Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) NOBIEMBRE 2012

Palambua ang Espiritu sang Pagkamapainubuson

Palambua ang Espiritu sang Pagkamapainubuson

“Sia nga nagagawi nga kubos sa tunga ninyo amo ang labing daku.”—LUC. 9:48.

1, 2. Ano ang ginlaygay ni Jesus sa iya mga apostoles, kag ngaa?

SANG 32 C.E., si Jesus ara sa distrito sang Galilea sang nagbaisay ang pila niya ka apostoles kon sin-o ang labing daku sa ila. Ang manunulat sang Ebanghelyo nga si Lucas nagsiling: “Nagbinaisay sila kon sin-o ang labing daku sa ila. Nahibaluan ni Jesus ang pangatarungan sang ila tagipusuon, gani nagkuha sia sang isa ka bata kag ginpatindog sa tupad niya kag nagsiling sa ila: ‘Ang bisan sin-o nga nagabaton sini nga bata sa akon ngalan nagabaton man sa akon, kag ang bisan sin-o nga nagabaton sa akon nagabaton man sa iya nga nagpadala sa akon. Kay sia nga nagagawi nga kubos sa tunga ninyo amo ang labing daku.’” (Luc. 9:46-48) Mapinasensiahon pero malig-on nga ginpahangop ni Jesus sa mga apostoles nga dapat sila mangin mapainubuson.

2 Ang laygay bala ni Jesus nga mangin kubos ginapakita sang mga Judiyo sang unang siglo? Ukon kabaliskaran ini sa panimuot sang kalabanan sa ila? Ang Theological Dictionary of the New Testament nagkomento parte sa panimuot sang mga tawo sadto: “Sa tagsa ka buluhaton, nagautwas pirme ang pamangkot kon sin-o ang mas daku, kag ang masami nga ginakabalak-an sang kada isa amo ang ila kadungganan.” Ginpalig-on ni Jesus ang mga apostoles nga mangin tuhay sa kalabanan nga tawo.

3. (a) Ano ang buot silingon sang paggawi subong kubos, kag ngaa indi ini mahapos himuon? (b) Ano nga mga pamangkot ang nagautwas parte sa paggawi subong kubos?

3 Ang Griego nga tinaga nga ginbadbad “kubos” nagakahulugan nga ang isa maugdang, mapainubuson, ukon indi salapakon. Gingamit ni Jesus ang isa ka bata agod ipakita sa iya mga apostoles nga dapat sila mangin mapainubuson kag maugdang. Ini nga laygay dapat man sundon sang matuod nga mga Cristiano sa karon. Sa pila ka kahimtangan, mahimo indi mahapos maggawi subong kubos. Bangod sa huyog sang tawo nga magpabugal  mahimo maghandum kita nga mangin prominente. Ang lapnag nga pagpaindis-indis sa karon kag ang espiritu sang kalibutan mahimo mag-impluwensia sa aton nga magpakataas, mangin palaaway, ukon magpamilit sang aton luyag. Ano ang makabulig sa aton nga maggawi subong kubos? Paano ‘ang nagagawi nga kubos sa tunga naton amo ang labing daku’? Sa ano nga mga bahin sang aton kabuhi dapat naton ipakita ang pagkamapainubuson?

“O PAGKADALOM SANG KAMANGGARAN KAG KAALAM KAG IHIBALO SANG DIOS!”

4, 5. Ano ang makabulig sa aton nga mangin mapainubuson? Iilustrar.

4 Ang isa ka paagi nga mapalambo naton ang pagkamapainubuson amo ang paghunahuna kon daw ano ka gamhanan si Jehova kon ipaanggid sa aton. Ang matuod, “wala sing pagtungkad sang iya paghangup.” (Isa. 40:28) Ginsambit ni apostol Pablo ang pila ka bahin sang pagkahalangdon ni Jehova sang nagsulat sia: “O pagkadalom sang kamanggaran kag kaalam kag ihibalo sang Dios! Indi gid mahangpan sing bug-os ang iya mga paghukom kag indi mausoy sing bug-os ang iya mga dalanon!” (Roma 11:33) Matuod gihapon ini nga pinamulong bisan pa nag-uswag na ang ihibalo sang mga tawo parte sa madamo nga butang sugod sang ginsulat ini ni Pablo sang nagligad nga mga 2,000 ka tuig. Bisan madamo kita sing nahibaluan, dapat kita mangin mapainubuson bangod wala sing katapusan ang aton matun-an parte kay Jehova, sa iya mga hilikuton, kag sa iya mga dalanon.

