Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Disiembre 2012

Kon Paano Mangin Matuod nga Madinalag-on

Kon Paano Mangin Matuod nga Madinalag-on

“Mangin mainuswagon kag madinalag-on ka.”—JOS. 1:8, Ang Pulong sang Dios, APD.

1, 2. (a) Ano ang kadalag-an para sa madamo nga tawo? (b) Ano ang imo talaksan sa kadalag-an?

ANO ang kahulugan sang kadalag-an sa kabuhi? Tilawi nga ipamangkot ina sa mga tawo, kag mabatian mo ang lainlain nga sabat. Halimbawa, para sa madamo ang kadalag-an nagadepende sa ila manggad, propesyon, ukon edukasyon. Ang iban naman nagasiling nga nagadepende ini sa ila kaangtanan sa ila pamilya, mga abyan, ukon katrabaho. Bisan gani ang isa ka alagad sang Dios mahimo magsiling nga madinalag-on sia kon makatigayon sia sing responsibilidad sa kongregasyon ukon kadalag-an sa ministeryo.

2 Para mahibaluan ang imo pagtamod sa kadalag-an, mahimo mo isulat ang ngalan sang pila ka tawo nga ginakabig mo nga madinalag-on, nga ayhan ginadayaw mo gid kag ginatahod. Sa ano sila nakilal-an? Manggaranon bala sila ukon bantog? Prominente bala sila? Ang imo sabat mahimo magpakita kon ano ang ara sa imo tagipusuon, kag may daku ini nga epekto sa imo mga desisyon kag mga tulumuron.—Luc. 6:45.

3. (a) Ano ang dapat himuon ni Josue para mangin madinalag-on? (b) Ano ang binagbinagon naton subong?

3 Ang pinakaimportante amo nga madinalag-on kita sa pagtamod ni Jehova, kay ang aton kabuhi nagadepende sa iya kahamuot. Sang gintugyan ni Jehova kay Josue ang mabug-at nga responsibilidad nga giyahan ang mga Israelinhon pakadto sa Ginsaad nga Duta, ginsilingan ni Jehova si Josue nga basahon “adlaw-gab-i” ang Mosaikong Kasuguan kag tumanon sing bug-os ang nasulat sa sini. Ginpasalig sia sang Dios: “Sa sini nga paagi mangin mainuswagon kag madinalag-on ka.” (Jos. 1:7, 8, APD) Kag nangin madinalag-on gid si Josue. Kamusta kita? Paano naton mahibaluan kon bala ang aton pagtamod sa kadalag-an nahisuno sa pagtamod sang Dios? Para masabat ini, binagbinagon naton ang duha ka tawo nga ginsambit sang Biblia.

 MADINALAG-ON GID BALA SI SOLOMON?

4. Ngaa masiling nga madinalag-on si Solomon?

4 Madamo gid sing kadalag-an nga natigayon si Solomon. Ngaa? Bangod sa sulod sang mga tinuig, nagkahadlok sia kag nagtuman kay Jehova, nga nagpakamaayo gid sa iya. Talupangda nga sang ginpamangkot ni Jehova si Solomon kon ano ang iya pangabayon, nangayo sia sing kaalam para giyahan ang katawhan. Gani ginhatagan sia sang Dios sing kaalam kag manggad. (Basaha ang 1 Hari 3:10-14.) Ang iya kaalam “naglabaw sa kaalam sang tanan nga katawohan sang sidlangan, kag sa tanan nga kaalam sang Egipto.” Si Solomon nangin bantog “sa tanan nga pungsud sa palibut.” (1 Hari 4:30, 31) Kon parte sa iya manggad, nagabaton sia kada tuig sing mga 25 ka tonelada nga bulawan! (2 Cron. 9:13) Maayo gid sia sa diplomasya, pagpanukod, kag pagnegosyo. Huo, nagmadinalag-on gid si Solomon sang ginhuptan niya ang iya maayo nga tindog sa Dios.—2 Cron. 9:22-24.

