra nga pagpabalor sa aton mga pagtamod ukon posisyon makapahilayo sa aton kay Jehova.—Sal. 138:6; Roma 12:3.

Sa baylo nga maghingamo sing posisyon sa kongregasyon, magkalipay sa imo ministeryo!!

17, 18. (a) Maghatag sing mga halimbawa sa Biblia sang mapainubuson kag bugalon nga mga tawo. (b) Paano nalikawan sang isa ka utod nga mapahilayo kay Jehova bangod sa bugal?

17 Mabasa sa Biblia ang mga halimbawa sang bugalon kag mapainubuson nga mga tawo. Si Hari David mapainubuson nga nangayo sing panuytoy ni Jehova, kag ginpakamaayo Niya sia. (Sal. 131:1-3) Pero ginpaubos ni Jehova ang bugalon nga mga hari nga sanday Nabocodonosor kag Belsasar. (Dan. 4:30-37; 5:22-30) Sa karon, may mga sitwasyon man nga magatilaw sang aton pagkamapainubuson. Si Ryan, nga 32 anyos nga ministeryal nga alagad, nagsaylo sa bag-o nga kongregasyon. “Ginapaabot ko nga irekomendar ako dayon subong elder,” siling ni Ryan, “pero isa na ka tuig ang nagligad wala gihapon.” Naakig  bala si Ryan ukon naglain ang iya buot kay pamatyag niya wala sia ginatahod sang mga gulang? Nag-untat bala sia sa pagtambong sa mga miting kag gintugutan ang bugal nga magpahilayo sa iya kay Jehova kag sa Iya katawhan? Kon ikaw sa iya sitwasyon, ano ang imo himuon?

18 “Ginbasa ko ang tanan nga makita ko sa aton publikasyon parte sa napaslawan nga mga pagpaabot,” siling ni Ryan. (Hulu. 13:12) “Narealisar ko nga kinahanglan ko mangin mapailubon kag mapainubuson. Dapat ako magpatudlo kay Jehova.” Sa baylo nga unahon ang iya kaugalingon, nagkonsentrar si Ryan sa pag-alagad sa iban—sa kongregasyon kag sa ministeryo. Wala madugay, nagadumala na sia sing mainuswagon nga mga pagtuon sa Biblia. “Sang gintangdo ako nga gulang pagligad sang isa ka tuig kag tunga, nakibot gid ako,” siling niya. “Wala ko na ini ginpamensar kay nalipay gid ako sa akon ministeryo.”—Basaha ang Salmo 37:3, 4.

MAGPABILIN NGA MALAPIT KAY JEHOVA!

19, 20. (a) Paano naton mapat-od nga ang aton mga ginatinguhaan kada adlaw indi magpahilayo sa aton kay Jehova? (b) Kay sin-o mga halimbawa ang mailog naton para makapabilin nga malapit kay Jehova?

19 Ang tanan nga butang nga ginbinagbinag sa sini kag sa nagligad nga artikulo may nagakaigo nga lugar sa aton kabuhi. Ginapabugal naton nga alagad kita ni Jehova. Ang malipayon nga pamilya kag maayo nga panglawas nalakip sa pinakamaayo nga mga regalo ni Jehova. Nahangpan naton nga ang sekular nga trabaho kag kuarta makabulig sa aton nga maaman ang aton mga kinahanglanon. Nahibaluan naton nga ang kalingawan makapaumpaw kag ang teknolohiya mapuslanon. Pero kon ini tanan wala naton ginabutang sa husto nga lugar, wala ginagamit sing balanse, ukon ginatugutan nga magtublag sa aton pagsimba, magapahilayo ini sa aton kay Jehova.

Indi pagtuguti ang bisan ano nga magpahilayo sa imo kay Jehova!

20 Siempre, amo gid sina ang gusto ni Satanas. Pero malikawan mo nga matabo ina sa imo kag sa imo pamilya! (Hulu. 22:3) Magpalapit kay Jehova, kag magpabilin nga suod sa iya. Madamo kita sing mga halimbawa sa Biblia nga makabulig sa aton parte sini. Sanday Enoc kag Noe “naglakat upud sa Dios.” (Gen. 5:22; 6:9) Si Moises “nagpabilin . . . nga mapag-on subong nga nakakita sa Isa nga di-makita.” (Heb. 11:27) Si Jesus padayon nga ginsakdag sang Dios bangod pirme niya ginahimo ang makapahamuot sa iya Amay sa langit. (Juan 8:29) Iluga ang ila mga halimbawa. “Magkasadya kamo pirme. Indi kamo mag-untat sa pagpangamuyo. May kaangtanan sa tanan nga butang magpasalamat kamo.” (1 Tes. 5:16-18) Kag indi pagtuguti ang bisan ano nga magpahilayo sa imo kay Jehova!

^ par. 4 Gin-islan ang mga ngalan.

^ par. 6 Tan-awa ang “Paano Magpadaku sing Responsable nga Kabataan?” sa Oktubre 2011 nga Magmata!

^ par. 7 Tan-awa ang “Lima Ka Paagi Para sa Mas Maayo nga Panglawas” sa Marso 2011 nga Magmata!