5 Ang pagbaton nga indi naton matungkad ang mga dalanon sang Dios nakabulig kay Leo * nga kabigon ang iya kaugalingon nga kubos. Subong pamatan-on, nawili si Leo sa siensia. Gusto gid niya mahangpan sing bug-os ang uniberso, gani nagtuon sia sing astrophysics kag sang ulihi nakasiling sia: “Narealisar ko sa akon mga pagtuon nga kon basihan lang naton ang mga teoriya sang siensia karon, indi gid mahangpan sang tawo ang uniberso. Gani, nagtuon ako sang abogasiya.” Sang ulihi, si Leo nangin abogado kag dayon nangin hukom. Wala madugay, sia kag ang iya asawa nagtuon sa Biblia upod sa mga Saksi ni Jehova, nagbaton sang kamatuoran, kag nangin dedikado nga mga alagad sang Dios. Ano ang nakabulig kay Leo nga maggawi subong kubos bisan pa mataas ang iya tinun-an? Sia nagsiling, “Narealisar ko nga bisan ano kadamo ang aton nahibaluan parte kay Jehova kag sa uniberso, madamo pa kita sing dapat matun-an.”

6, 7. (a) Anong dalayawon nga halimbawa sang pagkamapainubuson ang ginpakita ni Jehova? (b) Paano ang pagkamapainubuson sang Dios nagahimo sa isa nga “labing daku”?

6 Ang isa pa nga makabulig sa aton nga  mangin mapainubuson amo ang pagdumdom nga si Jehova mismo mapainubuson. Binagbinaga ini: “[Kita] mga masigkamanugpangabudlay sang Dios.” (1 Cor. 3:9) Hunahunaa! Si Jehova, ang pinakagamhanan nga Dios, nagpadungog sa aton paagi sa paghatag sa aton sing kahigayunan sa pagtuman sang aton ministeryo nga nagagamit sang iya Pulong, ang Biblia. Bisan pa nga si Jehova ang nagapatubo sang mga binhi, ginhatag niya sa aton ang hilikuton nga pagtanom kag pagbunyag sa sini. (1 Cor. 3:6, 7) Indi bala dalayawon ini nga halimbawa sang pagkamapainubuson sang Dios? Ang halimbawa ni Jehova sang pagkamapainubuson magapalig-on gid sa aton nga maggawi subong kubos.

7 Ang pagkamapainubuson sang Dios may daku nga epekto sa salmista nga si David. Sia nag-amba kay Jehova: “Ikaw naghatag man sa akon sang taming sang imo kaluwasan, kag ang imo pagpaubus nagpakadaku sa akon.” (2 Sam. 22:36) Nahibaluan ni David nga nakahimo sia sing dalagku nga mga butang sa Israel bangod sang pagkamapainubuson ni Jehova—nga nagaduko ukon nagapaubos sang iya kaugalingon sa pagbulig sa iya. (Sal. 113:5-7) Sa aton bahin, ano bala nga mga kinaiya, ikasarang, kag mga pribilehiyo ang ‘wala naton nabaton’ halin kay Jehova? (1 Cor. 4:7) Ang isa nga nagagawi sing kubos amo ang “labing daku” bangod mangin mas mapuslanon sia nga alagad ni Jehova. (Luc. 9:48) Tan-awon naton kon paano.

‘ANG KUBOS SA TUNGA NINYO AMO ANG LABING DAKU’

8. Paano ang pagkamapainubuson nagaapektar sa aton panimuot sa organisasyon ni Jehova?

8 Ang pagkamapainubuson nagabulig sa aton nga mangin kontento sa organisasyon sang Dios kag magsuportar sa mga kahimusan sang kongregasyon. Halimbawa, binagbinaga ang pamatan-on nga si Petra nga ginpadaku sang Saksi nga mga ginikanan. Luyag niya himuon ang iya gusto amo nga nagbiya sia sa Cristianong kongregasyon. Pagligad sang mga tinuig, nakig-upod sia liwat sa kongregasyon. Malipayon na sia subong sa organisasyon ni Jehova kag luyag na niya suportahan ang mga kahimusan sang kongregasyon. Ngaa nagbag-o ang iya panimuot? “Para mangin kontento kag malipayon sa organisasyon sang Dios,” sulat niya, “ang duha ka pinakaimportante nga kinaiya nga kinahanglan ko mahangpan kag ipakita amo ang pagkamapainubuson kag kaugdang.”