5. Ano ang ginsiling ni Solomon parte sa mga madinalag-on sa pagtamod sang Dios?

5 Ang ginsulat ni Solomon sa tulun-an sang Manugwali nagapakita nga wala sia nadaya sa paghunahuna nga ang kadalag-an kag kalipay para lamang sa mga manggaranon ukon prominente. Nagsulat sia: “Nahibaloan ko nga wala na sing maayo pa sa ila sang sa magkalipay kag maghimo sing maayo tubtub nga nagakabuhi sila; kag nga ang tagsa ka tawo man magkaon kag mag-inum, kag magpangalipay sing kaayohan sa bug-os niya nga kinabudlayan nga amo ang hatag sang Dios.” (Man. 3:12, 13) Kag narealisar niya nga mangin matuod ini nga kalipay kon ang isa ginakahamut-an sang Dios, kag may maayo nga kaangtanan sa Iya. Nagsiling pa gid si Solomon: “Ini amo ang katapusan sang butang; ang tanan nabatian na. Magkahadluk sa Dios, kag magbantay sa iya mga sogo; kay amo ini ang bug-os nga katungdanan sang tawo.”—Man. 12:13.

6. Ano ang ginatudlo sa aton sang halimbawa ni Solomon parte sa talaksan sang matuod nga kadalag-an?

6 Sa sulod sang mga tinuig, si Solomon nagkahadlok sa Dios. Mabasa naton nga padayon sia nga “naghigugma sa GINOO, nga nagalakat sa mga palatukuran sang iya amay nga si David.” (1 Hari 3:3) Indi bala nga matuod ina nga kadalag-an? Sa panuytoy sang Dios, si Solomon naghimo sing daku nga templo para sa matuod nga pagsimba kag nagsulat sing tatlo ka tulun-an sa Biblia. Bisan indi naton mailog ang iya ginhimo, ang halimbawa ni Solomon sang nangin matutom sia sa Dios dapat maggiya sa aton kon paano usisaon ang matuod nga kadalag-an kag dapat magbulig sa aton nga matigayon ini. Dumdumon naton nga sa panuytoy sang Dios, ginsulat ni Solomon nga wala sing pulos ang ginakabig sang mga tawo karon nga talaksan sa kadalag-an—ang manggad, kaalam, kabantugan, kag gahom. Ini nga mga butang wala sing pulos kag “pagpanikasug sa hangin.” Natalupangdan mo bala nga ang mga nagahigugma sa manggad nagahandum pa gid sing dugang? Kag masami sila nagakabalaka sa mga butang nga ara na sa ila. Isa pa, sa ulihi ang ila manggad makadto lang sa iban.—Basaha ang Manugwali 2:8-11, 17; 5:10-12.

7, 8. Paano nangin indi matutom si Solomon, kag ano ang resulta?

7 Nahibaluan man naton nga sang ulihi si Solomon wala nagpabilin nga matutom. Ang Pulong sang Dios nagsiling: “Sang si [Solomon] tigulang na ang iya mga asawa nagpatalang sang iya tagiposoon sa pagsonod sa iban nga mga dios; kag ang iya tagiposoon indi bug-os sa GINOO nga iya Dios, subong sang tagiposoon ni David nga iya amay. . . . Ginhimo ni [Solomon] ang malaut sa itololok sang GINOO.”—1 Hari 11:4-6.

8 Naakig gid si Jehova, gani ginsilingan niya si Solomon: “Sanglit nga . . . wala mo pagbantayi ang akon katipan kag ang akon mga palatukuran nga ginsogo ko sa imo, sa  pagkamatuud kusniton ko ang ginharian gikan sa imo kag ihatag ini sa imo alagad.” (1 Hari 11:11) Makapasubo gid ini! Bisan pa madamo sing kadalag-an si Solomon, napaakig niya sang ulihi si Jehova. Napaslawan si Solomon sa pinakaimportante nga bahin sang iya kabuhi, nga amo ang pagpabilin nga matutom sa Dios. Ang kada isa sa aton mahimo mamangkot, ‘Determinado bala ako nga iaplikar ang leksion nga akon natun-an sa kabuhi ni Solomon para magmadinalag-on?’

