Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) DISIEMBRE 2012

Mag-andam sa mga Disparatis sa Paggamit sang Biblia

Mag-andam sa mga Disparatis sa Paggamit sang Biblia

“ANG pulong sang Dios buhi kag gamhanan.” (Heb. 4:12) Sa sini nga pinamulong, ginpadaku ni apostol Pablo ang gahom sang pulong sang Dios sa pagtandog sa tagipusuon kag pagbag-o sang kabuhi sang isa ka tawo.

Pero, nagburon ang husto nga pagtamod sa gahom sang mensahe sang Biblia sang nagsugod ang gintagna nga apostasya sang napatay ang mga apostoles. (2 Ped. 2:1-3) Sang ulihi, nagapati ang mga lider sang simbahan nga may espiritistiko nga gahom ang Pulong sang Dios. Si Propesor Harry Y. Gamble nagsulat parte sa “paggamit sang Cristianong mga sinulatan sa madyik.” Nagsiling sia nga sang ikatlo nga siglo, ang Amay sang Simbahan nga si Origen nagsiling nga ang “pagpamati sa kahulugan sang sagrado nga mga pulong mahimo makabulig: kon ang mga pinamulong may gahom sa paganong madyik, daw ano pa gid ka gamhanan ang pinamulong sang Dios sa kasulatan.” Si John Chrysostom sang ulihi nga bahin sang ikap-at nga siglo nagsulat nga “ang yawa wala gid nagapalapit sa isa ka balay nga may Ebanghelyo.” Nagsiling man sia nga ginakulintas pa sang iban ang pila ka teksto sang Ebanghelyo subong anting-anting. Si Propesor Gamble nagsiling pa gid nga ang Katoliko nga teologo nga si Augustine “nagapati nga kon magsakit ang ulo sang isa, dapat niya butangan sang Ebanghelyo ni Juan ang idalom sang iya ulunan kon magtulog sia”! Gani ang mga teksto sa Biblia gingamit may kaangtanan sa disparatis. Ginakabig mo bala ang Biblia subong anting-anting, ukon pangpasuerte, nga makaamlig sa imo sa kalainan?

Ayhan ang masami nga sayop sa paggamit sang Biblia amo ang bibliomancy. Ano ini? Nagapatuhoy ini sa palagpat nga pagbukad sang isa ka libro, masami nga Biblia, kag ginabasa ang teksto nga una nga makita sa pagpati nga ini nga pinamulong nagahatag sing giya. Halimbawa, suno kay Propesor Gamble, sang nabatian ni Augustine ang tingog sang isa ka bata sa pihak nga balay nga nagasiling: “Kuhaa kag basaha, kuhaa kag basaha,” ginkabig ni Augustine nga isa yadto ka sugo sang Dios nga buksan ang Biblia kag basahon ang una nga teksto nga iya makita.

May nahibaluan ka bala nga tawo nga sang problemado sia nangamuyo sia sa Dios kag palagpat nga ginbuksan ang Biblia, nga nagapati nga ang una nga teksto nga iya makita makabulig sa pagsolbar sang iya problema? Bisan pa daw maayo ang iya tuyo, indi amo sini ang paagi sang mga Cristiano sa pagpagiya sa Kasulatan.

Ginpasalig ni Jesus ang iya mga disipulo nga mapadala sia sing “manugbulig, ang balaan nga espiritu.” Nagsiling pa sia: “Ini magatudlo sa inyo sang tanan nga butang kag magapahanumdom sa inyo sang tanan nga butang nga ginsiling ko sa inyo.” (Juan 14:26) Sa kabaliskaran, ginapakita sang bibliomancy nga indi na kinahanglan nga may ihibalo ka sa Kasulatan.

Kinaandan na ang bibliomancy kag ang iban pa nga disparatis sa paggamit sang Biblia. Pero ginapakamalaut sang Pulong sang Dios ang pagpamakot pasad sa mga panimad-on. (Lev. 19:26; Deut. 18:9-12; Binu. 19:19) “Ang pulong sang Dios buhi kag gamhanan,” pero kinahanglan nga mangin malantipon kita sa paggamit sini. Ang sibu nga ihibalo sa Biblia, nga wala nagagamit sini sa disparatis, nagapauswag sa kabuhi sang mga tawo. Ang pagtigayon sina nga ihibalo makabulig sa madamo para mangin maayo ang ila paggawi, malikawan ang makahalalit nga pagkabuhi, mapabakod ang relasyon sang pamilya, kag mapauswag ang maayo nga kaangtanan sa Awtor sang Biblia.