9. Ano ang pagtamod sang mapainubuson nga tawo sa espirituwal nga pagkaon, kag ngaa nagahimo ini sa iya nga mas mapuslanon?

9 Ang mapainubuson nga tawo may tudok nga apresasyon sa mga aman ni Jehova, lakip na sa espirituwal nga pagkaon. Gani, maukod sia nga nagatuon sang Biblia kag palabasa sang Lalantawan kag Magmata! nga mga magasin. Kaangay sang iban nga matutom nga alagad ni Jehova, ginabasa gid niya ang bag-o nga publikasyon antes ini ibutang sa iya librarya. Kon mapainubuson kita kag mainapresyahon paagi sa pagbasa kag pagtuon sang aton mga publikasyon, magauswag kita sa espirituwal, kag gamiton kita ni Jehova sing labi pa sa iya hilikuton.—Heb. 5:13, 14.

10. Paano naton mapakita ang pagkamapainubuson sa kongregasyon?

10 May isa pa ka paagi nga ang nagagawi sing kubos amo ang “labing daku.” Sa tagsa ka kongregasyon, may kalipikado nga mga lalaki nga gintangdo sang balaan nga espiritu subong mga gulang. Nagahimo sila sing mga kahimusan para sa mga miting sa kongregasyon, paggua sa latagon, kag pag-shepherding. Kon mangin mapainubuson kita paagi sa pagsuporta sa sini  nga mga kahimusan, nagabulig kita para sa kalipay, kalinong, kag paghiusa sang kongregasyon. (Basaha ang Hebreo 13:7, 17.) Kon ikaw isa ka gulang ukon ministeryal nga alagad, mapainubuson mo bala nga ginapasalamatan si Jehova sa pagtugyan sa imo sini nga pribilehiyo?

11, 12. Ano nga kinaiya ang nagahimo sa aton nga mas bilidhon sa organisasyon ni Jehova, kag ngaa?

11 Ang nagagawi subong kubos amo ang “labing daku” ukon mas bilidhon sa organisasyon ni Jehova bangod ang pagkamapainubuson nagahimo sa iya nga maayo kag mapuslanon nga alagad sang Dios. Kinahanglan laygayan ni Jesus ang iya mga disipulo nga maggawi subong kubos bangod ang pila sa ila naimpluwensiahan sang lapnag nga panimuot sadto. “Nagbinaisay sila kon sin-o ang labing daku sa ila,” suno sa Lucas 9:46. Ginahunahuna na bala naton nga sa pila ka paagi mas maayo kita sangsa aton masigkatumuluo ukon mas mataas sangsa kalabanan nga tawo? Madamo sa kalibutan ang mga bugalon kag maiyaiyahon. Indi naton sila dapat ilugon. Kon mangin mapainubuson kita kag unahon ang kabubut-on ni Jehova, mangin makapalig-on kita sa aton mga kauturan.

12 Napalig-on gid kita sa laygay ni Jesus nga maggawi subong kubos. Indi bala nga dapat naton tinguhaan nga mangin mapainubuson sa tanan nga bahin sang aton kabuhi? Binagbinagon naton ang tatlo sa sini.

PANIKASUGI NGA MANGIN MAPAINUBUSON

13, 14. Paano ang mag-asawa nagagawi subong kubos, kag ano ang epekto sini sa ila pag-asawahay?

13 Sa pag-asawahay. Madamo sa karon ang interesado lang sa ila mga kinamatarong kag ginainsister nila ini bisan pa matapakan ang kinamatarong sang iban. Pero ang isa nga kubos, ginatuytuyan sang panimuot nga ginpalig-on ni Pablo. Sa iya sulat sa mga taga-Roma, sia nagsiling: “Tinguhaan naton nga himuon ang mga butang nga nagadala sang paghidait kag ang mga butang nga makapabakod sa isa kag isa.” (Roma 14:19) Ang isa nga nagagawi subong kubos nagatinguha nga mangin mahidaiton sa tanan, ilabi na sa iya pinalangga nga tiayon.