ANG MATUOD NGA KADALAG-AN SA KABUHI

9. Madinalag-on bala si Pablo sa pagtamod sang kalibutan? Ipaathag.

9 Ang kabuhi ni apostol Pablo lain gid kay Hari Solomon. Si Pablo wala sing tiposo nga trono ukon sinalusalo upod sa mga hari. Sa baylo, naeksperiensiahan niya ang kagutom, kauhaw, katugnaw, kag kahubo. (2 Cor. 11:24-27) Sang ginbaton niya si Jesus subong Mesias, ginbiyaan ni Pablo ang iya posisyon sa Judaismo. Gani, naakig sa iya ang mga lider sang relihion. Ginpabilanggo sia, ginlapdusan, ginbunal sang bilugon, kag ginbato. Nagsiling si Pablo nga sia kag ang iya pareho nga Cristiano gintamay, ginhingabot, kag ginpakahuy-an. “Nangin subong kami sang basura sang kalibutan, ang higko sang tanan nga butang, tubtob karon.”—1 Cor. 4:11-13.

Sa pagtamod sang mga tawo, si Saulo daw may maayo nga buas-damlag

10. Ngaa daw ginsikway ni Pablo ang kadalag-an?

10 Si apostol Pablo, nga gintawag Saulo sang pamatan-on pa, daw may maayo nga buas-damlag. Natawo sia sa isa ka prominente nga pamilya, kag nagtuon kay Gamaliel nga isa ka respetado nga manunudlo. Nagsulat sia sang ulihi: “Nag-uswag ako sa Judaismo sing labi pa sangsa madamo nga katubotubo ko.” (Gal. 1:14) Maayo man si Saulo maghambal sing Hebreo kag Griego, kag banwahanon sia sang Roma amo nga may mga pribilehiyo sia kag kinamatarong nga ginahandum sang iban. Kon nagpadayon sia sa sini nga kadalag-an sa kalibutan, mahimo nga kilalahon gid sia kag makatigayon sing pinansial nga kasiguruhan. Pero ginpili niya ang dalanon nga para sa iban—ayhan sa pila niya ka paryente—daw kabuangan. Ngaa?

11. Ano nga mga butang ang ginapabaloran ni Pablo, kag ngaa?

11 Ginahigugma ni Pablo si Jehova kag ginahandum niya ang kahamuot sang Dios sangsa manggad kag kabantugan. Sang natigayon niya ang sibu nga ihibalo sang kamatuoran, ginpabaloran ni Pablo ang gawad, ang Cristianong ministeryo, kag ang paglaum nga mabuhi sa langit—mga butang nga ginabalewala gid sang kalibutan. Nahibaluan ni Pablo ang isyu nga dapat husayon. Nagsiling si Satanas nga masarangan niya patalikdon ang mga tawo sa pag-alagad sa Dios. (Job 1:9-11; 2:3-5) Ano man nga mga pagtilaw ang iya maatubang, determinado si Pablo nga mangin matutom sa Dios kag magpadayon sa matuod nga pagsimba. Amo ini ang tulumuron  nga wala ginabinagbinag sang kalibutan kon parte sa kadalag-an.

Si Pablo nangin matuod nga madinalag-on

12. Ngaa nagalaum kita sa Dios?

12 Pareho man bala kay Pablo ang imo determinasyon? Indi mahapos mangin matutom, pero nakahibalo kita nga magaresulta ini sa pagpakamaayo kag kahamuot ni Jehova, kag amo ini ang sekreto sang matuod nga kadalag-an. (Hulu. 10:22) Makabenepisyo kita subong, kag mapaabot man naton ang mga pagpakamaayo sa palaabuton. (Basaha ang Marcos 10:29, 30.) Gani may rason kita nga maglaum “indi sa wala kapat-uran nga manggad, kundi sa Dios, nga bugana nga nagahatag sa aton sang tanan nga butang agod malipay kita.” ‘Mahalungon kita nga nagatipon para sa aton kaugalingon sang maayo nga sadsaran para sa palaabuton subong aton bahandi, agod makapanguyapot kita sing malig-on sa matuod nga kabuhi.’ (1 Tim. 6:17-19) Makasalig gid kita nga isa ka gatos ka tuig sugod subong, bisan isa ka libo ukon sobra pa, makahinumdom kita kag makasiling, “Ginpili ko gid ang dalanon sang matuod nga kadalag-an!”

DIIN ANG IMO BAHANDI?

13. Ano ang laygay ni Jesus parte sa pagtipon sing mga bahandi?

13 Si Jesus nagsiling parte sa mga bahandi: “Untati ninyo ang pagtipon para sa inyo kaugalingon sing mga bahandi sa duta, diin ang sipit kag tuktok nagapang-ut-ot, kag diin ang mga kawatan nagapangrungkab kag nagapangawat. Sa baylo, magtipon kamo para sa inyo kaugalingon sang mga bahandi sa langit, diin wala sing sipit kag tuktok nga mang-ut-ot, kag diin wala sing mga kawatan nga mangrungkab kag mangawat. Kay kon diin ang imo bahandi, didto man ang imo tagipusuon.”—Mat. 6:19-21.

14. Ngaa indi maalamon nga tinguhaan ang mga bahandi sa duta?

14 Ang bahandi sa duta sang isa mahimo nga indi lang kuarta. Nalakip sa sini ang bisan ano nga butang nga ginsulat ni Solomon parte sa talaksan sang mga tawo sa kadalag-an—impluwensia, kabantugan, ukon gahom. Ginpadaku ni Jesus ang punto nga pareho sa ginsulat ni Solomon sa tulun-an sang Manugwali—ang mga bahandi sa kalibutan indi permanente. Subong sang makita mo karon, ini nga mga bahandi umalagi lang kag madali madula. Si Propesor F. Dale Bruner nagsulat parte sa sina nga mga bahandi: “Kabalo kita nga ang kabantugan nagabulubag-o. Ang ginaidolo sang nagligad nga Sabado laos na paglipas sang tion. Ang kadalag-an sa pinansial karon kapierdihan na sa masunod nga tuig. . . . Ginahigugma [ni Jesus] ang mga tawo. Ginapalig-on niya sila nga likawan ang kapaslawan sa himaya nga madali lang madula. Wala ini nagapadayon. Indi gusto ni Jesus nga mapaslawan ang [iya] mga disipulo. ‘Kada adlaw nagabaliskad ang kahimtangan sang mga ara sa ibabaw.’” Nagapati sa sini ang kalabanan nga tawo, pero madamo sa ila ang wala nagakabuhi suno sa sini. Ikaw man bala?

15. Ano nga kadalag-an ang dapat naton panikasugan?

15 Ang pila ka lider sang relihion nagabantala nga sayop ang pagtinguha sang  kadalag-an kag dapat untatan ang tanan nga panikasog nga magmadinalag-on. Apang talupangda nga wala ginpakamalaut ni Jesus ang tanan nga panikasog. Sa baylo, ginapalig-on niya ang mga disipulo nga bag-uhon ang ila panikasog, nga nagalaygay sa ila nga magtipon sing indi madunot nga “mga bahandi sa langit.” Ang panguna naton nga ginapanikasugan amo ang kadalag-an sa pagtamod ni Jehova. Huo, ginapahanumdom kita ni Jesus nga may pililian kita kon ano ang aton panikasugan. Pero ang matuod, ang ginapanikasugan naton amo ang ara sa aton tagipusuon kag kon ano ang aton ginapabaloran.