14 Halimbawa, mahimo indi pareho ang gusto sang mag-asawa kon parte sa kalingawan. Ayhan luyag sang bana nga magtener lang sa balay kag magbasa sang libro, samtang gusto naman sang asawa nga magkaon sa gua ukon magduaw sa mga abyan. Indi bala mas mahapos para sa asawa nga tahuron ang iya bana kon makita niya nga mapainubuson ini kag ginahatagan sing konsiderasyon ang gusto sang iya asawa? Kag mas higugmaon kag pabaloran sang bana ang iya asawa kon makita niya nga wala sini ginapilit ang iya mga gusto kundi ginabinagbinag man ang luyag sang iya bana! Ang pag-asawahay nagabakod kon ang mag-asawa nagagawi subong kubos.—Basaha ang Filipos 2:1-4.

15, 16. Ano nga panimuot ang ginpalig-on ni David sa Salmo 131, kag paano ini makaapektar sa aton panimuot sa kongregasyon?

15 Sa kongregasyon. Sa kalibutan, luyag sang madamo nga makuha dayon ang ila mga handum. Wala sila sing pasensia kag indi nila luyag maghulat. Kon mapainubuson kita, mas mahapos sa aton nga maghulat kay Jehova. (Basaha ang Salmo 131:1-3.) Ang mga benepisyo sang pagkamapainubuson kag paghulat kay Jehova amo ang kalig-unan kag mga pagpakamaayo, katawhay kag kalipay. Amo nga ginpalig-on  ni David ang mga Israelinhon nga maghulat sing mapailubon sa ila Dios!

16 Mabatyagan mo man ina nga kaumpawan kon mapainubuson ka nga maghulat kay Jehova. (Sal. 42:5) Mahimo “nagatinguha [ka] sa palangakuan sang manugtatap” gani ‘nagahandum ka sang maayo nga buhat.’ (1 Tim. 3:1-7) Siempre, dapat mo tinguhaan nga magpagiya sa balaan nga espiritu agod mapalambo ang mga kinaiya nga kinahanglan para sa isa ka manugtatap. Pero ano abi kon kinahanglan mo pa maghulat sing mas madugay sangsa iban? Ang mapainubuson nga nagahulat sing mapailubon sa pribilehiyo, padayon nga magaalagad kay Jehova sing malipayon bisan ano man nga asaynment ang ihatag sa iya.

17, 18. (a) Ano ang mga benepisyo kon handa kita magpangayo sing pasaylo kag magpatawad sa iban? (b) Ano ang ginalaygay sang Hulubaton 6:1-5?

17 Sa aton pagpakig-angot sa iban. Ang kalabanan nga tawo nabudlayan mangayo sing pasaylo. Pero, ang mga alagad sang Dios nagapakita sing pagkamapainubuson paagi sa pag-aku sang ila mga sala kag pagpangayo sing pasaylo. Handa man sila magpatawad sa iban. Ang bugal nagaresulta sing pagbinahinbahin kag kagamo, pero ang pagpatawad nagapasanyog sing paghidait sa kongregasyon.

18 Dapat man kita ‘magpaubos sa kaugalingon’ paagi sa sinsero nga pagpangayo sing pasaylo, kon indi naton matuman ang isa ka kasugtanan bangod sa indi mapaiway nga kahimtangan. Bisan pa may rason sia nga basulon ang iban, ginabaton sang mapainubuson nga Cristiano nga may kakulangan man sia.—Basaha ang Hulubaton 6:1-5.

19. Ngaa dapat kita magpasalamat sa laygay sang Biblia nga maggawi subong kubos?

19 Nagapasalamat gid kita sa laygay sang Kasulatan nga maggawi subong kubos. Mabudlay ini ipakita kon kaisa, pero ang pagpaanggid sang aton kahimtangan sa aton Manunuga kag ang pag-apresyar sang iya pagkamapainubuson, magapalig-on sa aton nga ipakita ining maayo nga kinaiya. Kon himuon naton ini, mangin mapuslanon kita nga mga alagad ni Jehova. Gani, kabay nga ang kada isa sa aton maggawi subong kubos.

^ par. 5 Gin-islan ang mga ngalan.