16. Sa ano kita makasalig?

16 Kon ara sa aton tagipusuon ang pagpahamuot kay Jehova, makasalig kita nga ihatag niya ang aton mga kinahanglanon. Mahimo tugutan niya nga makaeksperiensia kita sing temporaryo nga kagutom ukon kauhaw, pareho kay apostol Pablo. (1 Cor. 4:11) Pero makasalig kita sa maalamon nga laygay ni Jesus: “Indi gid kamo magkabalaka kag magsiling, ‘Ano ang aton kaunon?’ ukon, ‘Ano ang aton imnon?’ ukon, ‘Ano ang aton ipanapot?’ Kay ini tanan amo ang mga butang nga maukod nga ginatinguhaan nga maagom sang mga pungsod. Bangod nahibaluan sang inyo langitnon nga Amay nga kinahanglan ninyo ini tanan nga butang. Gani, padayon nga pangitaa anay ang ginharian kag ang iya pagkamatarong, kag ini tanan iban pa nga butang idugang sa inyo.”—Mat. 6:31-33.

MANGIN MADINALAG-ON SA PAGTAMOD SANG DIOS

17, 18. (a) Sa ano nabase ang matuod nga kadalag-an? (b) Sa ano wala nabase ang kadalag-an?

17 Amo ini ang punto: Ang aton matuod nga kadalag-an wala nabase sa aton mga hinimuan ukon posisyon sa pagtamod sang kalibutan. Ang matuod nga kadalag-an wala man nabase sa pila ka responsibilidad sa organisasyon sang Dios. Pero ina nga pagpakamaayo mahimo maangot sa matuod nga talaksan para sa kadalag-an—ang aton pagkamatinumanon kag katutom sa Dios, nga nagapasalig sa aton: “Ang ginapangita sa mga tulugyanan amo nga sila masapwan nga matutom.” (1 Cor. 4:2) Kag dapat magpadayon kita nga matutom. Si Jesus nagsiling: “Sia nga nagabatas tubtob sa katapusan amo ang maluwas.” (Mat. 10:22) Indi bala nga ang kaluwasan amo gid ang ebidensia sang kadalag-an?

18 Subong sang nabinagbinag na naton, ang katutom sa Dios wala nabase sa pagkaprominente, edukasyon, manggad, ukon tindog sa katilingban; ukon nagadepende sa kaalam, talento, ukon ikasarang. Ano man ang aton kahimtangan, masarangan naton nga mangin matutom sa Dios. Ang katawhan sang Dios sang unang siglo mga manggaranon kag imol. Para sa mga manggaranon, si Pablo naglaygay sa ila “nga maghimo sang maayo, nga mangin manggaranon sa maayong mga buhat, nga mangin maalwan, handa sa pagpaambit.” Ang mga manggaranon kag imol “makapanguyapot . . . sing malig-on sa matuod nga kabuhi.” (1 Tim. 6:17-19) Amo man sini sa karon. Tanan kita may pareho nga kahigayunan kag responsibilidad: Dapat kita magpabilin nga matutom kag “mangin manggaranon sa maayong mga buhat.” Kon himuon naton ini, mangin madinalag-on kita sa pagtamod sang aton Manunuga kag mangin malipayon kay ginapahamut-an naton sia.—Hulu. 27:11.

19. Kon parte sa kadalag-an, ano ang determinado mo nga himuon?

19 Mahimo nga indi mo makontrol sing bug-os ang imo kahimtangan, pero masarangan mo ini atubangon. Manikasog nga mangin matutom ano man ang imo kahimtangan. Takus gid ini panikasugan. Magsalig nga pakamaayuhon ka ni Jehova sing bugana—karon kag sa walay katubtuban. Indi pagkalimti ang ginsiling ni Jesus sa mga hinaplas: “Pamatud-i nga matutom ka bisan tubtob sa kamatayon, kag ihatag ko sa imo ang korona sang kabuhi.” (Bug. 2:10) Amo gid ini ang matuod nga kadalag-an!